1. Ki mannyer nou pou benefisye si nou ador Bondye konman fodre?

 ZEOVA i vreman enterese avek nou e i anvi nou benefisye avek son gidans ranpli avek lanmour. Si nou ador li konman fodre, nou pou ere e nou pou evit bokou problenm dan lavi. Nou pou ganny son benediksyon ek son led. (Izai 48:17) Me selman i annan en kantite larelizyon ki dir zot ansenny laverite lo Bondye. Pourtan sa ki zot ansennyen lo Bondye e sa ki i ekspekte nou fer, i vreman diferan avek kanmarad.

2. Ki mannyer nou kapab aprann konman pour ador Zeova konman fodre, e ki legzanp ki ed nou konpran sa?

² Ki mannyer ou pou konnen konman nou devret ador Zeova? Ou pa bezwen etidye e konpar lansennyman tou sa larelizyon ki i annan. Ou bezwen zis aprann sa ki Labib i vreman dir lo vre ladorasyon. Annou pran en legzanp. Dan bokou pei, i annan sa problenm fo biye. Si ou ti ganny demande pour anmas bann fo biye, ki mannyer ou ti pou rekonnet zot? Eski ou ti pou sey rapel ki mannyer sak kalite fo biye i ete? Non. I ti pou pli fer sans si ou ti etidye sa bon biye. Ler ou’n konnen ki mannyer en bon biye i ete, ou ti pou kapab rekonnet en fo biye. I menm parey avek larelizyon. Ler nou rode konman pour rekonnet sa vre larelizyon, nou kapab rekonnet bann fo larelizyon.

3. Ki Zezi ti dir nou bezwen fer pour ganny laprouvasyon Bondye?

 ³ I enportan ki nou ador Zeova mannyer li i oule. Bokou dimoun i krwar Bondye i aksepte tou larelizyon, me Labib pa dir sa. En dimoun pa zis dir i en Kretyen. Zezi ti dir: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel.” Alors pour ganny laprouvasyon Bondye, nou bezwen aprann ki i ekspekte nou fer e fer li. Zezi ti apel bann dimoun ki pa fer lavolonte Bondye bann “ki pratik lemal.” (Matye 7:21-23) Zis parey en fo biye, en fo larelizyon napa okenn valer. Sa ki pli pir ankor, se ki en fo larelizyon i danzere.

4. Ki Zezi ti oule ansennyen par sa de semen, e kote sak semen i anmennen?

⁴ Zeova i donn tou dimoun lo later loportinite pour ganny lavi eternel. Me pour viv pour touzour lo later, nou bezwen ador Bondye konman fodre e viv en fason ki i aksepte la konmela. Malerezman bokou dimoun pa oule fer sa. Se pour sa ki Zezi ti dir: “Antre par laport etrwat! akoz laport i larz, semen i fasil ki anmenn perdisyon, e i annan bokou ki pas par la. Me laport i etrwat, e semen i difisil ki anmenn dan lavi, napa bokou ki trouv li.” (Matye 7:13, 14) Vre larelizyon i anmenn ver lavi. Fo larelizyon i anmenn ver destriksyon. Zeova pa anvi personn ganny detrir. Se pour sa ki i pe donn loportinite dimoun partou pour aprann konsernan li. (2 Pyer 3:9) Alor, nou kapab vreman dir lafason ki nou ador Bondye pou donn nou swa lavi swa lanmor.

5. Ki mannyer nou kapab rekonnet bann ki pratik vre larelizyon?

⁵ Ki mannyer nou kapab trouv sa ‘semen ki anmenn ver lavi’? Zezi ti dir dimoun pou rekonnet vre larelizyon  par fason viv bann dimoun ki pratik li. I ti dir: “Zot a ganny rekonnet par zot fri. . . . En bon pye fri i raport bon fri.” (Matye 7:16, 17) Andotmo, bann dimoun ki pratik vre larelizyon pou ganny rekonnet par zot krwayans ek zot kondwit. Kantmenm zot pa parfe e zot fer fot, an zeneral bann vre adorater Bondye i sey fer lavolonte Bondye. Annou vwar sis mark ki idantifye bann ki pratik vre larelizyon.

6, 7. Ki mannyer bann serviter Bondye i vwar Labib, e ki legzanp Zezi in kite dan sa domenn?

⁶ Bann serviter Bondye i baz zot lansennyman lo Labib. Labib li menm i dir: “Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.” (2 Timote 3:16, 17) Zapot Pol ti ekrir bann konpanyon Kretyen: “Kan nou ti anons zot parol Bondye, zot ti ekoute e aksepte li, non pa konman parol zonm me konman parol Bondye parey i ete.” (1 Tesalonisyen 2:13) Alors, krwayans ek pratik vre larelizyon pa baze lo pwennvi oubyen tradisyon zonm. Zot baze lo Parol enspire Bondye, Labib.

⁷ Zezi Kri in kit en bon legzanp akoz i ti baz son lansennyman lo Parol Bondye. Ler i ti priy avek son Papa dan lesyel, i ti dir: “Ou parol i laverite.” (Zan 17:17) Zezi ti krwar Parol Bondye, e tou sa ki i ti ansennyen ti an akor avek Lekritir. Zezi ti abitye dir: “Dan Lekritir i’n dir.” (Matye 4:4, 7, 10) Apre i ti sit en pasaz dan Labib. Pep Bondye osi pa ansenny zot prop pwennvi. Zot krwar ki Labib i Parol Bondye, e zot baz zot lansennyman lo sa ki i dir.

8. Kwa ki enplike dan ladorasyon Zeova?

⁸ Bann ki pratik vre larelizyon i ador zis Zeova e zot fer lezot konn son non. Zezi ti dir: “Se Senyer [oubyen  Zeova] ou Bondye ki ou devre adore e li tousel ki ou devre servi!” (Matye 4:10) Sa verse ki Zezi ti pe site i Deterononm 6:13 e non Bondye, Zeova, i aparet dan sa verse. Alor bann serviter Bondye i ador zis Zeova. Fer lezot dimoun konn non sa vre Bondye e ki kalite Bondye i ete i form parti zot ladorasyon. Psonm 83:18 i dir: “Ki dimoun i konnen ki ou, ki ou non i Zeova, ou tousel ki Tre O lo later antye.” Zezi in donn legzanp par ed lezot konn non Bondye, parey i ti dir dan son lapriyer: “Mon’n fer tou bann ki ou’n tir dan lemonn e ki ou’n donn mwan, konn ou non.” (Zan 17:6) Ozordi bann vre adorater Bondye i fer parey. Zot fer lezot konn non Bondye, son plan, ek son bann kalite.

9, 10. Dan ki fason bann vre Kretyen i montre lanmour pour kanmarad?

⁹ Pep Bondye i montre lanmour senser pour kanmarad san mazin zot prop lentere. Zezi ti dir: “Dimoun pou war ki zot mon bann disip si zot kontan kanmarad.” (Zan 13:35) Bann premye Kretyen ti annan sa kalite lanmour pour kanmarad. Sa kalite lanmour ki Bondye i oule nou annan i kas tou baryer rasyal, sosyal, e nasyonal. I fer dimoun ini ansanm konman bann vre frer ek ser. (Kolosyen 3:14) Bann dimoun dan fo larelizyon pa kontan kanmarad parey frer. Akoz nou dir sa? Zot touy kanmarad akoz diferans nasyonal oubyen etnik. Bann vre Kretyen pa pran zarm pour al touy zot frer Kretyen oubyen lezot dimoun. Labib i dir: “Dan sa fason, nou kapab disteng zanfan Bondye ek zanfan dyab: tou dimoun ki pa pratik sa ki zis, oubyen ki pa kontan son frer i pa en zanfan Bondye. . . . Nou devre kontan kanmarad. Nou pa devre fer konman Kaen. I ti apartenir a dyab e i ti touy son frer.”—1 Zan 3:10-12; 4:20, 21.

 ¹⁰ Lanmour senser pa zis vedir nou pa touy nou prosen. Bann vre Kretyen i servi zot letan, lenerzi, ek resours pour ed e ankouraz kanmarad. (Ebre 10:24, 25) Zot ed kanmarad dan letan difisil, e zot onnet avek lezot dimoun. Zot vreman aplik sa konsey Labib ki dir: “Annou fer dibyen tou dimoun.”—Galat 6:10.

11. Akoz i enportan pour aksepte Zezi Kri konman sa enn ki Bondye in servi pour sov nou?

¹¹ Bann vre Kretyen i aksepte Zezi Kri konman sa enn ki Bondye in servi pour sov nou. Labib i dir: “Zis limenm ki kapab sov zot, parski napa okenn lot non dan lemonn ki Bondye in donnen par lekel nou kapab ganny sove.” (Akt 4:12) Parey nou ti vwar dan Sapit 5, Zezi ti donn son lavi konman en pri pour liber bann imen obeisan. (Matye 20:28) Deplis, Zezi i sa Lerwa ki Bondye in apwente dan son Rwayonm dan lesyel ki pou diriz later antye. Bondye i ekspekte nou obeir Zezi e aplik son bann lansennyman si nou anvi ganny lavi eternel. Se pour sa ki Labib i dir: “Tou dimoun ki krwar dan son Garson i ganny lavi eternel. Tou dimoun ki pa obei son Garson pa pou war lavi.”—Zan 3:36.

12. Ki savedir pa form parti lemonn?

¹² Bann vre adorater pa form parti lemonn. Letan Zezi ti pe ganny zize devan Pilat, en dirizan Romen, Zezi ti dir: “Mon Rwayonm pa sorti lo sa later.” (Zan 18:36) Nenport pei zot reste, bann vre disip Zezi i sitwayen son Rwayonm dan lesyel. Alors zot pa pran kote dan okenn zafer politik sa lemonn. Zot pa ni pran kote dan okenn konfli sa lemonn. Parkont, si lezot i deside zwenn en parti politik, met kandida pour eleksyon, oubyen vote, bann adorater Zeova pa enterfer avek zot desizyon. Deplis, kantmenm bann vre adorater Bondye  pa pran kote dan bann zafer politik, zot obeir lalwa zot pei. Akoz? Akoz Parol Bondye i demann zot pour “soumet” avek “bann lotorite ki gouvernen.” (Romen 13:1) Kan i annan en konfli ant sa ki Bondye i demande ek sa ki gouvernman i demande, bann vre adorater i swiv legzanp bann zapot, ki ti dir: “Nou devre obei Bondye plito ki zonm.”—Akt 5:29; Mark 12:17.

13. Ki mannyer bann vre disip Zezi i vwar Rwayonm Bondye, e ki sa i fer zot fer?

 ¹³ Bann vre adorater Zeova i prese ki Rwayonm Bondye i sel lespwar pour bann imen. Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Olye ankouraz dimoun pour fye lo zonm pour rezourd zot problenm, bann vre adorater Zeova i fer zot konnen ki Rwayonm Bondye i sel lespwar pour bann imen. (Psonm 146:3) Zezi ti ansenny nou pour priy pour sa gouvernman parfe kan i ti dir: “Ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:10) Parol Bondye ti predir ki sa Rwayonm dan lesyel “pou kraz e met en lafen avek tou sa bann rwayonm [ki la ozordi], e li menm i pou dire pour en letan endefini.”—Danyel 2:44.

14. Dapre ou, ki larelizyon ki annan tou sa mark vre ladorasyon?

¹⁴ Dapre sa ki nou’n fek vwar, demann ou lekor: ‘Ki larelizyon ki baz tou son lansennyman lo Labib e fer lezot konn non Zeova? Ki larelizyon ki montre sa lanmour senser, ki demontre lafwa dan Zezi, ki pa fer parti lemonn, e ki fer konnen Rwayonm Bondye i sel lespwar pour bann imen? Parmi tou sa larelizyon lo later, lekel sa enn ki annan tou sa bann mark?’ Fe i montre klerman ki sa i Temwen Zeova.—Izai 43:10-12.

15. Ki Bondye i ekspekte nou fer apard ki zis krwar i egziste?

¹⁵ Pour fer Bondye plezir, i pa ase zis pour nou krwar dan li. Apre tou, Labib i dir menm bann demon i krwar Bondye i egziste. (Zak 2:19) Me zot pa fer lavolonte Bondye e zot napa son laprouvasyon. Pour ganny laprouvasyon Bondye, nou pa bezwen zis krwar i egziste  me nou bezwen osi fer son lavolonte. Nou bezwen osi debaras nou avek fo larelizyon e aksepte vre ladorasyon.

16. Ki nou devret fer an rapor avek fo larelizyon?

¹⁶ Zapot Pol ti montre ki nou pa devret partisip dan bann fo ladorasyon. I ti ekrir: “‘Sorti parmi zot, e separe avek zot, Senyer i dir. Pa tous okenn keksoz enpir, e mon a resevwar zot.’” (2 Korentyen 6:17; Izai 52:11) Alors bann vre Kretyen i evit okenn keksoz ki annan pour fer avek fo ladorasyon.

17, 18. Lekel “Gran Babilonn,” e akoz nou bezwen “sorti” ladan osito posib?

¹⁷ Labib i montre ki tou kalite fo larelizyon i form parti “Gran Babilonn.” a (Revelasyon 17:5) Sa non i fer nou rapel lavil Babilonn dan letan lontan, kot fo larelizyon ti konmanse apre Deliz dan letan Noe. Plizyer lansennyman ek koutim ki komen dan bann fo larelizyon ozordi ti konmans byen lontan Babilonn. Par egzanp, bann Babilonnyen ti ador trwa bondye ansanm. Ozordi, Trinite i doktrin prensipal dan bokou larelizyon. Me Labib i montre klerman ki i annan zis en sel vre Bondye, Zeova, e ki Zezi Kri i son Garson. (Zan 17:3) Bann Babilonnyen ti osi krwar ki dimoun i annan en nanm imortel ki kontinyen viv apre zot lanmor e i kapab ganny tourmante kekpar. Ozordi, laplipar larelizyon i ansenny sa krwayans nanm oubyen lespri imortel ki kapab soufer dan lanfer.

¹⁸ Vi ki ladorasyon bann Babilonnyen lontan in propaz partou lo later, ozordi i apropriye pour bann fo larelizyon ganny apele Gran Babilonn. Deplis, Bondye in predir ki lafen sa bann fo larelizyon pou ariv en sel kou. (Revelasyon 18:8) Eski ou vwar akoz i enportan ou debaras ou avek tou sa ki annan pour fer avek Gran  Babilonn? Zeova i anvi ou “sorti” dan Gran Babilonn osito posib avan i tro tar.—Revelasyon 18:4.

19. Ki ou pou gannyen ler ou servi Zeova?

¹⁹ Serten dimoun i kapab deside pour inyor ou akoz ou desizyon pour aret pratik fo larelizyon. Me ler ou servi Zeova avek son pep, ou pou ganny plis ki ou’n perdi. Parey bann premye disip Zezi ki ti aret fer lezot keksoz pour swiv li, ou pou ganny bokou frer ek ser spirityel. Ou pou form parti en gran fanmiy mondyal konpoze avek bann vre Kretyen, ki kontan ou senserman. Deplis, ou pou annan sa zoli lespwar pour viv pour touzour dan “lemonn fitir.” (Mark 10:28-30) Petet plitar, bann ki’n rezet ou akoz ou krwayans pou etidye Labib zot osi e vin bann adorater Zeova.

20. Ki lavenir i anmase pour bann ki pratik vre larelizyon?

²⁰ Labib i dir ki byento Bondye pou met en lafen avek sa lemonn mesan e ranplas li avek en nouvo lemonn kot son Rwayonm pou anmenn lazistis. (2 Pyer 3:9, 13) Pa i pou gou pour viv dan en lemonn koumsa! Dan sa nouvo lemonn, pou annan zis en sel larelizyon, sa vre ladorasyon. Pa i pli bon ou pran bann pa neseser konmela menm pour asosye avek bann vre adorater Bondye?