Kestyon lekter

Lekel sa “bann garson sa vre Bondye” ki ganny mansyonnen dan Zenez 6:2, 4 ki ti pe viv avan Deliz?

▪ I annan levidans ki sa lekspresyon pe refer avek bann garson spirityel Bondye. Ki mannyer?

Premye parmi sa de verse i dir: “Bann garson sa vre Bondye ti remark fiy bann zonm, ki zot ti zoli; e zot ti pran zot konman zot madanm, setadir tou sa ki zot ti swazir.”​—Zen. 6:2.

Dan Lekritir Ebre, sa lekspresyon “bann garson sa vre Bondye” e “bann garson Bondye” i ganny trouve dan Zenez 6:2, 4; Zob 1:6; 2:1; 38:7; ek Psonm 89:6. Ki sa bann verse i dir nou lo sa “bann garson Bondye”?

I kler ki “bann garson sa vre Bondye” ki dan Zob 1:6 ti bann kreatir spirityel ki ti’n rasanble devan Bondye. Parmi zot i ti annan Satan, ki ti’n fini “fer letour later.” (Zob 1:7; 2:1, 2) Pareyman, dan Zob 38:4-7, nou lir ki “bann garson Bondye” ti ‘konmans aplodi’ kan Bondye ‘ti etabli’ later. Zot ti bezwen bann lanz Bondye parski bann imen pa ti ankor ganny kree sa letan. Definitivman, sa “bann garson Bondye” ki ganny mansyonnen dan Psonm 89:6 ti bann lanz ki ti pe viv dan lesyel avek Bondye, me pa bann imen.

Alor, lekel zot sa “bann garson sa vre Bondye” ki ganny mansyonnen dan Zenez 6:2, 4? Dapre levidans ki sa bann verse presedan in fer resorti, i lozik pour dir ki i pe refer avek sa bann garson spirityel Bondye ki ti desann lo later.

I annan serten ki vwar li difisil pour krwar ki bann lanz i enterese pour annan relasyon seksyel. Apre tou, Matye 22:30 i montre ki maryaz ek relasyon seksyel pa egziste dan lesyel. Pourtan, i annan serten moman kot bann lanz ti pran laform imen e zot ti manze e bwar avek bann imen. (Zen. 18:1-8; 19:1-3) Alor, i rezonnab pour konklir ki kan zot dan laform imen, bann lanz i kapab annan relasyon seksyel avek bann madanm.

I annan laprev dan Labib ki serten lanz ti fer egzakteman sanmenm. Zid 6, 7 i konpar pese bann zonm Sodonm avek sa ki “bann lanz ki pa ti satisfe avek lotorite ki zot ti’n gannyen e ki ti abandonn zot prop demer.” En pwen komen ant sa bann lanz ek bann zonm Sodonm i ki “zot ti livre zot lekor dan bann lakt seksyel imoral, ek bann lakt kont natir.” Premye Pyer 3:19, 20 i osi relye dezobeisans bann lanz avek “letan Noe.” (2 Pyer 2:4, 5) Alor, sa bann aksyon ki bann lanz dezobeisan ti komet dan letan Noe i kapab ganny konpare avek pese Sodonm ek Gomor.

Alor, i fer sans pour dir ki sa “bann garson sa vre Bondye” ki trouve dan Zenez 6:2, 4 ti bann lanz ki ti pran laform imen pour annan relasyon seksyel avek bann madanm.

 Labib i dir ki Zezi ti “pres avek bann lespri prizonnyen.” (1 Pyer 3:19) Ki sa i vedir?

▪ Zapot Pyer i idantifye sa bann lespri konman bann “ki ti dezobei Bondye kan i ti pe esper avek pasyans pandan ki Noe ti pe konstri lars.” (1 Pyer 3:20) I kler ki Pyer ti pe refer avek sa bann lanz ki ti rebele ansanm avek Satan. Zid i mansyonn bann lanz ki “pa ti satisfe avek lotorite ki zot ti’n gannyen e ki ti abandonn zot prop demer.” I ti osi dir ki Bondye ‘in gard zot avek bann lasenn eternel dan fernwanr labim san fon pour sa gran Zour kan zot pou ganny kondannen.’​—Zid 6.

Dan ki fason bann lanz ti dezobeisan dan letan Noe? Avan Deliz, sa bann move lanz ti pran laform imen, me sa pa ti dan plan Bondye. (Zen. 6:2, 4) An plis ki sa, kan sa bann lanz ti fer relasyon seksyel avek bann madanm, zot ti pe pratik en keksoz ki pa ti natirel. Bondye pa ti kre zot pour annan sa kalite relasyon. (Zen. 5:2) Bondye in rezerv en zour pour detrir sa bann lanz dezobeisan. Parey nou vwar dan liv Zid, pour le moman, sa bann lanz i dan “fernwanr labim,” setadir dan en prizon spirityel.

Kan e ki mannyer Zezi ti pres avek sa bann “lespri prizonnyen”? Pyer i ekrir ki sa ti arive apre ki Zezi ti “revin vivan par Lespri.” (1 Pyer 3:18, 19) Pyer i osi dir ki Zezi ‘ti pres’ avek zot. Sa i endike ki Zezi ti’n pres avek zot avan ki Pyer ti ekrir son premye let. Alor, i paret ki en pe letan apre son rezireksyon, Zezi ti dir avek sa bann move lanz ki pinisyon ki ti pe esper zot. Sa mesaz ki Zezi ti anons zot pa ti donn zot okenn lespwar akoz i ti en mesaz zizman. (Yona 1:1, 2) Vi ki Zezi ti’n demontre son fidelite ziska lanmor e resisite, sa ti prouve ki Dyab ti napa okenn pouvwar lo li. Alor, Zezi ti annan sa drwa pour anons sa zizman Bondye.​—Zan 14:30; 16:8-11.

Dan lavenir, Zezi pou ansenn e zet Satan ek sa bann move lanz dan labim. (Lik 8:30, 31; Rev. 20:1-3) Ziska sa letan, sa bann lanz dezobeisan i dan en fernwanr spirityel e nou asire ki zot pou finalman ganny konpletman detrir.​—Rev. 20:7-10.

[Portre lo paz 22]

[Portre lo paz 23]