I bezwen difisil pour en dimoun ki alerzik avek loder lesans. I tre probab ki zot pa kapab evite ganny ekspoze avek bann lesans dan zot lavi toulezour ler zot rankontre bann dimoun ki zot pa konnen. Serten in menm demande si i pou posib pour bann frer ek ser pa servi lesans dan bann renyon oubyen lasanble.

Sirman personn pa ti pou anvi fer ekspre pour fer ki en lot dimoun pa kapab asiste renyon. Nou tou nou bezwen sa bann lankourazman ki nou gannyen dan bann renyon. (Ebr. 10:24, 25) Anfet, en dimoun ki vreman alerzik avek loder lesans ki sa i anpes li vin renyon i kapab koz lo la avek bann ansyen. Menm si dapre Labib napa okenn lareg konsernan servi lesans kan nou pe vin lasal, bann ansyen i kapab donn bann lenformasyon pour ed kongregasyon konpran sityasyon ki lezot pe fer fas avek. Tou depan lo sirkonstans, bann ansyen i kapab deside pour revwar bann piblikasyon ki koz lo sa size e fer en bezwen lokal pandan Renyon Servis oubyen zot kapab fer en lanons lo sa size, me avek tak. * Me bann ansyen pa kapab toultan pe fer sa bann kalite lanons. I toultan annan bann nouvo dimoun ki enterese oubyen viziter ki prezan dan nou bann renyon e ki pa konn sa problenm e nou ti pou kontan ki zot santi zot alez. Personn pa devret santi zot anbarase akoz zot in met en ptigin lesans.

Si sa problenm i egziste dan nou kongregasyon e sirkonstans i permet, konsey ansyen i kapab fer laranzman pour bann ki alerzik avek loder lesans asiz dan en landrwa separe dan Lasal Rwayonm. Par egzanp, i kapab annan en lot lasal ki annan sistenm son kot zot kapab asize pour ekout renyon. Si sa problenm pa kapab ganny rezourd dan en fason rezonnab e ki serten i vreman pe soufer avek sa problenm, kongregasyon i kapab rikord renyon oubyen fer laranzman ki zot ekout renyon par telefonn kot zot menm, parey i ganny fer pour bann ki pa kapab sorti kot lakaz.

Tou dernyenman Nou Minister Rwayonm in ankouraz bann frer ek ser pour demontre konsiderasyon spesyal dan sa domenn kan zot pe asiste lasanble. Vi ki laplipar lasanble i ganny fer dan bann landrwa fermen kot i annan fàn, bann ki asiste i ganny demande pour pa servi bann lesans for dan sa bann lokazyon. Bann dimoun i ganny demande pour annan en konsiderasyon spesyal sirtou pour lasanble rezyonal, vi ki napa en landrwa spesifik pour met bann ki alerzik avek loder lesans. Me sa dispozisyon pa’n zanmen ganny fer avek lentansyon ki sa i vin en lareg dan bann renyon e i pa devret vin en lareg.

Vi ki nou viv dan sa lemonn, nou tou nou soufer avek konsekans lenperfeksyon ki nou’n erite. Pa nou apresye zefor ki lezot i fer pour evite ki nou soufer plis ankor! I kapab en sakrifis pour serten pa servi lesans pour ki i pli fasil pour bann frer ek ser asiste renyon. Me lanmour i kapab pous nou pour fer sa.

Bann lekter Labib i konn Pons Pilat akoz rol ki i ti zwe dan kondannasyon ek legzekisyon Zezi. (Mat. 27:1, 2, 24-26) Par kont, son non i osi aparet en kantite fwa dan lezot lenformasyon ki’n ganny rikorde konsernan listwar. Dapre The Anchor Bible Dictionary, i annan bokou plis lenformasyon istorik detaye lo Pons Pilat ki okenn lezot gouverner Romen dan Zide.

Non Pilat i aparet pli souvan dan bann liv ki istoryen Zwif Josephus in ekrir. Josephus ti ekrir trwa lensidan spesifik pour rakont bann difikilte ki Pilat ti rankontre ler i ti pe gouvern Zida. Istoryen Zwif Philo ti azout en katriyenm lensidan. Sa ekriven Romen Tacitus ki ti rikord listwar bann lanperer Romen ti konfirmen ki Pons Pilat ti donn lord pour Zezi ganny egzekite pandan renny Tiber.

An 1961, bann arkeolog ki ti pe travay dan en vye lasal teat Romen, Sezare, Izrael, ti trouv en slab ros ki ti’n ganny reservi e ki ti annan non Pilat lo la an Laten. Sa lenskripsyon (ki ganny montre la) pa an antye me petet orizinalman i ti lir koumsa: “Tiberieum Pons Pilat, Sef Zide ti’n dedye (sa batiman) avek bann bondye onorab.” Sa batiman ki ti pe ganny refer avek ti probableman en tanp ki ti onor Lanperer Romen Tiber.

Dan en “Kestyon lekter” ki ti ganny pibliye dan Latour Veyer le 15 Zilyet 2002 an Angle, i ti ganny dir ki en ser i devret kouver son latet si i kondwir en letid Labib dan prezans en proklanmater maskilen ki swa in batize oubyen non. Apre ki nou’n revwar konsernan sa size nou’n vwar ki i apropriye pour fer en modifikasyon.

Si sa proklanmater ki al avek sa ser pour fer en letid Labib ki’n ganny etabli i en frer batize, sa ser pou definitivman bezwen kouver son latet. Sa i montre ki i annan respe pour laranzman Zeova konsernan lotorite dan kongregasyon Kretyen akoz i pe fer en keksoz ki normalman i responsabilite en frer. (1 Kor. 11:5, 6, 10) Oubyen sa ser i kapab demann sa frer pour fer sa letid si i kalifye e si i kapab fer li.

De lot kote, si en ser i al fer en letid Labib ki’n fini ganny etabli avek en proklanmater maskilen ki pa ankor batize e ki pa son msye, dapre Labib i pa pou bezwen kouver son latet. Annefe, konsyans serten ser i kapab pous zot pour kouver zot latet menm dan sa sityasyon.