“Anons Byen Mesaz Laverite”

“Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.” —2 TIMOTE 2:15.

1, 2. (a) Akoz zouvriye i bezwen zouti? (b) Ki kalite travay bann Kretyen pe fer, e konman zot montre ki zot pe rod plito Rwayonm?

BANN zouvriye i bezwen zouti pour ed zot fer zot travay. Me i pa sifi zis pour annan zouti. En zouvriye i bezwen en zouti ki adapte avek son travay e i bezwen servi sa zouti konman fodre. Par egzanp, si ou pe fer en pti langar e ou anvi klout de morso playwoud ansanm, ou pou bezwen plis ki en marto ek klou. Ou pou bezwen konnen konman pour klout en klou dan dibwa san fer sa klou vin tord. Klout en klou dan dibwa san konnen konman pour servi en marto i tre difisil, e menm iritan. Me kan nou byen servi en zouti, sa i ed nou pour ganny en bon rezilta dan nou travay.

² Nou ki Kretyen, nou annan en travay pour fer. I en travay ki vreman enportan. Zezi Kri ti sipliy son bann disip pour “rod plito Rwayonm.” (Matye 6:33) Ki mannyer nou kapab fer sa? En fason se par devoue dan sa travay predikasyon ek fer disip. En lot fason se par fer nou predikasyon baze solidman lo Parol Bondye. En trwazyenm fason se par nou bon kondwit. (Matye 24:14; 28:19, 20; Akt 8:25; 1 Pyer 2:12) Pour nou efikas e zwaye dan sa travay Kretyen, nou bezwen bann zouti apropriye e konnen konman pour byen servi zot. Zapot Pol in donn en legzanp remarkab dan sa domenn. Deplis, i ti ankouraz son bann konpanyon dan lafwa pour imit li. (1 Korentyen 11:1; 15:10) Alors, ki nou kapab aprann avek Pol, nou konpanyon travay?

Pol ti en Proklanmater devoue

3. Akoz nou kapab dir ki zapot Pol ti en zouvriye Rwayonm ki ti devoue?

³ Ki kalite zouvriye Pol ti ete? I ti sirman devoue. Pol ti travay dir pour propaz sa bon nouvel dan en bon pe landrwa otour rezyon Lamediterane. Zapot Pol ti donn en rezon akoz i ti anons mesaz Rwayonm avek sitan lantouzyasm, an dizan: “Pa akoz mon anons Levanzil ki mon annan rezon vant mon lekor. Mon trouv mwan dan lobligasyon. Maler pour mwan si mon pa anons Levanzil!” (1 Korentyen 9:16) Eski Pol ti enterese pour sov zis son lavi? Non. I pa ti en dimoun egois. Okontrer i ti anvi ki lezot i benefisye zot osi avek sa bon nouvel. I ti ekrir: “Mon fer tousala pour Levanzil, pour mwan ganny en par dan son bann benediksyon.”—1 Korentyen 9:23.

4. Ki zouti bann zouvriye Kretyen i akord plis valer avek?

⁴ Zapot Pol ti en zouvriye modes, ki ti realize ki i pa ti pou kapab depan zis lo son prop kapasite. Zis parey en sarpantye i bezwen en marto, Pol ti bezwen sa zouti apropriye pour fer penetre laverite Bondye dan leker bann dimoun ki ti ekout li. Ki zouti i ti servi plis? I ti servi Parol Bondye, Lekritir Sen. Pareyman, Labib antye i sa zouti prensipal ki nou servi pour ed nou fer disip.

5. Pour nou vin bann minis efikas, ki nou bezwen fer apard ki sit bann verse Labib?

⁵ Pol ti konnen ki servi byen Parol Bondye pa ti enplik zis sit sa ki annan ladan. I ti osi sey “konvenk” dimoun. (Akt 28:23) Konman? Pol ti kapab byen servi Parol Bondye pour konvenk bokou dimoun pour aksepte laverite  dan Labib. I ti rezonn avek zot. Pour trwa mwan dan en sinagog an Efez, Pol “ti koze avek konviksyon. I ti pres lo Rwayonm Bondye.” “Ti annan serten ki ti antete e refize krwar,” tandis ki lezot ti ekoute. Akoz predikasyon Pol an Efez, “Parol Senyer ti fannen avek gran pisans.”—Akt 19:8, 9, 20.

6, 7. Ki mannyer Pol ti glorifye son minister e ki mannyer nou kapab fer parey?

⁶ Pol ti ‘glorifye son minister’ konman en proklanmater Rwayonm devoue. (Romen 11:13, NW ) Konman? I pa ti anvi elev son lekor. I pa ti ni onte ki lezot i konn li konman enn bann konpanyon travay Bondye. Okontrer, i ti vwar son minister konman en pli gran loner. Pol ti kapab byen servi Parol Bondye e i ti servi li dan en fason efikas. Son aktivite prodiktif ti ankouraz lezot. I ti ede motiv zot pour akonpli zot minister pli plennman. Dan sa fason osi, i ti glorifye son minister.

⁷ Parey Pol, nou kapab glorifye nou travay konman bann minis par servi Labib souvan e servi li dan en fason efikas. Dan tou laspe nou predikasyon, nou devret annan sa lobzektif pour partaz en keksoz dan Labib avek otan dimoun. Ki mannyer nou kapab fer sa avek konviksyon? Reflesir lo sa trwa fason enportan: (1) Diriz latansyon lo Parol Bondye dan en fason ki pou fer lezot devlop respe pour li. (2) San ofans sa dimoun, eksplik li sa ki Labib i dir e montre konman nou kapab met sa an pratik. (3) Rezonn lo Lekritir dan en fason ki konvenkan.

8. Ki kalite zouti nou annan ozordi pour pres lo Rwayonm? Ki mannyer ou’n servi zot?

⁸ Ozordi, bann proklanmater Rwayonm i annan bann zouti ki Pol ti napa dan son minister. Sa i enkli liv, magazin, brosir, fey lenvitasyon, trak, kaset odyo, ek video kaset. Boner dan bann lannen 1900, kart temwannyaz, granmofonn, portvwa lo loto, transmisyon lo radyo ti osi ganny servi. Byensir, nou pli bon zouti se Labib, e nou bezwen byen servi sa zouti vreman enportan.

Nou Predikasyon i devret baze lo Parol Bondye

9, 10. Ki nou kapab aprann atraver sa konsey ki Pol ti donn Timote konsernan lafason ki Parol Bondye i devret ganny servi?

⁹ Ki mannyer nou kapab servi Parol Bondye konman en zouti efikas? Par fer sa ki Pol ti dir son konpanyon travay Timote: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.” (2 Timote 2:15) Kwa ki enplike dan “anons byen mesaz laverite”?

¹⁰ Sa mo Grek ki’n ganny tradwir la konman  “anons byen” ti literalman vedir “koup drwat” oubyen “tras en santye drwat.” Zis dan sa konsey ki Pol ti donn Timote ki sa lekspresyon in ganny servi dan Lekritir Grek. Sa menm mo ti pou kapab ganny servi pour dekrir en fermye pe fouy en fose drwat dan en plantasyon. En fermye ki annan bokou leksperyans ti pou anbarase si i ti fouy en fose ki tord. Pour vin “en zouvriye ki napa nanryen pour onte,” Timote ti ganny rapele ki i ti pou bezwen evite elwanny li avek sa vre lansennyman dan Parol Bondye. Fodre pa ki Timote ti les son pwennvi personnel enfliyans son lansennyman. I ti bezwen baz son predikasyon ek lansennyman antyerman lo Lekritir. (2 Timote 4:2-4) Koumsa, bann dimoun ki senser ti pou kapab konn pwennvi Zeova lo diferan keksoz, olye adopte bann filozofi lemonn. (Kolosyen 2:4, 8) I menm zafer ozordi.

Nou devret annan en bon Kondwit

11, 12. Ki relasyon nou kondwit i annan avek anons byen Parol Bondye?

¹¹ Nou bezwen fer plis ki zis anons byen Parol Bondye par proklanm son laverite. Nou kondwit i bezwen an akor avek son Parol. “Nou pe travay ansanm pour Bondye,” alors nou bezwen evit lipokrizi. (1 Korentyen 3:9) Parol Bondye i dir: “Alor, ou ki ansenny lezot, akoz ou pa ansenny ou prop lekor? Ou ki ansennyen ki fodre pa vole akoz ou vole? Ou ki ansennyen ki fodre pa fer adilter, akoz ou fer li? Ou ki deteste bann zidol, akoz ou vol zot tanp?” (Romen 2:21, 22) Alors, konman en zouvriye Bondye ozordi, en fason ki nou kapab anons byen Parol Bondye se par ekout sa konsey: “Met ou konfyans dan Zeova avek tou ou leker e pa apiy lo ou prop lentelizans. Dan tou ou semen pran li an konsiderasyon, e li i pou fer drwat tou ou santye.”—Proverb 3:5, 6.

¹² Ki rezilta nou kapab gannyen letan nou anons byen Parol Bondye? Annou vwar pouvwar ki Parol Bondye i kapab annan dan lavi bann dimoun senser.

Parol Bondye i annan Pouvwar pour sanz Dimoun

13. Letan en dimoun i aplik Parol Bondye, ki rezilta sa i kapab anmennen?

¹³ Kan dimoun i aksepte mesaz Parol Bondye konman pli gran lotorite, i annan en gran lenfliyans lo zot, ki ed zot fer bann sanzman remarkab dan zot lavi. Pol ti vwar parol Bondye an aksyon e i ti temwanny son bon lefe lo bann ki ti vin Kretyen dan ansyen Tesalonik. Alors, i ti dir zot: “Nou dir mersi Bondye tou letan, ki kan nou ti anons zot parol Bondye, zot ti ekoute e aksepte li, non pa konman parol zonm me konman parol Bondye parey i ete, e ki aktif dan zot bann krwaryan.” (1 Tesalonisyen 2:13) Pour sa bann Kretyen e anfet pour tou vre disip Kris, rezonnman zonm i nanryen ditou konpare avek lasazes siprenm Bondye. (Izai 55:9) Bann Tesalonisyen ti “resevwar parol Bondye avek lazwa prodwi par Lespri Sen” e zot ti vin konman en legzanp pour lezot krwayan.—1 Tesalonisyen 1:5-7.

14, 15. Ki kantite pwisan Parol Bondye i ete, e akoz?

¹⁴ Parol Bondye i pwisan, zis parey son Sours, Zeova. I sorti kot “Bondye vivan,” sa enn ki par son parol “lesyel li menm ti ganny fer,” e ki son parol i touzour ‘annan sikse dan sa ki i anvoye.’ (Ebre 3:12; Psonm 33:6; Izai 55:11) En spesyalis Labib ti fer sa komanter: “Bondye pa separ li avek son Parol. I pa renye li konmsi i en keksoz etranz pour li. . . . Alor son parol pa zanmen mor, e okenn keksoz pa kapab afekte li; parski i en lyen linyon avek Bondye vivan.”

¹⁵ Ki kantite pwisan sa mesaz ki sorti dan Parol Bondye i ete? I annan en tre gran  pouvwar. An rapor avek sa, Pol ti dir: “Parol Bondye i vivan e i annan pisans. I pli koupe ki en lepe ki koup de kote. I kapab penetre ziska separasyon lam ek lespri, zwentir ek lanmwel lezo. I arive desifre tou dezir ek sekre leker imen.”—Ebre 4:12.

16. Ki kantite Parol Bondye i kapab sanz en dimoun?

¹⁶ Sa mesaz dan Parol Bondye i “pli koupe ki en lepe ki koup de kote.” Alors, i annan en pouvwar pour penetre ki enkrwayab, en pouvwar ki pa kapab ganny konpare avek okenn lenstriman oubyen zouti ki zonm in fer. Parol Bondye i kapab pers anndan en dimoun e sanz sa kalite dimoun ki i ete anndan. I kapab enfliyans lafason ki sa dimoun i panse, sa ki i kontan, e fer li vin en zouvriye Bondye ki akseptab. Pa sa i en zouti pwisan!

17. Eksplik pouvwar ki Parol Bondye i annan pour sanz dimoun.

¹⁷ Parol Bondye i devwal sa ki en dimoun i ete anndan konpare avek sa ki i krwar i ete oubyen avek sa ki i les lezot vwar. (1 Samyel 16:7) Menm en move dimoun i kapab parfwa kasyet sa ki i vreman ete e fer krwar i en bon dimoun oubyen en dimoun relizye. Bann dimoun mesan i kasyet sa ki zot ete pour bann move rezon. Bann dimoun vantar i fer krwar zot annan limilite pour lezot admir zot. Toudmenm, par devwal sa ki annan vreman dan leker, Parol Bondye i kapab pous en dimoun ki annan limilite pour rezet sa vye personnalite, “sanze e vin en dimoun konpletman nouvo, kree dan resanblans Bondye.” (Efezyen 4:22-24) Lansennyman Parol Bondye i kapab osi sanz bann dimoun timid e fer zot vin bann Temwen Zeova ki annan lardyes  e bann proklanmater Rwayonm devoue.—Zeremi 1:6-9.

18, 19. Dapre sa de paragraf oubyen en leksperyans personnel dan predikasyon, montre konman laverite dan Labib i kapab sanz latitid en dimoun.

¹⁸ Pouvwar ki Parol Bondye i annan pour sanz dimoun i annan en bon lefe lo dimoun partou. Par egzanp, bann proklanmater Rwayonm sorti Phnom Penh, Kanboz, ti pres dan rezyon Kompong Cham de fwa par mwan. Apre ki en paster laba ti tann lezot paster koz kont Temwen Zeova, i ti aranze pour li rankontre bann Temwen prosenn fwa ki zot vizit sa rezyon. I ti bonbard zot avek kestyon konsernan selebrasyon bann lafet e ekout atantivman letan zot ti rezonn avek li an servan Labib. Apre i ti dir: “Aprezan mon konnen ki sa ki mon bann kanmarad paster i dir konsernan zot pa vre! Zot dir ki zot pa servi Labib, me ozordi bomaten zot in servi zis sanmenm!”

¹⁹ Sa madanm ti kontinyen son diskisyon lo Labib avek bann Temwen. I ti ganny menase konmkwa i pou ganny tire konman paster, me sa pa ti fer li arete. I ti koz avek en zanmi konsernan son diskisyon lo Labib e apre sa zanmi ti konmans etidye Labib avek bann Temwen. Sa zanmi ti sitan kontan sa ki i ti pe aprann ki en zour kot sa legliz ki i ti ale i ti santi li pouse pour dir, “Vini, vin etidye Labib avek bann Temwen Zeova!” Apre sa, sa paster ek lezot osi ti konmans etidye Labib avek Temwen Zeova.

20. Konman leksperyans en madanm an Ghana i montre pouvwar Parol Bondye?

²⁰ Pouvwar ki Parol Bondye i annan i osi evidan dan ka Paulina, en madanm an Ghana. En proklanmater aplentan ti etidye Labib avek li dan liv Konnesans Ki Anmenn ver Lavi Eternel. * Paulina ti enplike dan en maryaz poligami e i ti santi ki i bezwen fer sanzman. Me son msye e tou son bann fanmiy ti opoz li en kantite. Son granpapa, ki en ziz lakour siprenm e ansyen dan en legliz, ti esey dekouraz li par mal enterpret Matye 19:4-6. Sa ziz ti paret konvenkan. Me Paulina ti deswit realize ki sa ti parey letan Satan ti detourn Lekritir kan i ti tant Zezi Kri. (Matye 4:5-7) I ti mazin sa ki Zezi ti dir lo maryaz, ki Bondye ti kree en zonm ek en fanm, pa en zonm ek de fanm, e ki sa de, pa trwa, ti pou vin en sel laser. I ti reste ferm avek son desizyon e finalman i ti ganny son divors dan sa maryaz poligami. En pti pe letan apre, i ti vin en proklanmater batize e ere.

Kontinyen anons byen Parol Bondye

21, 22. (a) Ki determinasyon nou annan konman bann proklanmater Rwayonm? (b) Ki nou pou vwar dan prosen lartik?

²¹ Parol Bondye i vreman en zouti pwisan pour nou servi pour ed lezot fer sanzman dan zot lavi pour ki zot apros avek Zeova. (Zak 4:8) Bann zouvriye kalifye i servi zot zouti pour ganny bann bon rezilta. Pareyman, fotespere nou determinen pour fer bokou zefor pour byen servi Parol Bondye dan sa travay ki i’n donn nou konman proklanmater Rwayonm.

²² Ki mannyer nou kapab servi Labib dan en fason pli efikas dan nou travay fer disip? En fason ki nou kapab fer sa se par devlop nou abilite pour vin bann ansennyan konvenkan. Silvouple port latansyon lo nou prosen lartik. I pou sizer bann fason pour ansenny e ed lezot aksepte mesaz Rwayonm.

[Not anba lo paz]

Eski ou rapel?

• Ki zouti bann proklanmater Rwayonm i annan?

• Dan ki fason Pol ti en legzanp konman en travayer Rwayonm?

• Kwa ki enplike dan anons byen Parol Bondye?

• Ki kantite pwisan Parol Zeova i ete?

[Kestyon]

[Portre lo paz 10]

Serten zouti ki bann Kretyen i servi dan travay predikasyon Rwayonm