Mon swa ler mon ti ankor zanfan

Mon ti annan zis di-z-an an 1985 kan bann zanfan sorti Cambodia ti ariv kot mon lekol Colombus, Ohio, Leta-z-ini. Enn sa bann garson ti konn detrwa mo an Angle. Atraver bann portre i ti konmans rakont mwan bann zistwar fer per lo fason ki bann dimoun i ganny tortire, touye e sove. Mon ti plere dan lannwit kan mon ti mazin sa bann zanfan. Mon ti anvi koz ek zot lo sa lespwar ki pou annan en Paradi e en rezireksyon, me zot pa ti konpran mon langaz. Menm si mon ti zis en pti garson, mon ti deside pour aprann Cambodian pour mon kapab koz avek mon bann kanmarad lekol lo Zeova. Mon pa ti realize sa letan ki mon swa ti pou annan en lefe lo mon lavenir.

I ti difisil pour aprann Cambodian. De fwa mon ti anvi les tonbe me Zeova ti ankouraz mwan atraver mon paran. Avek letan, mon bann ansenyan e mon bann kanmarad lekol ti konmans ankouraz mwan pour pourswiv en travay byen peye. Me mon ti anvi vin en pionye e mon ti swazir pour swiv bann kors pos segonder ki ti pou ed mwan pour trouv en travay a mi tan pour ki mon kapab atenn mon lobzektif. Apre lekol mon ti abitye zwenn serten pionye e travay avek zot dan predikasyon. Mon ti osi volonter pour montre bann etidyan ki ti pe aprann Angle konman en dezyenm langaz, en swa ki ti anmenn bokou byenfe pour mwan pli tar.

A laz 16 an mon ti tann koz lo en group Cambodian Long Beach, California, Leta-z-ini. Mon ti al vizit sa group e zot ti montre mwan ki mannyer pour lir Cambodian. Deswit apre ki mon ti fini lekol, mon ti konmans fer pionye e kontinyen pres avek bann dimoun ki sorti Cambodia ki ti reste pros kot mon reste. Kan mon ti ganny 18 an mon ti pe mazin pour al reste Cambodia. I ti ankor en landrwa danzere me mon ti konnen ki zis en pti gin dan sa dis milyon dimoun ki ti reste Cambodia ki ti’n tann sa bon nouvel Rwayonm. Sa letan, i ti annan zis en kongregasyon 13 proklanmater dan sa pei antye. Premye fwa ki mon ti vizit Cambodia mon ti annan 19 an. De-z-an pli tar mon ti deside pour al reste laba. Mon ti ganny en louvraz a mitan kot mon ti tradwir e ansenny Angle pour siport mon lekor finansyerman dan mon minister. Avek letan, mon ti zwenn mon madanm ki ti annan menm lobzektif ki mwan dan lavi. Ansanm, nou’n trouv lazwa pour ed plizyer dimoun Cambodia pour dedye zot lavi avek Bondye.

Zeova in donn mwan ‘sa ki mon leker i demande.’ (Ps. 37:4) Sa travay pli satisfezan ki en dimoun i kapab fer se fer disip. Pandan sa 16 an ki mon’n Cambodia, sa pti group 13 serviter Zeova in grandi pour vin 12 kongregasyon ek 4 group izole!​—Rakonte par Jason Blackwell.

[Portre lo paz 32]

Konman en zenn garson