BIOGRAFI

Akoz nou lavi i annan en vre bi

Rakonte par Patricia Smith

DESITO ki mon garson Gary ti ne an 1958, mon ti santi ki i ti annan en keksoz mal. Selman, i ti pran dis mwan pour bann dokter dir nou ki i ti gannyen e senk an plitar bann spesyalis Lonn ti konfirm son dyagnostik. Mon ti vreman tris kan mon fiy Louise ti ne ne-v-an apre Gary e li i ti annan bann sentonm pli pir ki pour li.

Dokter ti zantiman dir mwan: “Tou le de ou zanfan i ganny LMBB syndrome, * e ou pou bezwen viv avek sa sityasyon.” Sa letan, i ti napa bokou lenformasyon konsernan sa kondisyon zenetik ki rar. Dimoun ki annan sa kondisyon i souvan annan problenm lizye ki kapab fer zot vin aveg, zot vin tro gro, annan ledwa lanmen ouswa lipye an plis, zot retarde dan zot devlopman, i difisil pour zot annan bon kordinasyon, zot ganny dyabet, osteoarthritis e zot ronnyon i diformen. Alor, i ti pou en gran defi pour pran swen avek mon de zanfan. En letid ki’n ganny fer tou dernyenman i montre ki 1 dan 125,000 dimoun Langleter i annan sa kondisyon, e bokou plis ankor i annan en form mwen sever sa kondisyon.

ZEOVA I NOU “LANDRWA O KI AN SEKIRITE”

En pe letan apre ki mon ti’n marye, mon ti koz avek en Temwen Zeova e deswit mon ti realize ki i ti pe ansenny laverite dan Labib. Mon msye pa ti enterese ditou. Nou ti bezwen bouz en kantite akoz louvraz ki i ti fer, alor i ti difisil pour mwan asosye avek en kongregasyon. Kantmenm sa, mon ti kontinyen lir Labib e priy Zeova. Mon ti vreman ganny rekonforte kan mon ti lir ki “Zeova pou vin en landrwa o ki an sekirite pour nenport ki ki’n ganny oprimen,” e ki “bann ki rod [li] . . . sirman [i] pa pou kit zot.”​—Ps. 9:9, 10.

Gary pa ti tro vwar byen kler, alor a laz si-z-an i ti ganny anvoye pour en formasyon spesyalize kot en lekol o bor lakot sid Langleter. I ti souvan telefonnen pour dir mwan sa ki ti pe enkyet li e mon ti kapab ed li konpran serten prensip Labib lo telefonn. Detrwa lannen apre ki Louise ti ne, mon ti tonm malad. Mon ti ganny multiple sclerosis ek fibromyalgia. A laz 16 an, Gary ti fini son formasyon e retourn kot lakour. Me, son vizyon ti pe deteryore e an 1975, i ti ganny deklare aveg. An 1977, mon msye ti kit nou.

En pe letan apre ki Gary ti’n retournen, nou ti konmans partisip dan aktivite en kongregasyon ki byen kontan nou e an 1974, mon ti batize. Mon ti vreman kontan kan en frer ti ed Gary konpran son bann devlopman fizik ki i ti pe eksperyanse pandan son ladolesans. Lezot Temwen ti ed mwan avek mon louvraz lakour, e avek letan servis sosyal ti swazir senk parmi zot konman nou carer. I ti vreman en gran benediksyon sa!

Gary ti kontinyen fer progre dan laverite e i ti batize an 1982. I ti vreman anvi fer pionye asistan. Alor, mon ti deside akonpanny li dan sa servis e mon ti kontinyen fer li pour plizyer lannen.  En pe letan pli tar, mon garson ti vreman kontan kan sirveyan rezyonal ti demann li, “Akoz ou pa vin en pionye ordiner Gary?” Sanmenm sa kalite lankourazman ki Gary ti bezwen e an 1990 i ti ganny apwente pionye ordiner.

De fwa Gary in bezwen sanz son laans, premye fwa an 1999 e dezyenm fwa an 2008, me problenm lasante Louise ti pli serye. I ti ne aveg e ler mon ti vwar ki i ti annan en ledwa an plis lo enn son lipye, mon ti konnen ki li osi i ti annan LMBB syndrome. Bann tes ti montre ki i ti annan bann gro defo avek plizyer son bann lorgann tou. Diran bann lannen ki’n pase, i’n fer en kantite gran loperasyon, enkli senk loperasyon ronnyon. Li osi i annan dyabet parey Gary.

Vi ki i ti konn danze ki ti kapab annan pandan loperasyon, avan loperasyon Louise ti eksplik sirizyen, bann anestezis ek sa lekip ki ti pou ede dan son loperasyon lo son desizyon konsernan pa servi disan. Akoz sa, i annan en tre bon relasyon avek tou sa bann ki pran byen swen avek li.

EN LAVI KI ANNAN EN BI

Kot nou lakour i touzour annan bann aktivite ki deroule pour ador Zeova. Avan ki bann led elektronik ti disponib, mon ti abitye pas en kantite letan pour lir avek Gary ek Louise. Konmela bann CD, DVD ek lanrezistreman lo www.ps8318.com i ed nou apresye en progranm letid baze lo Labib pandan lasemenn antye, diferan ler, e nou kapab partisip byen dan renyon.

Gary i souvan aprann son larepons parker e si i annan en ekspoze dan Lekol Minister Teokratik, i kapab fer li dan son prop mo. I ti ganny apwente asistan ministeryel an 1995 e i touzour okipe kot Lasal Rwayonm. I akey bann ki pe vin renyon e ede avek sonorizasyon.

Lezot Temwen i akonpanny Gary dan predikasyon, souvan zot pous li dan son wiltyer ki i servi akoz i ganny arthritis. I annan en Temwen ki’n ed li kondwir letid Labib avek en dimoun ki enterese. Gary in osi ankouraz en Kretyen ki ti’n inaktif pour 25 an. Tou le de dimoun i asiste renyon konmela.

A laz ne-v-an, Louise ti aprann fer krose avek son granmanman ek enn son carer, e mwan mon ti montre li konman pour brode. Vi ki i ankor kontan koud, i fer bann zoli blennket pour pti baba ensi ki pour bann aze dan kongregasyon. I osi fer bann kart an servan portre lo papye kole. Bann ki ganny sa bann kart i vreman kontan zot. Ler i ti adolesan, i ti aprann tipe. Aprezan, avek led en konpiter ki koze, i souvan kontakte son bann zanmi par imel. Louise ti batize ler i ti annan 17 an. Pandan bann kanpanny spesyal, nou fer pionye asistan ansanm. Parey Gary, Louise i aprann bann verse parker pour eksprim son lafwa dan promes Bondye kot i pou annan en lemonn kot “lizye bann aveg pou ouver” e “okenn zabitan pa pou dir: ‘Mon malad.’”​—Iza. 33:24; 35:5.

Nou vreman rekonesan pour bann laverite presye dan Parol enspire Zeova! Nou leker i deborde avek rekonesans pour sa sipor ranpli avek lanmour ki nou gannyen avek nou kongregasyon, akoz san zot, nou pa ti pou kapab fer nou bann aktivite. Pli enportan ankor, avek led Zeova, nou lavi i annan en vre bi.

[Not anba lo paz]

[Portre lo paz 25]

[Ekstre lo paz 25]

Nou vreman rekonesan pour bann laverite presye dan Parol enspire Zeova!