Ansyen, eski ou pou ankouraz sa “enn ki fatige”?

Angela, * en ser selibater dan son 30 an i en pti pe enkyet. I pe esper bann ansyen. Ki zot pou dir li? I vre ki i’n mank enn de renyon, me sa i akoz i fatige vi ki i travay lazournen antye avek bann dimoun aze. An plis ki sa, i tre konsernen avek move lasante son manman.

Si ou ti enn parmi sa bann ansyen ki ti pe al vizit Angela, ki mannyer ou ti pou ankouraz sa enn “ki fatige”? (Zer. 31:25) Avan tou, ki mannyer ou ti pou prepare pour fer sa vizit ankourazan?

REFLESIR LO SIRKONSTANS OU FRER EK SER

Parler, nou travay oubyen nou responsabilite dan kongregasyon i fer nou fatige. Par egzanp, profet Danyel “ti epwize” kan i ti ganny en vizyon ki i pa ti konpran. (Dan. 8:27) I ti ganny led avek lanz Gabriyel. Sa lanz ti ed li konpran e asir li ki Zeova in antann son lapriyer e ki i ti ankor “vreman presye” dan lizye Bondye. (Dan. 9:21-23) Pli tar, dan en lot moman, sa profet ki ti fatige ti osi ganny fortifye par bann parol ankourazan en lot lanz.​—Dan. 10:19.

Pareyman, avan al vizit en frer oubyen ser ki fatige ouswa dekouraze, pran letan pour reflesir lo son sirkonstans. Ki bann problenm sa dimoun pe fer fas avek? Ki mannyer sa bann problenm pe afekte li? Ki bann bon kalite sa dimoun i annan? Konman en ansyen pour 20-t-an, Richard i dir: “Mon konsantre lo bann kalite ki  mon bann frer ek ser i annan.” I azoute: “Par reflesir byen lo zot bann sirkonstans avan mon vizit zot, sa i fer li fasil pour mwan ankouraz zot dapre zot bezwen.” Si en lot frer pou akonpanny ou, akoz ansanm zot pa reflesir lo sirkonstans sa frer oubyen ser ki zot pe al vizite?

FER ZOT SANTI ZOT ALEZ

I kapab anbarasan pour en frer oubyen ser eksprim son santiman avek en ansyen. Par egzanp, ou frer oubyen ou ser i kapab vwar li difisil pour konmans konversasyon avek bann ansyen ki vizit li. Me ki mannyer ou pou kapab met li alez? En sourir senser ek en parol ankourazan i kapab annan en bon lefe. Michael, en frer ki’n servi konman ansyen pour 40 an, i souvan konmans son vizit par dir sa komanter swivan: “Ou konnen, enn bann pli zoli privilez ki en ansyen i annan i loportinite pour vizit bann frer se zot e konn zot pli byen. Alor, mon ti pe esper avek enpasyans pour rann ou sa pti vizit ozordi.”

Ou kapab osi konmans avek en lapriyer senser byen boner dan konversasyon. Dan son bann lapriyer, Pol ti koz lo lafwa, lanmour, fidelite ek landirans son bann frer. (1 Tesa. 1:2, 3) Par koz lo sa ki ou santi konsernan bann kalite ki ou frer i annan, ou pe aktyelman prepar ou leker ek sa ki pour li pour fer en konversasyon ki batir. Ou parol i osi kapab rekonfort ou frer. Ray, en frer eksperyanse i fer sa remark: “Parler, nou tou nou oubliy bann byenfe ki nou fer dan servis Bondye, alor kan lezot i rapel nou, sa i ankouraz nou.”

PARTAZ EN KADO SPIRITYEL

Parey Pol, nou kapab partaz en “kado spirityel” par servi en panse ki sorti dan zis en verse Labib. (Rom. 1:11) Par egzanp, en frer ki dan depresyon i kapab santi li pa vo nanryen parey sa psalmis ki ti dir i pe sek parey en “boutey lapo  dan lafimen.” (Ps. 119:83, 176) Apre en leksplikasyon bref, ou kapab dir ou frer ki ou asire ki i “pa’n oubliy” komannman Bondye.

Pareyman, eski ou ti pou kapab ed en ser ki’n elwannyen avek kongregasyon oubyen ki’n ralanti dan servis par servi legzanp sa madanm ki ti perdi enn son dis pyes larzan? (Lik 15:8-10) Sa pyes ki ti’n perdi ti kapab form parti en sennon ki ti annan gran valer. Par diskit lo sa legzanp avek li, sa i kapab fer sa ser vwar ki i annan valer dan kongregasyon. Apre, ou kapab montre li ki konman enn son pti mouton, Zeova i kontan li.

Nou bann frer ek ser i kontan eksprim zot panse baze lo Labib. Alor, pa koz tou ou menm! Apre ki ou’n lir en verse ki aplik avek zot sityasyon, ou kapab demann zot pour fer en komanter lo en mo oubyen en fraz kle dan sa verse. Par egzanp, ou kapab demann li sa kestyon swivan apre ki ou’n lir 2 Korentyen 4:16, “Eski ou’n deza eksperyans bann fason ki Zeova i renouvle ou lafors?” Sa lapros i kapab fer ki zot pou ‘benefisye avek lankourazman’ kanmarad.​—Rom. 1:12.

Ou pou kapab osi ankouraz ou frer par diskit lo en personnaz dan Labib ki ti dan menm sityasyon avek li. En dimoun ki vreman dekouraze pou petet konpran byen sityasyon bann serviter fidel parey Ana ek Epafrodit ki a en serten moman zot ti soufer avek depresyon, me zot ti touzour presye dan lizye Zeova. (1 Sam. 1:9-11, 20; Fili. 2:25-30) Akoz ou pa diskit lo serten bon legzanp ki dan Labib kan i apropriye?

KONTINYEN DEMONTRE LENTERE

Ou kapab montre ki ou konsernen avek ou frer ek ser par kontinyen demontre lentere dan zot apre ki ou’n vizit zot. (Akt 15:36) A lafen ou vizit, ou kapab vwar li pratik pour envit zot pour pres ansanm avek ou. Kan ou rankontre en frer oubyen ser ki ou’n fek vizite, ou kapab refer endirekteman avek konsey ki ou ti’n donn li parey Bernard, en ansyen eksperyanse, i fer. I demann zot: “Dir mwan, eski i ti marse?” Par demontre lentere personnel, ou pou kapab konnen si i neseser pour donn plis led ou frer ek ser.

Plis ki oparavan, nou bann frer ek ser i bezwen santi ki nou pe pran swen avek zot, nou konpran e kontan zot. (1 Tesa. 5:11) Alor, avan vizit zot pran letan pour reflesir lo sirkonstans ou bann frer ek ser. Priy konsernan ou vizit. Swazir bann verse Labib ki apropriye. Kan ou fer tousala, ou pou kapab trouv sa bon parol ki pou ankouraz sa “enn ki fatige”!

[Not anba lo paz]

[Portre lo paz 29]

Avan fer ou vizit, reflesir lo sirkonstans ou frer

[Portre lo paz 30]

Nou bann frer ek ser i kontan pour eksprim zot panse baze lo Labib

[Portre lo paz 31]

Kontinyen demontre lentere senser