1, 2. (a) Ki lavertisman ki’n sov bokou lavi? (Vwar portre anler.) (b) Ki gidans Bondye i donn son pep ki kapab sov zot lavi?

“ARETE, GETE, EKOUTE.” Sa bann mo pe ganny servi pour plis ki 100 an, lo bann gran lansenny kot bann landrwa pour travers semen tren, dan Nor Lanmerik. Akoz? Zot la pour anpese ki bann transpor ki pe travers semen tren i ganny tape avek tren ki pe pase. Bokou dimoun ki’n port zot latansyon lo sa bann lavertisman in prezerv zot lavi.

² Zeova i donn nou en keksoz pli meyer ki bann lansenny pour protez nou. I gid son pep pour ki zot ganny lavi eternel e reste lwen avek bann danze. Zeova i parey en bon berze ki diriz e averti son bann mouton pour ki zot evit bann semen danzere.​—Lir Izai 30:20, 21. ^[1](Vwar lezot not.)

3. Kwa ki ti met limanite lo en semen ki anmenn ver lanmor?

³ Zeova in touzour donn son pep lenstriksyon spesifik depi o konmansman listwar limanite. Par egzanp, dan zarden Edenn, Zeova ti donn bann lenstriksyon kler ki ti pou gid bann imen pour ganny lavi eternel ek lazwa. (Zenez  2:15-17) Me Adan ek Ev ti rezet gidans zot Papa lanmour. Ev ti ekout en konsey ki ti paret pe ganny donnen par en serpan e apre Adan ti ekout son madanm. Ki ti rezilta? Zot tou le de ti soufer e mor san okenn lespwar. Gras a zot dezobeisans, limanite ti lo en semen ki anmenn ver lanmor.

4. (a) Akoz i ti bezwen annan lezot lenstriksyon apre Deliz? (b) Ler keksoz ti sanze, ki sa ti revele lo panse Zeova?

⁴ Bondye ti donn Noe bann lenstriksyon ki ti sov lavi. Apre Deliz, Zeova ti donn lord bann dimoun pour pa manz oubyen bwar disan. Akoz? Parski aprezan, Zeova ti pou permet imen manz lavyann. Vi ki la keksoz ti’n sanze, zot ti bezwen bann nouvo gidans: “Zis laser avek son lavi, savedir son disan, zot pa devret manze.” (Zenez 9:1-4) Atraver sa lord nou konn pwennvi Bondye lo lavi akoz lavi i sorti kot li. Zeova i Kreater e i donn nou lavi, alor, i annan sa drwa pour donn lord konsernan lavi. Par egzanp, i ti donn lord ki bann imen pa devret touy zot prosen. Lavi ek disan i en keksoz sakre pour Bondye e i pou pini okenn dimoun ki mal servi zot.​—Zenez 9:5, 6.

5. Ki nou pou egzaminen dan sa lartik aprezan e akoz?

⁵ Bondye ti kontinyen gid son pep apre letan Noe. Dan sa lartik, nou pou vwar detrwa legzanp lo ki mannyer i ti gid zot. Sa pou fer nou pli asire ki nou devret swiv lenstriksyon Zeova dan nouvo lemonn.

6. Akoz i ti neseser pour pep Bondye obei bann lalwa ki zot ti gannyen atraver Moiz e ki latitid zot ti bezwen annan?

⁶ Dan letan Moiz, Zeova ti donn son pep bann lenstriksyon kler konsernan zot kondwit ek ladorasyon. Akoz? Bann sirkonstans ti’n sanz ankor. Pour plis ki desan-z-an, bann Izraelit ti reste Lezip konman lesklav kot tou dimoun otour zot ti ador bann mor, servi zidol e fer bokou lezot keksoz ki ti dezonor Bondye. Ler pep Bondye ti ganny libere Lezip, zot ti bezwen nouvo lenstriksyon. Zot ti pou vin en nasyon ki swiv zis Lalwa Zeova. Dapre serten liv referans, sa mo Ebre pour “lalwa” i relye avek en mo ki vedir “diriz, gid, enstrir.” Lalwa ti protez bann Izraelit kont limoralite ek fo larelizyon bann nasyon otour zot. Ler bann Izraelit ti ekout Bondye, zot ti ganny son benediksyon. Ler zot pa ti ekout li, zot ti sibir bann konsekans terib.​—Lir Deterononm 28:1, 2, 15. ^[2](Vwar lezot not.)

7. (a) Eksplike akoz Zeova ti donn lenstriksyon son pep. (b) Ki mannyer Lalwa ti en gardyen pour bann Izraelit?

⁷ I ti annan en lot rezon pour annan bann nouvo lenstriksyon. Lalwa ti prepar bann Izraelit pour larive Mesi, Zezi Kri, ki en levennman enportan dan plan Zeova. Lalwa ti rapel bann Izraelit ki zot ti enparfe. I ti osi ed zot pour konpran ki zot bezwen en ranson, setadir en sakrifis parfe ki ti pou retir zot pese konpletman. (Galat 3:19; Ebre 10:1-10) An plis, Lalwa ti protez desandans Mesi e ed bann Izraelit pour idantifye li letan i ti arive. Wi, Lalwa ti parey en gid tanporer oubyen “gardyen,” ziska ler Kris ti arive.​—Galat 3:23, 24.

8. Akoz bann prensip dan Lalwa Moiz i devret gid nou?

⁸ Konman Kretyen, nou osi nou kapab  benefisye atraver bann lenstriksyon ki Zeova ti donnen dan Lalwa. Dan ki fason? Nou kapab arete e get bann prensip ki Lalwa i baze lo la. Kantmenm nou nepli anba sa bann lalwa, nou touzour kapab kont lo bokou parmi zot pour gid nou dan nou lavi toulezour e pour ador Zeova. Zeova in fer ki sa bann Lalwa in ganny ekrir dan Labib pour ki nou kapab aprann atraver zot, ganny gide par zot bann prensip e vin rekonesan ki Zezi in ansenny nou en keksoz pli gran ki Lalwa. Ekout sa ki Zezi ti dir: “Zot in tande ki i’n ganny dir: ‘Pa komet adilter.’ Me mwan mon dir zot: en dimoun ki get madanm en lot zonm avek dezir in deza komet adilter avek li dan son leker.” Alor nou pa devret zis evit bann aksyon imoral, me nou devret osi rezet okenn panse ek dezir imoral.​—Matye 5:27, 28.

9. Ki bann nouvo sirkonstans ki ti fer nouvo lenstriksyon sorti kot Bondye neseser?

⁹ Apre ki Zezi ti’n vini konman Mesi, Zeova ti donn bann nouvo lenstriksyon e devwal plis detay konsernan son plan. Akoz sa ti neseser? Zeova ti rezet nasyon Izrael lannen 33 e swazir kongregasyon Kretyen pour vin son pep. Alor, bann sirkonstans pep Bondye ti sanz ankor.

10. Akoz bann nouvo lalwa ti ganny donnen avek kongregasyon Kretyen e ki mannyer zot ti diferan avek sa bann ki ti ganny donnen avek bann Izraelit?

¹⁰ Zeova ti’n donn Lalwa Moiz avek bann Izraelit pour ansenny zot lo ki mannyer pour viv e ador li. Apartir premye syek, pep Bondye ti nepli sorti dan en sel nasyon me dan plizyer nasyon ek kiltir e zot ti ganny apele Izrael spirityel. Zot ti form kongregasyon Kretyen e zot ti anba en nouvo lalyans. Zeova ti donn zot bann nouvo lenstriksyon oubyen plis lenformasyon lo ki mannyer pour viv e ador li. Sa i montre ki “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) Zot ti swiv “lalwa Kris,” ki ti baze sirtou lo bann prensip ki pa ti’n ganny ekrir lo ros, me lo zot leker. Sa lalwa ti pou gid e anmenn byenfe pour bann Kretyen nenport landrwa zot reste.​—Galat 6:2.

11. Nonm de laspe dan lavi Kretyen ki “lalwa Kris” ti pou annan en lefe lo la?

¹¹ Izrael spirityel ti ganny bokou byenfe anba gidans Zeova atraver Zezi. Zis avan Zezi ti entrodwi sa nouvo lalyans, i ti donn de komannman enportan. Enn ti konsernan sa travay predikasyon. Sa lot ti konsernan lafason ki bann Kretyen i devret azir e tret kanmarad. Sa bann lenstriksyon ti pour tou bann Kretyen, alor zot aplik pour nou tou ozordi, ki swa nou annan lespwar pour viv pour touzour dan lesyel oubyen lo later.

12. Kwa ki ti nouvo konsernan sa travay predikasyon?

¹² Dan lepase, dimoun dan lezot nasyon ti bezwen vin an Izrael pour servi Zeova. (1 Lerwa 8:41-43) Me apre Zezi ti donn sa lord ki nou trouve dan Matye 28:19, 20. (Lir.) Zezi ti dir avek son bann disip ‘al’ kot tou pep. Zour Lapannkot lannen 33, Zeova ti montre ki i ti anvi ki bon nouvel i ganny prese partou dan lemonn. Sa zour, apepre 120  manm sa nouvo kongregasyon ti ranpli avek lespri sen e zot ti konmans koz dan diferan langaz avek bann Zwif ek bann ki’n aksepte larelizyon Zwif. (Akt 2:4-11) Apre sa, zot teritwar ti agrandi e zot ti pres avek bann Samariten. Pli tar, dan lannen 36, zot teritwar ti agrandi plis ankor e zot ti pres avek bann non Zwif. Sa i vedir ki bann Kretyen ti bezwen al pres avek tou dimoun dan lemonn!

13, 14. (a) Kwa ki enkli dan sa “konmannman nouvo” ki Zezi ti donnen? (b) Ki nou aprann atraver sa legzanp ki Zezi in kite?

¹³ Zezi ti osi donn “en konmannman nouvo” lo lafason ki nou devret tret nou bann frer ek ser. (Lir Zan 13:34, 35.) Nou devret demontre nou lanmour pour zot tou le zour, me nou devret osi pare pour donn nou lavi pour zot. Sa i en keksoz ki bann serviter Zeova pa ti oblize fer anba Lalwa.​—Matye 22:39; 1 Zan 3:16.

¹⁴ Zezi i sa pli gran legzanp en dimoun ki ti demontre sa kalite lanmour ki met lentere lezot premye. I ti telman kontan son bann disip ki i ti pare pour mor pour zot e i ekspekte ki tou son bann disip i fer parey li. Alor, nou devret pare pour andir bann difikilte e menm mor pour nou bann frer ek ser.​—1 Tesalonisyen 2:8.

15, 16. Ki bann nouvo sirkonstans nou ladan ozordi e ki mannyer Bondye i gid nou?

¹⁵ Zezi in apwent “lesklav fidel e pridan” pour donn son bann disip “manze [spirityel] kan i ler.” (Matye 24:45-47, NW) Sa manze i enkli bann lenstriksyon enportan pour pep Bondye ler bann sirkonstans i sanze. Ki mannyer nou bann sirkonstans i nouvo?

¹⁶ Nou pe viv dan “bann dernyen zour” e tre byento nou pou eksperyans en ladetres ki zanmen in deza arive oparavan. (2 Timote 3:1; Mark 13:19) I osi annan Satan ek son bann demon ki’n ganny pouse dan lesyel e anvoye lo later, ki pe fer soufer limanite. (Revelasyon 12:9, 12) An plis, nou pe obei lord Zezi par pres sa bon nouvel partou dan lemonn avek plis dimoun e dan plis langaz ki oparavan!

17, 18. Ki mannyer nou devret reazir anver lenstriksyon ki pe ganny donnen?

¹⁷ Lorganizasyon Bondye i donn nou bokou zouti ki ed nou dan nou travay predikasyon. Eski ou servi zot? Dan nou bann renyon, nou ganny gidans lo ki mannyer pour byen servi sa bann zouti. Eski ou vwar sa bann gidans konman en keksoz ki sorti kot Bondye?

¹⁸ Pour ganny benediksyon Bondye, nou bezwen port latansyon lo tou bann lenstriksyon ki i pe donn nou atraver kongregasyon Kretyen. Si nou obei depi ozordi, i pou pli fasil pour swiv bann lenstriksyon pandan “gran ladetres,” letan move lemonn Satan an antye pou ganny detrir. (Matye 24:21, NW) Apre sa, nou pou bezwen bann nouvo lenstriksyon pour viv dan en nouvo lemonn kot pou annan lazistis, ki pou ganny libere anba lenfliyans Satan.

19, 20. Ki bann roulo ki pou ouver e ki pou son rezilta?

¹⁹ Dan letan Moiz, nasyon Izrael ti bezwen bann nouvo lenstriksyon, alor  Bondye ti donn zot Lalwa. Pli tar, kongregasyon Kretyen ti bezwen swiv “lalwa Kris.” Pareyman, Labib i dir nou ki dan nouvo lemonn, nou pou ganny bann roulo avek nouvo lenstriksyon. (Lir Revelasyon 20:12.) I tre probab ki sa bann roulo pou eksplik sa ki Zeova i ekspekte avek limanite a sa moman. Ler tou dimoun, enkli bann ki pou resisite, i etidye zot, zot pou kapab konn sa ki Bondye i anvi pour zot. Sa bann roulo pou ed nou aprann plis lo lafason ki Zeova i panse. Nou pou osi konpran Labib pli byen, alor dan Paradi nou pou tret kanmarad avek lanmour, respe ek loner. (Izai 26:9) Imazin sa kantite keksoz nou pou aprann e ansenny lezot anba gidans Lerwa Zezi Kri!

²⁰ Si nou swiv bann lenstriksyon ki’n “ganny ekri dan sa bann liv” oubyen roulo e nou reste fidel avek Zeova pandan sa tes final, i pou ekri nou non pour touzour dan “liv lavi.” Nou kapab ganny lavi eternel! Alor, nou devret ARETE pour lir sa ki Labib i dir, GETE pour konpran sa ki i vedir pour nou e EKOUTE par obei gidans Bondye depi konmela menm. Si nou fer sa bann keksoz, nou pou sirviv sa gran ladetres e aprann lo Zeova, nou Bondye lanmour ki saz, pour touzour.​—Eklezyast 3:11; Romen 11:33.