Annou onor bann dimoun aze

“Ou devret onor en zonm aze.”​—LEV. 19:32.

KI OU POUR REPONN?

Ki mannyer Zeova i vwar bann aze ki fidel?

Ki responsabilite bann zanfan ki’n vin adilt i annan anver zot paran aze?

Ki mannyer bann kongregasyon i kapab pran konsiderasyon pour bann aze parmi zot?

1. Ki sityasyon tris limanite i ladan?

ZEOVA pa ti zanmen anvi ki imen i arive eksperyans bann move lefe ki lavyeyes i anmennen. O kontrer, i ti anvi ki zonm ek fanm i annan en lasante parfe dan Paradi. Me ozordi “tou lakreasyon Bondye pe soupire e soufer.” (Rom. 8:22) Ki mannyer ou panse Bondye i santi ler i vwar ravaz ki pese in fer lo bann imen? An plis ki sa, bokou dimoun aze i ganny neglize dan sa moman ki zot pli bezwen led.​—Ps. 39:5; 2 Tim. 3:3.

2. Akoz bann Kretyen i enterese avek bann aze?

² Pep Zeova i apresye bann frer ek ser aze dan zot kongregasyon. Nou benefisye avek zot lasazes e ganny ankouraze par zot lafwa. Bokou nou nou annan bann manm fanmir aze ki dan laverite. Toudmenm, ki swa zot nou manm fanmir oubyen non, nou enterese avek zot byennet. (Gal. 6:10; 1 Pyer 1:22) Nou tou nou pou benefisye kan nou aprann konn pwennvi Bondye lo bann aze. Nou pou osi egzamin responsabilite bann manm fanmir e osi kongregasyon konsernan nou bann aze ki nou kontan.

“PA REZET MWAN”

3, 4. (a) Ki ekriven Psonm 71 ti demann Zeova? (b) Kwa ki bann aze dan kongregasyon i kapab demann Bondye?

³ Anba lenspirasyon ekriven Psonm 71:9 ti enplor Bondye: “Pa rezet mwan pandan letan lavyeyes, pa kit mwan ler mon lafors in afebli.” I paret ki sa psonm i kontinyasyon Psonm  70, ki son lentrodiksyon i dir “par David.” Alor i paret ki David ki ti fer sa demann ki trouve dan Psonm 71:9. I ti servi Bondye depi son zenn tan ziska dan son vye zour e Zeova ti servi li pour akonpli bokou keksoz. (1 Sam. 17:33-37, 50; 1 Rwa. 2:1-3, 10) Kantmenm sa, David ti kontinyen demann Zeova pour pa rezet li.​—Lir Psonm 71:17, 18. *

⁴ Bokou dimoun ozordi i parey David. Menm si zot avanse dan laz e ki “bann zour difisil” in arive, zot fer tou sa ki zot kapab pour kontinyen loue Bondye. (Ekle. 12:1-7) Dan plizyer laspe zot lavi, bokou frer ek ser aze pa kapab fer sa ki zot ti abitye fer ler zot ti zenn e sa i enkli zot minister. Alor, zot osi zot kapab enplor Zeova pour donn zot son laprouvasyon e pran swen avek zot. Sa bann aze fidel i kapab asire ki Bondye pou reponn zot lapriyer. Apre tou, sa bann lapriyer i eksprim menm santiman parey sa ki David ti ekri anba lenspirasyon Bondye.

5. Ki mannyer Zeova i vwar bann aze ki fidel?

⁵ Lekritir i fer kler ki bann aze ki fidel i annan gran valer dan lizye Zeova e i ekspekte ki son bann serviter i donn zot loner. (Ps. 22:24-26; Prov. 16:31; 20:29) Levitik 19:32 i dir: “Devan en dimoun ki annan seve blan ou devret leve, ou devret onor en zonm aze e ou devret annan lakrent pour ou Bondye. Mwan mon Zeova.” Wi, onor bann aze dan kongregasyon ti en responsabilite enportan kan sa parol ti ganny ekrir e i ankor parey ozordi. Me ki nou pou dir lo pran swen avek zot? Lekel ki responsab pour sa?

RESPONSABILITE BANN MANM FANMIR

6. Ki legzanp Zezi in kite konsernan pran swen avek paran?

⁶ Parol Bondye i dir nou: “Onor ou papa ek ou manman.” (Egz. 20:12; Efe. 6:2) Zezi ti montre lenportans sa komannman kan i ti kondann bann Farizyen ek profeser lalwa ki ti refize pran swen avek zot paran. (Mark 7:5, 10-13) Zezi ti en bon legzanp dan sa domenn. Par egzanp, kan i ti pros pour mor lo poto, i ti donn zapot Zan, sa enn ki i ti kontan, sa responsabilite pour pran swen avek son manman ki aparaman ti en vev sa letan.​—Zan 19:26, 27.

7. (a) Ki prensip zapot Pol in kite lo konman pran swen avek paran? (b) Dan ki konteks Pol ti dir sa parol avek Timote?

⁷ Zapot Pol ti ganny enspire pour ekri ki bann krwayan i devret pran swen zot prop fanmir. (Lir 1 Timote 5:4, 8, 16.) Annou vwar dan ki konteks Pol ti dir sa avek Timote. Pol ti pe koz lo lekel ki ti kapab ganny led kongregasyon e lekel ki pa ti kapab ganny led kongregasyon. I ti fer kler ki bann zanfan ek pti zanfan e lezot fanmir pros ki premyerman annan sa responsabilite pour pran swen avek bann vev. Dan sa ka, sa fardo finansyel pa ti pou vin responsabilite kongregasyon. Pareyman ozordi, enn parmi bann fason ki Kretyen i met an pratik “zot lafwa” i par fourni zot prop fanmir avek keksoz materyel kan zot dan bezwen.

8. Akoz Labib pa donn bann konsey spesifik lo konman pour pran swen avek bann paran aze?

⁸ I kler ki bann zanfan Kretyen ki’n vin adilt i annan en lobligasyon pour fer sir ki zot konble bezwen materyel zot paran. Menm si Pol ti pe koz lo ‘bann fanmir ki krwayan,’ bann paran ki pa manm kongregasyon Kretyen pa devret ganny neglize. Fason ki bann zanfan i pran swen avek zot paran i kapab diferan. Napa sityasyon ki parey. Bann dimoun  aze i annan diferan bezwen, personnalite ek problenm lasante. Serten aze i annan bokou zanfan, tandis ki lezot i kapab annan zis enn. Serten i kapab ganny led avek gouvernman e lezot non. Bann swa personnel osi i diferan. Alor i pa ti pou byen pour kritik desizyon bann ki pe sey zot mye pour pran swen avek zot fanmir ki aze. Apre tou, Zeova i kapab beni nenport desizyon ki baze lo Labib e fer li reisi, parey i leka depi letan Moiz.​—Nom. 11:23.

9-11. (a) Ki sityasyon difisil serten i fer fas avek? (Vwar portre lo paz 20.) (b) Akoz bann zanfan ki’n vin adilt pa devret taye pour aret servis a plen tan? Donn en legzanp.

⁹ I kapab difisil pour pran swen avek paran aze kan paran ek zanfan i reste lwen avek kanmarad. Petet akoz lasante en paran in deteryore en sel kou, ouswa i’n tonbe, kas en lezo oubyen akoz lezot problenm, sa i fer ki sa zanfan i bezwen taye pour al get son papa ek son manman. Alor, sa i kapab fer ki zot pou bezwen led tanporer ouswa permanan. *

¹⁰ Bann serviter a plen tan ki pe servi dan bann landrwa ki lwen avek zot paran i bezwen fer fas avek bann desizyon difisil. Bann Betelit, misyonner ek bann sirveyan rezyonal e distrik zot tou zot vwar zot travay konman en keksoz presye e konman en benediksyon sorti kot Zeova. Kantmenm sa, si zot paran i tonm malad premye keksoz ki zot pour mazin fer i, ‘Nou bezwen aret nou servis e retourn dan lakour pour pran swen avek nou paran.’ Pourtan, i ti pou pli saz pour demann Zeova dan lapriyer si sa i vreman sa ki bann paran i bezwen oubyen anvi. Personn pa devret deswit abandonn zot privilez e i kapab pa neseser pour fer li. Eski i kapab ki sa problenm lasante i tanporer, oubyen eski petet serten manm dan kongregasyon zot paran ti pou kontan ede?​—Prov. 21:5.

¹¹ Annou vwar par egzanp, de frer ki ti servi lwen avek zot lakour. Enn ti misyonner Sid Lanmerik, lot ti travay kot biro prensipal Temwen Zeova Brooklyn, New York. Paran sa de frer ti bezwen led. Tou le de garson ek zot madanm ti vizit zot paran ki ti dan en pei Lazi pour vwar ki ti sa pli bon led pour zot. Avek letan, sa koup ki ti Sid Lanmerik ti pe mazin kit zot servis pour retourn kot zot. Apre sa, zot ti ganny en koudtelefonn sorti kot kordinater konsey ansyen dan kongregasyon zot paran. Bann ansyen ti’n diskit konsernan sa sityasyon e zot ti anvi ki sa koup i kontinyen dan zot servis pli lontan posib. Bann ansyen ti apresye servis sa koup e zot ti determinen pour fer tou sa ki zot ti kapab pour pran swen avek zot paran. Zis mazinen konbyen tou dimoun dan sa fanmir ti apresye led ranpli avek lanmour ki bann ansyen ti ofer zot!

12. Ki en fanmir Kretyen i devret konsernen avek kan i pe deside ki mannyer pour pran swen avek zot paran?

¹² Nenport ki metod en fanmir Kretyen i servi pour pran swen avek zot paran aze, tou sa ki enplike pou anvi fer sir ki i anmenn laglwar lo non Bondye. Zanmen nou pou anvi vin parey bann sef relizye dan letan Zezi. (Mat. 15:3-6) Nou anvi nou bann desizyon i anmenn loner lo Bondye ek kongregasyon.​—2 Kor. 6:3.

RESPONSABILITE KONGREGASYON

13, 14. Dapre Lekritir, akoz nou kapab dir ki bann kongregasyon i enterese pour pran swen avek zot bann dimoun aze?

¹³ Pa tou dimoun ki kapab ed bann serviter a plen tan parey i’n ganny mansyonnen  pli boner. Par kont, dapre en sityasyon ki ti arive dan premye syek, i kler ki kongregasyon i enterese pour ed bann frer ek ser aze ki egzanpler. Labib i dir sa konsernan kongregasyon Zerizalenm: “Personn parmi zot pa ti mank zot neseser.” I pa vedir ki zot tou zot ti ris lo plan materyel. I evidan ki serten ti annan en ptigin lo plan materyel, me keksoz ti ganny “distribye avek sakenn dapre zot bezwen.” (Akt 4:34, 35) Plitar, en sityasyon ti devlope lokalman. I ti ganny raporte ki serten “vev ti pe ganny neglize dan distribisyon [manze] toulezour.” Alor bann zapot ti fer laranzman ki bann frer kalifye i ganny apwente e sa bann frer ti fer sir ki bezwen sa bann vev ti ganny konble. (Akt 6:1-5) I vre ki distribisyon manze ti en laranzman tanporer pour ed bann ki ti vin Kretyen zour Lapannkot lannen 33 N.L. e ki apre ti pe reste en pe letan Zerizalenm pour zot ganny fortifye spirityelman. Toudmenm, sa ki bann zapot ti fer i montre ki kongregasyon ti kapab ede pour pran swen avek bann ki ti dan bezwen.

¹⁴ Parey nou’n vwar, Pol ti donn Timote bann lenstriksyon ki ti dekrir sirkonstans ki ti pou montre si en vev Kretyen ti merit ganny led materyel avek kongregasyon. (1 Tim. 5:3-16) Anba lenspirasyon Bondye, Zak sa ekriven Labib ti dakor avek sa lobligasyon ki bann Kretyen ti annan pour pran swen avek bann orfelen, vev ek lezot ki dan bezwen. (Zak 1:27; 2:15-17) Zapot Zan ti osi rezonnen e i ti dir: “Me si en dimoun i posed bann byen later, e i trouv son frer dan bezwen e i ferm son leker, e i pa ed li, ki mannyer lanmour Bondye i kapab reste dan son leker.” (1 Zan 3:17) Si endividyelman, en Kretyen i dan lobligasyon pour ed bann ki dan bezwen, eski pa sa i devret osi lobligasyon kongregasyon?

15. Ki bann fakter ki enplike ler pe donn led bann frer ek ser aze?

¹⁵ Dan serten pei, gouvernman i fer provizyon ki bann dimoun aze i ganny en pansyon, led avek bann servis sosyal ek bann dimoun ki aport swen kot lakour. (Rom. 13:6) Dan lezot pei, sa bann servis pa egziste. Alor, sa i vedir ki lakantite led ki bann fanmir ek kongregasyon i donnen pou depan lo sityasyon ki bann frer ek ser aze i ladan. Si bann zanfan ki Temwen i reste lwen avek zot paran, sa i kapab annan en lefe lo kantite led ki zot kapab aporte. I ti a byen ki bann zanfan i koz fransman avek bann ansyen dan kongregasyon zot paran pour fer sir ki tou dimoun i konpran  sirkonstans zot fanmir. Par egzanp, bann ansyen i kapab ed bann paran pour konnen ki mannyer gouvernman ek bann servis sosyal i kapab ede lokalman. Zot kapab osi fer konnen zanfan sa bann frer ek ser bann sityasyon ki pe pase kot lakour, tel parey bann bil ki pa’n ganny ouver ek fason ki paran pe servi zot medikaman. Kan i annan en bon kominikasyon, sa i kapab anpes en sityasyon vin pli grav e i kapab ede pour trouv bann solisyon pratik. Led ek konsey ki ganny donnen par bann ki pe vwar sa ki pe pase kot lakour en paran i kapab diminyen lenkyetid sa fanmir. I konmsi zot pe fer sa ki bann zanfan ti pou fer si zot ti la kot lakour.

16. Ki mannyer serten Kretyen i ed bann frer ek ser aze dan kongregayon?

¹⁶ Akoz zot annan lanmour pour zot bann aze, serten dan kongregasyon in pare pour volonterman donn zot letan ek lenerzi pour donn sa led ki zot bezwen. Zot vwar li enportan pour demontre en lentere senser anver bann ki pli aze dan kongregasyon. Zot fer laranzman pour ki sakenn son tour zot regilyerman ed sa bann aze. Menm si bann frer ek ser i realize ki zot sirkonstans pa permet zot pour fer servis a plen tan, zot kontan pour ed bann zanfan ki annan paran aze pour reste dan servis a plen tan osi lontan ki posib. Pa sa i en bon leta lespri ki sa bann frer ek ser i demontre! Byensir, sa pa vedir ki zenerozite sa bann frer ek ser i retir responsabilite ki bann zanfan i annan anver zot paran.

ONOR E BATIR BANN AZE

17, 18. Ki latitid en dimoun ki pe donn swen bann aze i devret annan pour ki son travay i agreab?

¹⁷ Tou bann ki pe donn led i devret fer zot mye pour fer li dan lazwa. Si ou annan en rol pour zwe, fer tou sa ki ou kapab pour gard en leta lespri pozitif. Dan serten ka, lavyeyes i kapab anmenn dezespwar ek depresyon. Alor, ou pou bezwen fer zefor spesyal pour onor e ankouraz bann frer ek ser aze avek bann parol ki batir. Ou kapab felisit bann ki’n servi Zeova fidelman pour bokou lannen. Zeova pa oubliy sa ki zot in fer pour servi li e tou Kretyen i devret fer parey.​—Lir Malaki 3:16; * Ebre 6:10.

¹⁸ An plis, bann pti dyok apropriye ki bann aze ek bann ki pe ed zot i fer i kapab fer li pli fasil pour fer fas avek bann difikilte dan lavi tou le zour. (Ekle. 3:1, 4) Bokou aze i fer zefor pour pa demann tro bokou latansyon lezot. Zot realize ki sa latansyon ek bann vizit ki zot gannyen i kapab ganny afekte par zot latitid. Souvan nou tann bann viziter dir sa bann parol, “Mon ti ale pour ankouraz mon vye zanmi, me se li ki’n ankouraz mwan.”​—Prov. 15:13; 17:22.

19. Ki bann zenn ek aze pe espere dan lavenir?

¹⁹ Nou pe esper sa zour kot soufrans ek lefe lenperfeksyon pou disparet. Antretan, bann serviter Bondye i devret gard zot lespwar fikse lo lavi eternel. Nou konnen ki lafwa dan promes Bondye i parey en lank ki pou ed nou dan move tan. Gras a lafwa, “nou pa perdi kouraz. Menm si nou lekor pe dousman dousman ganny detri, lo kote spirityel nou pe ganny renouvle de zour an zour.” (2 Kor. 4:16-18; Ebr. 6:18, 19) An plis ki gard en lafwa for dan bann promes Bondye, kwa ki kapab ed nou pour desarz nou bann responsabilite konman bann ki pe pran swen avek lezot? Nou pou vwar serten sizesyon pratik dan lartik ki swiv.

[Not anba lo paz]

[Kestyon]

[Portre lo paz 23]

Dan ka en aksidan, ki kongregasyon i kapab fer? (Vwar paragraf 15, 16)