SI EN dimoun ki ou kontan in mor, ou osi ou kapab annan diferan lemosyon. I kapab ki ou sagren, santi ou tousel e ki ou pa kapab fer nanryen. Petet ou osi per, ankoler e menm santi ou koupab. Ou kapab demann ou lekor si i vo lapenn kontinyen viv.

I normal pour ou sagren e parfwa sa sagrinasyon i kapab dire pour en bon pe letan. Sa i montre ki kantite ou ti kontan sa dimoun. Me eski i posib pour ganny en soulazman avek sa sagrinasyon?

Menm si i paret ki sa douler pa pou zanmen fini, ou kapab ganny rekonforte si ou aplik sa bann sizesyon swivan:

DONN OU LEKOR LETAN

Sak dimoun i diferan. I annan ki sagren pour en bon pe letan tandis ki lezot i pran mwens letan. Kantmenm sa, ler ou plere ou kapab ganny serten soulazman. Vanessa ki’n ganny mansyonnen pli boner i dir: “Mon ti zis plere. Mon ti anvi tir sa douler.” Sofia, ki son pti ser ti mor en sel kou i dir: “I vreman fermal pour mazin sa ki’n arive. I konmsi ou pe netway en boubou ki enfekte. I kapab difisil pour siport sa douler me sa i ed sa boubou geri.”

KOZ LO OU BANN SANTIMAN

I normal pour ou anvi reste tousel par ler. Me i vreman difisil pour ou fer fas avek sa sityasyon ou  tousel. Jared ki annan 17 an e ki’n perdi son papa i dir: “Mon ti koz avek lezot lo mon bann santiman. Menm si mon ti rabase, mon ti santi mwan pli byen apre ki mon ti’n koz avek zot.” Janice ki’n ganny mansyonnen dan premye lartik, i osi dir: “Mon ti vreman ganny rekonforte ler mon ti koz avek lezot. Mon ti santi ki zot ti konpran mwan e ki mon pa ti tousel.”

AKSEPTE LED

En dokter i dir: “Ler dimoun ki dan dey i aksepte led sorti kot son fanmir ek zanmi zis apre ki sa dimoun ki i kontan in mor, i pli fasil pour zot fer fas avek sagrinasyon.” Les ou bann zanmi konnen ki zot kapab fer pour ed ou. Petet zot anvi ed ou me zot pa konnen ki mannyer pour fer li.​—Proverb 17:17.

VIN PROS AVEK BONDYE

Tina i dir: “Ler mon msye ti mor en sel kou avek en kanser, mon ti nepli kapab dir li mon bann santiman, problenm ek lenkyetid. Alor, mon ti dir Bondye tou keksoz! Tou le bomaten mon ti demann Bondye pour ed mwan pas sa lazournen. Bondye ti ed mwan plis ki mon ti mazinen.” Tarsha, ki ti annan 22 an ler son manman ti mor i dir: “Lir Labib toulezour ti rekonfort mwan. Sa ti donn mwan en bon keksoz pour mazinen.”

IMAZIN REZIREKSYON

Tina i dir: “O konmansman sa lespwar rezireksyon pa ti rekonfort mwan akoz mon ti ankor bezwen mon msye e mon bann garson ti bezwen zot papa. Me aprezan, kat-r-an pli tar, mon reste atase avek sa lespwar ki parey en lakord ki en dimoun in anvoy avek en lot dan lanmer pour li pa noye. Dan mon lespri mon konnen mon pou vwar mon msye ankor e sa i donn mwan lape lespri ek lazwa!”

I tre probab ki ou pa pou aret sagren deswit. Kantmenm sa, leksperyans Vanessa i kapab rekonfort ou. Vanessa i dir: “Ou krwar ou pa pou zanmen aret sagren me avek letan ou pou santi ou pli byen.”

Gard antet ki menm si ou mank sa dimoun, i ankor vo lapenn kontinyen viv. Avek led Bondye, ou ankor kapab annan bann bon zanmi e annan en lavi ki vo lapenn viv. Tre byento, Bondye pou resisit bann mor. I anvi ki ou zwenn ou bann defen ankor e anmay zot. Apre sa ou pou nepli sagren ankor!