Fodre ou kouraze, Zeova i avek Ou!

“Fodre ou kouraze e for. . . . Zeova ou Bondye i avek ou.”​—ZOZ. 1:9.

KI OU POU REPONN?

Ki Zozye ti bezwen fer pour gard son lafwa ek kouraz?

Ki legzanp kouraz ou pli kontan?

Ki legzanp lafwa ek kouraz ki kapab ed ou dan predikasyon?

1, 2. (a) Ki kalite ki pou ed nou fer fas avek leprev? (b) Ki si sa lafwa? Donn legzanp.

SERVIS Zeova i anmenn lazwa. Me, nou tou nou eksperyans bann difikilte ki tou imen i pas atraver e nou menm kapab pe “soufer an fezan sa ki byen.” (1 Pyer 3:14; 5:8, 9; 1 Kor. 10:13) Pour kapab reisi fer fas avek sa bann leprev, nou bezwen lafwa ek kouraz.

² Ki si sa lafwa? Zapot Pol ti ekrir: “Lafwa i lasirans dan keksoz ki ou pe espere, e sertitid keksoz ki ou pa’n war.” (Ebr. 11:1) En lot tradiksyon i dir: “Lafwa i parey en dokiman an ekrir bann keksoz ki nou pe espere. Lafwa se ler nou asire lo bann keksoz ki nou pa vwar.” (The Simple English Bible) Si nou ganny en dokiman konmkwa nou propriyeter en bout later, nou asire ki sa bout later i pour nou, non? Vi ki nou annan lafwa ki Bondye i touzour fer sa ki i dir, i konmsi nou annan en dokiman an ekrir konsernan son promes. Nou lafwa i fer nou asire ki nou pou vwar lakonplisman bann promes sorti dan Labib ki nou pe espere e nou asire ki tou sa ki Labib i dir i vre, menm si nou pa kapab vwar li.

3, 4. (a) Ki si sa kouraz? (b) Dan ki fason nou kapab ranforsi nou lafwa ek kouraz?

³ En dimoun kouraze i “brav spirityelman, emosyonnelman e moralman e i azir san okenn lafreyer ler i fer fas avek bann lobstak ek danze.” (The New Interpreter’s Dictionary of the Bible) En dimoun kouraze i enn ki for, brav e menm ardyese.​—Mark 6:49, 50; 2 Tim. 1:7.

⁴ Lafwa ek kouraz i bann zoli kalite ki nou devret annan. Me, meton nou santi sa bezwen pour annan plis lafwa e nou pa santi nou sitan kouraze. Be, i annan en kantite dimoun dan Labib ki bann bon legzanp pour demontre sa bann kalite. Alor, en fason  nou kapab ranforsi nou lafwa ek kouraz, se ler nou egzamin legzanp sa bann dimoun.

ZEOVA TI AVEK ZOZYE

5. Ki Zozye ti bezwen pour reisi dan sa ki i ti annan pour fer?

⁵ Annou retourn apepre 3,500-z-an pase. Karant lannen ti’n pase depi ki plizyer milyon Izraelit ti’n ganny delivre par lanmen pwisan Zeova anba lesklavaz Lezip. Profet Moiz ki ti pe diriz zot. Aprezan, a laz 120-t-an, i ti pou zis kapab get Later Promiz dan lwen e apre mor lo Montanny Nebo. Zozye, en zonm fidel ki ti “ranpli avek lasazes” ti pou vin son sikseser. (Det. 34:1-9) Bann Izraelit ti pros pour pran posesyon Kanaan. Pour reisi konman zot sef, Zozye ti pou bezwen lasazes sorti kot Bondye. I ti devret kouraze, for e osi demontre lafwa dan Zeova.​—Det. 31:22, 23.

6. (a) Ki Zozye 23:6 i ankouraz nou pour fer? (b) Ki nou aprann atraver bann parol dan Akt 4:18-20 ek Akt 5:29?

⁶ Lasazes, kouraz ek lafwa ki Zozye ti demontre pandan tou sa letan ki zot ti pe konkerir Kanaan ti’n vreman bezwen ankouraz bann Izraelit. Zot ti bezwen brav pa zis ler zot ti pe lager avek zot lennmi, me osi annan kouraz pour obei Bondye. Ver lafen son lavi, dan son bann dernyen parol avek bann Izraelit, Zozye ti dir: “Zot devret vreman kouraze pour obei e fer tou sa ki’n ganny ekrir dan liv lalwa Moiz e pa zanmen detourn zot avek li pour al lo kote drwat oubyen lo kote gos.” (Zoz. 23:6) Nou osi nou bezwen kouraz pour arive obei Zeova toultan. Sa i devret le ka menm dan bann sityasyon kot bann imen i oule nou fer lekontrer avek sa ki Bondye i ekspekte. (Lir Akt 4:18-20; 5:29.) Pareyman, si nou depan lo Zeova dan lapriyer, i pou ed nou reste ferm avek kouraz.

KONMAN POUR REISI DAN LAVI?

7. Pour azir avek kouraz e reisi dan lavi, Zozye ti bezwen fer kwa?

⁷ Pour kapab annan sa kouraz pour fer lavolonte Bondye, nou bezwen absoliman etidye e aplik son Parol. Sanmenm ki Zozye ti ganny dir ler i ti vin sikseser Moiz: “Fodre ou kouraze e byen for pour fer sir ki ou fer tou dapre tou lalwa ki Moiz mon serviter in donn ou lord pour fer. . . . Sa liv lalwa pa devret elwannyen avek ou labous, ou devret lir li avwabas lizour konman aswar, pour fer sir ki ou fer tou dapre sa ki’n ganny ekrir, si ou fer sa ou pou reisi dan tou sa ki ou fer e ou pou azir avek lasazes.” (Zoz. 1:7, 8) Zozye ti swiv sa konsey e i ti ‘reisi dan tou sa ki i ti fer.’ Si nou fer parey, nou pou annan plis kouraz e nou pou pli byen reisi dan nou servis pour Bondye.

8. Teks pour lannen 2013 i sorti dan ki verse e ki mannyer ou krwar sa parol pou ed ou?

⁸ Manke Zozye ti’n vreman ganny ankouraze ler Zeova ti dir li: “Fodre ou kouraze e for. Pa bezwen soke oubyen tranble avek lafreyer, akoz Zeova ou Bondye i avek ou partou kot ou ale.” (Zoz. 1:9) Zeova i avek nou osi. Alor, annou pa “soke oubyen tranble avek lafreyer” dan nenport ki leprev nou kapab ladan. Sirtou,  rapel byen sa parol: “Fodre ou kouraze e for. . . . Zeova ou Bondye i avek ou.” Sa parol ki dan Zozye 1:9 in ganny swazir konman teks pour lannen 2013. I pou sirman donn nou lafors pandan bann mwan ki pe vini, zis parey parol ek aksyon sa bann lezot legzanp lafwa ek kouraz.

ZOT TI RESTE FERM AVEK KOURAZ

9. Dan ki fason Raab ti demontre lafwa ek kouraz?

⁹ Kan Zozye ti anvoy de espyon Kanaan, en prostitye ki ti apel Raab ti kasyet zot e fer zot lennmi al dan en lot direksyon. Akoz son lafwa ek kouraz, li, ensi ki son fanmir ti ganny sove kan bann Izraelit ti defet lavil Zeriko. (Ebr. 11:30, 31; Zak 2:25) Byensir, Raab ti aret viv en lavi imoral pour ki i fer plezir Zeova. Serten ki’n vin Kretyen in annan sa lafwa, kouraz ek determinasyon pour fer bann menm sanzman pour servi Bondye.

10. Dan ki sirkonstans Rit ti pran pozisyon pour vre ladorasyon, e ki rezilta sa ti anmennen?

¹⁰ Apre lanmor Zozye, Rit en madanm Moabit ti demontre kouraz par pran en pozisyon ferm pour vre ladorasyon. Tre probab, lefet ki i ti vev en zonm Izraelit, i ti konn keksoz lo Zeova. Son belmer Naomi osi ti en vev ki ti reste Moab, me i ti deside pour retourn Betleenm en lavil Izraelit. Dan semen, Naomi ti sipliy Rit pour retourn kot son pep, me Rit ti reponn: “Pa ensiste avek mwan pour abandonn ou, e pour aret swiv ou. . . . Ou pep pou vin mon pep, e ou Bondye mon Bondye.” (Rit 1:16) Rit ti vreman senser ler i ti dir sa parol. Avek letan, Boaz, en fanmir pros Naomi ti marye avek Rit e Rit ti ganny en garson ki ti vin granpye David ek Zezi. Zeova i definitivman beni bann aksyon ki demontre lafwa ek kouraz.​—Rit 2:12; 4:17-22; Mat. 1:1-6.

BOKOU TI RISKE ZOT LAVI

11. Dan ki fason Yeoyada ek Yeoseba ti demontre kouraz e ki zot ti akonplir?

¹¹ Nou kouraz ek lafwa i ganny ranforsi ler nou vwar ki Bondye i avek sa bann ki met lentere Bondye premye e byennet zot bann frer ek ser avan sa ki pour zot. Pran legzanp Gran Pret Yeoyada ek son madanm Yeoseba. Apre ki Lerwa Aazya ti mor, Atali son manman ti touy larestan bann desandans rwayal eksepte Yeoas e pran pardfors pozisyon konman larenn. Yeoyada ek Yeoseba ti riske zot lavi pour sov e kasyet Yeoas garson Aazya pour si-z-an. Dan setyenm lannen, Yeoyada ti fer Yeoas vin lerwa e i ti met Atali a mor. (2 Rwa. 11:1-16) Plitar, Yeoyada ti siport Lerwa Yeoas ler i ti repar tanp. Kan Yeoyada ti mor a laz 130 an, i ti ganny antere avek bann lerwa “akoz i ti’n fer sa ki byen an Izrael e anver sa vre Bondye ek Son lakaz.” (2 Kron. 24:15, 16) Deplis, kouraz Yeoyada ek son madanm ti prezerv sa laliny desandans rwayal depi David ziska Mesi.

12. Ki aksyon kouraze Ebed-Melek ti pran?

¹² Ebed-Melek, en zofisye dan lakour Lerwa Tsidkya ti riske son lavi pour Zeremi. Lerwa ti livre Zeremi avek bann prens Zida ki ti akiz li lo bann fo sarz konmkwa i ti’n revolte kont lerwa e zet li dan en pwi labou akoz zot ti oule touy li. (Zer. 38:4-6) Menm si i ti en danze pour li parski dimoun ti ay Zeremi, Ebed-Melek ti enplor Tsidkya pour sov lavi sa profet. Tsidkya ti aksepte son demann e i ti fer 30 zonm akonpanny Ebed-Melek pour delivre Zeremi. Atraver sa profet, Bondye ti asir Ebed-Melek ki i pa ti pou mor ler Babilonn ti pou atak  Zerizalenm. (Zer. 39:15-18) Kouraz ek lafwa dan Bondye i definitivman ganny rekonpanse!

13. Ki mannyer sa trwa Ebre ti demontre kouraz e ki leson nou kapab aprann avek zot leksperyans?

¹³ Diran setyenm syek A.N.L., trwa serviter Ebre Zeova ti vwar levidans konkret ki Zeova i rekonpans bann ki demontre lafwa ek kouraz. Lerwa Neboukadnetsar ti ralye tou bann o zofisye e demann zot pour ador en gran stati annor. Nenport dimoun ki pa ti fer sa, ti pou ganny touye dan en four dife. Sa trwa zonm Ebre ti dir Neboukadnetsar avek respe: “Nou Bondye ki nou pe servi i kapab sov nou. I pou sov nou dan sa four dife vreman so e dan ou lanmen, O lerwa. Si non, ou devret konnen, O lerwa, ki ou bann bondye i pa sa bann ki nou pe servi, e sa stati annor ki ou’n met debout la, nou pa pou adore.” (Dan. 3:16-18) Delivrans ekstraordiner sa trwa Ebre i ganny dekrir dan Danyel 3:19-30. Menm si petet nou pa pe ganny menase pour ganny zete dan en four dife, nou osi nou lentegrite i ganny teste e nou asire ki Bondye pou beni nou lafwa ek kouraz.

14. Dapre Danyel sapit 6, dan ki fason Danyel ti azir avek kouraz e avek ki rezilta?

¹⁴ Danyel ti demontre lafwa ek kouraz ler son bann lennmi ti fors Lerwa Daryis pour pas en lalwa konmkwa “nenport ki, ki fer en demann anver nenport bondye oubyen zonm dan lespas trant zour eksepte anver . . . lerwa, sa dimoun i devret ganny zete dan trou lyon.” Me desito ki Danyel ti tande ki en dokiman ti’n ganny sinyen, i “ti antre dan son lakaz, e lafnet dan son lasanm anler ki ti vir ver Zerizalenm ti ouver, e trwa fwa par zour i ti tonm azenou e fer lapriyer e ofer louanz devan son Bondye, zis parey i ti abitye fer depi avan sa.” (Dan. 6:6-10) Danyel, sa zonm kouraze ti finalman vwar li dan en trou lyon, me Zeova ti delivre li.​—Dan. 6:16-23.

15. (a) Ki legzanp lafwa ek kouraz Akilas ek Prisil in kite pour nou? (b) Ki parol Zezi dan Zan 13:34 i vedir e ki mannyer bokou Kretyen in demontre sa kalite lanmour?

¹⁵ Menm si Labib pa dir nou sirkonstans, Akilas ek Prisil ‘ti riske zot prop lavi pour sov sa ki pour Pol.’ (Akt 18:2; Rom. 16:3, 4) Avek kouraz, zot ti azir an armoni avek parol Zezi: “La mon donn zot en konmannman nouvo: kontan kanmarad. Zot devre kontan kanmarad parey mwan mon’n kontan zot.” (Zan 13:34) Dapre Lalwa Moiz, en dimoun ti devret kontan son prosen parey i kontan son prop lekor. (Lev. 19:18) Me komannman Zezi ti enn “nouvo” akoz i ti pe dekrir  en lanmour ki al plis ki sa, enn ki ti pou pare pour menm mor pour lezot parey li i ti fer. En kantite Kretyen in demontre lanmour par “riske zot lavi” pour pa devwal lenformasyon lo zot frer ek ser pour ki zot pa ganny martirize ouswa mor dan lanmen zot lennmi.​—Lir 1 Zan 3:16.

16, 17. Ki tes lafwa bann Kretyen dan premye syek ti fer fas avek e ki mannyer sa i konparab avek serten Kretyen dan nou letan?

¹⁶ Parey Zezi, avek kouraz bann Kretyen dan premye syek ti ador zis Zeova tousel. (Mat. 4:8-10) Zot ti refize bril lansan pour onor lanperer Romen. (Vwar portre.) Daniel Mannix ti ekrir ki ‘napa bokou Kretyen ki ti fer konpromi menm si en lotel kot dife ti pe brile lo la ti normalman plase dan en stad zis an ka zot ti sanz zot lide. En prizonnyen ti annan zis pour li senm en pti pense lansan lo sa lotel e apre i ti ganny en Sertifika Sakrifis e i ti lib. I ti osi ganny eksplike klerman ki i pa pe ador lanperer, me senpleman rekonnet ki i en bondye ki sef leta Romen. Kantmenm sa, pa bokou Kretyen ki ti plifere ganny libere dan sa fason.’​—Those About to Die.

¹⁷ Bann Kretyen dan nou letan ki ti ganny mete dan bann kan konsantrasyon Nazi avek posibilite pour ganny touye ti annan loportinite pour ganny libere par siny en dokiman pour renons Zeova. Me, pa bokou ki ti sinyen. Pli resaman pandan zenosid Rwanda, bann Temwen Toutsi ek Outou ti riske zot lavi pour protez zot bann frer ek ser. I demann lafwa ek kouraz pour fer fas avek sa bann sityasyon.

RAPEL BYEN, ZEOVA I AVEK NOU!

18, 19. Ki legzanp lafwa ek kouraz dan Labib ki kapab ed nou pour akonplir nou travay predikasyon?

¹⁸ Konmela, nou annan sa privilez pour partisip dan sa pli gran travay ki Bondye in donn son bann serviter lo later e sa se pour anons sa mesaz Rwayonm e fer disip. (Mat. 24:14; 28:19, 20) Pa nou vreman rekonesan pour sa bon legzanp ki Zezi in kite! I “ti vwayaz dan plizyer lavil ek vilaz pour pres Bonn Nouvel Rwayonm Bondye.” (Lik 8:1) Zis parey li, nou bezwen lafwa ek kouraz pour kapab pres sa mesaz Rwayonm. Avek led Bondye, nou pou kapab parey Noe, “en predikater lazistis” ki ti pres avek bann “move zabitan” later ki ti pe al mor dan en deliz global.​—2 Pyer 2:4, 5.

¹⁹ Lapriyer i ed nou akonplir nou travay predikasyon. Kan serten disip Kris ti pe ganny persekite, zot ti priye pour ki zot kapab ‘anons mesaz Bondye avek lasirans san okenn lafreyer’ e zot lapriyer ti ganny egzose. (Lir Akt 4:29-31.) Si petet ou kanmi pour pres portanport, Zeova pou reponn ou lapriyer e donn ou plis lafwa ek kouraz.​—Lir Psonm 66:19, 20. * *

20. Ki sipor nou annan konman serviter Zeova?

²⁰ I pa fasil pour kontinyen servi Bondye fidelman ler nou rankontre bann leprev dan sa move lemonn difisil. Me, nou pa tousel. Bondye i avek nou. Son Garson, Sef kongregasyon osi i avek nou. Nou osi annan nou 7,000,000 frer ek ser Temwen Zeova dan lemonn. Ansanm avek zot, annou kontinyen demontre lafwa e anons sa bon nouvel anmezir ki nou gard antet nou teks pour lannen 2013: “Fodre ou kouraze e for. . . . Zeova ou Bondye i avek ou.”​—Zoz. 1:9.

[Not anba lo paz]

[Kestyon]

[Portre lo paz 7]

[Ekstre lo paz 8]

Teks lannen 2013: “Fodre ou kouraze e for. . . . Zeova ou Bondye i avek ou.”​—Zozye 1:9

[Portre lo paz 10]

Pour bann Kretyen, fer konpromi pa ti en opsyon