DAN langaz ki Labib ti ganny ekrir orizinalman, i ti servi en mo Ebre sheʼohlʹ ek son ekivalan an Grek haiʹdes plis ki 70 fwa. Tou le de mo i annan pour fer avek lanmor. Serten Labib i tradwir sa de mo konman “latonm,” “lemonn lanmor,” oubyen “lanfer.” Me laplipar langaz napa en mo ki annan menm sans avek sa mo Ebre ek Grek. Se pour sa ki Traduction du monde nouveau i servi sa mo “Seol” ek “Lades.” Ki sa de mo i vedir? Annou vwar ki mannyer zot ganny servi dan diferan pasaz Labib.

Eklezyast 9:10 i dir: “Napa ni travay, ni plan, ni konnesans, ni lasazes dan Seol kot ou pe ale.” Eski sa i vedir ki Seol i sa landrwa kot nou’n anter enn nou bann defen? Non. Ler Labib i koz lo en landrwa kot en dimoun in ganny antere, oubyen en latonm, i servi en lot mo Ebre e en lot mo Grek, pa sheʼohlʹ ek haiʹdes. (Zenez 23:7-9; Matye 28:1) Labib pa ni servi mo “Seol” pour dekrir en latonm kot plizyer dimoun in ganny antere ansanm, parey en latonm fanmiy oubyen en latonm ki’n anter bokou dimoun ansanm.—Zenez 49:30, 31.

Ki kalite landrwa “Seol” pe refer avek alors? Parol Bondye i montre ki “Seol” oubyen “Lades” pa zis en latonm kot en kantite dimoun in ganny antere. Par egzanp dan Izai 5:14 i dir ki Seol in ‘elarzi li e in ouver son labous pli gran ki tou.’ Kantmenm Seol in anval sepa konbyen dimoun mor, i paret ki i toultan anvi plis ankor. (Proverb 30:15, 16) Kontrerman avek en landrwa kot nou anter en dimoun, ki kapab pran zis en serten kantite lekor, ‘Seol pa zanmen satisfe.’ (Proverb 27:20) Savedir Seol pa zanmen plen. I napa limit. Alors, Seol oubyen Lades pa en landrwa fizik kekpar. Plito i en landrwa senbolik kot preski tou dimoun mor pe repoze dan lanmor.

Sa ki Labib i ansennyen lo rezireksyon i ed nou konpran pli byen sinifikasyon “Seol” ek “Lades.” Parol Bondye i dir  bann ki dan Seol ek Lades pou resisite. a (Zob 14:13; Akt 2:31; Revelasyon 20:13) Parol Bondye i osi montre ki bann ki dan Seol, oubyen Lades, i pa zis bann dimoun ki’n servi Zeova me osi sa kantite dimoun ki pa’n servi li. (Zenez 37:35; Psonm 55:15) Se pour sa ki Labib i dir ki “tou dimoun bon konman move, pour resisite.”—Akt 24:15.