Abakouk, en zonm ki ti annan laprouvasyon Bondye ti demande: “[Zeova]! Ziska kan, mon pou kontinyen kriy osekour me ou pa ekoute? Ziska kan mon pou kriy ver ou kont vyolans?” (Abakouk 1:2, 3) Eski Abakouk ti demann sa bann kestyon akoz i ti napa ase lafwa? Non. Bondye ti reasir Abakouk ki I ti’n fikse en letan pour tir tou soufrans.​—Abakouk 2:2, 3.

Ler ou oubyen enn ou fanmir i soufer, i fasil pour dir ki Bondye pe tarde pour tir nou soufrans oubyen ki i ti’n devret fer en keksoz. Me Labib i asir nou: “Zeova pa tarde pour akonpli son promes, parey serten i panse i tarde, me i pasyan avek zot akoz i pa oule ki personn i ganny detrir, me i oule ki zot tou zot arive repantir.”​—2 Pyer 3:9.

Byento! Zezi ti dir ki en zenerasyon ti pou vwar sa siny ki ti pou montre lafen “sa lemonn.” (Matye 24:3-42) Lefet ki sa profesi pe vin vre dan nou letan, sa i montre ki Bondye i pros pour azir. a

Me ki mannyer Bondye pou tir tou soufrans? Ler Zezi ti lo later, i ti montre ki Bondye i annan sa pouvwar pour soulaz soufrans ki imen pe pas ladan. Annou vwar serten legzanp.

Dezas natirel: Ler Zezi ek son bann zapot ti dan en bato lo Lanmer Galile, en tanpet divan ti pre pour fer zot bato koule. Me Zezi ti montre ki li ek son Papa i annan kontrol lo lanatir. (Kolosyen 1:15, 16) Zezi ti senpleman dir: “Silans! Reste trankil!” Ki ti arive? “Divan ti kalmi e tou keksoz ti vin kalm.”​—Mark 4:35-39.

Maladi: Zezi ti annan sa abilite pour geri dimoun aveg, bwete, bann ki ti ganny bebelouka, lalep e lezot maladi. I ti “geri tou bann ki ti pe soufer.”​—Matye 4:23, 24; 8:16; 11:2-5.

Mankman manze: Zezi ti servi pouvwar ki son Papa ti’n donn li pour fer en pti gin manze vin en kantite. Labib i dir ki de fwa ler i ti lo later, Zezi ti nouri plizyer milye dimoun.​—Matye 14:14-21; 15:32-38.

Lanmor: Ler Zezi ti resisit sa trwa dimoun, i ti montre ki Zeova i annan sa pouvwar pour retir lanmor. Zezi ti menm kapab resisit en dimoun ki ti’n mor pour kat zour.​—Mark 5:35-42; Lik 7:11-16; Zan 11:3-44.