LESON 5
Ki plan Bondye pour later?
1. Akoz Bondye ti kree later?
Zeova in donn later avek bann zonm ek fanm. Later i nou landrwa reste. Savedir, premye koup imen, Adan ek Ev pa ti ganny kree pour ranpli lesyel akoz Bondye ti’n deza fini kree bann lanz pour viv dan lesyel. (Zob 38:4, 7) Plito, Bondye ti met sa premye zonm dan en zoli paradi apele zarden Edenn. (Zenez 2:15-17) Zeova ti donn Adan ek son desandans sa posibilite pour viv en lavi gou e eternel lo later.—Lir Psonm 37:29, NWT; 115:16.
O konmansman, zis zarden Edenn ki ti en paradi. Sa premye koup imen ti pou ranpli later avek zot desandans. Avek letan, zot ti pou pran swen avek later antye e fer li vin en paradi. (Zenez 1:28) Later pa pou zanmen ganny detrir. I pou touzour landrwa reste bann imen.—Lir Psonm 104:5.
Get sa video Akoz Bondye in kree later?
2. Akoz later pa en paradi la konmela?
Adan ek Ev ti dezobei Bondye, alor Zeova ti tir zot dan sa zarden. Paradi ti perdi e personn pa’n kapab fer later vin en paradi. Labib i dir: “I les dimoun malonnet pran pouvwar lo later.”—Zob 9:24.—Lir Zenez 3:23, 24.
Eski sa i vedir ki Zeova pa pou zanmen akonpli son plan ki i ti annan pour limanite? Non! Akoz i tou pwisan. I pa zanmen fel. (Izai 45:18) I pou reisi fer limanite viv parey i ti anvi o konmansman.—Lir Psonm 37:11, 34, NWT.
3. Ki mannyer later pou revin en paradi?
Later pou revin en paradi pandan renny Zezi, sa lerwa ki Bondye in apwente. Dan en lager ki apel Armagedon, Zezi avek bann lanz pou detri tou bann lennmi Bondye. Zezi pou anprizonn Satan pour 1,000 an. Pep Bondye pou sirviv sa destriksyon parski Zezi pou gid e protez zot. Zot pou viv pour touzour dan Paradi lo later.—Lir Revelasyon 20:1-3; 21:3, 4.
4. Kan soufrans pou fini?
Kan ki Bondye pou met en lafen avek lemal lo later? Zezi ti koz lo en “siny” ki ti pou ed dimoun rekonnet ki lafen i pros. Bann problenm lemonn pe menas legzistans limanite e sa i montre ki la konmela nou pe viv dan letan lafen sa move lemonn.—Lir Matye 24:3, 7-14, 21, 22.
Zezi i dan lesyel, i pou diriz lo later pandan 1,000 an e retir tou soufrans. (Izai 9:6, 7; 11:9) I pa pou zis en Lerwa, me Zezi pou en Granpret ki pou efas pese tou bann ki kontan Bondye. Alor, atraver Zezi, Bondye pou elimin maladi, lavyeyes ek lanmor.—Lir Izai 25:8; 33:24.
5. Lekel ki pou viv dan Paradi?
Kot Lasal Rwayonm ou pou zwenn bann dimoun ki kontan Bondye e oule aprann plis lo konman pour fer li plezir
Bann dimoun ki obei Bondye pou viv dan Paradi. (1 Zan 2:17) Zezi ti anvoy son bann disip pour rod bann dimoun senser e pour ansenny zot lo konman zot pou ganny laprouvasyon Bondye. Ozordi, Zeova pe met plizyer milyon dimoun pare pour zot viv dan sa Paradi lo later. (Zefanya 2:3) Dan bann Lasal Rwayonm Temwen Zeova, dimoun i aprann konman pour vin bann pli bon msye ek papa e bann pli bon madanm ek manman. Paran ek zanfan i ador Bondye ansanm e zot aprann konman ki sa bon nouvel i benefisye zot.—Lir Mika 4:1-4.
