Let pour bann Ebre 1:1-14
1 Lontan, Bondye ti koz plizyer fwa avek nou bann zanset atraver bann profet dan diferan fason.
2 Dan nou letan,* Bondye in koz avek nou atraver en Garson ki i’n apwente konman zeritye tou keksoz e atraver ki i’n fer sa lemonn.*
3 I reflekte laglwar Bondye e i resanblans egzakt personnalite Bondye. I gard tou keksoz an egzistans gras a son parol pwisan. Apre ki i’n pirifye nou avek nou pese, i ti asiz lo kote drwat sa Enn Tre O dan lesyel.
4 Vi ki i’n ganny en non pli enportan ki bann lanz, i’n vin pli siperyer ki zot.
5 Par egzanp, avek ki lanz Bondye in deza dir: “Ou menm mon garson e ozordi mon’n vin ou papa”? Ouswa: “Mon pou vin son papa e i pou vin mon garson”?
6 Me konsernan sa letan ler i pou anvoy son Premye Ne ankor enn fwa lo later, i dir: “Ki tou bann lanz Bondye i azenou devan li.”
7 Bondye i osi dir sa lo bann lanz: “I fer son bann lanz vin bann lespri e son bann serviter* en laflanm dife.”
8 Me konsernan son Garson, i dir: “Bondye i ou tronn pour touzour e touzour e ou baton lerwa i baton ladrwatir.*
9 Ou’n kontan ladrwatir e ay lemal. Se pour sa rezon ki Bondye, ou Bondye in devid delwil lo ou pour swazir ou konman lerwa e i’n donn ou plis lazwa ki lezot lerwa.”
10 I osi dir: “O Senyer, o konmansman ou’n fer bann fondasyon later e ou’n fer lesyel avek ou lanmen.
11 Later ek lesyel pou disparet, me ou ou pou reste. Parey en lenz zot pou ize,
12 ou pou ploy zot parey en gran lenz e ou pou sanz zot parey dimoun i sanz lenz. Me ou ou pa pou sanze e ou lavi pa pou zanmen fini.”
13 Me avek ki lanz, i’n deza dir: “Asiz lo mon kote drwat ziska ki mon met ou bann lennmi anba ou lipye”?
14 Pa zot tou zot bann lanz* ki fer en servis sen* e ki’n ganny anvoye pour servi bann ki pou ganny sove?
Bann not
^ Literalman, “a lafen sa letan.”
^ Oubyen “bann lepok, bann sistenm.” Vwar Leksplikasyon bann mo.
^ Oubyen “serviter piblik, minis.”
^ Oubyen “lazistis.”
^ Oubyen “lespri.”
^ Oubyen “servis piblik.”
