Met tou ou Konfyans dan Zeova dan Letan difisil
Met tou ou Konfyans dan Zeova dan Letan difisil
“Bondye i en refiz ek en lafors pour nou, en led ki fasilman ganny trouve pandan ladetres.”—PSONM 46:1.
1, 2. (a) Ki legzanp ki montre i pa ase pour zis dir nou annan konfyans dan Bondye? (b) Akoz nou bezwen fer plis ki zis dir nou annan konfyans dan Zeova?
I FASIL pour dir ki nou annan konfyans dan Bondye. Parkont, pour montre par nou aksyon, sa i en lot zafer. Par egzanp, depi byen lontan sa lekspresyon “Nou met konfyans dan Bondye” in aparet lo larzan Letazini. * An 1956, Kongre Letazini ti pas en lalwa ki ti deklar sa lekspresyon konman moto nasyonal Letazini. Me selman ler ou gete, bokou dimoun, pa zis dan sa pei me osi partou dan lemonn, i met plis konfyans dan larzan ek keksoz materyel ki dan Bondye.—Lik 12:16-21.
2 Nou konman bann vre Kretyen, nou bezwen fer plis ki zis dir nou annan konfyans dan Zeova. Zis parey “lafwa san bann laksyon i mor,” i pa fer sans osi pour nou dir nou annan konfyans dan Bondye si nou pa demontre li par nou aksyon. (Zak 2:26) Dan lartik presedan, nou ti aprann ki nou demontre konfyans dan Zeova kan nou tourn ver li dan lapriyer, kan nou rod gidans dan son Parol, e dan son lorganizasyon. Aprezan annou vwar konman nou kapab pran sa trwa pa dan letan difisil.
Kan en Dimoun i perdi son Travay oubyen kan son Saler i pti gin
3. Ki presyon ekonomik bann serviter Zeova i rankontre dan sa “letan difisil”? Ki mannyer nou konnen ki Bondye i pare pour ed nou?
3 Dan sa “letan difisil,” bann Kretyen i rankontre menm presyon ekonomik ki lezot dimoun. (2 Timote 3:1) Alors, en sel kou nou kapab perdi nou travay. Oubyen, nou kapab vwar nou oblize travay en kantite pour zis en pti saler. Dan bann sitiasyon koumsa, nou kapab vwar li difisil pour ‘port swen nou prop fanmiy.’ (1 Timote 5:8) Eski Bondye Tre O i pare pour ed nou dan bann ka koumsa? Definitivman! Byensir, Zeova pa protez nou kont tou difikilte ki nou kapab rankontre dan sa sistenm. Parkont, si nou met konfyans dan li, sa parol dan Psonm 46:1, pou aplik pour nou: “Bondye i en refiz ek en lafors pour nou, en led ki fasilman ganny trouve pandan ladetres.” Me ki mannyer nou kapab montre ki nou met tou nou konfyans dan Zeova letan nou annan problenm finans?
4. Kan nou dan problenm finans, ki nou kapab demann Zeova dan lapriyer? Konman Zeova i reazir anver bann tel lapriyer?
4 En fason ki nou kapab demontre nou konfyans dan Zeova se kan nou tourn ver li dan lapriyer. Me lo kwa nou kapab priye? La ki nou pe rankontre problenm finans, nou bezwen plis lasazes pratik ki zanmen oparavan. Alors, nou bezwen priy pour lasazes! Parol Zeova i asir nou: “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.” (Zak 1:5) Wi, demann Zeova lasazes. Lasazes i sa abilite pour byen servi konnesans, lentelizans, ek bon zizman pour fer bann bon desizyon ek bann bon swa. Nou Papa dan lesyel i asir nou ki i pou ekout bann tel lapriyer. I toultan pare pour fer drwat semen bann ki met tou zot konfyans dan li.—Psonm 65:2; Proverb 3:5, 6.
5, 6. (a) Akoz nou kapab tourn ver Parol Bondye pour ganny led pour fer fas avek presyon ekonomik? (b) Ki nou kapab fer pour redwir traka kan nou’n perdi nou travay?
5 En lot fason pour demontre nou konfyans dan Zeova se kan nou rod gidans dan son Parol. Son bann bon rapel dan Labib in ganny prouve “diny konfyans.” (Psonm 93:5) Menm si i ti fini ganny ekrir plis ki 1,900 an pase, sa liv enspire i annan bann konsey ki ou kapab depan lo la e en konprenezon profon ki kapab ed ou pli byen fer fas avek presyon ekonomik. Annou vwar ennde legzanp lasazes ki Labib i kontyen.
6 Byen lontan, Lerwa Salomon ti fer sa remark: “En serviter i fer en bon sonmey, ki swa i manz en pti gin oubyen bokou; me larises sa enn ki ris i anpes li dormi.” (Eklezyast 5:12) I demann letan ensi ki larzan pour kapab repar, netway, mentenir, e protez bann keksoz materyel ki nou annan. Aprezan ki nou’n perdi nou travay, nou kapab sezi sa loportinite pour reegzamin nou fason viv e esey fer diferans ant sa ki nou bezwen ek sa ki nou anvi. Petet i ti a byen fer serten sanzman pour diminyen traka. Par egzanp, eski i posib pour senplifye nou lavi, petet al reste dan en pli pti lakaz oubyen debaras nou avek bann keksoz ki pa neseser?—Matye 6:22.
7, 8. (a) Konman Zezi ti montre ki i konnen ki bann imen enparfe i tant pour trakas tro bokou lo bann keksoz materyel? (Vwar not anba lo paz.) (b) Ki bon konsey Zezi ti donnen konsernan konman pour evite trakas tro bokou?
7 Dan son Sermon lo montanny, Zezi ti donn sa konsey: “Pa bezwen trakase, ki zot pou manze e ki zot pou bwar pour viv, oubyen ki zot pou mete.” * (Matye 6:25) Zezi ti konnen ki normalman bann imen enparfe i pran traka lo bann nesesite debaz. Me ki mannyer nou kapab ‘aret trakas’ sa bann keksoz? Zezi ti dir: “Rod plito Rwayonm Bondye.” Nenport problenm ki nou rankontre, nou bezwen kontinyen donn ladorasyon Zeova priyorite dan nou lavi. Si nou fer sa, nou Papa dan lesyel pou ‘donn nou’ sa ki nou bezwen toulezour. Dan en fason ou en lot, i pou fer li posib pour nou ganny sa ki nou bezwen.—Matye 6:33.
8 Zezi ti donn ankor en lot konsey: “Pa trakas pour demen; demen pou anmenn ase traka par limenm. Traka en zour i sifi.” (Matye 6:34) I pa saz pour pran tro bokou traka konsernan sa ki demen i kapab anmennen. En spesyalis Labib ti fer sa remark: “I byen rar ki larealite konsernan lavenir i sitan move parey nou ti per i pou ete.” Letan nou swiv konsey Labib pour konsantre lo sa ki pli enportan e pour viv en zour alafwa, sa i kapab ed nou pour evite trakas tro bokou.—1 Pyer 5:6, 7.
9. Kan nou dan problenm finans, ki led nou kapab trouve dan bann piblikasyon ‘lesklav fidel e pridan’?
9 Kan nou dan problenm finans, nou kapab osi demontre nou konfyans dan Zeova par rod led dan bann piblikasyon ‘lesklav fidel e pridan.’ (Matye 24:45) Detanzaot, magazin Réveillez-vous! i pibliy bann lartik ki annan bann konsey ek sizesyon itil ki ed nou pour fer fas avek bann difikilte ekonomik. Lartik “Au chômage—Que faire?” ki ti aparet dan Réveillez-vous! le 8 Out, 1991, ti donn wit konsey ki’n ed bokou dimoun pour reste stab finansyerman e emosyonnelman kan zot pa pe anploye pour en serten letan. * Byensir, nou bezwen byen balans sa bann konsey avek en pwennvi apropriye lo vre lenportans larzan. Sa ti ganny diskite dan lartik “Plus important que l’argent,” ki ti aparet dan menm nimero.—Eklezyast 7:12.
Soufer avek Problenm Lasante
10. Konman legzanp David i montre ki i fer sans met konfyans dan Zeova ler nou annan en maladi grav?
10 Eski i fer sans met konfyans dan Zeova kan nou pe soufer avek en maladi grav? Byensir! Zeova i santi sa ki bann malad parmi son pep i santi. Anplis ki sa, i pare pour ed nou. Annou vwar legzanp Lerwa David. Petet i ti malad letan i ti ekrir lo fason ki Bondye i tret en dimoun drwat ki malad. I ti ekrir: “Zeova li menm pou soutenir li lo en lili douler; wi, ou pou sanz tou son lili pandan son maladi.” (Psonm 41:1, 3, 7, 8) David ti kontinyen annan en konfyans solid dan Zeova, e finalman sa lerwa ti reganny son lasante. Me ki mannyer nou kapab demontre konfyans dan Bondye letan nou pe soufer avek problenm lasante?
11. Ler nou pe soufer avek en maladi, ki nou kapab demann nou Papa dan lesyel?
11 En fason pour demontre nou konfyans dan Zeova ler nou pe soufer avek en maladi, se par sipliy li pour ed nou andire. Nou kapab demann li pour ed nou servi “lasazes pratik” pour rod sa nivo lasante ki nou sitiasyon i vreman permet. (Proverb 3:21) Nou kapab osi demann li pour ed nou annan pasyans ek perseverans pour kapab siport sa maladi. Pli enportan ankor, nou ti pou kontan demann Zeova pour soutenir nou, donn nou lafors pour reste fidel avek li e pour pa perdi nou lekilib, nenport kwa ki kapab arive. (Filipyen 4:13) Reste fidel avek Bondye i pli enportan ki prezerv nou lavi. Si nou reste fidel, sa Enn ki rekonpans nou pou donn nou lavi ek lasante parfe pour touzour.—Ebre 11:6.
12. Ki bann prensip Labib ki kapab ed nou fer bann desizyon ki saz konsernan tretman medikal?
12 Nou konfyans dan Zeova pou fer nou rod gidans pratik dan son Parol, Labib. Bann prensip dan Labib i kapab ed nou pour fer bann desizyon ki saz konsernan tretman medikal. Par egzanp, vi ki nou konnen ki Labib i kondann tou pratik grigri, nou pou evit okenn tes oubyen tretman ki annan pour fer avek grigri. (Galat 5:19-21; Deterononm 18:10-12) La en lot legzanp lasazes dan Labib ki ou kapab annan konfyans ladan: “Sa ki napa leksperyans i met lafwa dan tou parol, me sa enn ki malen i egzamin son lepa.” (Proverb 14:15) Alors, letan nou pe mazinen ki kalite tretman medikal nou pou pran, i byen pour rod lenformasyon ki nou vreman kapab met konfyans ladan olye “met lafwa dan tou parol.” En bon zizman i kapab ed nou pour reflesir byen lo nou bann opsyon e fer en desizyon baze lo en bon konnesans.—Tit 2:12, NW.
13, 14. (a) Ki bann lartik konsernan lasante ki magazin Latour Veyer ek Réveillez-vous! in pibliye? (Vwar bwat lo paz 31.) (b) Ki konsey Réveillez-vous! le 22 Zanvye, 2001, ti donnen konsernan konman fer fas avek en maladi ki persiste?
13 Nou kapab osi demontre nou konfyans dan Zeova par fer resers dan bann piblikasyon lesklav fidel. Detanzaot, magazin Latour Veyer ek Réveillez-vous! in pibliy bann lartik ki fer nou aprann bokou lo plizyer kalite maladi ek problenm lasante. * Dan sa bann lartik, i’n annan parfwa leksperyans bann dimoun ki’n reisi fer fas avek diferan maladi, problenm lasante, ek dezabilite. Deplis, serten lartik in ofer bann sizesyon ki baze lo Labib ensi ki bann konsey pratik lo konman pour viv avek en maladi ki persiste.
14 Par egzanp Réveillez-vous! le 22 Zanvye, 2001, ti pibliy en seri lartik anba tit “Maladie, infirmité: du réconfort.” Sa bann lartik ti ofer bann prensip Labib ki itil. I ti osi ofer bann lenformasyon ki zot in gannyen atraver bann entervyou avek bann dimoun byen enformen ki’n viv pour plizyer lannen avek bann maladi grav. Lartik “Comment vivre au mieux avec votre déficience physique” ti donn sa konsey: Rod otan lenformasyon ki ou kapab konsernan ou maladi. (Proverb 24:5) Etablir bann lobzektif rezonnab, enkli bann lobzektif pour ed lezot. Me realize ki petet ou pa pou kapab atenn menm lobzektif ki lezot in reisi atenn. (Akt 20:35; Galat 6:4) Evite izol ou avek lezot. (Proverb 18:1) Letan lezot i vizit ou, fer li en leksperyans agreab pour zot. (Proverb 17:22) Pli enportan ki tou, reste pros avek Zeova e avek kongregasyon. (Naoum 1:7; Romen 1:11, 12) Eski pa nou rekonesan pour sa vre gidans ki Zeova i fourni atraver son lorganizasyon?
Kan nou annan en Febles ki persiste
15. Konman zapot Pol ti reisi ganny laviktwar kont febles imen enparfe, e ki lasirans nou kapab annan?
15 Zapot Pol ti ekrir: “Napa naryen ki bon dan mwan.” (Romen 7:18) Dapre son prop leksperyans, Pol ti konnen konman i difisil pour lalit avek son bann dezir ek febles imen enparfe. Toudmenm, Pol ti osi annan konfyans ki i ti pou kapab ranport laviktwar. (1 Korentyen 9:26, 27) Konman i ti pou fer sa? Par met tou son konfyans dan Zeova. Se pour sa ki Pol ti kapab dir: “Malere! La sa ki mon ete! Lekel ki pou delivre mwan avek sa lekor lanmor? Gran mersi Bondye par Zezi-Kri nou Senyer!” (Romen 7:24, 25) Nou osi nou pe lalit avek nou bann febles. Anmezir ki nou fer sa, i fasil pour nou perdi konfyans, e krwar vreman ki nou pa pou zanmen reisi. Me Zeova pou ed nou, si parey Pol, nou vreman depan lo li olye depan zis lo nou prop lafors.
16. Si en febles i persiste, ki nou devret demann Zeova dan lapriyer? Ki nou devret fer si apre ki nou’n annan kontrol lo nou febles, nou retourn ankor ladan?
16 Kan nou febles i persiste, nou kapab montre ki nou annan konfyans dan Zeova par enplor li dan lapriyer. Nou bezwen demann Zeova, e menm sipliy li pour ed nou atraver son lespri sen. (Lik 11:9-13) Nou kapab sirtou demann li led pour nou annan kontrol lo nou lekor, ki form parti fri lespri Bondye. (Galat 5:22, 23) Ki nou devret fer si apre ki nou’n annan kontrol lo nou febles, nou rekonmans fer li ankor? Nou pa devret zanmen aret fer zefor pour sirmont li. Fodre nou pa zanmen fatige priy nou Bondye mizerikord pour demann li pardon e demann li son led. Zeova pa pou zanmen rezet oubyen vir son ledo avek en leker “brize e kraze,” akoz en move konsyans. (Psonm 51:17) Si nou sipliy li avek en leker senser e ranpli avek regre, Zeova pou ed nou reziste tantasyon.—Filipyen 4:6, 7.
17. (a) Akoz i itil pour reflesir lo ki mannyer Zeova i santi konsernan en serten febles ki nou pe lalit avek? (b) Ki teks Labib nou kapab mazinen si nou pe lite pour kontrol nou tanperaman? pour vey nou lalang? pour reziste tandans anver bann divertisman ki pa apropriye pour Kretyen?
17 Nou kapab montre ki nou annan konfyans dan Zeova par rod led dan son Parol osi. An servan en konkordans Labib (en liv ki endike kote pour trouv en mo dan Labib) oubyen sa liv Watch Tower Publications Index an Angle oubyen an Franse, nou kapab rod larepons sa kestyon: ‘Ki mannyer Zeova i santi anver sa febles ki mon pe lalit avek?’ Reflesir lo ki mannyer Zeova i santi anver sa, i kapab ranforsi nou dezir pour fer li plezir. Alors, nou konmans santi parey li, deteste sa ki li i deteste. (Psonm 97:10) Serten in vwar li i itil pour mazin bann teks Labib ki annan pour fer avek sa febles ki zot pe lalit avek. Eski nou pe lite pour kapab kontrol nou tanperaman? Dan sa ka, nou kapab mazin bann teks parey Proverb 14:17 ek Efezyen 4:31. Eski nou vwar li difisil pour vey nou lalang? Nou kapab aprann bann teks parey Proverb 12:18 ek Efezyen 4:29 parker. Eski nou tant pour ganny atire anver bann divertisman ki pa apropriye pour Kretyen? Nou kapab esey mazin bann verse parey Efezyen 5:3 ek Kolosyen 3:5.
18. Akoz nou pa devret santi nou anbarase pour demann led bann ansyen pour sirmont nou febles?
18 Rod led avek bann ansyen dan kongregasyon ki’n ganny apwente par lespri sen, i en lot fason pour demontre ki nou depann lo Zeova. (Akt 20:28) Apre tou, sa bann “kado zonm” i en provizyon ki Zeova in fer atraver Kris pour protez e pran swen avek son mouton. (Efezyen 4:7, 8, 11-14) I vre ki i pa fasil pour demann led pour sirmont en febles. Nou kapab santi nou anbarase e per ki bann ansyen i a nepli annan en bon pwennvi lo nou. Me selman sa bann zonm ki matir spirityelman pou respe nou akoz nou’n annan sa kouraz pour vin demann led. Deplis, bann ansyen i fer zot mye pour reflekte bann kalite Zeova dan zot mannyer azir avek troupo. Zot konsey ek lenstriksyon pratik e rekonfortan baze lo Parol Bondye, i kapab sanmenm ki nou ti bezwen pour fortifye nou determinasyon pour sirmont nou febles.—Zak 5:14-16.
19. (a) Avek ki bi Satan i sey servi sa kalite lavi initil dan sa sistenm? (b) Kisisa annan konfyans, e ki nou devret determinen pour fer?
19 Pa oubliye ki Satan i konnen ki son letan i kourt. (Revelasyon 12:12) Satan i anvi servi sa kalite lavi initil pour fer nou dekouraze e aret fer sa ki byen. Fotespere ki nou annan konfyans total dan sa ki Romen 8:35-39 i dir: “Lekel ki pou separ nou avek lanmour Kris? lasoufrans, lenkyetid, persekisyon, lafen, lamizer, danze ouswa lanmor? . . . Pourtan dan tousala nou sorti avek laviktwar konplet par sa enn ki’n kontan nou. Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir, ni okenn pisans, ni bann zabitan dan lemonn ki anler, ni dan lemonn ki anba, ni okenn lezot kreatir pa pou zanmen kapab separ nou avek lanmour Bondye dan Kris-Zezi nou Senyer.” Pa sa i vreman fer nou met konfyans dan Zeova! Parkont, en tel konfyans i enplik plis ki zis en santiman. I osi enplik fer bann desizyon ki ou’n byen reflesir lo la dan lavi toulezour. Annou determinen alors, pour met tou nou konfyans dan Zeova dan bann letan difisil.
[Not anba lo paz]
^ par. 1 Dan en let date le 20 Novanm 1861, ki i ti ekrir sa landrwa ki fer bann kalen, sekreter Trezorye, Salmon Chase, ti dir: “Napa okenn nasyon ki kapab for si Bondye pa donn li lafors, oubyen an sekirite si Bondye pa defann li. Konfyans nou pep dan Bondye i devret ganny deklare lo nou larzan.” Alors, sa moto “Nou met konfyans dan Bondye” ti aparet pour premye fwa lo kalen Letazini an 1864.
^ par. 7 Sa traka ki pe ganny dekrir la, i “en lenkyetid baze lo lafreyer, ki fer perdi lazwa dan lavi.” Sa parol “pa bezwen trakase” i donn lide ki nou pa devret konmans trakase. Me dapre en liv referans, ‘lafason ki sa verb in ganny servi, i pe demann nou pour aret fer en keksoz ki nou pe deza fer.’
^ par. 9 La sa wit pwen ki ti ganny diskite: (1) Pa panik; (2) gard en latitid pozitif; (3) pare pour aksepte bann nouvo kalite travay; (4) viv dapre ou mwayen—pa dapre sa ki lezot i gannyen; (5) fer atansyon kredi; (6) ed fanmiy pour reste ini; (7) pa perdi respe pour ou lekor; e (8) fer en bidze.
^ par. 13 Sa bann magazin ki baze lo Labib pa siport oubyen promot okenn tretman medikal, vi ki i rekonnet ki sa i devret en desizyon personnel. Sa bann lartik ki diskit serten maladi oubyen problenm lasante, i plito enform son bann lekter konsernan bann fe ki zeneralman ganny aksepte.
Eski ou rapel?
• Kan nou dan en problenm finans, konman nou kapab demontre ki nou annan konfyans dan Zeova?
• Ki mannyer nou kapab montre konfyans dan Bondye kan nou pe soufer avek en problenm lasante?
• Kan nou annan en febles ki persiste, konman nou montre ki nou vreman depann lo Zeova?
[Kestyon]
[Bwat lo paz 31]
Eski ou rapel sa bann Lartik?
Kan nou soufer avek serten problenm lasante, i ankourazan pour lir leksperyans bann ki’n reisi fer fas avek serten problenm lasante, maladi, oubyen dezabilite. La serten lartik ki’n ganny pibliye dan magazin Latour Veyer ek Réveillez-vous!
“Coping With My Weaknesses” ti diskit lo konman pour konbat kont bann panse negatif ek depresyon.—The Watchtower, le 1 Me, 1990.
“Not Even an Iron Lung Could Stop Her Preaching.”—Awake!, le 22 Zanvye, 1993.
“A Bullet Changed My Life” ti koz lo fer fas avek paralizi.—Awake!, le 22 Oktob, 1995.
“You Do Not Know What Your Life Will Be Tomorrow” ti diskit lo fer fas avek en maladi mantal (bipolar mood disorder).—The Watchtower, le 1 Desanm, 2000.
“Loida’s Journey out of Silence” ti koz lo konman fer fas avek en andikap koze par problenm laservel (cerebral palsy).—Awake!, le 8 Me, 2000.
“My Struggle With Endometriosis.”—Awake!, le 22 Zilyet, 2000.
“My Fight With Scleroderma.”—Awake!, le 8 Out, 2001.
“I Won My Battle With Postpartum Depression.”—Awake!, le 22 Zilyet, 2002.
[Portre lo paz 29]
I saz pour reegzamin nou fason viv kan nou’n perdi nou travay
[Portre lo paz 30]
Zistwar Loida i montre konman konfyans dan Zeova i ed nou andire. (Vwar bwat lo paz 31)
[Portre lo paz 32]
Nou pa devret anbarase pour demann led pour sirmont nou febles