Kestyon sorti kot nou lekter . . .

Kote sa Paradi ki Labib i koz lo la i ete?

▪ Zezi ti dir sa parol avek en zonm ki ti pros pour mor e ki ti’n eksprim son lafwa dan li: “Ou pou avek mwan dan paradi.” (Lik 23:43) Kote sa zonm ti pou ale? Eski Paradi pou dan lesyel, lo later ouswa dan en lot landrwa kot bann imen i esper zizman?

Nou premye paran ti deza viv dan Paradi. Labib i dir nou ki “Zeova ti fer en zarden an Edenn, dan les, e i ti met zonm ki i ti’n formen ladan. . . . E Zeova ti pran sa zonm e met li dan zarden Edenn pour li kiltiv li e pran swen avek li.” (Zenez 2:8, 15) Kan sa parol ti ganny tradwir dan langaz Grek, sa mo “zarden” ti ganny tradwir apartir sa mo pa·raʹdei·sos, ki an Kreol in ganny tradwir “paradi.”

Zis parey en koup ti pou agrandi zot lakaz si zot ti annan plis zanfan, sa Paradi ki nou premye paran ti reste ladan pa ti pou zis dan zarden Edenn anmezir lafanmir imen ti pou agrandi. Bondye ti dir zot: “Ranpli later e domin li.”—Zenez 1:28.

Nou Kreater ti anvi ki bann imen i viv e fer zanfan dan Paradi isi lo later. Zot ti pou viv pour touzour lo later ki ti pou en zarden, san ki i ti neseser pour annan okenn simityer. Later ti pou sa landrwa kot bann imen ti pou reste pour touzour. I pa drol alor ki bann keksoz natirel lo nou plannet i en plezir pour nou apresye! Nou ti ganny kree pour viv lo en later vreman zoli.

Eski plan Bondye in sanze? Non. Parski Zeova i asir nou: “De menm mon parol ki sorti dan mon labous pou akonplir. I pa pou retourn kot mwan san rezilta, me i pou sirman akonplir sa ki mon’n pran plezir ladan.” (Izai 55:11) Plis ki 3,000 an apre ki zonm ti ganny kree, Labib ti dir sa konsernan “sa Enn ki’n form e fer later.” I dir ki i “pa’n kree [later] pour nanryen ditou,” me ki i’n “fer li pour dimoun reste lo la.” (Izai 45:18) Lavolonte Bondye pa’n sanze. Later pou vini en paradi.

I enteresan pour note ki plizyer verse Labib ki koz lo Paradi i senpleman pe dekrir lavi lo later. Par egzanp, en profesi dan Izai i dir: “Zot pou konstrir lakaz e zot pou reste ladan; wi, zot pou plant pye rezen e zot pou manz son fri.” (Izai 65:21) Kote lakaz i ganny konstrir? Kote pye rezen i pouse pour manz son fri? Lo later. Proverb 2:21 i dir klerman: “Bann ki drwat ki pou reste lo later.”

Zezi osi ti koz lo en paradi lo later. I vre, i ti osi promet ki en pti group ki ganny swazir pou dan paradi dan lesyel. (Lik 12:32) Apre ki zot mor, sa bann dimoun i ganny resisite pour al viv dan lesyel e zwenn Kris pour zot diriz lo sa Paradi ki pou lo later. (Revelasyon 5:10; 14:1-3) Sa bann ki pou diriz ansanm avek Kris pou fer sir ki sa Paradi lo later pou ganny byen dirize e pran swen avek, dapre standar Bondye.

Zezi ti konnen ki sa ti lavolonte Bondye pour later. Apre tou, i ti dan lesyel avek son Papa ler zarden Edenn ti ganny fer. Tou dimoun ki annan lafwa dan Zezi ozordi i annan sa sans pour viv dan en paradi lo later a lavenir. (Zan 3:16) Zezi i promet sa bann dimoun: “Ou pou avek mwan dan Paradi.”—Lik 23:43.

[Portre sorti kot lo paz 10]

© FORGET Patrick/SAGAPHOTO.COM/Alamy