4 Retir ou bann dout

“Zonm lafwa feb! Akoz ou’n doute?”—Matye 14:31.

KI SA DEFI? Menm bann disip Zezi ti doute parfwa. (Matye 14:30; Lik 24:36-39; Zan 20:24, 25) Annefe, Labib i dekrir mank lafwa konman sa “pese ki anvlop nou si fasilman.” (Ebre 12:1) Zapot Pol ti ekrir: “Pa tou dimoun ki annan lafwa.” (2 Tesalonisyen 3:2) Sa pa ­vedir ki serten dimoun pa kapab annan lafwa. O kontrer, bokou dimoun pa fer zefor pour annan lafwa. Bondye pou beni bann dimoun ki fer zefor pour annan lafwa.

KI MANNYER OU KAPAB SIRMONT SA DEFI? Idantifye bann size ki fer ou doute. Par egzanp, disip Tomas ti doute ki Zezi ti’n resisite, menm si lezot disip Zezi ti dir ki zot ti’n vwar li. Tomas ti anvi ganny laprev. Ki ti rezilta? Zezi ti montre li levidans ki i ti bezwen pour li annan en lafwa pli for.—Zan 20:24-29.

 Zeova i donn nou larepons ki nou bezwen atraver Labib pour retir nou bann dout. Par egzanp, bokou dimoun napa lafwa dan Bondye akoz zot direkteman oubyen endirekteman blanm li pour lager, vyolans ek soufrans ki limanite pe sibir. Ki Labib i dir lo sa size?

Pa Bondye ki par deryer bann gouvernman imen. Zezi ti refer avek sa lespri envizib ki apel Satan konman “sa enn ki gouvern lemonn.” (Zan 14:30) Satan ti ofer pour donn Zezi lotorite lo tou Rwayonm lo later si selman i ador li, par dir: “Mon a donn ou tou sa pouvwar ek laglwar sa bann rwayonm, akoz tousala in ganny livre avek mwan, e mwan, mon kapab donn nenport ki, ki mon oule.” Zezi pa ti dir ki Satan napa lotorite lo tou Rwayonm lo later. O kontrer I ti dir: “I’n ekri, ‘Ou devre ador ou Bondye, e servi zis li tousel.’” (Lik 4:5-8) Satan ek bann gouvernman imen ki devret ganny blanmen pour bann soufrans dan sa lemonn, me pa Bondye.—Revelasyon 12:9, 12.

Byento, Zeova pou retir tou keksoz ki fer nou soufer. I’n fini fer laranzman pour etablir en Rwayonm oubyen gouvernman, anba dominasyon son Garson, Zezi Kri, ki pou rennyen lo limanite. (Matye 6:9, 10; 1 Korentyen 15:20-28) Aprezan, sa bon nouvel lo Rwayonm pe ganny anonse lo later antye e sa i levidans ki profesi Labib pe ganny akonplir. (Matye 24:14) Byento sa Rwayonm pou elimin tou bann ki opoz son dominasyon e i pou retir tou sa ki fer limanite soufer.—Danyel 2:44; Matye 25:31-33, 46; Revelasyon 21:3, 4.

KI SA REKONPANS? Bann ki doute i parey laroul ki ganny pouse partou par “nenport divan lansennyman ki dimoun tronper i fannen.” (Efezyen 4:14; 2 Pyer 2:1) Tou le kontrer avek bann ki doute, bann ki trouv larepons satisfezan pour zot kestyon zot kapab “reste ferm dan lafwa.”—1 Korentyen 16:13.

Temwen Zeova ki’n pibliy sa magazin pou kontan pour ed ou trouv larepons bann kestyon ki kapab teste ou lafwa. Zot envit ou pour asosye avek zot e egzamin zot lansennyman pour ou menm. Sa pou vreman ranforsi ou lafwa dan Bondye.

Pour plis lenformasyon, vwar sapit 8, “Ki si sa Rwayonm Bondye?” ek sapit 11 “Akoz Bondye i permet soufrans?” dan sa liv Ki Labib i vreman dir? *

[Not anba lo paz 9]

[Portre lo paz 9]

Bann ki trouv bann larepons satisfezan pour zot kestyon i annan en baz solid pour zot lafwa