Bondye in prouv son lanmour pour nou

“Lagras [pou] renny par lazistis pour lavi eternel.”​—ROM. 5:21.

1, 2. Ki sa de kado ki’n ganny mansyonnen. Lekel ki annan plis valer?

“POUR bann Romen, sa pli gran . . . leritaz ki zot ti kapab pas avek sa bann ki ti vin apre zot, se bann lalwa ek sa konviksyon ki nou devret viv nou lavi dapre lalwa.” (Dokter David Williams, Liniversite Melbourne, Lostrali) Ki swa nou dakor avek sa oubyen non, i annan en lot leritaz oubyen kado ki annan bokou plis valer. Sa kado i fer li posib pour nou annan laprouvasyon Bondye ek lespwar pour ganny sove e ganny lavi eternel.

² Dan en sans, i ti annan bann laspe legal ki ti enplike dan lafason ki Bondye ti pou donn sa kado. Dan Romen sapit 5, zapot Pol pa ti prezant en kantite lenformasyon annwiyan lo lalwa. Plito, i ti konmans avek en bon nouvel ki reasir nou, an dizan: “Nou’n ganny zistifye [oubyen konsidere konman drwat] par lafwa, [alor] nou annan lape avek Bondye par nou Senyer Zezi-Kri.” Sa bann ki benefisye avek kado Bondye i santi zot pouse pour kontan li an retour. Pol ti enn parmi. I ti ekrir: “Lanmour Bondye in  ganny deverse dan nou leker par Sent-Espri.”​—Rom. 5:1, 5.

3. Ki kestyon ki vin natirelman dan nou lespri?

³ Akoz sa bon kado ti neseser? Ki mannyer Bondye ti kapab ofer sa kado dan en fason zis ki ti pou benefisye tou dimoun? Ki nou bezwen pour nou kapab resevwar sa kado? Annou get bann larepons satisfezan e vwar ki mannyer sa i montre ki Bondye i kontan nou.

Lanmour Bondye ek pese

4, 5. (a) Dan ki fason Zeova ti demontre son lanmour ekstraordiner? (b) Ki nou bezwen konnen pour kapab konpran Romen 5:12?

⁴ Zeova ti demontre en lanmour ekstraordiner ler i ti anvoy son sel Garson pour ed bann imen. Pol ti met li koumsa: “Bondye in prouv son lanmour pour nou: Kan nou ti ankor peser, Kris in mor pour nou.” (Rom. 5:8) Reflesir lo sa realite ki ganny mansyonnen: “Kan nou ti ankor peser.” Tou dimoun i bezwen konnen ki mannyer sa ti arive.

⁵ Pol ti fer resorti en pwen ler i ti dir: “Pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.” (Rom. 5:12) Nou kapab konpran sa pwen parski Bondye in donn nou en liv ki rakonte ki mannyer listwar imen ti konmanse. Zeova ti kree de imen, Adan ek Ev. Nou Kreater i parfe, nou de premye paran osi ti parfe. I ti annan zis en keksoz ki Bondye ti dir zot pa fer. I ti fer kler ki si zot dezobeir sa lalwa, zot ti pou mor. (Zen. 2:17) Toudmenm, zot ti mal azir par kas sa lalwa rezonnab ki Bondye ti’n donn zot. Alor, zot ti rezet sa Enn ki Souvren e ki fer bann lalwa.​—Det. 32:4, 5.

6. (a) Akoz bann desandans Adan ti mor, avan e apre ki Bondye ti donn Lalwa Moiz? (b) Ki nou kapab aprann avek sa maladi ki apel emofili?

⁶ Adan ti fer zanfan apre ki i ti’n fer pese, alor, i’n pas pese ek son move konsekans avek tou son bann zanfan. Byensir, zot pa ti’n kas lalwa Bondye parey Adan, alor zot pa ti koupab pour menm pese ki li, e osi lalwa pa ti ankor ganny donnen sa letan. (Zen. 2:17) Me, kantmenm sa, desandans Adan in erit pese. Alor, pese ek lanmor in dominen ziska lepok kot Bondye ti donn lalwa bann Izraelit ki ti fer kler ki zot ti bann peser. (Lir Romen 5:13, 14.) Pour montre ki mannyer nou kapab erit pese, annou pran legzanp serten maladi erediter parey lannemi Mediterane ouswa emofili. Kekfwa ou’n deza lir ki Alexis, garson Lerwa Larisi, Nicholas 2 ek Alexandra ti ganny emofili, en maladi erediter dan disan. I vre ki dan en fanmir koumsa, pa tou zanfan ki pou devlop sa maladi, me toudmenm, zot kapab bann porter. Me i pa le ka avek pese. Personn pa kapab sap move konsekans pese ki nou’n erite avek Adan. Tou dimoun i santi son lefe. I touzour fatal. Tou zanfan in ganny li. Ki mannyer nou kapab sirmont sa sityasyon difisil?

Kado Bondye atraver Zezi Kri

7, 8. Ki mannyer lavi de zonm parfe ti anmenn diferan rezilta?

⁷ Avek lanmour, Zeova in fer provizyon pour bann imen sirmont zot leta peser ki zot in erite. Pol ti eksplike ki sa ti posib par mwayen en lot zonm, en zonm parfe ki ti vin sa dezyenm Adan. (1 Kor. 15:45) Me lavi sa de zonm parfe in anmenn de rezilta konpletman diferan. Ki mannyer sa?​—Lir Romen 5:15, 16.

⁸ Pol ti ekrir: “Don gratwit Bondye napa konparezon avek fot Adan.” Adan ti koupab akoz son fot e i ti resevwar en santans zis, setadir lanmor. Selman, pa zis li ki ti mor. Nou lir: “Bokou dimoun in mor par fot [sa] sel zonm.” Sa santans zis ki ti’n ganny pase lo li, in pas lo nou tou konman son bann desandans enparfe. Kantmenm sa, i ankourazan pour konnen ki lavi Zezi, sa zonm parfe ti pou anmenn en rezilta konpletman diferan. Ki rezilta? Pol ti reponn an dizan: “Bondye in akit  [tou sort zonm] e donn [zot] lavi.”​—Rom. 5:18, nou ki’n met an italik.

9. Dapre Romen 5:16, 18, ki savedir Bondye in akit zot?

⁹ Ki sa lekspresyon Grek ki’n ganny tradwir “zistifikasyon” e “Bondye in akit” zot i vedir? En tradikter Labib ti ekrir sa lo sa size: “Sa bann mo ki ganny servi dan sa legzanp i bann term preski legal. I pa koz lo en sanzman dan sa dimoun, me plito dan lafason ki Bondye i vwar sityasyon sa dimoun . . . Dan sa legzanp, Bondye i parey en ziz ki’n pas en zizman favorab lo en dimoun ki ti’n ganny akize devan lakour Bondye konmkwa i pa en dimoun drwat. Me Bondye i akit li.”

10. Ki Zezi ti fer pour ki Bondye i kapab akit en peser?

¹⁰ Lo ki baz sa “Ziz lo later antye” i akit en peser? (Zen. 18:25) Premye pa enportan ki sa Bondye lanmour ti pran se ki i ti anvoy son sel Garson lo later. Zezi ti akonplir lavolonte son Papa parfetman, malgre tantasyon, sikannri ek labi. I ti gard son lentegrite menm ziska lanmor lo en poto martir. (Ebr. 2:10) Par donn son lavi imen parfe konman en sakrifis, Zezi ti pey sa ranson pour liber desandans Adan avek pese ek lanmor.​—Mat. 20:28; Rom. 5:6-8.

11. Ki mannyer sa ranson i annan menm valer ki sa keksoz ki’n ganny perdi?

¹¹ Dan lezot parti Labib, Pol i servi sa lekspresyon “pri pour sov limanite.” Sa pri ti bezwen annan menm valer avek sa keksoz ki ti’n perdi. (1 Tim. 2:6) Ki sa pri? Nou konnen ki Adan ti pas lenperfeksyon ek lanmor avek plizyer bilyon dimoun, setadir son bann desandans. Konman en zonm parfe, Zezi ti’n kapab vin papa en desandans plizyer bilyon imen parfe. * Alor, i ti annan sa krwayans ki lavi Zezi avek lavi sa desandans ki i ti’n kapab annan ti pou vin konman en sakrifis ki annan menm valer avek lavi Adan ek lavi son desandans enparfe. Me, Labib pa dir ki menm si Zezi ti’n annan en desandans, sa desandans ti pou form parti sa ranson. Romen 5:15-19 i fer resorti ki par lanmor zis “en sel zonm” bokou ti pou ganny libere. Wi, lavi parfe Zezi ti annan menm valer ki sa ki pour Adan. Nou devret konsantre zis lo Zezi tousel. I’n vin posib pour tou imen ganny sa don gratwit ek lavi akoz “laksyon zis en sel zonm” Zezi, setadir atraver son lobeisans ek lentegrite menm ziska lanmor. (2 Kor. 5:14, 15; 1 Pyer 3:18) Ki mannyer sa in vin posib?

Akite lo baz ranson

12, 13. Akoz bann ki benefisye avek ranson i bezwen mizerikord ek lanmour Bondye?

¹² Zeova ti aksepte sa ranson oubyen sakrifis ki son Garson ti fer. (Ebr. 9:24; 10:10, 12) Toudmenm, bann disip Zezi lo later enkli son bann zapot fidel ti ankor enparfe. Menm si  zot ti fer bokou zefor pour pa fer sa ki mal, zot pa ti toultan reisi. Akoz? Parski zot ti’n erit pese. (Rom. 7:18-20) Me, Bondye ti kapab e i ti fer en keksoz pour zot. I ti aksepte sa ranson oubyen sa pri ki annan menm valer avek sa ki ti’n perdi e i ti pare pour fer bann imen fidel benefisye avek sa laranzman.

¹³ I pa konmsi Bondye ti oblize fer zot benefisye avek ranson akoz zot ti’n fer serten bon aksyon. Plito, Bondye ti fer sa akoz son gran lanmour ek mizerikord. I ti swazir pour akit bann zapot ek lezot imen fidel e i pa ti vwar zot koupab akoz lenperfeksyon ki zot ti’n erite. Pol ti fer li kler ler i ti dir: “Par lagras zot in ganny sove, par lafwa dan li. E sa se pa par zot prop zefor, me i en kado Bondye.”​—Efe. 2:8.

14, 15. Ki rekonpans serten pou gannyen, me ki zot bezwen fer toudmenm?

¹⁴ Zis mazin sa kado ki Bondye Tou Pwisan i fer ler i pardonn pese ki en dimoun in erite e lofans ki i’n komet! I enposib pour kont lakantite pese ki en dimoun i fer avan i vin en Kretyen. Pourtan, lo baz ranson, Bondye i kapab pardonn sa bann pese. Pol ti ekrir: “Don gratwit apre bokou fot, ti anmenn zistifikasyon.” (Rom. 5:16) Bann zapot ek lezot ki ti ganny sa kado (setadir zistifye oubyen konsidere konman drwat par Bondye) ti pou bezwen kontinyen ador sa sel vre Bondye avek lafwa. Ki rekonpans zot ti pou gannyen a lavenir? “Tou sa ki’n resevwar an abondans lagras Bondye ek don gratwit son lazistis pou rennyen dan lavi par en sel, Zezi-kri.” Vreman, sa kado Bondye i anmenn en rezilta konpletman diferan, i donn lavi.​—Rom. 5:17; lir Lik 22:28-30.

¹⁵ Bann ki resevwar sa kado i vin bann garson spirityel Bondye. Konman zeritye ansanm avek Kris, zot annan sa lespwar pour ganny resisite pour al dan lesyel konman bann vre garson spirityel ki pou “rennyen” ansanm avek Zezi Kri.​—Lir Romen 8:15-17, 23.

Bondye i demontre son lanmour anver lezot ankor

16. Ki kado bann ki annan lespwar pour viv lo later i kapab gannyen?

¹⁶ Pa tou dimoun ki demontre lafwa e servi Bondye konman Kretyen fidel ki pou “rennyen” avek Kris dan lesyel. Bokou i annan menm lespwar baze lo Labib ki bann serviter fidel Bondye avan lepok Kretyen ti annan. Zot annan lespwar pour viv dan Paradi lo later. Eski bann ki annan lespwar pour viv lo later i kapab resevwar en kado Bondye e ganny akite avek zot pese la konmela? Dapre sa ki Pol ti dir bann Romen, larepons i wi. Pa sa i ankourazan!

17, 18. (a) Lefet ki i ti annan lafwa, ki mannyer Bondye ti konsider Abraam? (b) Ki mannyer Zeova ti kapab konsider Abraam konman en dimoun drwat?

¹⁷ Pol ti donn en bon legzanp, i ti koz lo Abraam en zonm ki ti annan lafwa ki ti viv avan ki Bondye ti donn lalwa avek bann Izraelit, lontan avan ki Kris ti ouver semen pour al viv dan lesyel. (Ebr. 10:19, 20) Nou lir: “Bondye ti promet Abraam ek son desandan leritaz lemonn non pa akoz Abraam ti obei lalwa, me parski i ti ganny konsidere konman zis akoz son lafwa.” (Rom. 4:13; Zak 2:23, 24) Alor, Bondye ti konsider Abraam konman en dimoun drwat.​—Lir Romen 4:20-22.

¹⁸ Byensir, sa pa vedir ki pandan tou sa lannen ki Abraam ti servi Zeova i pa ti fer pese. I pa ti en zonm drwat dan sa sans. (Rom. 3:10, 23) Me dan son lasazes ekstraordiner, Zeova ti pran an konsiderasyon lafwa remarkab Abraam ek son bann bon aksyon ki ti vin avek. Espesyalman, Abraam ti annan lafwa dan sa “desandans” ki ti’n ganny promet ki ti pou sorti dan son fanmir. Sa Desandans ti finalman vin Mesi oubyen Kris. (Zen. 15:6; 22:15-18) Dan sa menm fason, “par Kris Zezi ki’n delivre zot,” Bondye konman Ziz i kapab pardonn pese ki ganny fer dan lepase. Alor,  Abraam ek lezot zonm fidel ki ti viv avan lepok Kretyen i kapab ganny resisite.​—Lir Romen 3:24, 25; Ps. 32:1, 2.

Ou kapab ganny konsidere drwat la konmela

19. Akoz lafason ki Bondye ti konsider Abraam i ankourazan pour bokou dimoun ozordi?

¹⁹ Lefet ki sa Bondye lanmour in konsider Abraam konman en dimoun drwat, i devret ankourazan pour bann Kretyen ozordi. Zeova pa ti konsider li konman en dimoun drwat dan menm sans avek sa bann ki ganny swazir avek lespri sen pour vin “zeritye ansanm avek Kris.” Zis sa pti group ki ti pou vin bann “garson Bondye” oubyen bann sen. (Rom. 1:7; 8:14, 17, 33) Par kont, Abraam li i ti vin “zanmi Bondye” menm avan ki ranson ti ganny peye. (Zak 2:23; Iza. 41:8) Alor, ki arive avek bann Kretyen ki annan lespwar pour viv dan Paradi lo later?

20. Ki Bondye i ekspekte avek bann ki i konsider konman drwat parey Abraam?

²⁰ Sa bann Kretyen pa’n resevwar “don gratwit son lazistis” pour viv dan lesyel “par Kris Zezi ki’n delivre zot.” (Rom. 3:24; 5:15, 17) Toudmenm, zot demontre en gran lafwa dan Bondye ek son bann laranzman e zot demontre zot lafwa par bann bon aksyon. Enn sa bann aksyon i enplik “pres Rwayonm Bondye e ansennyen konsernan Senyer Zezi-kri.” (Akt 28:31) Alor, Zeova i kapab konsider zot konman bann dimoun drwat dan menm sans ki i ti fer avek Abraam. Sa kado ki zot resevwar i en lanmitye avek Bondye e sa i diferan avek “don gratwit” ki bann Kretyen swazir i gannyen. Selman, zot vreman kontan sa kado e zot aksepte li avek rekonesans.

21. Ki byenfe nou kapab gannyen gras a lanmour ek lazistis Zeova?

²¹ Si ou annan sa lespwar pour viv lo later pour touzour, ou devret realize ki sa i pa zis akoz en lide ki’n pas dan lespri en dirizan imen. Plito, i form parti en plan ki reflekte lasazes Souvren Liniver. Zeova in progresivman akonplir son plan. Dan sa bann diferan letap dan lakonplisman son plan, i’n toultan respekte son vre lazistis. Pli enportan ankor, zot in reflekte son gran lanmour. Pour sa rezon, Pol ti kapab dir: “Bondye in prouv son lanmour pour nou: Kan nou ti ankor peser, Kris in mor pour nou.”​—Rom. 5:8.

[Not anba lo paz]

Eski ou rapel?

• Ki leritaz bann desandans Adan in gannyen e ki son konsekans?

• Ki mannyer en ranson ti ganny peye e dan ki sans i ti annan menm valer avek sa ki ti’n ganny perdi?

• Lefet ki Bondye i konsider ou konman drwat, ki ou pou gannyen a lavenir?

[Kestyon]

[Portre lo paz 21]

Sa zonm parfe Adan ti fer pese. Zezi sa zonm parfe ti ofer en ranson

[Portre lo paz 23]

Pa i en bon nouvel ki gras a Zezi, Bondye i kapab konsider nou konman drwat!