Zot ti volonterman servi​—Filipin

APEPRE di-z-an pase, Gregorio ek Marilou, en koup marye dan zot 30 an ti pe servi konman pionye Manila an menm tan ki zot ti pe travay a plen tan. I ti en defi, me zot ti reisi. Apre Marilou ti ganny en promosyon pour vin manedyer dan sa labank kot i ti pe travay. I dir: “Sa bon travay ki nou ti annan ti permet nou viv en lavi konfortab.” Anfet, keksoz ti pe mars telman byen finansyerman ki sa koup ti deside pour konstri sa lakaz ki zot ti reve annan dan en landrwa ideal apepre 19 kilomet les avek Manila. Zot ti siny en kontra avek en kontrakter e fer laranzman pour pey pour sa proze tou le mwan pandan di-z-an.

“MON TI SANTI KI MON TI PE VOL ZEOVA”

Marilou i rakonte: “Mon ti sitan depans bokou letan ek lenerzi dan sa nouvo travay ki mon ti perdi gou pour bann keksoz spirityel. Mon ti santi ki mon ti pe vol Zeova.” I eksplike: “Mon ti nepli kapab donn Zeova sa letan ki mon ti deside pour depanse dan son servis.” Gregorio ek Marilou pa ti satisfe avek sa sityasyon, alor en zour zot ti deside pran letan pour koz konsernan ki direksyon zot  lavi ti pe ale. Gregorio i dir: “Nou ti oule fer en sanzman me nou pa ti vreman konnen ki pour fer. Nou ti diskit lo konman nou kapab servi nou lavi pour fer plis dan servis Zeova, sirtou ki nou ti napa zanfan. Nou ti priy Zeova pour son gidans.”

Sa letan, zot ti tann plizyer diskour konsernan servi dan en landrwa kot i annan bezwen pour plis proklanmater Rwayonm. Gregorio i dir: “Nou ti santi ki sa bann diskour ti larepons Zeova pour nou bann lapriyer.” Sa koup ti priye pour annan plis lafwa pour ki zot ganny kouraz pour fer sa bon desizyon. Sa pli gro lobstak ti zot proze lakaz ki ti touzour an mars. Zot ti’n deza fini pey pour trwa-z-an. Ki zot ti pou fer? Marilou i dir: “Si nou ti aret sa kontra, nou ti pou perdi tou sa ki nou ti’n fini deza peye ziska prezan e sa ti en gro sonm larzan. Me nou ti swazir pour met lavolonte Zeova premye dan nou lavi olye nou prop dezir.” Nou ti mazin parol zapot Pol kot i ti dir ki i’n “rezet tou,” alor nou ti kennsel nou proze lakaz, kit nou travay, vann laplipar nou bann byen e al reste dan en vilaz elwannyen lo zil Palawan, apepre 480 kilomet sid avek Manila.​—Fili. 3:8.

ZOT IN APRANN POUR ‘KONTANT ZOT DAN TOU SIRKONSTANS’

Avan ki zot ti ale, Gregorio ek Marilou ti esey prepar zot pour viv en lavi senp, me zot pa ti realize ki degre ba zot nivo lavi ti pou ete ziska ki zot ti ariv kot zot destinasyon. Marilou i dir: “I ti en sok. I ti napa elektrisite, ni okenn lezot fasilite. Olye zis met diri dan rice cooker, nou ti bezwen koup dibwa e kwi li lo dife. Mon ti sagren ki mon pa ti kapab al dan bann gran laboutik, al manze restoran, e profit tou bann fasilite ki annan dan bann gran lavil.” Kantmenm sa, sa koup ti kontinyen gard antet akoz zot ti’n demenaze e zot pa ti tarde pour adapte avek zot nouvo lavi. Marilou i dir: “Aprezan mon kontan obzerv labote lanatir e osi bann zetwal ki briye aswar. Plis ki tou keksoz, i gou pour vwar lakontantman lo figir bann dimoun ki nou pres avek. Dan nou servis isi, nou’n aprann pour ‘kontant nou dan tou sirkonstans.’”​—Fili. 4:12.

Gregorio i dir: “Ler nou ti ariv isi, i ti annan zis kat Temwen Zeova. Zot ti telman kontan ler mon ti konmans fer diskour piblik sak semenn e akonpanny zot avek gitar ler pe sant kantik.” Dan lespas enn an, sa koup ti vwar pour zot menm sa pti group kat dimoun prospere e vin en kongregasyon 24 proklanmater. Gregorio i dir: “Lanmour ki sa kongregasyon i demontre anver nou i tous nou en kantite.” Ler zot reflesir lo sa sis lannen ki zot in pase pour servi dan sa rezyon izole, zot dir: “Napa pli gran lazwa ki vwar bann progre spirityel. Plis ki  zanmen oparavan nou santi ki nou lavi i vreman annan en bi.”

“MON’N ‘GOUTE E MON’N VWAR KONMAN ZEOVA I BON’!”

I annan apepre 3,000 frer ek ser Filipin ki’n al dan bann rezyon kot i annan bezwen pour plis proklanmater Rwayonm. I annan 500 parmi zot ki bann ser selibater. Annou pran legzanp Karen.

Karen, ki dan son 25 an ti grandi dan lavil Baggao, Cagayan. Ler i ti ankor adolesan, souvan i ti mazin pour fer plis dan travay predikasyon. I rakonte: “Lefet ki mon konsyan ki letan i kourt e ki tou sort kalite dimoun i bezwen tann sa mesaz Rwayonm, mon ti anvi al servi la kot i annan bezwen pour plis proklanmater.” Par kont, serten dan son fanmir ti konsey li pour fer letid avanse olye al prese dan bann landrwa izole, me Karen ti priy Zeova pour ganny son gidans. I ti osi koz avek bann ki ti pe servi dan bann landrwa izole. A laz 18 an, i ti al reste dan en rezyon izole apepre 64 kilomet avek lavil kot i ti reste.

Sa pti kongregasyon kot Karen ti al ede ti responsab pour predikasyon dan en rezyon lo montanny lo Lakot Pasifik. Karen i rakonte: “Depi Baggao ziska sa nouvo kongregasyon nou ti bezwen mars pour trwa zour, monte desann lo bann montanny e plis ki 30 fwa travers bann larivyer.” I azoute: “Pour ariv kot serten etidyan Labib mon mars pour sis erdtan, pas lannwit kot zot e son lannmen mon mars pour ankor sis erdtan pour retourn kot mwan.” Eski tou sa zefor i vo lapenn? Karen i dir, “Par ler mon lipye i fermal.” Me i azoute avek en gran sourir, “Mon’n kondwir 18 letid Labib. Mon’n ‘goute e mon’n vwar konman Zeova i bon’!”​—Ps. 34:8.

“MON TI APRANN POUR DEPAN LO ZEOVA”

Kwa ki ti motiv Sukhi, en ser selibater ki dan son 40 an ki pe reste Leta-z-ini, pour al Filipin? An 2011 i ti asiste en lasanble rezyonal kot en koup marye ti ganny entervyou. Zot ti rakonte ki mannyer zot ti vann zot bann byen pour al reste Meksiko pour ede dan predikasyon laba. Sukhi i dir: “Sa entervyou ti konmans fer mwan reflesir lo bann lobzektif ki mon pa ti’n mazin lo la avan.” Kan Sukhi, ki annan lorizin Endyen, ti aprann ki i ti annan en bezwen Filipin pour pres avek bann dimoun ki koz Punjabi, i ti deside pour al ede laba. Eski i ti rankontre bann difikilte?

Sukhi i dir: “I ti pli difisil pour deside kwa ki mon pou garde oubyen vann. An plis ki sa, mon ti pe viv en lavi konfortab pandan 13 an dan mon prop apartman e la mon ti bezwen al reste kot en fanmir e tou mon bann keksoz ti dan bann bwat. I pa  ti fasil, me i ti prepar mwan pour viv en lavi senp.” Ki bann defi i ti rankontre apre ki i ti’n al reste Filipin? “Lafreyer zensek e sa lanvi pour retourn se mwan ti sa de pli gro defi. Mon ti aprann pour depan lo Zeova plis ki zanmen oparavan.” Eski i ti vo lapenn? Sukhi i dir an souriyan: “Zeova i dir nou, ‘Teste mwan, gete si mon pa ava devid en benediksyon lo zot.’ Sa bann parol ti vin vre dan mon ka ler en met lakour ti demann mwan, ‘Kan ki ou pou retourn kot mwan? Mon annan bokou lezot kestyon pour demann ou.’ Mon ganny bokou lazwa ek satisfaksyon pour ed bann dimoun ki lafen spirityelman!” (Mal. 3:10) Sukhi i azoute: “Vreman, fer sa desizyon pour demenaze ti sa keksoz pli difisil pour mwan. Apre ki mon ti’n fer sa, i ti enkrwayab pour vwar ki mannyer Zeova ti fer keksoz al byen pour mwan.”

“MON TI SIRMONT MON LAFREYER”

Sime, en frer marye ki aprezan i pros pour ganny 40 an ti kit Filipin pour al fer en travay byen peye dan en pei Mwayen Oriyan. Ler i ti laba, lankourazman ki i ti gannyen avek en sirveyan rezyonal e atraver en diskour ki en manm Konsey Direkter ti fer, Sime ti ganny motive pour met Zeova premye dan son lavi. I dir: “Me ler mon ti mazin pour kit mon travay sa ti vreman difisil.” Kantmenm sa, i ti kit son travay e retourn Filipin. Ozordi, Sime ek son madanm, Haidee pe servi dan provens Davao del Sur sid Filipin kot i annan plis bezwen pour proklanmater pour kouver sa gran teritwar. Sime i dir: “Kan mon mazin lepase, mon vreman kontan ki mon ti sirmont mon lafreyer pour kit travay e ki mon’n met Zeova premye dan mon lavi. Napa nanryen ki kapab anmenn plis satisfaksyon dan lavi ki donn Zeova nou meyer!”

“I DONN NOU EN GRAN SATISFAKSYON!”

Ler Ramilo ek Juliet, en koup pionye dan zot 30 an ti aprann ki en kongregasyon 30 kilomet avek kot zot ti reste ti bezwen led, zot ti volonter pour al ede. Alor sak semenn, ki swa lapli oubyen soley, Ramilo ek Juliet i fer plizyer vwayaz lo zot moter pour asiste renyon e partisip dan predikasyon. Menm si i en defi pour vwayaz lo bann semen ranpli avek bos ek bann pon lakord, zot kontan ki zot in arive fer plis dan zot minister. Ramilo i dir: “An tou, nou pe kondwir 11 letid Labib. Pour servi kot i annan plis bezwen i demann en leta lespri sakrifis, me i donn nou en gran satisfaksyon!”​—1 Kor. 15:58.

Eski ou ti a kontan konn plis konsernan servi kot i annan plis bezwen pour proklanmater dan ou pei oubyen aletranze? Si wi, koz avek ou sirveyan rezyonal e lir sa lartik “Eski ou kapab ‘pas dan Masedwann’?” dan Nou Minister Rwayonm Out 2011.

[Ekstre lo paz 3]

“Napa pli gran lazwa ki vwar bann progre spirityel. Plis ki zanmen oparavan nou santi ki nou lavi i vreman annan en bi.”​—Gregorio ek Marilou

[Portre lo paz 3]

[Bwat lo paz 4]

KI MANNYER ZOT SIPORT ZOT LEKOR FINANSYERMAN

I annan apepre 70 frer ek ser, ant 18 a 50 an ki sorti dan lezot pei ki pe servi Filipin. Robert ek Mirjam, en koup marye dan zot 45 an sorti Lalmanny i rakonte ki zot ti deside pour al servi zis pour enn an aletranze. Sa ti 14 an pase e zot ankor pe servi Filipin. Ki mannyer zot siport zot lekor finansyerman? Robert i rakonte: “Vi ki i vreman difisil pour trouv en travay isi, nou retourn Lalmanny enn fwa par an pour travay pour trwa mwan. Sa larzan ki nou gannyen i permet nou viv en lavi senp e fer pionye pandan larestan lannen Filipin.” Byensir, viv aletranze i annan son defi, me Mirjam i dir, “Mon annan lape lespri ek gidans Zeova.” Robert i dakor avek parol Mirjam, i dir: “Nou servis isi in ranforsi nou lafwa.”

[Portre]

[Portre lo paz 5]

Karen

[Portre lo paz 5]

Sukhi

[Portre lo paz 6]

Sime ek Haidee

[Portre lo paz 6]

Juliet ek Ramilo