1. Akoz nou kapab dir ki tou keksoz i pour Zeova? (Vwar portre o konmansman sa lartik.)

 TOU keksoz i pour Zeova! “Lesyel ek tou sa ki ladan, later osi ek tou sa ki ladan i pour” Zeova. (Deterononm 10:14; Revelasyon 4:11) Vi ki Zeova in kree bann imen, nou tou nou pour li. (Psonm 100:3) Me parmi tou bann dimoun ki’n deza viv, Bondye in swazir serten pour vin pour li dan en fason spesyal.

2. Dapre Labib, lekel ki’n vin pour Zeova dan en fason spesyal?

² Par egzanp, Psonm 135 i dir ki bann adorater fidel Zeova dan letan lontan Izrael ti “son byen personnel.” (Psonm 135:4) Osea osi ti profetize ki serten non Zwif ti pou vin pep Zeova. (Osea 2:23) Sa profesi ti ganny akonplir ler Zeova ti konmans swazir bann dimoun ki pa ti Izraelit pour diriz ansanm avek Kris dan lesyel. (Akt  10:45; Romen 9:23-26) Bann ki ti ganny swazir par lespri sen ti ganny apele “en nasyon sen.” “Zot en pep ki’n vin zis pour” Zeova. (1 Pyer 2:9, 10) Me ki nou pou dir lo bann Kretyen fidel ozordi ki annan lespwar pour viv pour touzour lo later? Zeova i osi apel zot “mon pep” ek “sa bann ki mon’n swazir.”​—Izai 65:22.

3. (a) Lekel ki annan en relasyon spesyal avek Zeova ozordi? (b) Ki nou pou vwar dan sa lartik?

³ Ozordi, sa “pti troupo” ki annan lespwar pour viv pour touzour dan lesyel ek “lezot mouton” ki annan lespwar pour viv pour touzour lo later, zot ador Zeova ansanm konman “en sel troupo.” (Lik 12:32; Zan 10:16) Nou anvi montre Zeova ki nou rekonesan pour annan sa relasyon spesyal avek li. Dan sa lartik, nou pou vwar ki mannyer nou kapab eksprim nou rekonesans anver Zeova pour sa loner spesyal ki i’n donn nou.

4. Ki mannyer nou kapab remersye Zeova pour permet nou annan en relasyon avek li e ki mannyer Zezi ti fer sa?

⁴ Nou demontre nou rekonesans anver Zeova ler nou dedye nou lavi avek li e batize. Apre sa, tou dimoun i kapab vwar ki nou pour Zeova e ki nou pare pour obei li. (Ebre 12:9) Sanmenm sa ki Zezi ti fer ler i ti batize. Menm si i ti deza form parti en nasyon ki ti’n dedye avek Zeova, i ti ofer son lavi avek Zeova. I ti konmsi i ti pe dir: “Mon Bondye! Mon oule fer ou lavolonte.”​—Psonm 40:7, 8.

5, 6. (a) Ki Zeova ti dir ler Zezi ti batize? (b) Ki legzanp ki kapab ed nou konpran lafason ki Zeova i santi konsernan nou dedikasyon?

⁵ Ki mannyer Zeova ti santi ler Zezi ti batize? Labib i dir: “Apre ki i ti’n ganny batize, desito Zezi ti sorti anba delo e la! lesyel ti ouver e i ti vwar lespri sen Bondye parey en kolonm, pe desann lo li. Osi, en lavwa sorti dan lesyel ti dir: ‘Sa i mon Garson ki mon kontan ki mon’n aprouve.’” (Matye 3:16, 17) Zezi ti deza pour Bondye. Me Zeova ti ere ler i ti vwar ki Zezi ti pare pour servi son lavi pour fer zis Son lavolonte. Zeova i osi kontan ler nou dedye nou lavi avek li e i pou beni nou.​—Psonm 149:4.

⁶ Me tou keksoz i deza pour Zeova! Ki nou kapab donn li? Imazin en msye ki annan bann zoli fler dan son zarden. En zour son pti fiy i kas enn sa bann fler e donn li. Menm si sa fler i deza pour sa papa, i vreman kontan sa kado. Sa i montre ki son fiy i kontan li. Sa fler ki son fiy in donn li, i annan plis valer ki tou lezot fler dan son zarden. Dan menm fason, Zeova i kontan ler nou volonterman dedye nou lavi avek li.​—Egzod 34:14.

7. Ki mannyer Malaki i ed nou konpran lafason ki Zeova i santi konsernan bann ki servi li volonterman?

⁷ Lir Malaki 3:16. a (Vwar not.) Akoz i sitan enportan pour dedye ou lavi avek Zeova e batize? I vre ki depi  sa moman ki ou ti vin an egzistans, ou ti deza pour ou Kreater Zeova. Me zis mazinen ki kantite Zeova pou kontan ler ou aksepte li konman ou Dirizan e dedye ou lavi avek li! (Proverb 23:15) Zeova i konn bann ki pare pour servi li e i ekri zot non dan son “liv souvenir.”

8, 9. Ki Zeova i demann bann ki zot non in ekri dan son “liv souvenir”?

⁸ Si nou anvi ki nou non i reste dan “liv souvenir” Zeova, i annan en keksoz nou bezwen fer. Malaki ti dir ki nou bezwen annan respe pour Zeova e medit lo son non. Si nou ador okenn lezot personnaz ouswa lezot keksoz, nou non pou ganny tire dan liv Zeova!​—Egzod 32:33; Psonm 69:28.

⁹ Alor i pa ase pour nou zis promet pour fer lavolonte Zeova e apre batize. I annan serten keksoz ki nou fer zis en fwa, me ador Zeova i en fason viv. Toulezour, tan ki nou ankor vivan, nou devret prouve par nou aksyon ki nou obei Zeova.​—1 Pyer 4:1, 2.

10. Ki gran diferans i bezwen annan ant bann ki servi Zeova ek bann ki pa servi li?

¹⁰ Dan sa lartik avan, nou ti aprann ki Kaen, Salomon ek bann Izraelit ti dir ki zot ador Zeova me zot pa ti fidel anver li. Sa bann legzanp ti montre nou ki i pa ase pour zis dir ki nou ador Zeova. Nou bezwen ay sa ki mal e kontan sa ki byen. (Romen 12:9) Zeova i dir ki i ti pou annan en gran diferans “ant sa enn ki zis ek en malfeter, ant sa enn ki servi Bondye ek sa enn ki pa servi li.”​—Malaki 3:18.

11. Akoz i devret fasil pour tou dimoun vwar ki nou ador zis Zeova?

¹¹ Nou rekonesan anver Zeova pour swazir nou konman son pep! I devret fasil pour tou dimoun vwar ki nou lo kote Zeova. (Matye 5:16; 1 Timote 4:15) Demann ou lekor: ‘Eski lezot i vwar ki mon konpletman fidel anver Zeova? Eski mon fyer pour dir dimoun ki mon en Temwen Zeova?’ Imazinen ki mannyer Zeova ti pou sagren si nou ti onte pour dir lezot ki nou pour li.​—Psonm 119:46; lir Mark 8:38.

12, 13. Ki mannyer serten in fer li difisil pour lezot idantifye zot konman bann Temwen Zeova?

¹² Malerezman, menm serten Temwen i imit “leta lespri lemonn.” Sa i fer ki napa en sitan gran diferans ant zot ek bann ki pa ador Zeova. (1 Korentyen 2:12) “Leta lespri lemonn” i fer dimoun konsantre lo zot dezir egois. (Efezyen 2:3) Par egzanp, malgre tou bann konsey ki nou’n gannyen, serten i swazir pour sanz dan en fason ki pa respektab. Zot met bann lenz ki kole lo zot, ki tro kourt e ki montre tro bokou zot lekor, menm ler zot asiste renyon ek lasanble. Zot osi fer bann  stil seve ki atir tro bokou latansyon lo zot oubyen ki donn lenpresyon ki zot asosye avek en serten group dimoun dan lemonn. (1 Timote 2:9, 10) Sa i kapab fer li difisil pour lezot konnen si zot bann Temwen Zeova oubyen non.​—Zak 4:4.

¹³ I osi annan lezot fason ki serten Temwen pa’n montre ki zot diferan avek lemonn. Par egzanp, dan bann parti, serten in dans e konport zot dan en fason ki pa akseptab pour bann Kretyen. Lezot in met zot portre ek bann komanter lo rezo sosyal ki montre ki zot annan menm fason panse avek dimoun dan lemonn. Petet zot pa’n ganny disiplinen dan kongregasyon Kretyen pour en pese grav, me zot kapab vin en move lenfliyans pour lezot frer ek ser ki pe fer bokou zefor pour vin diferan avek sa lemonn.​—Lir 1 Pyer 2:11, 12.

14. Ki nou bezwen fer pour protez nou lanmitye spesyal avek Zeova?

¹⁴ Tou keksoz dan lemonn in ganny fer dan en fason ki fer nou konsantre lo “dezir lekor enparfe, dezir lizye” e ki fer nou “demonstre akoz [nou] bann keksoz materyel.” (1 Zan 2:16) Nou pour Zeova, alor nou diferan. Nou “rezet bann kondwit ki dezonor Bondye ek bann dezir sa lemonn” e nou “viv dan en fason drwat, avek bon zizman ek devosyon pour Bondye dan sa lemonn, konmela.” (Tit 2:12) Nou fason viv ki enkli nou fason koze, manze, bwar, sanze e travay, i devret fer li kler pour tou dimoun ki nou pour Zeova.​—Lir 1 Korentyen 10:31, 32.

15. Akoz nou devret demontre labonte ek lanmour anver lezot Kretyen?

¹⁵ Nou montre ki nou apresye lanmitye Zeova par lafason ki nou tret nou bann frer ek ser. Zot pour Zeova, zis parey nou nou pour li. Si nou rapel sa, nou pou toultan tret zot avek labonte ek lanmour. (1 Tesalonisyen 5:15) Akoz sa i sitan enportan? Zezi ti dir: “Par sa, tou dimoun pou konnen ki zot mon disip, si zot annan lanmour antre zot.”​—Zan 13:35.

16. Ki nou aprann dan Lalwa Moiz konsernan lanmour Zeova pour son pep?

¹⁶ En legzanp dan Lalwa Moiz i kapab ed nou pour konpran ki mannyer nou devret tret lezot dan kongregasyon. Dan tanp Zeova, i ti annan bann vesel ki ti ganny servi zis pour ladorasyon. Lalwa ti klerman eksplike lafason ki bann Levit ti devret pran swen avek sa bann vesel e okenn dimoun ki pa ti swiv sa bann lenstriksyon ti pou ganny met a mor. (Nonm 1:50, 51) Si Zeova ti sitan enterese lo fason ki dimoun ti tret bann lobze ki ti ganny servi dan son ladorasyon, konbyen plis alor i enterese avek lafason ki dimoun i tret son bann adorater fidel ki’n dedye avek li! I ed nou pour konpran ki kantite valer nou annan pour li ler i ti dir: “Sa ki tous zot, i tous mon kannet lizye.”​—Zekarya 2:8, NWT.

17. Lo kwa ki Zeova pe “port latansyon e ekoute”?

¹⁷ Malaki ti dir ki Zeova ti pe ‘port latansyon e ekout’ lafason ki son pep i tret kanmarad. (Malaki 3:16, NWT)  Zeova “i konn sa bann ki pour li.” (2 Timote 2:19) I konn tre byen tou sa ki nou dir e fer. (Ebre 4:13) Zeova i vwar ler nou pa demontre labonte anver nou bann frer ek ser. Me nou kapab asire ki Zeova i osi vwar ler nou demontre lospitalite ek zenerozite, pare pour pardonnen e demontre labonte.​—Ebre 13:16; 1 Pyer 4:8, 9.

18. Ki mannyer nou kapab remersye Zeova pour swazir nou konman son pep?

¹⁸ Nou anvi montre Zeova ki kantite nou rekonesan ki nou pour li konman son pep. Nou konnen ki ler nou ti dedye nou lavi avek li, sa ti sa pli bon swa ki nou ti’n kapab fer. Menm si nou viv “parmi en zenerasyon ki move e koronpi,” nou touzour kapab “inosan e san okenn repros” e “parey bann lalimyer ki pe briye dan sa lemonn.” (Filipyen 2:15) Alor nou determinen pour evit tou keksoz ki Zeova i deteste. (Zak 4:7) Nou osi kontan e respekte nou bann frer ek ser parski zot osi zot pour Zeova.​—Romen 12:10.

19. Ki mannyer Zeova i rekonpans bann ki pour li?

¹⁹ Labib i promet: “[Zeova] pa pou abandonn son pep.” (Psonm 94:14) Sa i en garanti. Nenport kwa ki arive, Zeova pou avek nou. Menm si nou mor, i pa pou oubliy nou. (Romen 8:38, 39) “Si nou viv, nou viv pour Zeova e si nou mor, nou mor pour Zeova. Alor, ki swa nou viv ouswa nou mor, nou pour Zeova.” (Romen 14:8) Nou pe esper sa letan kot Zeova pou resisit tou son bann zanmi fidel ki’n mor. (Matye 22:32) Menm ozordi nou annan en kantite zoli kado sorti kot nou Papa. Parey Labib i dir, “byennere sa nasyon ki annan [Zeova] koman son Bondye! I byennere sa pep ki SENYER in swazi pour son patrimwann!”​—Psonm 33:12.