Zapot Pol i dekrir Zeova a konman sa “Bondye . . . ki donn rekonfor dan tou sityasyon. I rekonfort nou dan tou nou bann leprev.” (2 Korentyen 1:3, 4, NW) Labib i asir nou ki nou Papa ki dan lesyel i kapab ed e rekonfort nenport dimoun, dan nenport ki sityasyon ki nou pas ladan.

Byensir, i annan serten keksoz ki nou bezwen fer si nou anvi Bondye i rekonfort nou. Ki mannyer en dokter i kapab ed nou si nou pa’n deza al vwar li? Profet Amos ti demande: “Eski de zonm i mars ansanm, si zot pa’n tonm dakor avan?” (Amos 3:3) Alor Labib i ankouraz nou: “Apros avek Bondye, e i ava apros avek zot.”​—Zak 4:8.

Akoz nou asire ki Bondye pou vin pros avek nou? Premyerman, akoz i souvan dir nou ki i anvi ed nou. (Vwar  bwat.) Dezyenmman, akoz nou annan laprev ki Bondye in rekonfort bann dimoun dan lepase e osi dan nou letan.

Parey bokou dimoun ozordi ki rod led avek Bondye, Lerwa David osi ti ganny bokou problenm dan son lavi. En zour, sa Lerwa ti sipliy Zeova: “Ekout mon siplikasyon kan mon kriy ver ou.” Eski Bondye ti reponn David? Wi, akoz David li menm ti dir: “I vin sekour mwan.”​—Psonm 28:2, 7.

Bondye ti donn Zezi plizyer travay pour fer e enn parmi ti sa rol enportan pour rekonfort lezot. Zezi ti pou “geri bann leker brize” e “konsol tou sa bann ki dan sagren.” (Izai 61:1, 2) Parey i ti’n ganny predir, Zezi ti annan en lentere senser dan bann dimoun ki ti “fatige [e] anba en fardo.”​—Matye 11:28-30.

Zezi ti tret bann dimoun byen e i ti donn zot bann bon konsey pour rekonfort zot. Par ler, i ti menm geri zot maladi. En zour, en lepre ti sipliy Zezi: “Si ou oule, ou kapab fer mwan vin pir.” Zezi ti pran pitye pour li e i ti reponn: “Mon oule! Ganny pirifye.” (Mark 1:40, 41) Sa lepre ti geri.

Ozordi, Zezi pa lo later pour rekonfort nou personnelman. Me son Papa, Zeova, sa “Bondye  . . . ki donn rekonfor dan tou sityasyon,” pe kontinyen ed bann ki dan bezwen. (2 Korentyen 1:3, NW) Annou vwar kat keksoz ki Bondye i servi pour rekonfort bann dimoun.

• Labib. “Tou sa ki’n ganny ekri dan lepase in ganny ekri pour enstrir nou, pour ki par perseverans ek lankourazman ki Lekritir i donnen, nou posed lesperans.”​—Romen 15:4.

• Lespri sen Bondye. En pe letan apre lanmor Zezi, i ti annan lape dan kongregasyon Kretyen. Akoz? “Zot ti annan en gran respe pour Zeova e zot ti ganny rekonforte par lespri sen.” (Akt 9:31, NW) Lespri sen ki lafors aktif Bondye i vreman pwisan. Bondye i kapab servi son lespri sen pour rekonfort nenport dimoun dan nenport ki sityasyon.

• Lapriyer. Labib i dir: “Pa bezwen enkyet pour nanryen,” me plito “demann Bondye tou sa ki zot bezwen. Alor, lape Bondye ki depas tou disernman imen, ava gard zot leker ek zot lespri ini.”​—Filipyen 4:6, 7.

• Bann frer ek ser Kretyen i kapab vin bann vre zanmi ki nou kapab kont lo la pour rekonfort nou dan bann moman difisil. Zapot Pol ti dekrir son bann konpanyon konman “en gran rekonfor” dan letan “langwas ek . . . soufrans.”​—Kolosyen 4:11; 1 Tesalonisyen 3:7.

Petet ou kapab pe mazinen ki mannyer sa i kapab posib dan lavi toulezour. Annou revwar leksperyans sa bann dimoun ki’n fer fas avek bann problenm ki nou’n koz lo la lo paz 3. Parey zot, ou pou vwar ki Bondye i ankor pe akonpli sa zoli promes ki dir: “Parey en manman i konsol son zanfan, mwan osi mon pou konsol ou.”​—Izai 66:13.