“Zot a vin mon bann temwen”

“Zezi ti dir zot, ‘. . . zot a vin mon bann temwen . . . ziska tou bann landrwa pli elwannyen lo later.’”​—AKT 1:7, 8.

ESKI OU KAPAB REPONN?

Ki mannyer Zezi ti viv dapre sinifikasyon son non?

Akoz Zezi ti dir: “Zot a vin mon bann temwen”?

Akoz nou kapab annan konfyans ki nou pou reisi dan nou travay rann temwannyaz?

1, 2. (a) Lekel sa pli gran “temwen fidel e vre”? (b) Ki non Zezi i vedir e ki mannyer Garson Bondye ti viv an armoni avek son non?

“MON’N ne e mon’n vin dan lemonn pour servi temwen pour laverite.” (Lir Zan 18:33-37.) Zezi ti dir sa parol avek gouverner Romen Zide kan i ti pe ganny zize. Zezi ti’n fek idantifye son lekor konman en lerwa. Plizyer lannen pli tar, zapot Pol ti refer avek legzanp Zezi konman en “[“temwen,” NW] ki ti afirm son lafwa devan Pons Pilat.” (1 Tim. 6:13) Byensir, par ler i demann kouraz pour azir konman en “temwen fidel e vre” dan sa lemonn Satan ki ranpli avek laenn!​—Rev. 3:14.

² Lefet ki i ti ne dan nasyon Zwif, Zezi ti en temwen pour Zeova depi son nesans. (Iza. 43:10) Byensir, i ti vin sa pli gran temwen ki Bondye in formen pour defann Son non. Zezi ti pran o serye sinifikasyon sa non ki Bondye ti’n donn li. Kan en lanz ti dir Zozef, papa adoptif Zezi, ki Mari ti’n konsevwar en zanfan atraver lespri sen, sa lanz ti azoute: “I pou donn nesans en garson, e ou ava apel li Zezi, parski i pou sov son pep dan zot pese.” (Mat. 1:20, 21) Bann spesyalis Labib an zeneral i dakor ki sa non Zezi i sorti dan en non Ebre Yesoua ki vedir, “Zeova i Delivrans.” An armoni avek sinifikasyon son non, Zezi ti ed “bann  brebi egare pep Izrael” pour repantir pour ki zot reganny laprouvasyon Zeova. (Mat. 10:6; 15:24; Lik 19:10) Pour fer sa, Zezi ti rann temwannyaz avek devouman konsernan Rwayonm Bondye. Mark en ekriven Levanzil ti dir: “Zezi ti vin Galile, e i ti pres Levanzil an dizan: ‘Ler in arive, Rwayonm Bondye i pros, sanz zot lavi e krwar dan sa Bonn Nouvel.’” (Mark 1:14, 15) Avek kouraz Zezi ti osi denons bann sef relizye Zwif ki ti konplis pour fer li ganny egzekite lo en poto.​—Mark 11:17, 18; 15:1-15.

“BANN MERVEY KI BONDYE IN FER”

3. Ki ti arive trwazyenm zour apre lanmor Zezi?

³ Trwa zour apre lanmor kriyel Zezi en keksoz ekstraordiner ti arive, Zeova ti resisit li pa avek en lekor imen, me konman en lespri imortel. (1 Pyer 3:18) Pour prouv sa, Zezi ti aparet dan laform imen pour donn levidans ki i ti’n resisite. Menm zour ki i ti resisite, i ti aparet omwen senk fwa avek diferan disip.​—Mat. 28:8-10; Lik 24:13-16, 30-36; Zan 20:11-18.

4. Ki renyon Zezi ti fer apre son rezireksyon e ki responsabilite i ti fer kler avek son bann disip?

⁴ Senkyenm fwa ki Zezi ti aparet sete pour prezant son lekor avek son bann zapot ek bann ki ti’n reini ansanm avek zot. Dan sa moman inoubliyab, i ti kondwir en letid Labib. “I ti ouver zot lespri pour zot kapab konpran Lekritir.” Alor zot ti konpran ki son lanmor e son rezireksyon ti’n ganny predir dan Labib. A lafen sa renyon ki Zezi ti fer apre son rezireksyon, i ti fer kler avek son lodyans ki responsabilite zot ti annan. I ti dir zot “ki repantans ek pardon pese i ganny prese an son non avek tou nasyon, an konmansan par Zerizalenm.” I ti azoute: “Zot temwen sa bann keksoz.”​—Lik 24:44-48.

5, 6. (a) Akoz Zezi ti dir: “Zot a vin mon bann temwen”? (b) Ki nouvo laspe dan plan Zeova bann disip Zezi ti pou bezwen fer konnen?

⁵ Alor, 40 zour pli tar ler Zezi ti aparet pour dernyen fwa, son bann zapot ti pou’n konpran ki i ti oule dir par sa konmann senp me pwisan: “Alor zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Akoz Zezi ti dir: “Zot a vin mon bann temwen,” me pa pour Zeova? Zezi ti’n kapab dir vin temwen pour Zeova me i ti pe koz avek bann Izraelit ki ti deza bann temwen pour Zeova.

⁶ La aprezan bann disip Zezi ti pou bezwen fer konnen en nouvo laspe dan plan Zeova, en keksoz ki pli enportan ki delivrans bann Izraelit dan lesklavaz Lezip e apre Babilonn. Lanmor ek rezireksyon Zezi Kri i sa baz ki delivre nou dan sa pli gran egzil, setadir lesklavaz pese ek lanmor. Lapannkot lannen 33 N.L., bann disip Zezi ki ti’n fek ganny swazir ti fer bann dimoun konn “bann mervey ki Bondye in fer” e bokou ti reazir byen lo sa ki zot ti’n tande. Alor, akote drwat son Papa dan lesyel, Zezi ti konmans vwar ki son non i annan en pli gran lenportans kan plizyer milye dimoun ti repantir e met lafwa dan li konman sa enn ki Zeova in swazir pour anmenn delivrans.​—Akt 2:5, 11, 37-41.

“PRI POUR LIBERASYON BOKOU DIMOUN”

7. Ki bann levennman zour Lapannkot 33 N.L. ti prouve?

⁷ Bann levennman ki ti arive Lapannkot 33 N.L. ti prouve ki Zeova  ti’n aksepte valer sakrifis Zezi ki ti parfe konman sakrifis propisyasyon oubyen sakrifis ki kouver pese. (Ebr. 9:11, 12, 24) Parey Zezi ti eksplike, i “pa’n vin pour ganny servi, me pour servi e donn son lavi konman pri pour liberasyon bokou dimoun.” (Mat. 20:28) Sa “bokou dimoun” ki ti pou benefisye avek ranson Zezi pa ti zis bann Zwif ki ti’n repantir. O kontrer, i lavolonte Bondye “ki tou [“sort kalite,” NW] dimoun i ganny sove” vi ki ranson i “efas pese lemonn.”​—1 Tim. 2:4-6; Zan 1:29.

8. Ziska ki degre bann disip Zezi ti rann temwannyaz e ki mannyer sa ti posib?

⁸ Eski sa bann disip Zezi dan premye syek ti annan sa kouraz neseser pour kontinyen rann temwannyaz konsernan li? Byensir zot ti annan, me zot pa ti fer sa avek zot prop lafors. Lespri sen pwisan Zeova ti motiv zot e donn zot lafors pour kontinyen rann temwannyaz. (Lir Akt 5:30-32.) Apepre 27 an apre Lapannkot 33 N.L., i ti kapab ganny dir ki “mesaz laverite, levanzil,” ti’n ariv kot bann Zwif ek bann dimoun dan lezot nasyon “dan lemonn antye.”​—Kol. 1:5, 23.

9. Parey ti’n ganny predir, ki ti arive avek sa premye kongregasyon Kretyen?

⁹ Me malerezman, sa premye kongregasyon Kretyen ti gradyelman vin koronpi. (Akt 20:29, 30; 2 Pyer 2:2, 3; Zid 3, 4) Parey i ti ganny endike par Zezi, sa lapostazi ki ti ganny promote par “dyab,” ti pou grandi e kasyet bann vre Kretyen ziska “pandan konklizyon sa sistenm, NW.” (Mat. 13:37-43) Apre Zeova ti pou apwent Zezi konman Lerwa lo limanite. Sa ti arive Oktob 1914, ki ti konmansman “bann dernyen zour” move lemonn Satan.​—2 Tim. 3:1.

10. (a) Ki dat enportan bann Kretyen swazir dan nou letan ti fer resorti? (b) Ki ti arive Oktob 1914 e ki mannyer sa in vin evidan?

¹⁰ Bann Kretyen swazir dan nou letan ti fer resorti byen davans ki Oktob 1914 ti pou en lannen enportan. Zot ti baz sa lo profesi Danyel konsernan en gro pye dibwa ki ti ganny koupe e ki ti pou repouse apre “set letan.” (Dan. 4:16) Dan son profesi konsernan son prezans e ‘konklizyon sa sistenm,’ Zezi ti refer avek sa  menm letan konman “letan bann nasyon etranze.” Depi lannen 1914 “siny ki pou endik [“prezans,” NW]” Zezi konman nouvo Lerwa later in vin evidan pour tou dimoun. (Mat. 24:3, 7, 14; Lik 21:24) Alor depi sa letan “bann mervey ki Bondye in fer” i enkli lefet ki i’n apwent Zezi konman Lerwa lo limanite.

11, 12. (a) Ki nouvo Lerwa later ti konmans fer lannen 1919 apre Premye Lager Mondyal? (b) Ki lezot devlopman ti vin evidan depi bann lannen 1935 an montan? (Vwar portre lo paz 28.)

¹¹ Konman nouvo Lerwa later, Zezi Kri ti konmans delivre bann disip swazir ki ti an egzil “Gran Babilonn,” setadir tou fo larelizyon. (Rev. 18:2, 4) An 1919 apre Premye Lager Mondyal, bann Kretyen swazir ti annan sa posibilite pour rann en temwannyaz dan lemonn antye lo lafason ki Bondye pou sov nou e lo sa bon nouvel konsernan son Rwayonm ki i’n etabli. Bann Kretyen swazir ti sezi sa loportinite pour rann temwannyaz ki ti rasanble plizyer milye lezot Kretyen swazir pour vin zeritye ansanm avek Kris.

¹² Depi 1935 an montan, i ti vin evidan ki Kris ti’n konmans rasanble plizyer milyon “lezot mouton,” ki ti pou form parti sa “gran lafoul” sorti dan tou nasyon. Anba direksyon bann Kretyen swazir, sa gran lafoul i osi swiv legzanp kouraze Zezi e piblikman fer konnen ki zot pou ganny delivre gras a Bondye ek Kris. Lefet ki zot pe andire dan sa travay rann temwannyaz e kontinyen demontre lafwa dan sakrifis Kris, sa gran lafoul pou ganny sa privilez pour sirviv sa “gran [“ladetres,” NW]” ki pou met en lafen avek lemonn Satan.​—Zan 10:16, NW; Rev. 7:9, 10, 14.

‘PRAN KOURAZ POUR ANONS LEVANZIL’

13. Konman Temwen Zeova, ki nou determinen pour fer e ki mannyer nou asire nou pou reisi?

¹³ Annou kontinyen apresye nou privilez pour rann temwannyaz lo “sa bann mervey” ki Zeova in fer e son bann promes pour lavenir. I vre, i pa toultan fasil pour rann temwannyaz. Bokou nou bann frer ek ser i pres dan bann teritwar kot i annan bokou ki pa enterese, zot ganny sikannen oubyen persekite. Nou kapab fer parey zapot Pol ek son bann konpanyon ti fer. Pol ti dir: “Nou ti pran kouraz gras a nou Bondye pour anons zot Levanzil Bondye devan gran lopozisyon.” (1 Tesa. 2:2, NW) Alor annou pa zanmen bes lebra. O kontrer, annou determinen pour reste fidel anver nou dedikasyon, anmezir ki lemonn Satan  i ganny detrir. (Iza. 6:11) Nou pa kapab fer sa par nou prop lafors, me pour swiv legzanp bann Kretyen dan premye syek, nou bezwen priy Zeova pour ki i donn nou son lespri sen, sa “pisans ki napa son parey.”​—Lir 2 Korentyen 4:1, 7; Lik 11:13.

14, 15. (a) Ki mannyer bann Kretyen ti ganny konsidere dan premye syek N.L. e ki zapot Pyer ti dir konsernan zot? (b) Ki mannyer nou devret santi si nou ganny maltrete akoz nou en Temwen Zeova?

¹⁴ Ozordi, plizyer milyon dimoun i dir ki zot Kretyen, “me zot bann aksyon i prouv tou lekontrer. Zot detestab, dezobeisan e zot pa kapab fer nanryen ki bon.” (Tit 1:16) I bon pour nou rapel ki dan premye syek, bokou ti ay bann vre Kretyen, petet menm lamazorite bann dimoun ki ti viv dan zot lepok. Se pour sa ki zapot Pyer ti ekrir: “Si zot ganny maltrete pour non Kris, zot ere, parski . . . Lespri Bondye i repoz lo zot.”​—1 Pyer 4:14.

¹⁵ Eski sa parol enspire i kapab aplik pour bann Temwen Zeova ozordi? Be wi, akoz nou rann temwannyaz konsernan dominasyon Zezi. Alor, si lezot i ay nou akoz nou port non Zeova i parey konmsi nou “pe ganny maltrete pour non [Zezi] Kris,” ki ti dir avek son bann opozan: “Mon’n vin avek lotorite mon Papa me zot pa aksepte mwan.” (Zan 5:43) Alor, laprosenn fwa ki ou rankontre lopozisyon dan ou travay rann temwannyaz, pa dekouraze. Sa kalite maltrete i laprev ki ou annan laprouvasyon Bondye e son lespri sen pe ‘repoz lo ou.’

16, 17. (a) Ki pep Zeova i eksperyanse dan plizyer parti lemonn? (b) Ki ou determinen pour fer?

¹⁶ An menm tan, rapel ki i annan en kantite progre dan plizyer parti lemonn. Menm dan bann teritwar ki souvan ganny prese, nou ankor pe trouv dimoun ki pare pour ekoute e ki nou kapab partaz sa zoli mesaz delivrans avek. Annou devoue pour retourn kot bann ki enterese e si i posib fer bann letid Labib avek zot, ed zot pour progrese ziska ki zot dedye zot lavi e batize. Petet ou santi parey Sarie, en ser ki reste Sidafrik ki aktif dan predikasyon pour plis ki 60 an. I dir, “Mon vreman apresye ki par sakrifis Zezi, mon kapab annan en bon relasyon avek Zeova, Souvren liniver e mon kontan ki mon kapab fer konnen son non glorye.” Li avek son msye Martinus in ed bokou dimoun, enkli zot trwa zanfan pour vin bann adorater Zeova. Sarie i azoute: “Napa okenn lezot aktivite ki anmenn en pli gran satisfaksyon e atraver son lespri sen, Zeova i donn nou tou lafors ki nou bezwen pour kontinyen dan sa travay ki sov lavi.”

¹⁷ Ki swa nou bann Kretyen ki’n batize oubyen nou annan sa lobzektif pour fer li, nou annan tou rezon pour apresye sa privilez pour asosye avek kongregasyon Temwen Zeova dan lemonn antye. Alor, kontinyen rann plennman temwannyaz e an menm tan fer bokou zefor pour pa les ou ganny sali par move lemonn Satan. An fezan sa, ou pou onor nou Papa ranpli ek lanmour ki dan lesyel, ki nou annan sa privilez pour port son non glorye.

[Kestyon]

[Portre lo paz 30, 31]

Konman disip Zezi, nou kontinyen fer konnen plan Zeova pour lavenir (Vwar paragraf 5, 6)