Apros avek Bondye

Rekonfor pour bann ki annan leker brize

‘ZEOVA pa pou zanmen kontan mwan.’ Sa i parol en madanm Kretyen ki’n lalit avek depresyon preski tou son lavi. I ti’n konvenk son lekor ki Zeova ti lwen avek li. Eski vreman Zeova i lwen avek son bann adorater ki dan depresyon? Dan Psonm 34:18, Lerwa David i donn nou en larepons vreman rekonfortan.

David ti konn byen lefe ki langwas i kapab annan lo en serviter fidel Zeova. Ler i ti ankor zenn, David ti mars an tayan akoz Sail sa lerwa zalou ti fer tou pour touy li. David ti al kasyet dan en landrwa kot i ti krwar Sail pa ti pou zanmen vwar li, dan en lavil Filisten, Gat, kot zot bann lennmi ti reste. Me ler zot ti rekonnet li, David ti pros pour ganny touye si i pa ti’n fer krwar ki i ti fou. David ti konnen ki se Bondye ki ti’n delivre li, e i ti ekrir Psonm 34 baze lo sa leksperyans.

Eski David ti krwar ki Bondye i lwen avek bann ki santi zot rezete oubyen ki krwar zot napa valer dan son lizye akoz zot dan langwas? David ti ekrir: “Zeova i pre avek sa bann ki annan leker brize; e i sov bann ki zot lespri i fatige.” (Verse 18) Annou gete ki mannyer sa bann parol i kapab rekonfort nou e donn nou lespwar.

“Zeova i pre.” En ansiklopedi i dir ki sa fraz i montre ki Bondye i atantif, pe vey lo son pep e i touzour pare pour ed e sov zot. Pa i rekonfortan pour konnen ki Bondye pe vey lo son pep. I vwar bann “letan difisil” ki zot pe eksperyanse e i konn zot santiman pli profon.​—2 Timote 3:1; Akt 17:27.

“Bann ki annan leker brize.” Dan serten kiltir, “en leker brize” i kapab pe refer avek en dimoun ki kontan en dimoun ki pa kontan li. Me en spesyalis Labib i dir ki sa lekspresyon i plito pe refer avek “latristes oubyen lapenn an zeneral.” Wi, parler menm bann serviter fidel Bondye i kapab fer fas avek bann difikilte ki dan en sans i fer zot leker brize.

“Bann ki zot lespri i fatige.” Serten dimoun ki dekouraze i kapab santi zot sitan ba ki zot perdi lespwar pour en serten letan. En liv pour bann tradikter Labib i dir ki sa lekspresyon ti kapab ganny tradwir “bann ki pa ekspekte nanryen de bon.”

Ki Zeova pou fer pour bann ki annan ‘leker brize’ ek ‘lespri fatige’? Eski i reste lwen avek zot akoz i santi ki zot pa merit son lanmour ek latansyon? I tou le kontrer. Parey en paran ki kontan son zanfan pou pran li e rekonfort li ler i pa santi li byen, Zeova i pros avek son bann serviter ki kriy o sekour. I anvi fer tou pour rekonfort zot e soulaz bann ki annan leker brize ek lespri fatige. I kapab donn zot lasazes ek lafors pour fer fas avek okenn problenm ki zot kapab rankontre.​—2 Korentyen 4:7; Zak 1:5.

Akoz ou pa esey konpran ki mannyer ou kapab vin pli pros avek Zeova? Sa Bondye konpasyon i promet ou: “Mon reste . . . avek sa enn ki’n ganny kraze e ki lespri i fatige, pour relev moral bann ki annan limilite e pour soulaz leker bann ki pe ganny kraze.”​—Izai 57:15.