Aprann avek Parol Bondye

Eski i annan lespwar pour bann ki’n mor?

Sa lartik i soulev bann kestyon ki petet ou’n deza demande e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Ki lespwar i annan pour bann ki’n mor?

Kan Zezi ti ariv Betani pros avek Zerizalenm, i ti’n fer kat zour depi ki son zanmi Lazar ti’n mor. Zezi ti al avek Mart ek Mari, sa de ser Lazar kot zot ti’n met li. En pti pe letan apre, en lafoul ti rasanble. Eski ou kapab imazin lazwa Mart ek Mari ler Zezi ti resisit Lazar?​—Lir Zan 11:20-24, 38-44.

Mart ti krwar ki bann mor ti pou resisite. Bann serviter fidel Zeova in touzour konnen ki a lavenir, Bondye pou resisit bann mor pour zot reviv lo later ankor.​—Lir Zob 14:14, 15.

2. Ki arive avek en dimoun ler i mor?

“Lespri” i sa lafors lavi ki gard bann dimoun ek zannimo vivan. Kantmenm sa, nou pa bann lespri ki pe reste dan bann lekor imen. (Eklezyast 3:19; Zenez 7:21, 22) Nou lekor in ganny fer avek lapousyer. (Zenez 2:7; 3:19) Kan nou laservel i nepli fonksyonnen, nou panse i disparet. Sanmenm ki apre ki i ti’n ganny resisite, Lazar pa ti dir nanryen konsernan son leksperyans konman en dimoun mor, parski bann mor pa konn nanryen.​—Lir Psonm 146:4; Eklezyast 9:5, 10.

I kler ki bann mor pa soufer. Alor, sa lansennyman konmkwa Bondye i tourmant bann dimoun apre lanmor i fo. I pe koz lalang lo Bondye. Sa lide pour tourmant dimoun dan dife i degoutan dan lizye Bondye.​—Lir Zeremi 7:31.

 3. Eski nou kapab koz avek bann dimoun mor?

Bann dimoun mor pa kapab koze. (Psonm 115:17) Me kan bann move lanz i koz avek bann dimoun, zot fer krwar ki zot lespri oubyen nanm sa bann dimoun mor. (2 Pyer 2:4) Zeova pa oule ki son pep i esey koz avek bann dimoun mor.​—Lir Deterononm 18:10, 11.

4. Lekel ki pou viv ankor?

Dan sa nouvo lemonn ki pe vini, plizyer milyon dimoun ki ti dan latonm pou reviv ankor. Menm sa bann ki ti fer sa ki mal akoz zot pa ti konn Zeova pou reviv ankor.​—Lir Lik 23:43; Akt 24:15.

Bann dimoun ki pou ganny resisite pou kapab aprann laverite lo Bondye e demontre ki zot annan lafwa dan Zezi par obeir li. (Revelasyon 20:11-13) Bann ki pou reviv ankor e ki pou fer sa ki byen pou kapab viv pour touzour lo later. Par kont, serten dimoun ki pou resisite pou kontinyen fer sa ki mal. Zot “pou resisite pou ganny kondannen.”​—Lir Zan 5:28, 29.

5. Ki nou aprann lo Zeova atraver rezireksyon?

Rezireksyon i posib akoz Bondye ti anvoy son Garson pour donn son lavi pour nou. Alor, sa i en fason pour Zeova demontre son lanmour ek labonte ekstraordiner anver nou.​—Lir Zan 3:16; Romen 6:23.

Pour plis lenformasyon, vwar sapit 6 ek 7 dan liv Ki Labib i vreman dir? pibliye par Temwen Zeova.

[Portre lo paz 22]

Adan ti ganny kree avek lapousyer