Ed Bann Vev dan Zot Soufrans

ENN bann zistwar pli renonmen konsernan bann vev se resi Labib lo Rit ek son belmer, Naomi. Tou le de madanm ti vev. Sepandan Naomi li, pa ti perdi zis son mari me osi son de garson, enn parmi ti mari Rit. Vi ki zot ti viv dan en sosyete lagrikiltir ki ti depan bokou lo zonm, zot sitiasyon ti vreman trazik.—Rit 1:1-5, 20, 21.

Sepandan, Naomi ti annan en zanmi remarkab ki ti konsol li. Sa ti son belfiy Rit ki ti refize pour separe avek li. Avek letan, Rit ti montre li “pli meyer pour [Naomi] ki set garson”—pa selman akoz son gran lanmour pour Naomi me osi akoz son lanmour pour Bondye. (Rit 4:15) Ler Naomi ti demann Rit pour retourn kot son fanmiy ek bann zanmi Moabit, Rit ti reponn avek en lekspresyon lwayote pli tousan ki’n deza ganny rikorde: “Kot ou ale mon pou ale, e kot ou pas lannwit mon pou pas lannwit. Ou pep pou vin mon pep, e ou Bondye mon Bondye. Kot ou mor mon pou mor, e se la kot mon pou ganny antere. Ki  Zeova i fer parey avek mwan e ki i azout ankor avek si okenn keksoz apard ki lanmor i separ mwan avek ou.”—Rit 1:16, 17.

Zeova Bondye ti pran kont latitid Rit. I ti beni zot pti lakour, e finalman Rit ti marye avek Boaz, en Izraelit. Naomi ti pran swen avek zot zanfan konmsi ti pour li menm, sa zanfan ti apre vin en zanset Zezi Kri. Sa fe i en legzanp ki montre konman ki Zeova i seri bann vev ki rapros avek li e met zot konfyans dan li. Deplis, Labib i dir nou ki Zeova i apresye sa bann ki ed bann vev avek lanmour dan zot soufrans. Alor, konman ki nou ozordi nou kapab soutenir bann vev ki parmi nou?—Rit 4:13, 16-22; Psonm 68:5.

Led Pratik Me Pa Enpozan

Ler nou pe ofer en vev nou led, i pli meyer pour fer li dan en fason kler e direk me toudmenm fodre pa ki nou enpoz sa led. Evit bann komanter ki pa presi tel konman, “Fer mwan konnen si ou bezwen okenn keksoz.” Sa konmsi ou pe dir, “Gard ou so, e manz byen” avek en dimoun ki ganny fre e lafen me apre ou pa fer nanryen pour ed li. (Zak 2:16) Laplipar dimoun pa pou demann lasistans ler zot bezwen serten keksoz; zot plito soufer an silans. Pour ed sa bann dimoun koumsa i demann diskresyon, persevwar ki zot bezwen. Lo lot kote, pran tro bokou linisyativ—pran kontrol lo lavi sa vev—i kapab anmenn bann konfli oubyen afekte son santiman. Pour sa rezon, Labib i met lanfaz lo nesesite pour nou ekilibre dan nou relasyon avek lezot. Anmenmtan ki i ankouraz nou pour pran en lentere personnel dan en dimoun, i osi rapel nou pour pa mel dan zafer lezot.—Filipyen 2:4; 1 Pyer 4:15.

Rit ti demontre en tel latitid ekilibre anver Naomi. Kantmenm i ti reste atase avek son belmer, Rit pa ti met presyon lo li oubyen domin li. I ti pran bann linisyativ ki rezonnab, tel konman rod manze pour Naomi e pour li menm, me i ti osi swiv bann lenstriksyon Naomi.—Rit 2:2, 22, 23; 3:1-6.

Byensir, sa ki en dimoun i bezwen i kapab bokou diferan avek sa ki en lot i bezwen. Sandra, ki’n ganny mansyonnen pli boner, i dir: “Mon ti annan sa ki mon ti bezwen dan mon soufrans—bann bon zanmi pros ki ti antour mwan.” Tandis ki Elaine, ki’n osi ganny mansyonnen pli boner, ti bezwen letan li tousel. Alor, montre nou itil i vedir montre disernman e balanse ant respekte letan prive en dimoun e disponib pour ede kot i neseser.

Sipor Avek Fanmiy

Si i annan en bon latmosfer familyal kot lanmour i egziste, sa i kapab fer bokou pour reasir en vev ki i kapab fer fas avek son sitiasyon. Kantmenm serten manm fanmiy i kapab ofer plis led ki lezot, zot tou zot kapab kontribye. “Si en vev i annan zanfan oubyen pti zanfan, fodre ki sa bann zanfan i aprann met an pratik premyerman zot lafwa anver zot prop fanmir, e ensi, ranpli zot devwar [konpansasyon, NW ] anver zot paran ek gran paran. Se sa ki fer plezir Bondye.”—1 Timote 5:4.

Dan bokou ka, petet sipor finansyel oubyen “konpansasyon” i pa neseser. Serten vev i annan sifizaman larzan pour okip zot bezwen e lezot vev i kalifye pour bann benefis ki gouvernman i donnen dan serten pei. Me dan ka kot bann vev i dan bezwen, bann manm fanmiy i devret ede. Si en vev napa en fanmiy pros pour ofer sipor oubyen si sa fanmiy pa  kapab ede, Labib i ankouraz bann konpanyon Kretyen pour ed li: “La sa ki Bondye nou Papa i konsider konman en larelizyon pir e san defo: Pran swen bann orflen ek bann vev dan zot soufrans.”—Zak 1:27.

Bann ki met an aplikasyon sa bann prensip Labib i vreman “okip avek respe bann vev.” (1 Timote 5:3) Pour okip en dimoun avek respe i vedir pour demontre par nou aksyon respe pour sa dimoun. En dimoun ki ganny respe i santi li ganny apresye e annan valer, e sa i osi ranforsi son dinite. Zot pa santi ki lezot pe ede senpleman akoz i en lobligasyon. Rit, menm si i ti en vev pour en pe letan li menm, i ti vreman respe Naomi par volonterman e avek lanmour prevwar ki bann bezwen emosyonnel e fizik Naomi i ganny konble. Annefe, akoz son latitid, i pa ti pran Rit bokou letan pour ganny en bon repitasyon, ki fer ki son fitir mari ti kapab dir avek li: “Tou dimoun dan lavil mon pep i okouran ki ou en madanm ekselan.” (Rit 3:11, not anba paz) Anmenmtan, lanmour ki Naomi ti annan pour Bondye, son natir rezonnab e fasil, ek son profon lapresyasyon pour zefor ki Rit ti fer dan son lentere ti san dout fer li en plezir pour Rit ed li. Pa Naomi i en bon legzanp pour bann vev ozordi!

Rapros Avek Bondye

Byensir, bann zanmi ek manm fanmiy pa kapab ranpli sa lespas vid ki lanmor en konzwen i kite. Pour sa rezon i enportan sirtou pour sa dimoun ki pe soufer pour rapros avek sa “Papa ki ranpli avek labonte, Bondye ki touzour donn konsolasyon. I konsol nou dan nou bann soufrans.” (2 Korentyen 1:3, 4) Konsider legzanp Ann, en vev devoue ki ti annan 84 an letan Zezi ti ne.

Ler mari Ann ti mor zot ti’n pas zis set an ansanm. I ti tourn ver Zeova pour konsolasyon. “I pa ti kit Tanp. I ti kontinyen servi Bondye, nwit-e-zour dan lapriyer e dan zenn.” (Lik 2:36, 37) Ki mannyer Zeova ti reazir anver devouman ki Ann ti demontre pour li? I ti montre son lanmour pour li dan en fason spesyal par permet li vwar sa pti baba ki ti pou grandi pour vin Sover lemonn. Sa pa ti vreman rezwir e konsol Ann! I evidan, ki i ti eksperyans sa verite ki trouve dan Psonm 37:4: “Pran plezir dan Zeova, e i pou akord ou bann swe ou leker.”

Bondye i Servi Bann Konpanyon Kretyen

Elaine ti dir: “Pour en bon pe letan apre lanmor David, mon ti resanti en douler fizik konmsi en kouto ki pe vire dan mon bann kot. Mon ti panse ki i en problenm dizesyon. En zour i ti sitan fer mal ki mon ti panse mon bezwen al vwar en dokter. En zanmi ki osi en ser spirityel, ki annan diskresyon, ti sizere ki mon latristes i kapab en fakter ki pe koz sa e i ti ankouraz mwan pour demann Zeova led ek rekonfor. Deswit mon ti aksepte son konsey e mon ti ofer en lapriyer silans me profon e demande ki Zeova i soutenir mwan dan mon latristes. E Zeova ti fer sa!” Elaine ti konmans santi li pli mye e apre sa, menm son douler fizik ti ale.

Sirtou bann ansyen dan kongregasyon i kapab ofer lanmitye dan en fason zantiy avek bann vev ki pe soufer. Par regilyerman fourni konsolasyon ek sipor spirityel, avek konsiderasyon ek diskresyon, bann ansyen i kapab ed zot reste pros avek Zeova malgre zot leprev. Kot i neseser, bann ansyen i osi kapab ede pour fer laranzman pour soutenir zot lo kote materyel. Bann tel ansyen ki annan konpasyon, ki annan diskresyon i vreman vin “en landrwa kasyet kont divan.”—Izai 32:2; Akt 6:1-3.

Konsolasyon Permanan Avek Nouvo Lerwa Later

Sa enn ki Ann ti kontan pour vwar de mil an pase, in aprezan vin Lerwa Mesyanik dan Rwayonm seles Bondye. Sa gouvernman pou byento elimin tou keksoz ki anmenn sagren, enkli lanmor. Dan sa laspe, Revelasyon 21: 3, 4 i dir: “La aprezan Bondye in fer son demer parmi zonm. . . I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” Eski ou’n remarke ki sa pasaz i fer referans avek “zonm”? Wi, imen pou ganny libere avek lanmor e avek tou bann sagrinasyon ek larm ki i anmennen.

Me i annan ankor en lot bon nouvel! Labib i osi promet en rezireksyon pour bann mor. “Ler pe arive kan tou bann mor ki dan tonbo pou tann son lavwa [Zezi], e zot pou sorti dan zot tonbo.” (Zan 5:28, 29) Zis parey Lazar, ki Zezi ti resisite, zot pou sorti konman bann imen, pa konman bann kreatir spirityel. (Zan 11:43, 44) Sa bann ki ‘fer sa ki byen’ apre sa, pou ganny anmennen ver perfeksyon e zot pou personnelman eksperyans swen Zeova konman en Papa pandan ki i ‘ouver son lanmen e satisfer dezir tou kreatir vivan.’—Psonm 145:16.

Sa bann ki’n perdi enn ki zot kontan dan lanmor e ki met lafwa dan sa lesperans sir, i trouv sa en gran sours konsolasyon. (1 Tesalonisyen 4:13) Alor si ou en vev, fer sir ki ou “priye tou letan” pour konsolasyon ek led ki ou bezwen toulezour pour anmenn ou bann fardo. (1 Tesalonisyen 5:17; 1 Pyer 5:7) Pran letan sak zour pour lir Parol Bondye afen ki bann panse Bondye i a konsol ou. Si ou fer sa bann keksoz, ou pou vwar pour ou menm, kantmenm bann leprev ek defi ki ou fer fas avek konman en vev, konman ki Zeova i kapab vreman ed ou pour trouv lape.

[Ekstre lo paz 5]

Montre nou itil i vedir balanse ant respekte letan prive en dimoun e disponib pour ede kot i neseser

[Portre lo paz 7]

Konman en vev aze, Ann ti ganny beni par Bondye