Persekite, me ere
Persekite, me ere
“Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip.”—MATYE 5:11.
1. Ki lasirans Zezi ti donn son bann disip an rapor avek boner ek persekisyon?
PREMYE fwa ki Zezi ti anvoy son bann zapot pres konsernan Rwayonm Bondye, i ti averti zot ki zot ti pou rankontre lopozisyon. I ti dir zot: “Tou dimoun pou ay zot akoz mwan.” (Matye 10:5-18, 22) Me avan sa, dan son Sermon lo montanny, i ti asir son bann zapot ek lezot ki sa bann lopozisyon pa pou neseserman anpes zot trouv vre boner. Annefe, Zezi ti menm asosye boner avek persekisyon konman laprev ki zot Kretyen! Ki mannyer persekisyon i kapab anmenn boner?
Soufer akoz Ladrwatir
2. Dapre Zezi ek zapot Pyer, ki kalite soufrans ki anmenn boner?
2 Zezi ti nonm sa wityenm keksoz ki anmenn boner: ‘Byennere bann ki ganny persekite pour ladrwatir zot pou ganny Rwayonm Lesyel.’ (Matye 5:10) Byensir, soufrans lo li menm i pa en keksoz ki gou. Zapot Pyer ti dir: “Ki benefis en dimoun i gannyen, si i bezwen siport move tretman pour fot ki i’n fer? Me si ou soufer avek pasyans pour sa ki ou’n byen fer, sa i ganny aprouve par Bondye. Me ki personn parmi zot pa soufer konman en kriminel, ou en voler, ou en bandi, ou bann ki mel dan zafer lezot. Me si en dimoun i soufer konman en kretyen, i pa devre onte, me plito rann glwar Bondye, akoz i port sa non.” (1 Pyer 2:20; 4:15, 16) Dapre sa ki Zezi ti dir, soufrans i anmenn boner kan en dimoun i andire akoz ladrwatir.
3. (a) Ki savedir ganny persekite akoz ladrwatir? (b) Ki lefe persekisyon ti annan lo bann premye Kretyen?
3 Nou kapab rekonnet vre ladrwatir par lobeisans anver lavolonte ek lalwa Bondye. Soufer akoz ladrwatir i vedir nou soufer akoz nou reziste sa presyon pour kas bann standar Bondye. Bann zapot ti ganny persekite par bann sef Zwif akoz zot pa ti oule aret pres lo non Zezi. (Akt 4:18-20; 5:27-29, 40) Eski sa ti fer zot perdi zot lazwa oubyen aret prese? Pa ditou! “[Zot] ti kit lasal konsey, byen kontan, ki zot ti’n ganny konsidere diny pour ganny maltrete pour sa Non Senyer. Toulezour zot ti kontinyen prese dan Tanp ek dan bann lakaz e anons Zezi konman Mesi.” (Akt 5:41, 42) Sa persekisyon ti fer zot ere e ti ranforsi zot devouman dan sa travay predikasyon. Plitar, bann premye Kretyen ti ganny persekite par bann Romen akoz zot ti refize ador lanperer.
4. Donn serten rezon akoz bann Kretyen i ganny persekite?
4 Dan nou letan, Temwen Zeova in ganny persekite akoz zot pa oule aret pres “sa Bonn Nouvel Rwayonm.” (Matye 24:14) Kan zot napa drwa fer bann renyon Kretyen, zot pare pour soufer ki aret zwenn ansanm parey Labib i demande. (Ebre 10:24, 25) Zot in ganny persekite akoz zot pa fer parti lemonn oubyen parfwa akoz zot refize pour mal servi disan. (Zan 17:14; Akt 15:28, 29) Me akoz zot siport ladrwatir, sa i fer pep Bondye ozordi annan lape ek boner.—1 Pyer 3:14.
Ganny ensilte akoz Kris
5. Pour ki rezon prensipal pep Zeova i ganny persekite ozordi?
5 Touzour dan son Sermon lo montanny, sa nevyenm keksoz ki Zezi ti dir i anmenn boner, i osi annan pour fer avek persekisyon. I ti dir: ‘Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip.’ (Matye 5:11) En rezon prensipal akoz pep Zeova i ganny persekite, i akoz zot pa form parti sa move sistenm. Zezi ti dir son bann disip: “Si zot, zot ti fer parti lemonn, lemonn ti pou kontan son byen. Me parski, zot pa fer parti lemonn, parski mon’n swazir zot e mon’n retir zot dan lemonn, sanmenm rezon akoz ki i ay zot.” (Zan 15:19) Pareyman, zapot Pyer ti dir: “Bann payen i trouv sa drol, e kritik zot akoz zot nepli partisip dan sa bann move fason viv.”—1 Pyer 4:4.
6. (a) Akoz bann Kretyen swazir ek zot bann konpanyon i ganny ensilte e persekite? (b) Eski sa bann lensilt i fer nou annan mwens boner?
6 Parey nou’n vwar, bann premye Kretyen ti ganny persekite akoz zot pa ti oule aret pres lo non Zezi. Kris ti donn son bann disip en travay pour fer: “Zot a vin mon bann temwen . . . ziska tou bann landrwa pli elwannyen lo later.” (Akt 1:8) Bann Kretyen swazir fidel ki ankor lo later ansanm avek zot bann konpanyon fidel, “gran lafoul,” in fer sa travay avek devouman. (Revelasyon 7:9) Alor, Satan i fer lager avek “leres desandans sa fanm, [lorganizasyon Bondye dan lesyel], avek tou sa ki obei konmannman Bondye e ki fidel avek temwanyaz Zezi.” (Revelasyon 12:9, 17) Konman Temwen Zeova nou rann temwannyaz lo Zezi ki ozordi pe rennyen konman Lerwa dan sa Rwayonm. Sa Rwayonm pou detrir bann gouvernman imen ki pe debout dan semen sa nouvo lemonn drwat Bondye. (Danyel 2:44; 2 Pyer 3:13) Akoz nou rann temwannyaz lo Zezi, nou ganny ensilte e persekite, me nou kontan pour soufer akoz non Kris.—1 Pyer 4:14.
7, 8. Ki mansonz bann ki ti opoz bann vre Kretyen dan premye syek ti fannen?
7 Zezi ti dir ki son bann disip i devret kontan menm ler dimoun i ‘koz manti pour dir tou sort keksoz mal’ kont zot akoz li. (Matye 5:11) Sa ti vreman en realite pour bann premye Kretyen. Kan zapot Pol ti ganny detenir an Ronm, apepre lannen 59-61 N.L., bann sef Zwif ti dir sa lo bann Kretyen: “Bokou dimoun partou pe koz kont sa [‘sekt,’ NW ].” (Akt 28:22) Pol ek Silas ti ganny akize konmkwa zot “in met dezord partou,” e “fer bann keksoz kont lalwa Sezar.”—Akt 17:6, 7.
8 Dan son liv lo bann Kretyen dan letan lanpir Romen, en istoryen ki apel Kenneth Latourette ti dir: “Bann lakizasyon ti varye. Akoz zot pa ti oule partisip dan bann seremoni payen, sa bann Kretyen ti ganny akize konmkwa zot pa krwar dan Bondye. Vi ki zot pa ti fer bokou keksoz ki dimoun dan kominote ti fer—zot ti refize partisip dan bann festivite payen ek bann lanmizman . . .—alor zot ti ganny konsidere konman bann dimoun ki pa kontan lezot imen. . . . I ti annan ki ti dir ki bann fanm ek zonm Kretyen ti zwenn ansanm aswar . . . e zot ti fer sèks antre zot. . . . Lefe ki zis bann krwayan ki ti selebre [Memoryal], sa ti fer annan rimer konmkwa bann Kretyen ti regilyerman sakrifye en zanfan e servi son disan ek laser.” Deplis, vi ki bann premye Kretyen ti refize ador lanperer, zot ti ganny akize konmkwa zot lennmi gouvernman.
9. Ki mannyer bann Kretyen dan premye syek ti reazir kan bann fo lakizasyon ki ti ganny fer kont zot, e ki mannyer sitiasyon i ete ozordi?
9 Sa bann fo lakizasyon pa ti anpes bann premye Kretyen kontinyen akonpli zot travay pour pres sa bon nouvel Rwayonm. Lannen 60-61 N.L., Pol ti kapab koz konsernan sa ‘bon nouvel’ ki ti pe “repann e anmenn benediksyon dan lemonn antye” e ki ti’n “ganny anonse avek tou dimoun dan lemonn antye.” (Kolosyen 1:5, 6, 23) I menm parey ozordi. Bann Temwen Zeova pe ganny akize, parfwa menm parey bann Kretyen dan premye syek. Kantmenm sa, sa travay predikasyon lo mesaz Rwayonm pe trouv sikse e i anmenn boner pour bann ki partisip dan sa travay.
Kontan pour ganny persekite parey bann Profet
10, 11. (a) Ki Zezi ti dir pour konklir sa nef keksoz ki anmenn boner? (b) Akoz bann profet ti ganny persekite? Donn legzanp.
10 Pour konklir son parol lo sa nef keksoz ki anmenn boner, Zezi ti dir: ‘Rezoui . . . , parski koumsa menm zot bann zanset ti persekit bann profet avan zot.’ (Matye 5:12) Bann profet ki Zeova ti anvoye pour averti bann Izraelit enfidel ti ganny mal resevwar e menm ganny persekite. (Zeremi 7:25, 26) Zapot Pol i donn nou laprev pour sa. I ti ekrir: “Ki mon devre dir ankor? Letan i manke pour mwan koz lo . . . bann profet. Par lafwa, zot . . . ti siport bann mokri, kou-d-fwet, e serten ti ganny ansennen e ganny fermen dan prizon.”—Ebre 11:32-38.
11 Pandan letan ki sa move Lerwa Raab ek son madanm, Zezabel, ti pe dirize, bokou profet Zeova ti ganny touye par lepe. (1 Lerwa 18:4, 13; 19:10) Profet Zeremi ti ganny met dan blok dibwa e plitar i ti ganny zete dan en trou labou. (Zeremi 20:1, 2; 38:6) Profet Danyel li ti ganny zete dan trou lyon. (Danyel 6:16, 17) Tou sa bann profet avan lepok Kretyen, ti ganny persekite akoz zot ti defann vre ladorasyon Zeova. En kantite profet ti ganny persekite par bann sef relizye Zwif. Zezi ti apel bann profeser lalwa ek Farizyen “desandan bann ki’n touy bann profet.”—Matye 23:31.
12. Akoz nou Temwen Zeova nou vwar li en privilez pour ganny persekite parey bann profet dan letan ansyen?
12 Nou bann Temwen Zeova, ozordi nou souvannfwa ganny persekite akoz nou pres sa bon nouvel lo Rwayonm avek devouman. Nou bann lennmi i akiz nou konmkwa nou “fors dimoun pour konverti,” me nou konnen ki bann serviter fidel avan nou ti fer fas avek bann menm kritik. (Zeremi 11:21; 20:8, 11) I en privilez pour nou soufer pour menm rezon ki bann profet fidel dan letan ansyen ti soufer. Disip Zak ti ekrir: “Mon bann frer, pran konman legzanp lasoufrans ek pasyans bann profet ki’n anons mesaz Senyer. Wi, nou konsider zot byennere zot ki i’n reste fidel.”—Zak 5:10, 11.
Bann bon Rezon akoz nou ere
13. (a) Akoz persekisyon pa dekouraz nou? (b) Kwa ki permet nou reste fidel e ki sa i prouve?
13 Olye dekouraze akoz persekisyon, nou ganny rekonforte ler nou mazinen ki nou pe swiv legzanp bann profet, bann premye Kretyen, ek Zezi Kri. (1 Pyer 2:21) Sa ki Labib i dir i donn nou bokou satisfaksyon, tel parey sa parol ki zapot Pyer ti dir: “Mon bann byenneme pa bezwen etonnen par bann soufrans ki zot pe pas ladan pour teste zot, konmsi sa ki pe ariv zot ti bann keksoz ekstraordiner. Si zot ganny maltrete pour non Kris, zot ere, parski Lespri laglwar, Lespri Bondye i repoz lo zot.” (1 Pyer 4:12, 14) Atraver leksperyans nou konnen ki nou kapab reste fidel, gras a lespri sen Zeova ki toultan avek nou e fortifye nou. Sa sipor ki lespri sen i donn nou, i prouve ki nou ganny benediksyon Zeova e sa i anmenn en kantite boner pour nou.—Psonm 5:12; Filipyen 1:27-29.
14. Ki rezon nou annan pour rezwir ler nou ganny persekite akoz ladrwatir?
14 En lot rezon akoz nou kontan ler nou ganny opoze e persekite pour ladrwatir, se akoz i prouve ki nou pe viv konman bann vre Kretyen ki fidel avek Bondye. Zapot Pol ti ekrir: “Tou sa ki oule viv en lavi fidel dan Kris Zezi pou ganny persekite.” (2 Timote 3:12) Nou vreman kontan pour konnen ki ler nou gard nou fidelite dan difikilte, sa i en lot larepons kont provokasyon Satan ki ti dir ki bann serviter Zeova i servi Li zis akoz zot benefisye. (Zob 1:9-11; 2:3, 4) Menm si nou pa zwe en gran rol, nou rezwir parski nou annan en par pour zwe pour zistifye drwa Zeova pour dirize.—Proverb 27:11.
Nou Rekonpans i vreman fer nou ere
15, 16. (a) Ki rezon Zezi in donnen pour nou ‘rezoui e santi nou ere’? (b) Ki rekonpans ki’n ganny rezerve dan lesyel pour bann Kretyen swazir e ki rekonpans lezot “mouton,” pou gannyen?
15 Zezi ti donn ankor en lot rezon akoz nou devret ere ler nou ganny akize e persekite parey bann profet dan letan ansyen. Alafen sa nevyenm keksoz ki anmenn boner, i ti dir: ‘Rezoui e santi zot ere akoz zot annan en gran rekonpans dan lesyel.’ (Matye 5:12) Zapot Pol ti ekrir: “Rekonpans pour pese i lanmor, me don gratwit ki Bondye i donnen i lavi eternel dan Kris-Zezi nou Senyer.” (Romen 6:23) Wi, sa ‘gran rekonpans’ i lavi, e i pa en lapey ki nou kapab gannyen. I en kado. Zezi ti dir ki sa rekonpans i “dan lesyel,” akoz i sorti kot Zeova.
16 Bann Kretyen swazir i ganny “kouronn lavi” avek Kris dan lesyel. (Zak 1:12, 17) Bann lezot “mouton” ki annan lespwar pour viv lo later i enpasyan pour ganny lavi eternel dan paradi lo later. (Zan 10:16; Revelasyon 21:3-5) Pour tou le de group, sa rekonpans i pa en keksoz ki zot vreman merite gannyen. Bann Kretyen swazir ek lezot “mouton” i ganny sa rekonpans gras a sa “gran lagras” sorti kot Zeova. Sa ti pous zapot Pol pour dir: “Annou rann gras Bondye pour son gran don.”—2 Korentyen 9:14, 15.
17. Akoz nou kapab rezoui e vreman “ere” kan nou ganny persekite?
17 Zapot Pol ti ekrir bann Kretyen ki ti pe al ganny persekite dan en fason kriyel par lanperer Nero: “Nou rezoui osi dan nou bann soufrans, akoz nou konnen ki lasoufrans i prodwi perseverans, perseverans i prodwi fidelite dan leprev e fidelite i prodwi lesperans. Sa lesperans pa tronp nou.” I ti osi dir: “Ki ou lesperans i gard ou dan lazwa, ki dan lasoufrans ou ganny bokou pasyans.” (Romen 5:3-5; 12:12) Ki swa nou annan lespwar pour viv dan lesyel oubyen lo later, nou pa pou kapab konpar nou rekonpans pour nou fidelite dan difikilte avek okenn lezot keksoz. Nou lazwa napa limit, lefe ki nou annan sa lespwar pou viv pour touzour pour servi e loue nou Papa lanmour, Zeova, anba nou Lerwa Zezi Kri. Alor, sa i vreman fer nou “ere.”
18. Ki nou ekspekte bann nasyon fer anmezir ki lafen i aprose, e ki Zeova pou fer?
18 Dan serten pei, bann Temwen Zeova in ganny persekite e zot ankor pe ganny persekite. Dan son profesi ki koz konsernan lafen sa sistenm, Zezi ti averti bann vre Kretyen: ‘Tou dimoun pou ay zot akoz mwan.’ (Matye 24:9) Anmezir ki lafen i aprose, Satan pou fer bann nasyon montre zot laenn kont pep Zeova. (Ezekyel 38:10-12, 14-16) Sa pou endike ki i’n ariv ler pour Zeova azir. “Sirman mon pou fer zot konn mon grander ek mon sentete e mon pou fer bokou nasyon vwar mwan avek zot lizye; e zot pou bezwen konnen ki mwan mon Zeova.” (Ezekyel 38:23) Zeova pou glorifye son gran non e tir son pep anba persekisyon. Alor, “byennere sa dimoun ki reste ferm dan leprev.”—Zak 1:12.
19. Anmezir ki nou pe esper sa gran “zour Zeova,” ki nou devret fer?
19 Anmezir ki sa gran “zour Senyer” i vin pli pros, annou rezwir parski nou’n “ganny konsidere diny” pour non Zezi. (2 Pyer 3:10-13; Akt 5:41) Parey bann premye Kretyen, annou kontinyen ansenny e anons sa bon nouvel konsernan Kris ek son Rwayonm, anmenmtan ki nou pe esper nou rekonpans dan sa nouvo lemonn drwat.—Akt 5:42; Zak 5:11.
Revizyon
• Ki savedir soufer akoz ladrwatir?
• Ki lefe persekisyon ti fer lo bann premye Kretyen?
• Akoz nou kapab dir ki bann Temwen Zeova i ganny persekite parey bann profet dan letan ansyen?
• Akoz nou kapab ‘rezoui e santi nou ere’ ler nou ganny persekite?
[Kestyon]
[Portre lo paz 28]
“Zot byennere, kan en dimoun i ensilte zot, persekit zot”
[Portre lo paz 29]
Group ki dan prizon: Chicago Herald-American