Mars dan en Fason ki san Defo
Mars dan en Fason ki san Defo
“Mwan, mon pou mars dan en fason ki san defo.”—PSONM 26:11.
1, 2. (a) Akoz lafason ki zonm i viv i relye etrwatman avek drwa Bondye pour dirize? (b) Ki mannyer bann kreasyon Bondye ki annan lentelizans i kapab montre ki zot siport drwa Zeova pour dirize?
KAN Satan ti rebel dan zarden Edenn, i ti lev en kestyon ki enplik tou imen. Sa kestyon i eski Bondye i annan drwa diriz son bann kreasyon. Plitar, i ti ensiste ki zonm i servi Bondye osi lontan ki i dan zot lavantaz. (Zob 1:9-11; 2:4) Alors lafason ki bann imen i viv zot lavi i relye etrwatman avek sa kestyon lo si Zeova i annan drwa pour dirize.
2 Kantmenm drwa Bondye pour dirize pa depan lo fason ki bann imen ek bann lanz Bondye i viv, zot kapab montre zot pozisyon an rapor avek sa kestyon. Konman? Par swazir pour viv en lavi ki moralman drwat oubyen lotreman. Sa i en baz solid lo ki en dimoun i kapab ganny zize.
3. (a) Ki kalite Zob ek David ti anvi Zeova i egzaminen e ziz zot lo la? (b) Ki kestyon sa i fer leve lo sa kalite?
3 Avek konfyans Zob ti dir: “[Zeova] pou pez mwan dan en balans ki egzakt e Bondye pou konnen si mon san defo.” (Zob 31:6) Sanmenm sa ki Lerwa David dan ansyen Izrael ti demann Zeova pour egzaminen dan son lapriyer; si i san defo. I ti priye: “Ziz mwan, Zeova, parski mwan mon’n mars dan en fason ki san defo, e mon’n met konfyans dan Zeova, pour ki mon pa drive.” (Psonm 26:1) I vreman enportan ki nou osi nou mars dan en fason ki san defo! Me kwa ki fer nou san defo, oubyen mars dan en fason ki san defo? Kwa ki pou ed nou reste san defo?
‘Mon’n mars dan en Fason ki san Defo’
4. Dekrir en dimoun ki san defo.
4 Dapre son mo Ebre, en dimoun ki ganny konsidere konman san defo i bezwen onnet, drwat e san okenn repros. Me sa kalite i enplik plis ki zis fer sa ki byen. Dan son leker osi, sa dimoun i bezwen anvi fer tou sa ki byen e atase avek Bondye. Satan ti kestyonn motivasyon Zob kan i ti dir avek Bondye: “Pour en sanzman, silvouple, anvoy ou lanmen e tous ziska son lezo ek son laser e ou a vwar si i pa modi ou dan ou figir menm.” (Zob 2:5) Alors, apard ki fer sa ki byen, en dimoun i bezwen annan sa bon motivasyon dan son leker pour li ganny konsidere konman san defo.
5. Kwa ki montre ki nou pa bezwen parfe pour nou ganny konsidere konman san defo?
5 Me pa bezwen ki en dimoun i parfe pour li ganny konsidere konman san defo. Lerwa David ti enparfe e diran son lavi i ti fer ennde fot grav. Pourtan, Labib i dir ki i ti en zonm ki ti annan ‘en leker san defo.’ (1 Lerwa 9:4) Akoz sa? Parski David ti kontan Zeova. Son leker ti pour Bondye. I ti pare pour aksepte son fot, aksepte son blanm, e i ti koriz son fason fer. Anfet, sa fidelite ek lanmour senser ki David ti annan pour Bondye i montre ki i ti en zonm san defo.—Deterononm 6:5, 6.
6, 7. Ki i enplike dan mars dan en fason ki san defo?
6 En dimoun san defo pa demontre sa kalite zis dan serten laspe son lavi, par egzanp zis dan son lavi spirityel. I tous tou laspe son lavi. David ti “mars” dan en fason ki ti san defo. The New Interpreter’s Bible i dir ki sa “verb ‘marse’ i refer avek ‘fason viv’ oubyen ‘stil lavi.’ ” Sa psalmis ti pe koz lo bann ki “zot lavi i san defo,” kan i ti sante: “Byennere bann ki obzerv bann rapel [Bondye]; avek tou zot leker zot kontinyen rod li. Vreman zot pa’n pratik sa ki mal. Zot in mars dan son semen.” (Psonm 119:1-3) En dimoun ki san defo i toultan oule fer lavolonte Bondye e mars dan son semen.
7 Nou mars dan en fason ki san defo kan nou reste fidel avek Bondye menm dan bann sitiasyon difisil. Sa kalite i vin pli evidan dan nou kan nou persevere dan difikilte, reste ferm kantmenm maler i arive, oubyen nou reziste tantasyon sa lemonn mesan. Nou ‘rezwir leker Zeova’ parski i kapab reponn sa enn ki pe provok li. (Proverb 27:11) Nou annan rezon alors pour determinen parey Zob, ki ti dir: “Ziska mon lanmor, mon pou reste san defo!” (Zob 27:5) Vennsizyenm Psonm i montre kwa ki kapab ed nou mars dan en fason ki san defo.
“Pirifye mon Ronnyon ek mon Leker”
8. Ki ou aprann atraver siplikasyon David pour Zeova egzamin son ronnyon ek son leker?
8 David ti priye: “Egzamin mwan Zeova e teste mwan; pirifye mon ronnyon ek mon leker.” (Psonm 26:2) Nou ronnyon i trouve en pe profon dan nou lekor. Dan en sans senbolik, nou ronnyon i reprezant nou panse ek santiman pli profon. Tandis ki nou leker i sa dimoun ki nou ete anndan, nou motivasyon, santiman, ek lentelizans. Kan David ti demann Zeova pour egzamin li, i ti priye ki Zeova i rod son bann panse ek santiman pli profon e egzamin zot.
9. Konman Zeova i pirifye nou ronnyon ek leker senbolik?
9 David ti sipliy Bondye pour pirifye son ronnyon ek son leker. Ki mannyer Zeova i pirifye sa ki nou ete anndan? David ti sante: “Mon pou beni Zeova, ki’n donn mwan konsey. Vreman, pandan lannwit mon ronnyon in koriz mwan.” (Psonm 16:7) Ki sa i vedir? Savedir konsey Bondye ti’n desann byen profon dan David e reste la, kot i ti koriz son bann panse ek santiman pli profon. Menm keksoz i kapab ariv avek nou si nou reflesir avek lapresyasyon lo konsey ki nou gannyen dan Parol Bondye, atraver son bann reprezantan, ek son lorganizasyon, e les li reste profon dan nou. Ler nou priy Zeova regilyerman pour pirifye nou dan sa fason, i pou ed nou mars dan en fason ki san defo.
‘Ou Labonte Leker i devan mwan’
10. Kwa ki ti ed David pour mars dan laverite Bondye?
10 David ti kontinyen: “Ou labonte leker i devan mon lizye, e mon’n mars dan ou laverite.” (Psonm 26:3) David ti konn byen konman Bondye ti demontre son labonte leker, e i ti reflesir lo la avek bokou lapresyasyon. I ti sante: “Beni Zeova, mon nanm, e pa oubliy tou sa ki i’n fer.” I ti pe mazin en keksoz ki Bondye ‘ti’n fer’ ler i ti kontinyen par dir: “Zeova pe enplimant ladrwatir e pas zizman pour bann ki’n ganny trike. I ti fer Moiz konn son semen, e bann garson Izrael konn son fason azir.” (Psonm 103:2, 6, 7) Petet David ti pe mazin kan bann Ezipsyen ti trik bann Izraelit dan letan Moiz. Si sa ti leka, reflesir lo konman Zeova ti fer konnen Moiz ki mannyer i ti pou delivre zot, ti’n bezwen tous leker David e fer li pli determinen pour mars dan laverite Bondye.
11. Kwa ki kapab ed nou pour mars dan en fason ki san defo?
11 Etidye Parol Bondye regilyerman e reflesir lo sa ki nou aprann ladan pou osi ed nou mars dan en fason ki san defo. Par egzanp, mazin Zozef ki ti taye kan madanm Potifar ti oule dormi avek li, i kapab ankouraz nou pour fer parey kan nou ganny bann propozisyon koumsa dan travay, kot lekol, oubyen lezot landrwa. (Zenez 39:7-12) Be kan nou ganny tante avek bann loportinite pour ganny plis lo plan materyel oubyen pour ganny rekonnet e ganny pozisyon dan sa lemonn? Nou annan legzanp Moiz, ki ti rezet bann trezor Lezip. (Ebre 11:24-26) Gard antet pasyans Zob pou sirman ed nou fortifye nou determinasyon pour reste fidel avek Zeova malgre maladi ek maler. (Zak 5:11) Si nou ganny persekite? Be nou kapab mazin leksperyans Danyel ki ti ganny zete dan trou avek lyon. Sa i a donn nou bokou kouraz!—Danyel 6:16-22.
“Mon pa’n asiz avek bann Manter”
12, 13. Ki kalite frekantasyon nou devret rezete?
12 David ti mansyonn en lot fakter ki ti ed li mars san defo: “Mon pa’n asiz avek bann manter; e mon pa frekant bann ki kasyet sa ki zot ete. Mon’n deteste lasanble bann ki pratik lemal, e mon pa’n asiz avek bann mesan.” (Psonm 26:4, 5) David pa ti oule asiz avek bann mesan. I pa ti kontan move frekantasyon.
13 Be nou? Eski nou refize asiz avek bann manter ki nou vwar lo televizyon, video, sinema, sit Internet, oubyen lezot mwayen? Eski nou gard nou zistans avek bann ki kasyet sa ki zot ete? Serten kot lekol oubyen kot travay i kapab fer krwar zot anvi vin nou zanmi avek bann move lentansyon antet. Eski nou vreman anvi devlop en relasyon pros avek bann ki pa viv dapre laverite Bondye? Bann aposta osi i kapab fer krwar zot senser, me kasyet zot lentansyon pour fer nou aret servi Zeova. Ki nou pou dir lo serten Kretyen dan kongregasyon ki annan de kalite lavi? Zot osi zot kasyet sa ki zot vreman ete. Jayson ki pe servi konman en asistan ministeryel, ti annan bann zanmi koumsa kan i ti pli zenn. I dir sa lo zot: “En zour, enn parmi zot ti dir mwan: ‘I pa enportan ki nou fer ozordi parski ler nouvo sistenm pou vini, nou pou’n mor. Alors, nou pa pou konnen ki nou pe manke.’ Sa konversasyon ti tap mwan. Mon pa ti anvi mor ler nouvo sistenm i vini.” Jayson ti azir avek lasazes e i ti arete frekant sa bann zanmi. Zapot Pol ti averti: “Pa les zot ganny anbete: ‘Move frekantasyon, i gat repitasyon.’ ” (1 Korentyen 15:33) Pa i enportan ki nou rezet move frekantasyon!
‘Mon pou anons ou bann Travay merveye’
14, 15. Ki mannyer nou kapab ‘mars otour lotel Zeova’?
14 David ti kontinyen: “Mon pou lav mon lanmen dan linosans, e mon pou mars otour ou lotel, Zeova.” Akoz? “Pour fer tande mon remersiman avek en lavwa for, e pour anons tou ou bann travay merveye.” (Psonm 26:6, 7) David ti anvi reste prop moralman pour li kapab ador Zeova e fer konnen son latasman avek Bondye.
15 Tou sa ki ti annan pour fer avek vre ladorasyon kot tabernak e plitar kot tanp ti “en kopi e en lonbraz sangtyer ki dan lesyel.” (Ebre 8:5; 9:23) Lotel i reprezant lefe ki Zeova in aksepte sakrifis Zezi Kri pour liber bann imen. (Ebre 10:5-10) Nou lav nou lanmen dan linosans e ‘mars otour lotel Zeova’ par demontre lafwa dan sa sakrifis.—Zan 3:16-18.
16. Ki mannyer nou benefisye kan nou fer lezot konn konsernan bann travay merveye Bondye?
16 Kan nou reflesir lo tou sa ki sa ranson i fer posib pour nou, eski nou leker pa deborde avek rekonesans pour Zeova ek son sel Garson? Alors avek lapresyasyon dan nou leker, annou fer lezot konn bann travay merveye Bondye—depi kreasyon zonm dan zarden Edenn ziska sa letan kot i pou refer tou keksoz a-nef dan lemonn nouvo. (Zenez 2:7; Akt 3:21) Deplis, pres lo sa Rwayonm e fer disip i en gran proteksyon spirityel! (Matye 24:14; 28:19, 20) Kan nou reste okipe dan sa travay, i ede pour gard nou lespwar pour lavenir briye, nou lafwa dan promes Bondye for, e nou lanmour pour Zeova ek nou prosen vivan.
“Mon kontan reste dan ou Lakaz”
17, 18. Ki latitid nou devret annan anver bann renyon Kretyen?
17 Tabernak, ansanm avek son lotel pour sakrifis, ti sant ladorasyon an Izrael. David ti montre konman i kontan sa landrwa, kan i ti priye: “Zeova, mon kontan reste dan ou lakaz e sa landrwa kot ou laglwar i reste.”—Psonm 26:8.
18 Eski nou kontan sa landrwa kot nou rasanble pour Zeova ansenny nou? Tou Lasal Rwayonm avek son progranm lenstriksyon spirityel sak semenn, i servi konman sant vre ladorasyon dan kominote. Deplis, nou annan nou bann diferan lasanble tou le zan. Bann “rapel” Zeova i ganny diskite dan sa bann renyon. Si nou aprann “kontan zot en kantite,” nou pou enpasyan pour asiste renyon e nou pou atantif dan renyon. (Psonm 119:167) Pa i ankourazan kan nou avek nou bann frer ek ser ki enterese avek nou byennet e ki ed nou kontinyen viv en lavi san defo!—Ebre 10:24, 25.
‘Pa pran mon Lavi’
19. Pour ki pese David pa ti anvi ganny trouve koupab?
19 Vi ki David ti konn byen konsekans al kont laverite Bondye, i ti sipliye: “Pa pran mwan ansanm avek bann peser, ni mon lavi ansanm avek bann zonm ki’n vers disan, ki dan zot lanmen i annan kondwit deregle, e ki zot lanmen drwat i plen avek koripsyon.” (Psonm 26:9, 10) David pa ti anvi ganny enkli parmi bann zonm ki annan kondwit deregle oubyen bann ki ti pe fer koripsyon.
20, 21. Kwa ki kapab fer nou mars parey bann dimoun ki pa servi Bondye?
20 Lemonn ozordi in ganny anvair avek bann pratik imoral. Televizyon, magazin, ek film i ankouraz kondwit deregle—“aksyon imoral, lenpirte, vis.” (Galat 5:19) Serten in vin lesklav pornografi, ki souvan fini par kondwit imoral. Bann zenn sirtou i fasilman ganny enfliyanse par sa. Dan bann pei ki zot vwar pwente konman normal, bann adolesan i santi sa presyon ki zot bezwen annan en boyfriend oubyen girlfriend. Bokou zenn i konmans kontan boner, menm si zot tro zenn pour marye. Pa bokou letan apre, zot vin tro entim e ganny pour dormi ansanm pour satisfer sa dezir seksyel ki vin deplizanpli for dan zot.
21 Bann adilt osi i ganny afekte avek bann move lenfliyans. Malonnekte dan biznes ek en tandans pour fer bann desizyon ki zis dan nou lavantaz i endike ki nou nepli mars san defo. Mars dapre lafason ki sa lemonn pe ale i zis elwanny nou avek Zeova. Annou “ay sa ki mal, e kontan sa ki byen” e kontinyen mars dan en fason ki san defo.—Amos 5:15.
“Liber mwan e montre mwan Faver”
22-24. (a) Ki lankourazman ou kapab trouve dan konklizyon Psonm 26? (b) Ki pyez ki nou pou diskite dan lartik swivan?
22 David ti fini eksprim li avek Bondye par sa parol: “Mwan, mon pou mars dan en fason ki san defo. Liber mwan e montre mwan faver. Mon prop lipye pou sirman debout lo en landrwa plat; mon pou beni Zeova parmi bann lafoul ki’n rasanble.” (Psonm 26:11, 12) Determinasyon David pour kontinyen mars dan en fason ki san defo, i mars kotakot avek son siplikasyon pour ganny libere. Pa sa i ankourazan! Kantmenm nou peser, Zeova pou ed nou si nou determinen pour mars dan en fason ki san defo.
23 Fotespere nou fason viv i montre ki nou respe e apresye drwa Bondye pour dirize dan tou laspe nou lavi. Nou tou endividyelman, nou kapab demann Zeova pour egzamin e pirifye nou bann panse ek santiman pli profon. Nou kapab toultan reflesir lo son laverite par etidye seryezman son Parol. Annou fer tou mwayen posib alors pour rezet move frekantasyon. Plito, annou beni Zeova parmi bann lafoul ki rasanble pour ador li. Annou prese e fer disip avek devouman, e pa zanmen les lemonn met an danze nou relasyon presye avek Bondye. Ler nou fer nou mye pour mars dan en fason ki san defo, nou kapab annan konfyans ki Zeova pou montre nou faver.
24 Vi ki mars dan en fason ki san defo i tous tou laspe nou lavi, nou bezwen konsyan ki labi lalkol i en pyez vreman danzere. Lartik swivan pou diskit sa size.
Eski ou rapel?
• Akoz bann kreasyon Bondye ki annan lentelizans i kapab ganny zize pour vwar si zot san defo?
• Dekrir en dimoun san defo, e ki enplike dan mars dan en fason ki san defo?
• Kwa ki pou ed nou pour mars dan en fason ki san defo?
• Ki danze nou bezwen konsyan e evite pour nou reste san defo?
[Kestyon]
[Portre lo paz 23]
Eski tanzantan ou demann Zeova pour egzamin ou bann panse pli profon?
[Portre lo paz 23]
Eski ou kontinyen vwar konman Zeova in demontre son labonte leker?
[Portre lo paz 24]
Kan nou reste san defo dan difikilte, sa i fer leker Zeova kontan
[Portre lo paz 25]
Eski ou byen servi bann provizyon Zeova pour ed ou mars dan en fason ki san defo?