BIOGRAFI

Depan lo Zeova in anmenn rekonpans

Rakonte par Malcolm Allen

Parfwa dan lavi nou rankontre bann levennman san ekspekte, ki kapab menm difisil pour fer fas avek. Me Zeova i beni bann ki depan lo li, e pa lo zot prop konprenezon. Sanmenm ki mwan ek mon madanm nou’n eksperyanse diran nou lavi satisfezan ansanm. La en pti bout nou listwar.

MON papa ek mon manman ti rankontre an 1919 kot en lasanble distrik bann Etidyan Labib, Cedar Point, Ohio, Leta-z-ini. Zot ti marye pli tar sa menm lannen. Mon ti ne an 1922 e mon frer Paul ti ne de-z-an pli tar. Mon madanm Grace ti ne an 1930. Son paran, Roy ek Ruth Howell ti ganny elve konman bann Etidyan Labib e son granparan osi ti bann Etidyan Labib e zot ti zanmi avek Frer Charles Russell.

Mon ti zwenn Grace an 1947 e nou ti marye le 16 Zilyet 1949. Avan ki nou ti marye nou ti annan bann konversasyon fran konsernan nou lavenir. Nou ti deside pour partisip dan servis a plen tan e pour pa annan zanfan. Le 1 Oktob 1950, nou ti konmans nou servis pionye ansanm. Apre an 1952, nou ti ganny envite pour fer servis konman sirveyan rezyonal.

SIRVEYAN REZYONAL EK FORMASYON GILEAD

Nou tou le de nou ti santi ki nou ti bezwen ganny led pour akonpli sa nouvo servis. Pandan ki mon ti pe aprann avek bann frer eksperyanse, mon ti osi rod led pour Grace. Mon ti apros Marvin Holien, en vye zanmi nou fanmir ki ti eksperyanse dan sa servis konman sirveyan rezyonal e mon ti dir li: “Grace i zenn e i mank leksperyans. Eski ou kapab rod en dimoun ki kapab travay avek li pour en serten letan pour li ganny en formasyon?” I ti reponn, “Wi, Edna Winkle i en pionye ki kapab ed li en kantite.” Pli tar, Grace ti dir sa konsernan Edna: “I ti met mwan alez devan laport bann dimoun. I ti konn byen konman pour sirmont bann lobzeksyon e i ti montre mwan konman pour ekout bann dimoun pour ki mon kapab dir en keksoz ki apropriye. I ti zis sa ki mon ti bezwen!”

Grace ek mwan nou ti servi dan de rezyon dan leta Iowa, enkli serten bout dan leta Minnesota ek Sid Dakota. Apre, nou ti ganny transfer Rezyon 1 New York ki ti enkli serten rezyon Brooklyn ek Queens. Dan sa servis, nou ti realize ki nou ti vreman napa leksperyans. Sa  rezyon ti enkli kongregasyon Brooklyn Heights ki ti zwenn kot Lasal Rwayonm Betel e i ti annan en kantite manm fanmir Betel eksperyanse. Apre ki mon ti fer mon premye diskour servis dan sa kongregasyon, Frer Nathan Knorr ti vin kot mwan e dir: “Malcolm, ou’n donn nou detrwa konsey pour travay lo la e i ti vreman apropriye. Pa oubliye, si ou pa ed nou par sa bann bon konsey, ou pou napa en sitan gran valer pour lorganizasyon. Kontinyen ou bon travay.” Apre renyon, mon ti rakont sa avek Grace e pli tar, nou ti mont dan nou lasanm Betel epwize akoz lenkyetid e nou ti plere.

Apre detrwa mwan, nou ti resevwar en lenvitasyon pour asiste vennkatriyenm laklas Lekol Gilead ki ti pou terminen an Fevriye 1955. Nou ti ganny enformen avan al sa lekol ki sa formasyon pa ti pou neseserman prepar nou pour vin misyonner. Plito, i ti pou ed nou pour vin pli efikas dan nou servis konman sirveyan rezyonal e distrik. Asiste sa lekol ti en leksperyans merveye me i ti osi fer nou devlop limilite.

Ler nou ti fini sa formasyon, nou ti ganny anvoye pour fer servis sirveyan distrik. Nou distrik ti enkli leta Indiana, Michigan ek Ohio. Apre, an Desanm 1955, nou ti etonnen pour resevwar en let sorti kot Frer Knorr ki ti dir: “Pa ezite pour eksprim ou lekor fransman e pour onnet avek mwan aprezan. Si ou dir ki ou anvi vin Betel e reste isi . . . oubyen si ou anvi servi dan en lot servis apre ki ou’n servi dan Betel pour en pe letan, fer mwan konnen. Si ou prefere fer servis sirveyan distrik ek rezyonal, mon ti pou kontan konnen.” Nou ti reponn ki nou ti pou kontan aksepte nenport servis ki nou ganny demande pour fer. Preski deswit apre, nou ti ganny demande pour vin Betel.

BANN LANNEN EKSITAN DAN BETEL

Pandan mon bann lannen eksitan dan Betel, mon ti ganny demande pour fer bann diskour e ansenny dan en fason efikas dan Leta-z-ini antye. Mon ti ede form bann zenn frer ki pli tar ti ganny bann gro responsabilite dan lorganizasyon Zeova. Finalman, mon ti travay konman sekreter Frer Knorr dan departman ki ti organiz predikasyon mondyal.

Mon ti vreman apresye sa bann lannen ki mon’n pase dan Departman Servis. Dan sa servis mon’n ganny lokasyon travay avek Thomas Sullivan koni konman Bud. I ti servi konman sirveyan pour plizyer lannen dan sa departman. Me  i annan lezot ankor ki mon ti aprann bokou avek. Fred Rusk ti enn parmi sa bann frer ki ti form mwan. Avek lapresyasyon, mon rapel mon ti demann li, “Fred, akoz ou’n fer sa bann sanzman dan serten mon bann let?” I ti riye, me i ti azoute byen serye, “Malcolm, ler ou dir en keksoz avek labous i kapab ganny eksplike par lezot mo, me ler ou ekrir en keksoz sirtou ler i sorti isi, i bezwen byen kler e pli egzakt posib.” Apre i ti dir mwan zantiman, “Pran kouraz, ou pe byen fer e avek letan ou pou oke.”

Diran bann lannen Betel, Grace ti fer diferan travay enkli fer netwayaz, pran swen e okip lasanm bann Betelit. I ti kontan son travay. Ziska aprezan ler nou zwenn serten frer ki ti ankor zenn dan Betel pandan sa bann lannen, zot dir Grace avek en sourir, “Ou ti vreman montre mwan ki mannyer aranz lili, e mon manman ti byen apresye sa ki ou’n fer.” Grace ti travay dan Departman Magazin, Korespondans ek Prodiksyon Kaset. Lefet ki i’n desarz diferan responsabilite, sa ti ed li apresye nenport keksoz ki nou ti fer oubyen landrwa kot nou ti servi dan lorganizasyon Zeova konman en privilez ek benediksyon. Ziska aprezan i ankor santi koumsa.

BANN SANZMAN KI NOU’N FER

Ver lannen 1975, nou ti konmans realize ki nou paran aze ti bezwen plis led. Finalman, nou ti bezwen fer en desizyon difisil. Nou pa ti anvi kit Betel ek nou bann zanmi, bann serviter Zeova ki nou ti vreman kontan. Me kantmenm sa, mon ti santi ki i ti mon responsabilite pour pran swen avek nou bann paran aze. Alor, apre en serten letan nou ti kit Betel, me avek lide pour retournen ler nou sityasyon i sanze.

Pour siport nou lekor finansyerman, mon ti konmans travay dan en lakonpannyen lasirans. Mon pou toultan mazin sa ki en manedyer ti dir mwan kan mon ti pe fer mon formasyon: “Nou biznes i enplik al vizit bann dimoun aswar. I sa letan ki nou kapab zwenn bann dimoun. Napa nanryen ki pli enportan ki al kot sa bann dimoun tou le swar.” Mon ti reponn: “Mon asire ki ou pe koz dapre leksperyans e mon respekte ou pwennvi. Me mwan, mon annan bann responsabilite spirityel ki mon pa’n zanmen neglize e mon napa okenn lentansyon konmans fer li. Mon pou al vizit dimoun aswar, me dan Mardi ek Zedi swar mon bezwen asiste mon bann renyon ki vreman enportan.” Zeova ti vreman beni mwan lefet ki mon pa ti mank renyon pour al travay.

Nou ti avek mon manman ler i ti mor dan en lenstitisyon pour bann dimoun aze an Zilyet 1987. Sa ners ansarz ti vin kot Grace e dir: “Madanm Allen, al dan lakour e esey repoze. Tou  dimoun i konnen ki ou ti toultan la pour ou belmer. Annan en lespri anpe.”

An Desanm 1987, nou ti fer laplikasyon pour servi dan Betel ankor, sa landrwa ki nou ti kontan. Me zis detrwa zour pli tar Grace ti dekouver ki i ti annan kanser gro zentesten. Apre ki i ti’n opere e rekipere i ti ganny dir ki i ti nepli annan kanser. Me antretan, nou ti ganny en let sorti Betel ki ti demann nou pour kontinyen servi dan nou kongregasyon. Nou ti determinen pour kontinyen dan nou bann aktivite Rwayonm.

Avek letan, mon ti ganny sa loportinite pour ganny en travay Texas. Nou ti deside vi ki i annan en klima pli so laba, sa ti pou bon pour nou e sa in le ka. Isi Texas, nou antoure avek bann frer ek ser ki’n vreman pran byen swen avek nou pour sa apepre 25 an e nou’n vin vreman pros avek zot.

LESON KI NOU’N APRANN

Grace in bezwen lalit avek kanser gro zentesten ek tiroid, e tou dernyenman kanser tete. Me, i pa’n zanmen konplent lo son sityasyon dan lavi oubyen kestyonn prensip konsernan lotorite ek korperasyon. I ti souvan ganny demande, “Ki zot sekre pour annan en lavi maryaz reisi e ere?” I ti donn kat rezon: “Nou de pli bon zanmi. Nou koz regilyerman sak zour avek kanmarad. Nou kontan pas letan ansanm. Nou pa zanmen al dormi ankoler san ki nou koz avek kanmarad.” Byensir, enn fwa dan rar nou fer kanmarad ankoler, me nou pardonnen e oubliye. Sa i vreman marse.

Dan tou sa bann leprev ki nou pas atraver, i annan detrwa bon leson ki nou’n aprann:

(1) Touzour depan lo Zeova e aksepte sa ki i permet. Pa zanmen depan lo ou prop konprenezon.​—Prov. 3:5, 6; Zer. 17:7.

(2) Depan lo Parol Zeova pour gidans nenport kwa ki arive. I enportan pour obeir Zeova ek son lalwa. Napa lot swa, swa nou obeisan oubyen non.​—Rom. 6:16; Ebr. 4:12.

(3) I annan zis en keksoz dan lavi ki pli enportan, sa se pour fer en bon non devan Zeova. Met son lentere premye e pa tay deryer bann keksoz materyel.​—Prov. 28:20; Ekle. 7:1; Mat. 6:33, 34.

(4) Priye pour vin prodiktif e aktif dan servis Zeova otan ki ou kapab. Konsantre lo sa ki ou kapab fer, me pa lo sa ki ou pa kapab.​—Mat. 22:37; 2 Tim. 4:2.

(5) Konnen ki napa en lot lorganizasyon ki Zeova i beni e donn son laprouvasyon.​—Zan 6:68.

Grace ek mwan, nou’n servi Zeova pour plis ki 75 an e konman en koup marye nou’n servi li pour apepre 65 an. Nou’n vreman pas en moman merveye ansanm dan servis Zeova pour plizyer dizenn lannen. Nou swete e priye ki tou nou bann frer ek ser i kapab annan menm leksperyans e vwar ki byenfe nou gannyen ler nou depan lo Zeova.

[Portre lo paz 17]

[Portre lo paz 18]

Konmansman agos: Nathan Knorr, Malcolm Allen, Fred Rusk, Lyle Reusch, Andrew Wagner

[Ekstre lo paz 18]

“Si ou pa ed nou par sa bann bon konsey, ou pou napa en sitan gran valer pour lorganizasyon. Kontinyen ou bon travay”

[Portre lo paz 19]

Fern ek George Couch, Grace ek mwan Gilead an 1954

[Portre lo paz 19]

Pe travay dan Departman Servis an 1956

[Ekstre lo paz 20]

“Touzour depan lo Zeova e aksepte sa ki i permet”

[Portre lo paz 20]