BANN LARTIK AVAN i montre ki mannyer diferan problenm ki anmenn bokou douler i kapab fer lavi paret tro difisil. Anmezir ou pe fer fas avek ou problenm, ou kapab mazinen si i vo lapenn kontinyen viv oubyen si i annan en dimoun ki enterese avek ou. Ou kapab asire ki Bondye i vreman enterese avek ou problenm. Ou annan bokou valer pour li.

Sa ekriven ki ti ekrir Psonm 86 ti annan konfyans dan Bondye e i ti dir: “Mon apel ou zour mon dan maler akoz ou reponn mwan.” (Psonm 86:7) Petet ou pe mazinen, ‘ki mannyer Bondye pou reponn mwan ler mon “dan maler”?’

Menm si Bondye pa pou rezourd ou problenm deswit, son Parol, Labib i asir ou ki i kapab donn ou lape lespri pour ed ou fer fas avek ou problenm. Labib i dir: “Pa bezwen trakas pour nanryen, me dan tou sirkonstans, fer Bondye konn zot bann demann dan lapriyer ek siplikasyon ensi ki remersiman e ki lape Bondye ki depas tou sa ki nou kapab konpran i protez zot leker ek zot panse.” (Filipyen 4:6, 7, not) Annou vwar ki mannyer sa bann verse Labib i asir nou ki Bondye i vreman enterese avek nou.

“Napa ni enn [sren] ki Bondye pa remarke. . . Zot annan bokou plis valer ki en kantite sren.”​—Lik 12:6, 7, not.

REFLESIR: Bann pti zwazo parey sren i kapab pa vreman enportan pour bokou dimoun me Bondye i enterese avek zot akoz i vwar sakenn ant zot. Pour Bondye, imen i annan bokou plis valer ki bann sren. Imen i pli enportan parmi tou bann kreasyon ki Bondye in kree lo later. Zot in ganny kree dan son “limaz.” Zot kapab devlop e demontre bann kalite ki i annan.​—Zenez 1:26, 27.

“[O Zeova!] Ou’n egzamin mwan e ou konn mwan. . . . Ou konn tou mon lentansyon . . . Egzamin mwan e ou ava dekouver mon lentansyon.”​—Psonm 139:1, 2, 23.

REFLESIR: Bondye i konn ou personnelman e i konn ou bann santiman pli profon ek sa ki fer ou enkyet. Menm si lezot dimoun pa konpran ou problenm, Bondye i enterese avek ou e i anvi ed ou. Ler ou konn sa, i vo lapenn kontinyen viv.

“[Zeova!] Ekout mon lapriyer. Ekout mon siplikasyon ki mont kot ou. . . . Ekout mwan ler mon apel ou. Pa tarde pour reponn mwan. . . . I pou ekout lapriyer bann ki’n ganny abandonnen.”​—Psonm 102:1, 2, 17.

REFLESIR: Zeova in vwar tou larm ki imen in verse akoz zot soufrans. (Psonm 56:8) Sa i osi enkli ou larm. Bondye i mazin tou ou difikilte ek larm akoz ou annan bokou valer pour li.

“Pa bezwen enkyet, akoz mwan menm ou Bondye. Mon pou rann ou for, mon pou ed ou . . . Mwan menm [Zeova] ou Bondye ki . . . dir ou: Pa bezwen per, mon la pour sekour ou.”​—Izai 41:10, 13.

REFLESIR: Bondye i pare pour ed ou. Si ou tonbe i pou relev ou.

“Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.”​—Zan 3:16.

REFLESIR: Vi ki ou vreman enportan pour Bondye, i ti volonterman donn son garson, Zezi, konman en sakrifis pour ou. Sa sakrifis in fer li posib pour ou viv en lavi ere pour touzour. a