1, 2. Ki difikilte Yifta ek son fiy ti rankontre?

EN ZENN fiy i taye pour al zwenn son papa. I eksite pour vwar ki son papa in tournen sen e sof sorti lager. I sote, sante, danse pour selebre sa gran laviktwar ki son papa in gannyen. Me ler son papa i vwar li i desir son lenz e kriye: “O non! Mon fiy! Ou’n kas mon leker.” Son fiy pa konpran ki pe arive, me apre son papa i eksplik li ki i’n promet Zeova en keksoz ki pou sanz son lavi antye. Sa promes ki i’n fer i vedir ki i pa pou zanmen kapab marye oubyen fer zanfan. Deswit sa fiy i reponn son papa e ankouraz li pour gard sa promes ki i’n fer avek Zeova. Son zoli larepons i montre ki i annan konfyans total dan Zeova e ki nenport kwa ki Zeova i demann li pour fer, i bon. (Ziz 11:34-37) Son papa i get li e vwar son lafwa, i fyer parski i konnen ki Zeova i byen kontan ki son fiy i pare pour gard son promes.

 ² Yifta ek son fiy ti annan konfyans total dan Zeova e dan son fason fer keksoz. Zot ti fidel menm ler i pa ti tro fasil. Zot ti anvi ganny laprouvasyon Zeova e sa ti vo bokou plis ki okenn sakrifis ki zot ti pou bezwen fer.

3. Akoz legzanp Yifta ek son fiy i kapab ed nou ozordi?

³ I pa toultan fasil pour reste fidel avek Zeova. Nou bezwen “lite . . . pour lafwa.” (Zid 3) Alor annou vwar ki mannyer Yifta ek son fiy ti andir bann difikilte e reste fidel avek Zeova. Zot legzanp pou ed nou fer parey.

4, 5. (a) Ki lord Zeova ti donn bann Izraelit ler zot ti antre dan Later Promiz? (b) Dapre Psonm 106, ki ti arive avek bann Izraelit vi ki zot ti’n dezobei Zeova?

⁴ Sak zour ki ti pase Yifta ek son fiy ti pou’n vwar rezilta dezobeisans bann Izraelit anver Zeova. Preski 300 an avan sa, Zeova ti’n donn bann Izraelit lord pour touy tou bann fo adorater dan Later Promiz, me zot pa ti obei. (Deterononm 7:1-4) En kantite Izraelit ti konmans imit bann Kananeen ki ti ador bann fo bondye e anmenn en lavi imoral.​—Lir Psonm 106:34-39.

⁵ Vi ki bann Izraelit ti’n dezobei Zeova, i pa ti protez zot kont zot bann lennmi. (Ziz 2:1-3, 11-15; Psonm 106:40-43) Nou kapab mazinen ki i pa ti fasil pour bann fanmir ki ti kontan Zeova reste fidel pandan sa bann lannen. Kantmenm sa, Labib i dir ki i ti annan bann fidel, tel parey Yifta ek son fiy e Elkana, Ana ek Samyel. Zot ti determinen pour fer Zeova kontan.​—1 Samyel 1:20-28; 2:26.

6. Ki move lenfliyans nou annan ozordi e ki nou bezwen fer?

⁶ Ozordi, dimoun i mazin e fer menm parey bann Kananeen. Zot mazin zis sèks, vyolans ek larzan. Me Zeova i donn nou bann lavertisman kler. Akoz? Parski i anvi protez nou zis parey i ti anvi protez bann Izraelit kont bann move lenfliyans. Eski nou pou aprann avek fot bann Izraelit? (1 Korentyen 10:6-11) Eski nou pou fer tou sa ki nou kapab pour evite adopte fason panse sa lemonn? (Romen 12:2) Ki sakenn ant nou i fer nou mye!

7. (a) Ki pep Yifta ti fer avek li? (b) Ki mannyer Yifta ti reazir?

⁷ Dan letan Yifta, bann Filisten ek Amonit ti servi zot lotorite pour fer bann Izraelit soufer parski zot ti’n dezobei Zeova. (Ziz 10:7, 8) Yifta ti bezwen fer fas avek sa bann nasyon lennmi, me an plis ki sa, i ti annan problenm avek son bann frer ek bann sef Izrael. Son bann frer ti fors li pour kit sa pei ki legalman ti pour li akoz zot ti zalou li e ay li. (Ziz 11:1-3) Me Yifta pa ti les zot  move fason fer gat son latitid. Ki mannyer nou konnen? Be ler bann ansyen sa nasyon ti sipliy li pour vin ed zot, i ti al deswit. (Ziz 11:4-11) Kwa ki ti’n kapab pous Yifta pour reazir koumsa?

8, 9. (a) Petet ki prensip dan Lalwa Moiz ki ti ed Yifta? (b) Kwa ki ti pli enportan pour Yifta?

⁸ Yifta ti en gran gerye e i ti konn listwar Izrael ek Lalwa Moiz tre byen. I ti aprann bann standar Zeova konsernan sa ki byen ek sa ki mal par lafason ki Zeova ti tret son pep. (Ziz 11:12-27) Yifta ti servi tou sa ki i ti’n aprann pour ed li fer bann desizyon. I ti konn tre byen ki mannyer Zeova ti santi konsernan lakoler ek revanz e ki Bondye i anvi ki Son pep i kontan kanmarad. An plis ki sa, Lalwa ti ansenny li ki mannyer pour tret lezot, menm bann ki ti ay li.​—Lir Egzod 23:5; Levitik 19:17, 18.

⁹ Kekfwa legzanp Zozef osi ti’n ed Yifta. I bezwen ki i ti’n tann koz lo Zozef e lafason ki i ti demontre konpasyon anver son bann frer menm si zot ti ay li. (Zenez 37:4; 45:4, 5) Petet ler Yifta ti reflesir lo son legzanp, sa ti ed li pour azir dan en fason akseptab dan lizye Zeova. Definitivman sa ki bann frer Yifta ti fer ti bles li en kantite. Me lager pour defann non Zeova ek son pep ti pas avan santiman Yifta. (Ziz 11:9) I ti determinen pour reste fidel avek Zeova. Sa latitid ki Yifta ti demontre, ti fer li ek bann Izraelit ganny benediksyon Zeova.​—Ebre 11:32, 33.

10. Ki mannyer nou kapab servi bann prensip Bondye pour azir konman bann Kretyen ozordi?

¹⁰ Ki nou aprann avek legzanp Yifta? Ki nou pou fer si nou bann frer ek ser i fer en keksoz ki nou pa ti pe ekspekte oubyen nou santi ki zot tret nou dan en fason ki nou pa kontan? Nou pa devret les nou santiman anpes nou servi Zeova. Pa zanmen aret al renyon oubyen aret pas letan avek bann dan kongregasyon. Annou imit Yifta e obei Zeova. Sa pou ed nou sirmont bann sityasyon difisil e nou osi nou pou kapab vin en bon legzanp.​—Romen 12:20, 21, NW; Kolosyen 3:13.

11, 12. Ki promes Yifta ti fer e ki sa ti vedir?

¹¹ Yifta ti konnen ki san led Bondye i pa ti pou kapab liber bann Izraelit anba dominasyon bann Amonit. Alor i ti promet Zeova ki si I donn li laviktwar, i ti pou donn Li sa premye dimoun ki sorti dan son lakaz ler i sorti lager konman “en lofrann brile.” (Ziz 11:30, 31) Ki savedir sa?

 ¹² Zeova pa kontan ler bann imen i ganny ofer konman sakrifis, alor nou konnen ki Yifta pa ti pe al literalman bril en dimoun. (Deterononm 18:9, 10) Lalwa Moiz ti eksplike ki en lofrann brile ti en kado spesyal ki en dimoun ti donn Zeova konpletman. Alor Yifta ti pe promet ki sa dimoun ki i ti pou donn Zeova ti pou servi kot tabernak pour leres son lavi. Zeova ti ekout Yifta e ed li ranport en laviktwar konplet. (Ziz 11:32, 33) Me lekel ki Yifta ti pou donn Zeova?

13, 14. Ki parol Yifta dan Ziz 11:35 i montre nou konsernan son lafwa?

¹³ Mazin ankor enn fwa lo sa ki nou’n mansyonnen o konmansman sa lartik. Ler Yifta ti retourn kot li sorti lager, premye dimoun pour vin zwenn li ti son fiy, sel piti ki i ti annan! Yifta ti byen kontan son fiy, alor eski i ti pou gard son promes? Eski i ti pou donn son prop fiy pour servi kot tabernak pour leres son lavi?

¹⁴ Ankor enn fwa, bann prensip dan Lalwa Bondye ti ed Yifta pran sa bon desizyon. Petet i ti rapel Egzod 23:19, ki ti dir pep Bondye ki zot devret pare pour donn Zeova zot meyer. Deplis, Lalwa ti dir ki ler en dimoun i fer en promes avek Zeova, “i pa devret kas son promes. I devret fer tou sa ki i’n promet pour fer.” (Nonm 30:2) Zis parey Ana, ki tre probab ti viv menm lepok avek li, Yifta ti bezwen gard son promes, menm si i ti konnen ki sa ti vedir pour li ek son fiy. Son fiy ti pou servi kot tabernak, alor i pa ti pou zanmen fer zanfan. Sa i vedir ki i ti pou  napa personn pour erit non ek later Yifta. (Ziz 11:34) Malgre tousala, Yifta ti fidel e dir: “Mon’n fer en promes avek Zeova e mon pa kapab sanz sa.” (Ziz 11:35) Zeova ti aksepte sa gran sakrifis ki Yifta ti fer e beni li. Si ou ti dan plas Yifta, eski ou ti pou’n fidel parey li?

15. Ki promes bokou nou in fer e ki mannyer nou kapab reste fidel?

¹⁵ Ler nou ti dedye nou lavi avek Zeova, nou ti promet ki nou ti pou toultan fer son lavolonte. Nou ti konnen ki i pa ti pou toultan fasil pour gard sa promes. Me ki nou fer ler nou ganny demande pour fer en keksoz ki nou pa tro kontan? Si nou met nou santiman de kote e pare pour obei Bondye, nou montre ki nou pe gard nou promes. Wi, par ler nou bann sakrifis i kout nou ser, me benediksyon Zeova i toultan annan plis valer. (Malaki 3:10) Me aprezan annou koz lo fiy Yifta, ki mannyer li, i ti reazir anver promes son papa?

16. Ki mannyer fiy Yifta ti reazir anver promes son papa? (Vwar portre lo paz 3.)

¹⁶ Sa promes ki Yifta ti fer ti diferan avek sa enn ki Ana ti fer. Anna ti promet pour donn son garson Samyel konman en Nazireen pour servi kot tabernak. (1 Samyel 1:11) Normalman en Nazireen ti annan drwa marye e fer zanfan. Me fiy Yifta li, i ti ganny donnen konman en “lofrann brile” konplet, alor i pa ti pou zanmen ganny sa lazwa ki en madanm i gannyen ler i marye e fer zanfan. (Ziz 11:37-40) Zis mazin sa! Sa fiy ti’n kapab marye avek sa pli bon msye dan sa pei akoz son papa ki ti sef Izrael. Me la aprezan i ti pou vin en senp pti servant kot tabernak. Ki ou krwar sa zenn fiy ti fer? I ti dir avek son papa: “Fer sa ki ou’n promet pour fer avek mwan.” (Ziz 11:36) I ti montre ki servi Zeova ti pas premye dan son lavi. I ti sakrifye son dezir pour ganny en msye ek zanfan pour li kapab fer sa. Ki  mannyer nou kapab annan menm leta lespri sakrifis avek li?

17. (a) Ki mannyer nou kapab imit lafwa Yifta ek son fiy? (b) Ki mannyer Ebre 6:10-12 i ankouraz ou pour fer sakrifis?

¹⁷ En kantite zenn Kretyen i pare pour fer sa menm sakrifis. Zot swazir pour pa marye oubyen pour pa fer zanfan pour lemoman. Akoz? Parski zot anvi konsantre lo zot servis. I osi annan bokou nou bann frer ek ser aze ki donn zot letan ek lenerzi avek Zeova, olye pas letan avek zot zanfan ek pti zanfan. Serten parmi zot i ede dan konstriksyon oubyen zot al sa Lekol pour bann Predikater Rwayonm e al servi dan en kongregasyon kot i annan plis bezwen. Serten i aranz zot progranm byen davans pour ogmant zot servis pandan letan Memoryal. Zeova pa pou zanmen oubliy sakrifis ki tou sa bann frer ek ser i fer pour demontre zot lanmour. (Lir Ebre 6:10-12.) Me ou? Eski ou kapab fer serten sakrifis pour servi Zeova plis?

18, 19. Ki nou’n aprann atraver sa resi Labib konsernan Yifta ek son fiy e ki mannyer nou kapab imit zot?

¹⁸ Kwa ki ti ed Yifta sirmont tou son bann difikilte? I ti les Zeova gid li dan son bann desizyon. I ti swazir pour pa les bann dimoun otour li enfliyans li. I ti osi reste fidel menm ler lezot ti dezapwent li. Zeova ti beni li ek son fiy pour zot sakrifis ki zot ti fer volonterman e I ti servi zot tou le de pour ed lezot servi li. Menm ler lezot ti aret fer sa ki byen, Yifta ek son fiy ti reste fidel avek Zeova.

¹⁹ Labib i dir: “Imit sa bann ki par lafwa ek pasyans i erit bann promes Bondye.” (Ebre 6:12) Annou imit Yifta ek son fiy parski nou konnen ki ler nou reste fidel, Zeova pou beni nou!