Bann rapel Zeova i anmenn lakontantman dan nou leker

“Mon’n fer ou bann rapel vin pour mwan pour en letan endefini.”​—PS. 119:111.

KI OU POU REPONN?

Ki rezon nou annan pour kontan bann rapel Zeova?

Ki mannyer nou kapab devlop konfyans dan Zeova?

Akoz i enportan pour reste okipe dan bann aktivite spirityel?

1. (a) Ki bann diferan fason imen i reazir anver rapel e akoz? (b) Ki mannyer lorgey i kapab afekte pwennvi en dimoun konsernan konsey?

IMEN i reazir dan diferan fason anver gidans. En rapel sorti kot en dimoun ki annan lotorite i kapab ganny aksepte volonterman, me konpletman rezete si i sorti kot en lot dimoun menm laz ouswa ki annan mwens lotorite. Emosyonnelman, dimoun i osi reazir diferaman ler zot ganny disiplinen ouswa konseye. Zot kapab santi zot tris, sagrinen, oubyen onte ouswa zot kapab santi zot motive, konfidan e anvi fer pli byen. Akoz sa diferans? En fakter se lorgey. An realite en dimoun ki annan lespri arogan pa kapab ziz byen e sa i fer li rezet konsey e perdi sa loportinite pour benefisye avek bann lenstriksyon ki annan valer.​—Prov. 16:18.

2. Akoz bann vre Kretyen i apresye konsey ki sorti dan Parol Bondye?

² De lot kote, bann vre Kretyen i apresye bann bon konsey, sirtou ler i baze lo Parol Bondye. Bann rapel Zeova i fer nou ganny en konnesans o profon, i ansenny e ed nou pour ki nou pa tonm dan bann pyez parey materyalizm, limoralite seksyel, drog oubyen labi lalkol. (Prov. 20:1; 2 Kor. 7:1; 1 Tesa. 4:3-5; 1 Tim. 6:6-11) Deplis, nou zwaye akoz nou annan “lakontantman dan nou leker” lefet ki nou obeir bann rapel Bondye.​—Iza. 65:14.

3. Ki latitid sa psalmis ti annan ki ti pou byen nou imite?

³ Pour prezerv nou relasyon presye avek nou Papa dan lesyel, nou bezwen kontinyen aplik bann lenstriksyon saz ki sorti kot Zeova dan nou lavi. I ti pou byen si nou latitid i reflekte sa ki sa psalmis ti ekrir: “Mon’n fer ou bann rapel vin pour mwan pour en letan endefini, akoz zot anmenn lakontantman dan  mon leker.” (Ps. 119:111) Eski pareyman nou pran plezir dan bann komannman Zeova oubyen eski nou vwar zot konman en fardo? Menm si par ler nou pa kontan serten konsey ki nou gannyen, fodre pa ki nou dekouraze. Nou kapab devlop en konfyans total dan lasazes Bondye ki pli siperyer. Annou egzamin trwa fason.

DEVLOP KONFYANS ATRAVER LAPRIYER

4. Ki sa sel keksoz ki ti toultan reste parey dan lavi David?

⁴ Lerwa David ti eksperyans botan ek movetan dan son lavi, me i ti annan en keksoz ki pa ti sanze, se son konfyans total dan son Kreater. I ti dir: “O Zeova, mon vin ver ou. O mon Bondye, mon’n met mon konfyans dan ou.” (Ps. 25:1, 2) Kwa ki ti ed David pour devlop en tel konfyans dan son Papa dan lesyel?

5, 6. Ki Parol Bondye i dir nou konsernan relasyon ki David ti annan avek Zeova?

⁵ En kantite dimoun i priy Bondye zis ler zot dan bann sityasyon difisil. Ki mannyer ou pou santi si en zanmi oubyen fanmir i anvi koz avek ou zis ler i bezwen larzan ouswa en faver? Petet avek letan ou pou konmans kestyonn son motivasyon akoz i pe rod ou. Me, David pa ti koumsa. Tou dilon son lavi, son relasyon avek Zeova ti reflekte son lafwa ek lanmour pour Bondye, ki swa dan botan oubyen movetan.​—Ps. 40:8.

⁶ Remarke ki mannyer David ti loue e remersye Zeova, i ti dir: “O Zeova nou Senyer, vreman ou non i eksepsyonnel lo later antye, ou ki ou dinyite pe ganny rakonte par lao lesyel.” (Ps. 8:1) Eski pa ou santi ki David ti annan en relasyon pros avek son Papa dan lesyel? Lapresyasyon ki David ti annan pour grander ek splander Bondye ti enspir li pour loue Zeova “tou dilon lazournen.”​—Ps. 35:28.

7. Ki byenfe nou gannyen ler nou apros avek Bondye dan lapriyer?

⁷ Parey David, nou bezwen kominik avek Zeova regilyerman pour kapab devlop konfyans dan li. Labib i dir: “Apros avek Bondye, e i ava apros avek zot.” (Zak 4:8) Apros avek Bondye dan lapriyer i osi en fason enportan ki nou kapab ganny lespri sen.​—Lir 1 Zan 3:22.

8. Akoz nou devret evite repet menm keksoz ler nou priye?

⁸ Ler ou priye, eski ou annan tandans pour repet menm parol oubyen servi menm lekspresyon sak fwa? Si sa i le ka, avan ou fer lapriyer pran detrwa minit pour reflesir lo sa ki ou anvi dir. Si nou repet menm parol avek en zanmi oubyen fanmir sak fwa ki nou koz avek li, eski ou krwar i pou vwar nou konversasyon enteresan? Petet i kapab konmans aret ekout nou. Byensir, Zeova pa ti pou zanmen refize ekout lapriyer senser enn son bann serviter fidel. Me, i ti a byen ki nou evite tonm dan en routin ler nou koz avek li.

9, 10. (a) Ki nou kapab enkli dan nou lapriyer? (b) Kwa ki kapab ed nou fer bann lapriyer ki sorti dan fon nou leker?

⁹ I kler ki si nou anvi apros avek Bondye nou pa kapab fer bann lapriyer anler anler. Pli nou devid nou leker avek Zeova, pli nou pou vin pros avek li e annan plis konfyans dan li. Me ki nou devret enkli dan nou lapriyer? Parol Bondye i reponn: “Dan tou sirkonstans par lapriyer ek siplikasyon demann Bondye tou sa ki zot bezwen.” (Fili. 4:6) Anfet, tou keksoz ki afekte nou relasyon avek Bondye oubyen nou lavi konman enn son serviter i apropriye pour priy lo la.

¹⁰ Nou kapab aprann en kantite si nou egzamin sa ki bann zonm ek fanm fidel dan lepase ti dir dan zot lapriyer ki’n ganny rikorde dan Labib. (1 Sam. 1:10, 11; Akt 4:24-31) I annan en kantite lapriyer ek kantik tousan pour Zeova dan liv Psonm. Sa bann lapriyer ek kantik i eksprim tou bann lemosyon ki imen i annan, par egzanp i eksprim soufrans pli entans e osi lazwa. Par egzamin sa ki  sa bann serviter fidel ti dir, sa i kapab ed nou pour fer bann lapriyer ki annan valer pour Zeova.

MEDIT LO BANN RAPEL BONDYE

11. Akoz nou bezwen medit lo konsey sorti kot Bondye?

¹¹ David ti dir: “Rapel Zeova i diny konfyans, i fer sa ki napa leksperyans saz.” (Ps. 19:7) Wi, menm si nou napa okenn leksperyans, nou kapab vin saz par obei bann komannman Bondye. Me pour benefisye plennman avek serten konsey sorti dan Labib nou bezwen medit lo zot. Par egzanp, si nou anvi gard nou lentegrite ler nou anba presyon kot lekol oubyen travay, pe respekte standar Bondye lo disan, pa pe pran okenn kote dan bann zafer politik e pe aplik bann prensip Labib konsernan resanz ek laparans. Si nou annan pwennvi Bondye dan sa bann domenn sa pou ed nou prepar nou davans pour bann problenm ki nou kapab rankontre. Apre nou kapab annan sa determinasyon dan nou leker pour konnen ki pour fer si sa problenm i leve. En bon preparasyon davans i kapab fer nou evit en kantite tourman.​—Prov. 15:28.

12. Ki bann kestyon nou kapab medit lo la ki pou ed nou gard bann rapel Bondye?

¹² Anmezir ki nou pe esper bann promes Bondye ganny akonplir, eski nou montre dan nou lavi ki nou pe reste eveye spirityelman? Par egzanp, eski nou vreman krwar ki Gran Babilonn pou ganny detri byento? Eski bann benediksyon, parey lavi eternel dan paradi lo later i vreman reel pour nou parey o konmansman? Eski nou touzour devoue dan predikasyon olye ki les bann keksoz personnel pas premye dan nou lavi? Ki nou pou dir konsernan lespwar rezireksyon, sanktifikasyon non Zeova, e zistifikasyon son souvrennte? Eski sa bann size i touzour enportan pour nou? Ler nou medit lo sa bann kestyon, sa i kapab ed nou pour fer parey sa psalmis ki ti dir, ‘fer rapel Bondye vin pour nou pour en letan endefini.’​—Ps. 119:111.

13. Akoz bann premye Kretyen ti vwar li difisil pour konpran serten keksoz? Donn legzanp.

¹³ Petet i annan serten keksoz ki ganny mansyonnen dan Labib ki nou pa vreman konpran pour lemoman akoz Zeova pa ankor vwar li apropriye pour donn nou leklersisman lo zot. Plizyer fwa Zezi ti dir avek son zapot ki i ti pou bezwen soufer e ganny met amor. (Lir Matye 12:40; 16:21.) Me bann zapot pa ti konpran sa ki Zezi ti oule dir. Zot ti konpran sinifikasyon son parol ler i ti pran laform imen e aparet avek serten disip apre son rezireksyon. A sa moman, i “ti ouver zot lespri pour zot kapab konpran Lekritir.” (Lik 24:44-46; Akt 1:3) Pareyman, bann disip Kris ti konpran ki Rwayonm Bondye ti pou ganny etablir dan lesyel, kan zot ti resevwar lespri sen zour Lapannkot lannen 33 N.L.​—Akt 1:6-8.

14. O konmansman ventyenm syek, ki bon legzanp en kantite frer in kite malgre ki zot pa ti konpran serten keksoz konsernan dernyen zour?

¹⁴ Pareyman, o konmansman ventyenm syek, bann vre Kretyen ti annan bann fo ekspektasyon lo sa ki ti pou arive dan “bann dernyen zour.” (2 Tim. 3:1) Par egzanp, an 1914 serten ti mazinen ki zot ti pros pour al dan lesyel. Ler sa ki zot ti pe ekspekte pa ti ariv desito, zot ti fer bokou zefor pour reegzamin Lekritir e zot ti konpran klerman ki i ti annan en gran travay predikasyon ki ti pou bezwen ganny fer. (Mark 13:10) Alor, an 1922, Joseph Rutherford ki ti pe diriz travay predikasyon ti dir avek bann ki ti’n vin lasanble enternasyonal Cedar Point, Ohio, Leta-z-ini: “Gete, nou Lerwa pe dirize! Zot, zot sa bann ki i pe servi pour anons sa mesaz. Alor anonse, anonse, anonse, konsernan sa Lerwa ek son rwayonm.” Depi sa letan,  predikasyon “sa Bonn Nouvel konsernan Rwayonm Bondye” i sa travay ki idantifye bann serviter Zeova ozordi.​—Mat. 4:23; 24:14.

15. Ki byenfe nou gannyen ler nou medit lo lafason ki Bondye in azir anver son pep?

¹⁵ Kan nou reflesir lo bann fason merveye ki Zeova ti azir avek son pep, dan lepase e konmela, sa i fer nou annan plis konfyans dan son abilite pour akonplir son lavolonte ek son plan dan lavenir. An menm tan, Bondye i ed nou pour gard dan nou lespri ek leker son bann profesi ki nou pe esper ganny akonplir. Nou kapab asire ki si nou fer son lavolonte, sa pou ed nou devlop konfyans dan son bann promes.

DEVLOP KONFYANS ATRAVER NOU LADORASYON

16. Ki byenfe nou gannyen ler nou reste aktif dan predikasyon?

¹⁶ Nou Bondye Zeova i en Bondye ki pwisan e i pare pour azir. En psalmis ti demande, “O Ya, lekel ki pwisan parey ou?” I ti azoute: “Ou lanmen i for, ou lanmen drwat i ganny glorifye.” (Ps. 89:8, 13) An armoni avek sa parol, Zeova i apresye e beni bann zefor ki nou fer pour promot lentere Rwayonm. I vwar ki son bann serviter, ki swa zonm oubyen fanm, zenn ouswa aze, pa pe asize nanryen fer e manz “dipen lapares.” (Prov. 31:27) Parey nou Kreater, nou reste okipe dan bann aktivite teokratik. Si nou servi Bondye avek tou nou leker, sa pou anmenn bann byenfe pour nou e Zeova pou vreman kontan pour beni nou minister.​—Lir Psonm 62:12. *

17, 18. Akoz nou kapab dir ki bann travay ki nou akonpli avek fidelite i fer nou devlop konfyans dan bann konsey Zeova? Donn legzanp.

¹⁷ Dan ki fason bann travay ki nou  akonpli avek fidelite i kapab ed nou pour devlop konfyans dan Zeova? Annou egzamin sa resi dan Labib ler bann Izraelit ti pe al antre dan Later Promiz. Zeova ti demann bann pret ki ti pe anmenn lars lalyans pour antre direkteman dan Larivyer Zourden. Me, anmezir ki sa pep ti pe aprose, zot ti kapab vwar ki lapli prentan ti’n fer larivyer deborde. Ki bann Izraelit ti pou fer? Eski zot ti pou kanpe o bor larivyer e esper plizyer semenn ouswa plis letan ziska ki delo i desann? Non, zot ti met zot konfyans dan Zeova e swiv son gidans. Avek ki rezilta? Sa resi i dir: “Desito ki lipye bann pret ti tous delo, larivyer ti aret koule, . . . e bann pret ti debout dan milye sa larivyer sek o bor Zeriko pandan ki tou dimoun ti traverse.” (Zoz. 3:12-17, Contemporary English Version) Zis mazinen ki mannyer i ti vreman bezwen enpresyonan pour vwar sa ta delo ki ti pe koule arete! Anfet, lafwa bann Izraelit dan Zeova ti vin pli for akoz zot ti annan konfyans dan son gidans.

¹⁸ I vre, Zeova nepli fer sa bann kalite mirak pour son pep ozordi, me i beni nou ler nou demontre lafwa dan li. Lespri sen Bondye i donn zot kouraz neseser pour akonplir sa travay predikasyon dan lemonn antye. Apre son rezireksyon, Zezi, premye Temwen Zeova, ti asir son bann disip ki i ti pou siport zot dan sa travay enportan an dizan: “Ale e fer tou pep vin mon bann disip . . . mwan mon avek zot toulezour, ziska lafen.” (Mat. 28:19, 20) Bokou Temwen ki ti timid i dir ki lespri sen Bondye i donn zot kouraz pour koz avek dimoun ki zot pa konnen dan predikasyon.​—Lir Psonm 119:46; * 2 Korentyen 4:7.

19. Malgre ki nou pa kapab fer otan dan servis Bondye akoz nou sirkonstans, ki lasirans nou annan?

¹⁹ Serten frer ek ser pa kapab fer otan ki zot ti a kontan dan servis Bondye akoz zot bann problenm lasante oubyen lavyeyes. Me, zot kapab asire ki zot “Papa ki ranpli avek labonte, [e] Bondye ki touzour donn konsolasyon” i konpran sityasyon sak vre Kretyen. (2 Kor. 1:3) I apresye tou sa ki nou fer pour promot lentere Rwayonm. Anmezir ki nou akonpli nou servis dapre nou sirkonstans, nou tou nou bezwen gard antet ki nou lavi i depan avan tou lo lafwa ki nou annan dan sakrifis Kris.​—Ebr. 10:39.

20, 21. Ki serten fason nou montre ki nou annan konfyans dan Zeova?

²⁰ Nou ladorasyon i enkli depans nou letan, lenerzi ek resours otan ki nou kapab dan servis Bondye. Wi, nou anvi “travay konman predikater levanzil,” avek tou nou leker. (2 Tim. 4:5) Nou vreman kontan pour fer li, akoz i ed lezot pour “ganny konnesans laverite.” (1 Tim. 2:4) I kler ki ler nou onor e loue Zeova, sa i fer nou ris spirityelman. (Prov. 10:22) Sa i osi ed nou pour annan konfyans total dan nou Kreater, malgre nenport kwa ki kapab arive.​—Rom. 8:35-39.

²¹ Parey nou’n vwar, i pa otomatik pour annan konfyans dan Zeova konman sa enn ki donn gidans, nou bezwen fer zefor pour devlop sa kalite konfyans. Alor, annou fer tou zefor pour depan lo Zeova dan lapriyer. Medit lo lafason ki Zeova in akonpli son lavolonte dan lepase e pou akonpli li dan lavenir. Kontinyen devlop konfyans dan Zeova atraver nou ladorasyon. Pa oubliye ki bann rapel Zeova pou dir pour touzour. Nou osi nou pou kapab!

[Not anba lo paz]

[Kestyon]

[Portre lo paz 12]

[Portre lo paz 15]

Eski ou pou demontre konfyans parey pep Zeova dan letan Zozye? (Vwar paragraf 17, 18)