1-3. (a) Ki sityasyon difisil Etyenn i fer fas avek e ki i fer? (b) Ki bann kestyon nou pou reponn?

 ETYENN pe debout devan bann ziz ankour. Zot dan en lasal ki enpresyonan ki tre probab pa lwen avek tanp Zerizalenm e i pe debout devan 71 zonm. Ozordi, Sannedren in zwenn ansanm pour ziz Etyenn. Sa bann ziz i annan en kantite pouvwar ek lotorite e laplipar zot napa okenn respe pour sa disip Zezi. Anfet, sa zonm ki’n rasanble sa bann ziz i Granpret Kaif ki ti pe diriz Sannedren ler Sannedren ti kondann Zezi Kri amor detrwa mwan avan. Eski Etyenn i per?

² Dan sa moman, i annan en zoli lekspresyon lo figir Etyenn. Bann ziz i get li e zot vwar ki son figir i “parey figir en lanz.” (Akt 6:15) Bann lanz i anmenn bann mesaz sorti kot Bondye e pour sa rezon zot pa per, zot kalm e anpe. Koumsanmenm Etyenn i santi. Menm sa bann ziz ki ay li en kantite i kapab vwar sa. Ki mannyer i kapab sitan kalm koumsa?

³ Bann Kretyen ozordi i kapab aprann en kantite keksoz avek larepons sa kestyon. Nou osi bezwen konnen akoz Etyenn ti dan sa sityasyon difisil. Ki mannyer i ti defann son lafwa avan sa? Ki mannyer nou kapab swiv son legzanp?

4, 5. (a) Akoz Etyenn ti en gran led pour kongregasyon? (b) Ki mannyer Etyenn “ti annan pwisans ek laprouvasyon Bondye”?

⁴ Nou’n aprann ki Etyenn ti en gran led pour sa kongregasyon Kretyen ki ti’n fek ganny formen. Dan sa sapit avan, nou ti vwar ki i ti parmi sa set zonm ki ti annan limilite ki ti pare pour ed bann zapot. Ler nou mazin lo ki kantite Zeova in beni Etyenn e kantmenm sa i ti kontinyen annan limilite, sa i enpresyonn nou plis ankor. Akt 6:8 i dir ki i ti kapab fer “bann keksoz merveye ek bann mirak” zis parey serten zapot ti fer. Sa verse i osi dir ki i “ti annan pwisans ek laprouvasyon Bondye.” Ki sa i vedir?

 ⁵ Sa mo Grek ki’n ganny tradwir konman “laprouvasyon Bondye” i osi kapab ganny tradwir konman labonte. I evidan ki Etyenn ti en bon dimoun, zantiy e dimoun ti kontan li. Lafason ki i ti koze ti konvenk en kantite dimoun ki ti pe ekout li. Zot ti vwar ki i ti senser e sa ki i ti pe ansenny zot ti pou ed zot. I ti annan pwisans akoz i ti annan limilite e i ti les lespri sen Zeova gid li. Olye fer vantar akoz son bann abilite ki i ti annan, i ti donn tou loner Zeova e i ti montre ki i ti enterese avek sa bann dimoun ki i ti koz avek. I pa drol alor ki son bann lennmi ti vwar li konman en menas!

6-8. (a) Ki sa de keksoz ki bann lennmi Etyenn ti akiz li e akoz? (b) Akoz Etyenn i en bon legzanp pour bann Kretyen ozordi?

⁶ Plizyer zonm ti vini pour fer diskisyon avek Etyenn me “zot pa ti kapab reponn li akoz i ti pe koz avek lasazes ek lespri sen.” a Sa ti fer zot ankoler. Alor, “an sekre zot ti persyad” bann zonm pour akiz sa disip Kris menm si i ti inosan. Zot ti osi “ensit lepep,” bann ansyen ek profeser lalwa e zot ti anmenn Etyenn pardfors devan Sannedren. (Akt 6:9-12) Son bann lennmi ti akiz li pour de keksoz. Zot ti dir ki i ti pe koz kont Bondye e osi kont Moiz. Dan ki fason?

⁷ Sa bann fo temwen ti akiz Etyenn pour koz kont Bondye parski dapre zot, i ti’n koz kont “sa landrwa sen,” setadir sa tanp ki Zerizalenm. (Akt 6:13) Zot ti osi dir ki i ti koz kont Moiz parski dapre zot, i ti’n koz kont Lalwa Moiz e sanz bann koutim Moiz. Sa ti en lofans ki ti vreman serye akoz bann Zwif dan sa letan ti met en gran lanfaz lo tanp, lo bann detay dan Lalwa Moiz e lo bann tradisyon ki zot ti’n azoute dan Lalwa. Alor dapre zot, sa ti vedir ki Etyenn ti en zonm danzere ki ti merit lanmor!

⁸ Malerezman, bann dimoun dan bann larelizyon i fer menm parey pour zot fer problenm pour bann serviter Bondye. Ozordi, parfwa bann larelizyon ki opoz nou i fer bann lotorite gouvernman persekit bann Temwen Zeova. Ki nou devret fer ler dimoun i fer bann fo lakizasyon kont nou? Nou kapab aprann en kantite keksoz avek Etyenn.

9, 10. Ki kritik serten dimoun in fer konsernan diskour Etyenn devan Sannedren e ki nou bezwen gard antet?

⁹ Parey nou’n vwar o konmansman sa sapit, figir Etyenn ti kalm parey figir en lanz, anmezir ki i ti ekout sa bann lakizasyon ki zot ti pe fer kont li. Apre, Kaif ti get li e demann li: “Eski sa bann keksoz i vre?” (Akt 7:1) Aprezan i ti tour Etyenn pour koze e sanmenm sa ki i ti fer!

 ¹⁰ Serten dimoun in kritik diskour Etyenn e zot in dir ki menm si sa diskour ti long, i pa ti reponn sa bann lakizasyon ki zot ti’n fer kont li. Me an realite, Etyenn in kit en bon legzanp pour nou lo ki mannyer “pour defann” sa bon nouvel. (1 Pyer 3:15) Gard antet ki Etyenn ti’n ganny akize pour koz kont Bondye par koz kont tanp e osi pour koz kont Moiz par koz kont Lalwa Moiz. Etyenn ti koz lo trwa peryod letan dan listwar Izrael e i ti met lanfaz lo serten keksoz ki ti arive. Annou vwar sa trwa peryod letan, enn par enn.

11, 12. (a) Ki mannyer Etyenn ti byen servi legzanp Abraam? (b) Akoz Etyenn ti koz lo Zozef dan son diskour?

¹¹ Dan lepok bann patriars. (Akt 7:1-16) Etyenn ti konmans koz lo Abraam. Bann Zwif ti respekte Abraam akoz i ti en dimoun ki ti annan lafwa. Etyenn ti konmans koz lo en size enportan ki zot ti krwar ladan e i ti montre ki Zeova sa “Bondye laglwar” ti aparet avek Abraam pour premye fwa ler i ti Mezopotami. (Akt 7:2) Anfet, i ti en etranze ki ti pe reste dan Later Promiz. I ti napa tanp pour Abraam al ador Bondye laba e i ti napa Lalwa Moiz. Alor ki mannyer en dimoun i kapab ensiste ki i bezwen en tanp oubyen lalwa pour li kapab reste fidel avek Bondye?

¹² Sa bann dimoun ki ti pe ekout Etyenn ti annan en gran respe pour Zozef ki ti en desandans Abraam. Me Etyenn ti fer zot rapel ki bann frer Zozef ki ti bann sef tribi Izrael ti persekit Zozef, en zonm drwat e vann li konman en lesklav. Kantmenm sa, Bondye ti servi li pour sov Izrael ler i ti annan lafanmin. San dout, Etyenn ti kapab vwar ki Zeova ti servi Zozef ek Zezi Kri dan menm fason, me i pa ti fer sa konparezon akoz i ti anvi ki sa bann dimoun i kontinyen ekout li.

13. Ki mannyer sa ki Etyenn ti dir lo Moiz ti reponn sa lakizasyon kont li e ki tenm i ti devlope?

¹³ Dan letan Moiz. (Akt 7:17-43) Etyenn ti koz en kantite lo Moiz e sa ti saz vi ki en kantite ziz dan Sannedren ti bann Sadiseen ki ti rezet tou bann liv Labib eksepte sa bann ki Moiz ti’n ekri. Rapel osi ki Etyenn ti’n ganny akize pour koz kont Moiz. Sa ki Etyenn ti dir ti reponn sa lakizasyon. I ti montre ki i ti annan en gran respe pour Moiz e pour Lalwa. (Akt 7:38)  I ti montre zot ki Moiz osi ti ganny rezete par sa bann ki i ti anvi sove. Zot ti rezet li ler i ti annan 40 an. Plis ki 40 an pli tar, plizyer fwa zot ti kestyonn son fason dirize. b Ptitapti Etyenn ti devlop en tenm enportan. I ti dir ki pep Bondye ti pe kontinyen rezet sa bann ki Zeova in apwente pour diriz zot.

14. Ki pwen Etyenn ti koz lo la dan son diskour ler i ti koz lo legzanp Moiz?

¹⁴ Etyenn ti fer sa bann dimoun ki ti pe ekout li rapel ki Moiz ti predir ki i ti pou annan en profet parey Moiz ki ti pou sorti parmi pep Izrael. Lekel sa profet e ki dimoun ti pou fer ler i vini? Etyenn ti reponn sa bann kestyon ler i ti pros pour fini fer son diskour. I ti koz lo en lot pwen enportan. I ti dir ki Moiz ti’n aprann ki nenport landrwa i kapab vin sen, parey i ti arive dan sa landrwa kot sa brousay ti pe brile ler Zeova ti koz avek li. Alor, eski nou devret ador Zeova zis dan en sel batiman parey sa tanp ki ti Zerizalenm? Annou vwar.

15, 16. (a) Akoz i ti enportan pour Etyenn koz lo tabernak? (b) Ki mannyer Etyenn ti koz lo tanp Salomon dan son diskour?

¹⁵ Tabernak ek tanp. (Akt 7:44-50) Etyenn ti fer sa bann ziz rapel ki avan ki tanp ti ganny konstrir Zerizalenm, Bondye ti’n demann Moiz pour konstri en tabernak kot zot ti pou ador li. Sa tabernak ti parey en latant ki zot ti kapab anmenn avek zot dan diferan landrwa. Personn pa ti kapab dir ki sa tabernak ti annan mwens valer ki tanp, vi ki Moiz li menm ti ador Zeova laba!

¹⁶ Pli tar, ler Salomon ti konstri tanp Zerizalenm, Bondye ti enspir li pour fer bann dimoun aprann en keksoz enportan ler i ti pe fer son lapriyer. Parey Etyenn ti dir, “Bondye Tre O pa reste dan lakaz ki’n ganny fer par zonm.” (Akt 7:48; 2 Kron. 6:18) Zeova i kapab servi en tanp pour akonpli son plan, me i pa servi zis tanp pour akonpli son plan. Alor, bann dimoun ki ador li pa krwar ki ladorasyon pir i devret ganny fer zis dan en batiman ki imen in fer! Finalman, Etyenn ti servi bann verse dan liv Izai pour fer en bon konklizyon. I ti dir: “Zeova i dir, Lesyel i mon tronn e later i mon marspye. Ki kalite lakaz ou kapab konstri pour mwan? Ouswa kote mon pou reste? Pa mwan ki’n fer tou keksoz?”​—Akt 7:49, 50; Iza. 66:1, 2.

17. (a) Ki mannyer diskour Etyenn ti montre ki sa bann ki ti pe ekout li ti annan en move latitid? (b) Ki mannyer diskour Etyenn ti reponn bann lakizasyon kont li?

¹⁷ Ler ou reflesir lo diskour Etyenn devan Sannedren ziska aprezan, pa ou pou dakor ki i ti vreman fer kler ki sa bann ki’n akiz li ti annan en move latitid? I ti montre ki Zeova pe kontinyen akonpli son plan ptitapti e i pa depan lo bann tradisyon. Sa bann ki ti met en gran  lenportans lo sa zoli tanp ki ti Zerizalenm e lo bann koutim ek tradisyon ki zot ti’n azoute avek Lalwa Moiz pa ti vreman konpran bi sa Lalwa ek sa tanp! Dan en sans, Etyenn ti demann sa kestyon enportan dan son diskour: ‘Eski pa ou onor Lalwa ek tanp pli byen ler ou obei Zeova?’ Vreman, sa ki Etyenn ti dir ti defann son aksyon akoz i ti fer tou sa ki i ti kapab pour obei Zeova.

18. Ki mannyer nou kapab swiv legzanp Etyenn?

¹⁸ Ki nou kapab aprann avek diskour Etyenn? Etyenn ti konn byen Lekritir. Nou osi nou bezwen etidye byen Parol Bondye pour nou kapab “servi byen parol laverite.” (2 Tim. 2:15) En lot keksoz ki nou kapab aprann avek diskour Etyenn, i ki nou bezwen koz byen avek bann dimoun e nou devret annan bon zizman. Sa bann dimoun ki ti pe ekout Etyenn ti vreman opoz li! Me kantmenm sa, i ti fer tou sa ki i ti kapab pour koz lo bann keksoz ki zot osi zot ti krwar ladan e ki ti vreman enportan pour zot. I ti osi koz avek zot avek respe, i ti apel bann zonm aze “ansyen.” (Akt 7:2) Nou osi nou bezwen koz lo laverite ki dan Parol Bondye avek “ladouser ek bokou respe.”​—1 Pyer 3:15.

19. Ki mannyer Etyenn ti anons mesaz zizman Zeova avek kouraz devan Sannedren?

¹⁹ Par kont, nou pa devret ezite pour partaz bann laverite ki dan Parol Bondye akoz nou per pour ofans dimoun, ni esey fer krwar ki sa mesaz zizman Zeova pa sitan serye. Etyenn i en bon legzanp. San dout, i ti vwar ki tou sa levidans ki i ti’n koz lo la devan Sannedren ti napa okenn lefe lo sa bann ziz ki ti annan leker dir. Alor, avek led lespri sen, i ti fini son diskour avek kouraz e i ti dir zot ki zot ti zis parey zot bann zanset ki ti rezet Zozef, Moiz ek tou bann profet. (Akt 7:51-53) Anfet, sa bann ziz dan Sannedren ti’n touy Mesi, sa enn ki Moiz ek tou bann profet ti’n predir pour vini. Vreman, zot in dezobei Lalwa Moiz dan sa pli move fason posib!

20, 21. Ki Sannedren ti fer ler zot ti tann sa ki Etyenn ti’n dir e ki mannyer Zeova ti ankouraz Etyenn?

²⁰ Sa bann ziz ti ankoler akoz sa ki Etyenn ti pe dir ti laverite. Zot ti nepli kapab tenir zot lakoler e zot ti anvi fer Etyenn dimal. Sa zonm fidel ti kapab vwar ki zot pa ti pou pran pitye pour li, zis parey zot pa ti pran pitye pour son Met, Zezi.

²¹ Etyenn ti bezwen annan kouraz pour andir sa ki ti pe al arive avek li e san dout, i ti ganny ankouraze en kantite ler Zeova ti fer li ganny en vizyon. Etyenn ti vwar laglwar Bondye e i ti vwar Zezi pe debout lo kote drwat Son Papa! Anmezir ki Etyenn ti dir zot sa vizyon, sa bann ziz ti bous zot zorey. Akoz zot ti fer sa? En pe letan avan, Zezi ti’n dir sa  menm lakour ki i ti Mesi e ki byento i ti pou lo kote drwat son Papa. (Mark 14:62) Sa vizyon ki Etyenn ti gannyen ti prouve ki Zezi ti’n koz laverite. Anfet, sa Sannedren ti’n trai Mesi e touy li! Zot tou zot ti sot lo Etyenn e zot ti saboul li avek ros pour touy li. c

22, 23. Ki mannyer Etyenn ti mor parey son Met ti mor e ki mannyer bann Kretyen ozordi i kapab annan menm konfyans ki Etyenn ti annan?

²² Etyenn ti mor dan menm fason ki son Met ti mor. I ti mor anpe, i ti annan konfyans dan Zeova e i ti pardonn sa bann ki ti pe touy li. I ti dir: “Senyer Zezi, pran mon lavi.” Petet i ti dir sa akoz i ti ankor pe vwar sa vizyon kot Garson zonm ti avek Son Papa. San dout, Etyenn ti konn bann parol ankourazan ki Zezi ti dir. Zezi ti dir: “Mwan menm rezireksyon ek lavi.” (Zan 11:25) Finalman, Etyenn ti priy Zeova byen for e i ti dir: “Zeova, pa kondann zot pour sa pese.” Apre ki i ti’n dir sa, i ti mor.​—Akt 7:59, 60.

²³ Etyenn ti sa premye disip Zezi ki ti soufer akoz son krwayans. (Vwar sa bwat “ Dan ki sans ‘en dimoun i soufer akoz son krwayans’?”) Malerezman, i pa ti pou sa dernyen dimoun ki ti pou mor pour son lafwa. Ziska ozordi, dimoun dan bann larelizyon, dimoun dan politik ek lezot ki opoz nou, in touy serten serviter fidel Zeova. Kantmenm sa, nou annan menm konfyans ki Etyenn ti annan. Aprezan, Zezi pe dirize konman Lerwa e son Papa in donn li en kantite pouvwar. Napa nanryen ki pou anpes li resisit son bann disip ki fidel.​—Zan 5:28, 29.

24. Ki Sol ti fer ler Etyenn ti ganny touye e ki lefe lanmor sa zonm fidel i annan?

²⁴ En zonm ki ti apel Sol ti pe get sa ki ti pe pase. I ti dakor pour Etyenn ganny touye e i ti menm vey lenz sa bann dimoun ki ti pe saboul Etyenn avek ros. Pa bokou letan apre, i ti diriz bann persekisyon ki ti vyolan e kriyel. Me lanmor Etyenn ti pou annan en lefe pozitif pour en kantite letan. Son legzanp ti pou ankouraz lezot Kretyen pour reste fidel pour zot osi reisi. An plis ki sa, Sol ki pli tar ti ganny apele Pol, ti regret en kantite ler i ti mazin sa ki i ti’n fer ler Etyenn ti ganny touye. (Akt 22:20) I ti ede touy Etyenn me pli tar i ti dir: “Mon ti koz an mal lo Bondye, persekit lezot e mon ti arogan.” (1 Tim. 1:13) I kler ki Pol pa ti zanmen oubliy Etyenn ek sa zoli diskour ki i ti fer sa zour. Anfet, ler Pol ti fer son prop diskour e ekri son bann let, i ti servi serten keksoz ki Etyenn ti dir dan son diskour. (Akt 7:48; 17:24; Ebr. 9:24) Pli tar, Pol ti aprann pour reste fidel e pour annan kouraz parey Etyenn, en zonm ki “ti annan pwisans ek laprouvasyon Bondye.” Eski nou pou fer parey nou osi?