Pwisans Bondye i ganny revele dan bann zetwal

“Lev zot lizye anler e gete. Lekel ki’n kree sa bann keksoz? Se sa Enn ki pe fer marse sa larme, zot tou zot la. I apel zot tou par zot non. Akoz i annan en kantite lenerzi e akoz i for e pwisan, napa enn parmi zot ki manke.”—Izai 40:26.

SOLEY i en zetwal ki pa tro gro ni tro pti. Kantmenm sa, i 330,000 fwa pli lour ki later. Lamazorite zetwal ki pros avek later i pli pti ki soley. Me lezot zetwal parey sa enn ki apel V382 Cygni i apepre 27 fwa pli gro ki Soley.

Ki kantite lenerzi soley i large? Zis mazinen ki degre so en dife ti pou bezwen ete si malgre ou 15 kilomet lwen avek li ou ankor pe santi sa lasaler ki i large. Soley i apepre 150 milyon kilomet avek later. Pourtan, sa lasaler ki i large i kapab deplis ou lapo pandan en lazournen byen an soleye! I sirprenan pour konnen ki zis apepre en pti poursantaz lenerzi soley ki ariv lo later. E sa ptigin lenerzi ki soley i large i ase pour soutenir lavi lo nou plannet.

Anfet, bann syantis in kalkile ki lakantite lenerzi ki soley i large i ase pour soutenir 31,000 bilyon plannet parey later. Sit Internet Space Weather Prediction Center (SWPC) i donn en lot fason ki ou kapab kalkil sa. I dir ki Leta-z-ini “ti pou kapab servi menm poursantaz lenerzi ki i pe servi la konmela pour ankor 9,000,000 lannen” si tou lenerzi ki soley i annan ti kapab ganny anmase pour zis en segonn.

I annan bann atonm dan milye soley ki ler zot tap ansanm, zot larg en kantite lenerzi. Soley i sitan gro e son milye i sitan epe ki i pran plizyer milyon lannen pour sa lenerzi ki i prodwir ariv lo son sirfas. Sit Internet SWPC i dir: “Si ti arive ki soley i aret prodwir lenerzi ozordi, i ti pou pran apepre 50,000,000 lannen pour konmans santi bann pti lefe isi lo later!”

Aprezan analiz sa fe: Kan ou get dan lesyel pandan en sware byen kler, ou kapab vwar plizyer milye zetwal e parey soley zot larg en kantite lenerzi. Bann syantis in kalkile ki i annan plizyer bilyon zetwal dan liniver!

Kote tou sa bann zetwal i sorti? Ziska aprezan laplipar serser i krwar ki liniver in vin par azar apepre 14 bilyon lannen pase me zot pa konpran ki mannyer. Labib i klerman dir: “Okonmansman Bondye ti kree lesyel ek later.” (Zenez 1:1) San okenn dout, sa Enn ki’n kree bann zetwal ki prodwir en kantite lenerzi i kapab ganny dekrir konman Enn ki “pwisan.”—Izai 40:26.

Konman Bondye i servi Son pwisans?

Zeova i servi son pwisans pour soutenir bann ki fer son lavolonte. Par egzanp, zapot Pol ti servi son lenerzi pour ansenny lezot lo Bondye. Pol ti napa en lafors ekstraordiner, me i ti kapab fer en kantite bon travay malgre lopozisyon sever. Ki mannyer? I ti rekonnet ki i ti’n ganny “pisans ki napa son parey” sorti kot Bondye.—2 Korentyen 4:7-9.

 Zeova ti osi servi son pouvwar pour detrir bann ki volonterman kas son bann standar moral. Zezi Kri ti refer avek destriksyon Sodonm ek Gomor, ek Deliz dan letan Noe konman bann legzanp kot Zeova ti servi son pouvwar pour detrir bann move dimoun. Zezi ti profetize ki byento Zeova pou ankor enn fwa servi son pouvwar pour detrir bann ki inyor Son standar.—Matye 24:3, 37-39; Lik 17:26-30.

Ki lefe i annan lo ou?

Apre ki ou’n medit lo pwisans Bondye ki evidan dan bann zetwal, petet ou pou santi parey Lerwa David ki ti dir: “Kan mon vwar ou lesyel, travay ou ledwa, lalin ek zetwal ki ou’n prepare, ki zonm mortel i ete ki ou gard li antet, e en senp imen ki ou pran swen avek li?”—Psonm 8:3, 4.

Wi, kan nou realize ki degre ptipti nou ete konpare avek sa gran liniver sa i fer nou abes nou lekor. Pourtan, nou pa devret santi nou dekouraze par sa pouvwar ki Bondye i annan. Zeova ti enspir profet Izai pour ekrir sa bann parol rekonfortan: “I [Bondye] pe donn lafors sa enn ki fatige e sa ki napa lenerzi, i donn bokou bokou kouraz. Bann garson pou fatige e epwize, e bann zenn zan pou sirman tonbe, me bann ki annan lespwar dan Zeova pou reganny lafors. Zot pou leve avek lezel, parey bann leg. Zot pou taye e zot pa pou fatige; zot pou marse e zot pa pou epwize.”—Izai 40:29-31.

Si ou vreman anvi fer lavolonte Bondye, ou kapab asire ki i pou soutenir ou par donn ou son lespri sen. Me ou bezwen demann li. (Lik 11:13) Avek sipor Bondye ou kapab ganny lafors pour fer sa ki byen e andir nenport leprev.—Filipyen 4:13.

[Not adisyonnel]

Avek sipor Bondye ou kapab ganny lafors pour fer sa ki byen

[Portre lo paz 7]

Konmans kote gos anler, Galaksi Whirlpool, Group zetwal Pleiades, Orion Nebula, Galaksi Andromeda

[Portre lo paz 7]

Soley i 330,000 fwa pli lour ki later