Apresye fidelite ek pardon Zeova
Apresye fidelite ek pardon Zeova
“Ou, O Zeova, ou bon e pare pour pardonnen; e tou bann ki apel ou, i resevwar labonte leker annabondans.”—PS. 86:5.
ESKI OU KAPAB EKSPLIKE?
Dan ki fason nou kapab imit fidelite Zeova?
Ki mannyer nou kapab imit pardon Zeova?
Akoz ou anvi kontinyen ogmant ou lapresyasyon pour bann kalite Zeova?
1, 2. (a) Akoz nou apresye bann zanmi ki fidel e pare pour pardonnen? (b) Ki kestyon nou pou reponn?
KI MANNYER ou ti pou dekrir en vre zanmi? En ser Kretyen ki apel Ashley i dir: “Pour mwan en vre zanmi i en dimoun ki touzour la pour ou e ki pardonn ou kan ou fer fot.” Nou tou nou apresye bann zanmi fidel e ki pare pour pardonnen. Zot fer nou santi nou an sekirite e zot kontan nou.—Prov. 17:17.
2 Zeova i sa Zanmi pli fidel ki nou kapab annan e i pare pour pardonnen. Parey en psalmis ti dir: “Ou, O Zeova, ou bon e pare pour pardonnen; e tou bann ki apel ou, i resevwar labonte leker annabondans.” (Ps. 86:5) Ki fidelite ek pardon i vedir? Ki mannyer Zeova i demontre sa bann zoli kalite? Ki mannyer nou kapab imit son legzanp? Larepons sa bann kestyon pou fer nou devlop en profon lanmour pour nou pli bon Zanmi, Zeova. Zot pou osi ed nou ranforsi nou lanmitye avek kanmarad.—1 Zan 4:7, 8.
ZEOVA I FIDEL
3. Ki sa mo fidelite i vedir?
3 Fidelite i en kalite vreman tousan, i enkli devosyon e diny konfyans. En dimoun fidel pa pe toultan sanz son lide. O kontrer, i demontre labonte leker volonterman e fidelman, e i reste atase avek en dimoun (oubyen keksoz) menm dan sityasyon difisil. Wi, Zeova i sa “Enn ki [pli] fidel.”—Rev. 16:5, NW.
4, 5. (a) Ki mannyer Zeova i demontre fidelite? (b) Ki lankourazman nou gannyen ler nou reflesir lo fidelite Zeova?
4 Ki mannyer Zeova i demontre fidelite? I pa zanmen abandonn son bann serviter fidel. Lerwa David, enn son serviter ti konfirmen ki Zeova i fidel. (Lir 2 Samyel 22:26. *) Ler David ti pe pas dan bann leprev, Zeova ti fidelman gid li, protez li, e sov li. (2 Sam. 22:1) David ti konnen ki fidelite Zeova i enplik plis ki zis dir i fidel. Akoz Zeova ti fidel avek David? Parski David li menm ti en “dimoun fidel.” Zeova i apresye fidelite son bann adorater, e an retour i fidel avek zot.—Prov. 2:6-8.
5 Nou kapab ganny ankouraze ler nou reflesir lo fidelite Zeova. En frer fidel ki apel Reed i dir: “Letan mon lir lo lafason ki Zeova ti azir anver David ler i ti pas dan difikilte, sa i ed mwan bokou. Menm ler David ti pe mars an tayan, e ti pe antre sorti dan bann kavern, Zeova ti toultan soutenir li. Sa i en gran lankourazman pour mwan! I fer mwan rapel ki dan nenport sityasyon, menm si i paret ki napa okenn lespwar, Zeova i la pour mwan tan ki mon reste fidel avek li.” San dout, ou santi parey.—Rom. 8:38, 39.
6. Dan ki lezot fason Zeova i demontre fidelite, e ki mannyer son bann adorater i benefisye?
6 Dan ki lezot fason Zeova i demontre fidelite? I respekte son bann standar. Zeova i asir nou: “Mon pou reste touzour parey menm kan zot in vye.” (Iza. 46:4) Kan i fer desizyon, i pa zanmen sanz son bann standar lo sa ki byen ek mal. (Mal. 3:6) An plis ki sa, Zeova i demontre fidelite par reste fidel avek son promes. (Iza. 55:11) Tou bann adorater fidel Zeova i benefisye avek son fidelite. Ki mannyer sa? Ler nou fer nou mye pour aplik bann standar Zeova, nou kapab annan konfyans ki i pou gard son promes pour beni nou.—Iza. 48:17, 18.
IMIT FIDELITE ZEOVA
7. Dan ki fason nou kapab imit fidelite Bondye?
7 Ki mannyer nou kapab imit fidelite Zeova? En fason se par ed bann ki dan bann sirkonstans difisil. (Prov. 3:27) Par egzanp, eski ou konn en konpanyon Kretyen ki dekouraze, petet akoz problenm lasante, lopozisyon dan fanmir, oubyen son prop febles? Akoz ou pa pran linisyativ pour koz bann “bon parol, bann parol lankourazman” avek li? (Zeka. 1:13) * Par fer sa, ou pou montre ki ou en vre zanmi fidel, enn “ki pli atase ki en frer.”—Prov. 18:24.
8. Ki mannyer nou kapab imit fidelite Zeova dan maryaz?
8 Nou osi kapab imit fidelite Zeova ler nou senser avek bann dimoun ki nou kontan. Par egzanp, si nou’n marye, nou konnen ki nou bezwen reste fidel avek nou konzwen. (Prov. 5:15-18) Alor, nou pa devret ni menm fer sa premye pa ki kapab fer nou komet adilter. (Mat. 5:28) An plis ki sa, nou montre ki nou fidel anver bann konpanyon Kretyen si nou evite fann rimer, koz manti e koz dan en fason negatif lo zot oubyen menm ekout bann ki fer li.—Prov. 12:18.
9, 10. (a) Avek lekel nou devret sirtou reste fidel? (b) Akoz i pa pou touzour fasil pour obeir komannman Zeova?
9 Avan tou, nou anvi reste fidel avek Zeova. Ki mannyer nou kapab fer sa? Si nou fer bokou zefor pour vwar keksoz parey li, setadir kontan sa ki i kontan e ay sa ki i deteste. (Lir Psonm 97:10. *) Pli nou panse ek santiman i an armoni avek panse ek santiman Zeova, pli nou pou anvi obeir son komannman.—Ps. 119:104.
10 I vre, i pa pou touzour fasil pour obeir komannman Zeova. I kapab ki nou bezwen lite pour reste fidel. Serten Kretyen selibater ti pou kontan marye, me zot pa ankor trouv sa bon konzwen parmi bann adorater Zeova. (1 Kor. 7:39) En ser selibater i kapab remarke ki son bann koleg travay ki pa Temwen pe touzour fer li fer konnesans avek serten koleg travay avek bi pour li ganny en konzwen. I kapab ki sa ser i santi li tousel e pe lager avek sa santiman. Me kantmenm sa, i determinen pour fer zefor pour gard son lentegrite anver Zeova. Eski pa nou apresye sa bann bon legzanp fidelite? Sirman Zeova pou rekonpans tou bann ki reste fidel avek li malgre difikilte.—Ebr. 11:6.
ZEOVA I PARE POUR PARDONNEN
11. Ki savedir pardonnen?
11 Enn parmi bann kalite pli atiran Zeova, se ki i pare pour pardonnen. Ki savedir pardonnen? I enplik pardonn sa enn ki’n ofans nou ler i annan en rezon valab pour fer li. I pa vedir toler ouswa pa admet en keksoz mal. O kontrer, i les pase sa lofans. Labib i ansenny nou ki Zeova i ‘pare pour pardonn’ bann ki senserman repantir.—Ps. 86:5.
12. (a) Dan ki fason Zeova i montre ki i pardonnen? (b) Ki sa lekspresyon ki’n ganny tradwir pardonnen i vedir?
12 Dan ki fason Zeova i montre ki i pardonnen? Kan Zeova i pardonnen i “pardonn nou en kantite.” I pardonn konpletman e dan en fason permanan. (Iza. 55:7) Ki mannyer nou konnen ki Zeova i pardonn konpleman? Annou vwar sa lasirans dan Akt 3:19. (Lir.) Zapot Pyer ti ankouraz son lodyans “pour sanz zot lavi [oubyen “repantir,” NW] e revin ver Bondye.” Ler en peser i senserman repantir, i annan en profon regre pour sa keksoz mal ki i’n fer. I osi determinen pour pa repet sa pese. (2 Kor. 7:10, 11) An plis ki sa, vre repantans i motiv sa dimoun ki’n fer pese pour sanz son lavi e “revin ver Bondye,” andotmo, aret fer sa ki mal e fer sa ki fer Bondye plezir. Si bann dimoun ki ti pe ekout Pyer ti demontre ki zot ti’n senserman repantir, ki rezilta sa ti pou anmennen? Pyer ti dir ki zot ti pou ganny ‘pardonnen zot pese.’ Sa lekspresyon ki’n ganny tradwir konman pardonnen i sorti dan en mo Grek ki vedir “eswiye, efase.” Alor, letan Zeova i pardonnen, i konmsi i efas tou nou pese. I pardonn konpletman.—Ebr. 10:22; 1 Zan 1:7.
13. Ki sa parol “mon pa pou mazin zot pese ankor” i asir nou?
13 Ki mannyer nou konnen ki pardon Zeova i permanan? Annou vwar profesi Zeremi konsernan sa nouvo lalyans avek bann Kretyen swazir, ki fer vre pardon posib pour tou sa ki met lafwa dan sakrifis Zezi konman en ranson. (Lir Zeremi 31:34. *) Zeova i dir: “Mon pou pardonn zot fot, e mon pa pou mazin zot pese ankor.” Alor, Zeova i asir nou ki enn fwa in pardonn nou, i pa pou zanmen pran aksyon kont nou pour sa bann menm pese. I pa reservi nou pese pour akiz nou oubyen kontinyen pini nou. O kontrer, i pardonn sa bann pese e zet zot lwen deryer li e i fer sa dan en fason permanan.—Rom. 4:7, 8.
14. Ki mannyer nou kapab ganny rekonforte ler nou medit lo pardon Zeova? Donn en legzanp.
14 Nou kapab ganny rekonforte ler nou medit lo pardon Zeova. Annou vwar en legzanp. En kantite lannen pase, en ser ki nou pou apel li Elaine ti ganny ekskli. Detrwa lannen pli tar, i ti ganny reentegre. Elaine i dir: “Kantmenm mon ti dir dan mwan menm e avek lezot ki mon krwar ki Zeova in pardonn mwan, mon ti toultan santi ki i ti lwen avek mwan e ki i ti pli pros avek lezot e pli reel pour zot.” Me Elaine ti ganny rekonfor par lir e medit lo bann zoli fason ki Labib i dekrir pardon Zeova. Elaine i azoute: “Mon ti santi lanmour ek ladouser Zeova anver mwan dan en fason ki mon pa’n zanmen deza santi oparavan.” La sa panse ki ti vreman tous li: “Kan Zeova i pardonn nou pese, nou pa bezwen santi nou koupab tou dilon nou lavi.” * Elaine i dir: “Mon ti realize ki mon pa ti krwar ki Zeova i kapab konpletman pardonn mwan, e mon ti mazinen ki mon ti pou anmenn sa fardo larestan mon lavi. Mon konnen ki i pou pran letan, me mon pe konmans santi ki mon kapab vin pli pros avek Zeova, e mon santi ki sa fardo in sorti lo mon zepol.” Pa sa Bondye ki nou servi i annan lanmour e pare pour pardonnen!—Ps. 103:9.
IMIT LAFASON KI ZEOVA I PARDONNEN
15. Ki mannyer nou kapab imit pardon Zeova?
15 Nou kapab imit lafason ki Zeova i pardonnen si nou pardonn kanmarad sak fwa i annan en rezon pour fer li. (Lir Lik 17:3, 4.) Mazinen ki letan Zeova i pardonn nou, i pa pou zanmen pran aksyon kont nou pour sa bann menm pese. Kan nou pardonn lezot, nou osi nou kapab oubliye, setadir nou pa mansyonn sa problenm ankor dan lavenir.
16. (a) Eski pardonnen i vedir ki nou toler pese lezot oubyen les zot profit lo nou? Eksplike. (b) Ki nou devret fer pour Bondye pardonn nou?
16 Kan nou pare pour pardonnen, eski sa i vedir ki nou toler bann pese oubyen les lezot profit lo nou? Non. O kontrer, i enplik pardonn sa enn ki’n ofans nou san gard rankin. Me, si nou oule ganny pardonnen avek Zeova, nou bezwen imit son legzanp dan lafason nou tret lezot. (Mat. 6:14, 15) Apre tou, lefet ki Zeova i santi sa ki lezot i santi, sa i motiv li pour rapel ki “nou lapousyer.” (Ps. 103:14) Pa i vre ki si nou met nou dan plas lezot, sa pou motiv nou pour pas lo zot defo e pardonn zot volonterman avek tou nou leker!—Efe. 4:32; Kol. 3:13.
17. Kwa ki kapab ed nou si nou’n ganny ofanse par enn nou konpanyon Kretyen?
17 Byensir, i pa touzour fasil pour pardonnen. Aparaman menm serten Kretyen swazir dan premye syek ti vwar li difisil pour rezourd zot problenm. (Fili. 4:2) Si en frer oubyen ser in ofans nou, kwa ki kapab ed nou? Mazin Zob. I ti vreman sagrinen letan son bann swadizan zanmi, setadir, Elifaz, Bildad ek Tsofar ti akiz li pour bann keksoz ki i pa ti’n fer. (Zob 10:1; 19:2) A lafen, Zeova ti reprimann sa trwa zonm. Bondye ti anvoy zot kot Zob e demann zot pour ofer en sakrifis pour zot pese. (Zob 42:7-9) Me Zeova ti osi demann Zob pour fer en keksoz. Kwa? Zeova ti demann Zob pour priy pour sa trwa zonm ki ti’n akiz li. Zob ti fer parey Zeova ti’n demann li, e Zeova ti beni li pour son leta lespri pare pour pardonnen. (Lir Zob 42:10, 12, 16, 17. *) Ki leson pour nou? En lapriyer senser pour en dimoun ki’n ofans nou i kapab ed nou pour pa gard rankin.
KONTINYEN APRESYE PLENNMAN BANN KALITE ZEOVA
18, 19. Ki mannyer nou kapab ogmant nou lapresyasyon pour bann kalite atiran Zeova?
18 Sirman nou’n ganny ankouraze par egzamin diferan laspe zoli personnalite Zeova. Nou’n vwar ki i abordab, i pa fer lapliferans, i zenere, i rezonnab, i fidel e i pare pour pardonnen. Byensir, nou’n vwar zis en ptigin konsernan son bann kalite. Nou pou annan sa lazwa pour konn plis lo Zeova diran leternite. (Ekle. 3:11) Nou dakor avek zapot Pol ki ti ekrir: “Larises Bondye i vreman gran, son konnesans ek son lasazes i vreman profon.” Nou kapab dir menm keksoz konsernan lanmour Bondye ek son sis kalite ki nou’n diskit lo la dan sa trwa lartik.—Rom. 11:33.
19 Annou touzour kontinyen ogmant nou lapresyasyon pour bann kalite atiran Zeova. Nou kapab familyariz nou avek son bann kalite, reflesir lo zot, e apre imit sa bann kalite dan nou lavi. (Efe. 5:1) Anmezir ki nou fer sa, nou pou san dout tonm dakor avek sa ki sa psalmis ti sante: “Tandis ki mwan, i bon pour mwan apros avek Bondye.”—Ps. 73:28.
[Not anba lo paz]
^ par. 4 2 Samyel 22:26: “Avek en dimoun fidel ou pou azir avek fidelite, avek en zonm for ki parfe, ou pou azir parfetman.”
^ par. 7 Pour bann sizesyon pratik dan sa domenn, vwar lartik “Have You Encouraged Anyone Lately?” (Eski ou’n ankouraz en dimoun tou dernyenman?) dan Latour Veyer le 15 Zanvye 1995, e “Incite to Love and Fine Works—How?” (Konman pour pous kanmarad pour annan lanmour e fer sa ki byen?) dan Latour Veyer le 1 Avril 1995.
^ par. 9 Psonm 97:10: “Zot ki kontan Zeova, ay sa ki mal. I pe vey bann ki fidel avek li; e i delivre zot dan lanmen bann mesan.”
^ par. 13 Zeremi 31:34: “La sa ki Zeova i dir: ‘Napa personn ki pou ansenny son konpanyon, ni son frer, an dizan, “Fodre konn Zeova!” Akoz zot tou zot pou konn mwan, depi sa ki pli pti ziska sa ki pli gran parmi zot. Parski mon pou pardonn zot fot, e mon pa pou mazin zot pese ankor.’”
^ par. 17 Zob 42:10, 12, 16, 17: “10 Zeova li menm ti tir Zob dan sa sityasyon kan i ti priy pour son bann konpanyon e Zeova ti konmans donn an plis tou sa ki ti pour Zob, i ti double lakantite.” “12 Tandis ki Zeova, a lafen i ti beni Zob plis ki o konmansman, i ti ganny katorz mil mouton, e sis mil samo, mil bef ek mil femel bourik.” “16 E apre sa, Zob ti viv ankor senkant an, e i ti kapab vwar son bann garson e son bann pti zanfan garson, setadir kat zenerasyon. 17 Finalman Zob ti mor, vye e satisfe avek son lavi.”
[Kestyon]
[Portre lo paz 17]
[Portre lo paz 19]
“I egziste en zanmi ki pli atase ki en frer.”—Prov. 18:24 (Vwar paragraf 7)
“Pardonn kanmarad.” —Efe. 4:32 (Vwar paragraf 16)
[Portre lo paz 21]
Priy senserman pour nou ganny pardonnen (Vwar paragraf 17)
