Profet Moiz ti dir ki si nou obei komannman Bondye, nou pou ganny son benediksyon. (Deterononm 10:13; 11:27) Nou pa obei Bondye akoz nou per pangar i a pini nou. Me nou obei li akoz son bann zoli kalite i motiv nou pour kontan li e nou anvi evite fer okenn keksoz ki pour fer li sagren. “Kontan Bondye i vedir obei son bann komannman.”​—1 Zan 5:3.

Ki mannyer nou ganny benediksyon Bondye ler nou obei li? Annou vwar de fason.

“Mwan Zeova, mon ou Bondye, sa Enn ki pe ansenny ou pour ou prop byenfe, . . . ki pe gid ou dan sa semen ki ou devret marse.”​—IZAI 48:17, NWT.

Zeova nou Kreater i konn nou e i gid nou. Si nou anvi ki son lansennyman i ed nou pour fer bann bon desizyon, nou bezwen servi Labib pour aprann sa ki i anvi nou fer e met zot an pratik.

“Ere sa bann ki tann parol Bondye e obei li!”​—LIK 11:28.

Plizyer milyon dimoun ozordi, i santi zot ere ler zot obei Parol Bondye. Par egzanp, annou vwar en msye ki reste Lespanny e ki ti annan en move lakoler. I ti tret lezot dan en fason brit enkli son madanm. En zour i ti lir lo sa ki profet Moiz ti’n dir konsernan bon karakter ki Zozef, garson Zakob ti annan. Zozef ti ganny vann konman lesklav e ganny met dan prizon dan en fason enzis. Kantmenm sa, i ti dous, gard lape e pare pour pardonnen. (Zenez, sapit 37-45) Sa msye ki reste Lespanny i dir: “Ler mon mazin legzanp Zozef, sa ti motiv mwan pour devlop ladouser, labonte ek kontrol lo mon lekor. Sa in fer mwan annan en lavi ere.”

Labib i gid nou lo ki mannyer nou devret tret lezot. Nou pour vwar plis detay dan sa lot lartik.