Psonm 41:1-13
Pour direkter lanmizik. En sanson David.
41 Ere sa enn ki pran swen avek en malere.Zeova pou delivre li zour maler.
2 Zeova pou protez li e gard li vivan.
Dimoun lo later pou dir ki i ere.Ou pa pou zanmen livre li dan lanmen son bann lennmi.*
3 Zeova pou soutenir li ler i malad lo son lili.Ler i malad ou pou pran swen avek li.*
4 Parski mon ti dir: “O Zeova, demontre labonte anver mwan.
Geri mwan, parski mon’n fer pese kont ou.”
5 Me mon bann lennmi i koz an mal lo mwan e zot dir:
“Kan i pou mor e son non i ganny oubliye?”
6 Si enn parmi zot i vin vwar mwan, i koz manti.
I rod en keksoz mal pour dir lo mwanE apre i al dir sa avek tou dimoun.
7 Tou bann ki ay mwan i koz dousman avek kanmarad.Zot fer konplo pour fer mwan ditor. Zot dir:
8 “En maler in ariv li.Aprezan ki i’n tonm ater, i pa pou lev ankor.”
9 Menm sa dimoun ki ti anpe avek mwan, ki mon ti annan konfyans dan li,Ki ti pe manz mon dipen in vir kont mwan.*
10 Me ou, O Zeova, demontre labonte anver mwan e geri mwanPour ki mon fer zot peye.
11 Koumsa mon pou konnen ki ou kontan mwan:
Ler mon lennmi pa kapab selebre akoz mwan.
12 Me mwan, ou soutenir mwan akoz mon fidelite,Ou pou fer mwan toultan reste avek ou.
13 Ki Zeova, Bondye Izrael i ganny louePour touzour.*
Amenn e Amenn.
Bann not
^ Oubyen “I pa pou les son bann lennmi fer sa ki zot oule avek li.”
^ Oubyen “pou konpletman sanz son lili.”
^ Oubyen “in lev son talon kont mwan.”
^ Oubyen “leternite.”
