EN KONVERSASYON AVEK EN VWAZEN

Eski Bondye i enterese avek nou soufrans?

Sa konversasyon ki swiv i enn ki Temwen Zeova i kapab gannyen avek en vwazen. Meton en Temwen ki apel Michelle in vin kot lakour en madanm ki apel Sophia.

KI MANNYER I KAPAB LES SA ARIVE?

Michelle: Ozordi mon pe kit sa trak avek tou dimoun dan sa zanmirant. I annan pour tit Eski ou ti a kontan konn Laverite? Sa i ou kopi.

Sophia: Eski sa i annan pour fer avek larelizyon?

Michelle: Wi. Remark sa sis kestyon lo kouvertir. Ki kestyon​—

Sophia: Ekskize. Ou pou perdi ou letan avek mwan.

Michelle: Akoz ou dir sa?

Sophia: Mon pa ni menm asire si mon krwar dan Bondye.

Michelle: Mon apresye ou lonnekte. Eski mon kapab demann ou si ou’n toultan santi koumsa?

Sophia: Non, mon’n toultan al lanmes depi ptipti. Me i fer en bon pe letan depi ki mon’n aret ale.

Michelle: Oke mon konpran. Anfet mon ti pou kontan entrodwir mon lekor. Mon apel Michelle.

Sophia: Mwan mon apel Sophia.

Michelle: Mon byen kontan pour zwenn ou Sophia.

Sophia: Mwan osi parey.

Michelle: Mon pa’n vin kot ou pour fors ou adopte mon krwayans. Me kantmenm sa, mon ti a kontan konnen si i annan en keksoz an partikilye ki’n fer ou annan dout ki Bondye i vreman egziste?

Sophia: Wi. Mon manman ti dan en aksidan loto 17 an pase.

Michelle: Mon pran lapenn dan ou maler. Eski i ti ganny dimal?

Sophia: Wi, depi sa i’n paralize.

Michelle: I vreman tris. Sa in bezwen afekte ou en kantite.

Sophia: Toutafe. Mon zis pa kapab aret mazinen si Bondye i egziste, akoz i’n les sa arive? Akoz Bondye i les nou soufer koumsa?

ESKI I MAL POUR DEMANDE AKOZ?

Michelle: Mon konpran akoz ou kapab santi koumsa e demann sa bann kestyon. Ler nou soufer, i toutafe normal pour demande akoz tousala in arive. Anfet, menm serten zonm ek fanm fidel dan letan lontan ti demann sa kestyon.

Sophia: Vre?

Michelle: Wi. Eski ou ti pou kontan si mon montre ou en legzanp dan Labib?

Sophia: Mon ti pou byen kontan.

Michelle: Remark sa ki profet Abakouk ti demann Bondye, dan Abakouk sapit 1, verse 2 ek 3: “Konbyen letan O Zeova mon bezwen kriy o sekour, san ki ou tann mwan? Konbyen letan fodre mon kriy ou pour demann led kont vyolans, san ki ou sov mwan? Akoz ou fer mwan vwar sa ki fer mal?” Eski sa bann kestyon i parey sa bann ki ou’n demande?

Sophia: Wi.

Michelle: Bondye pa ti zanmen reprimann Abakouk pour demann sa bann kestyon, ni dir li ki i bezwen annan plis lafwa.

Sophia: I enteresan.

ZEOVA PA KONTAN VWAR DIMOUN SOUFER

Michelle: Labib i ansennyen ki Bondye i vwar soufrans ki nou pas ladan e ki i enterese.

Sophia: Ki ou pe esey dir par sa?

Michelle: Les mwan montre ou en legzanp dan Egzod 3:7. Eski ou ti pou kontan lir sa verse?

 Sophia: Oke. I dir: “Zeova ti azoute: ‘Mon’n vreman vwar soufrans ki mon pep i ladan Lezip, e mon’n tann zot pe kriye akoz bann ki fors zot travay. Mon konn tre byen sa douler ki lo zot.’”

Michelle: Mersi. Dapre sa verse, eski Bondye i remarke ler son pep pe soufer?

Sophia: Be wi, i le ka.

Michelle: I pa konmsi i pa ti konn byen sityasyon son pep. Annou relir ankor lafen sa verse. Bondye i dir: “Mon konn tre byen sa douler ki lo zot.” Eski sa parol i donn lenpresyon ki Bondye pa abordab ouswa i elwannyen avek nou?

Sophia: Pa vreman.

Michelle: Byensir, Zeova pa zis vwar problenm ki nou pas ladan, me i osi santi li tris ler i vwar nou dan sa bann problenm.

Sophia: Vreman.

Michelle: Avek sa nide antet, annou lir sa resi kot pep Bondye ti pe soufer dan en lot moman. Sa i trouve dan Izai 63:9. Premye parti sa verse i dir: “Pandan ki zot ti pe pas dan soufrans, sa ti fer li soufer.” Alor, ki ou panse, eski soufrans ki son pep ti pe pas ladan ti annan en lefe lo Bondye?

Sophia: Wi, i paret ki i le ka.

Michelle: An realite Sophia, Bondye i vreman enterese avek nou e i pa kontan vwar dimoun soufer. Ler nou soufer li osi i soufer.

AKOZ I PE ESPERE?

Michelle: Avan mon ale, i annan en lot panse ki mon ti pou kontan partaz avek ou.

Sophia: Oke.

Michelle: Annou vwar ki Labib i ansennyen konsernan pwisans Bondye. Mon pe mazin sa verse dan Zeremi 10:12. Eski ou ti pou kontan lir silvouple?

Sophia: Byensir. I dir: “I sa Enn ki’n fer later avek son lafors, sa Enn ki’n solidman etablir sa bon later avek lasazes. I osi sa Enn ki par son lentelizans in redi lesyel.”

Michelle: Mersi. Annou reflesir lo sa verse en pti kou. Eski Bondye ti bezwen en kantite pwisans pour kre sa gran liniver ek tou keksoz ladan?

Sophia: Definitivman.

Michelle: Aprezan, si Bondye ti annan pwisans pour kre tou keksoz otour nou, eski pa nou ti pou ekspekte ki i osi annan lafors pour kontrol son kreasyon?

Sophia: Wi.

Michelle: Annou pran legzanp ou manman. Akoz i fatig ou ler ou vwar li soufer?

Sophia: Parski mon kontan li. I mon manman.

Michelle: Si ou ti annan sa lafors pour geri li konmela menm, eski ou ti pou fer li?

Sophia: Byensir.

Michelle: Mazinen ki sa i vedir. Labib i dir nou ki Bondye i vwar nou soufrans, i santi sa ki nou santi e i annan en kantite pwisans. Eski ou kapab mazinen alor ki kantite kontrol Bondye i bezwen annan lo son lekor pour pa deswit entervenir pour anmenn en lafen avek nou soufrans?

Sophia: Mon pa’n zanmen mazin koumsa avan.

Michelle: Eski i posib ki i annan en bon rezon akoz i pa ankor entervenir pour anmenn en lafen avek nou problenm? *

Sophia: Mon mazinen ki wi.

Michelle: Mon tann telefonn pe sonnen, alor mon pou kit ou, mon a retournen en lot fwa e nou ava kapab diskit sa topik plis ankor.

Sophia: Mersi. Mon ti pou kontan. *

Eski ou annan okenn kestyon konsernan en size dan Labib? Eski ou ti a kontan konn lo okenn krwayans oubyen pratik relizye Temwen Zeova? Si wi, pa ezite pour demann en Temwen Zeova. I pou kontan pour diskit lo sa size avek ou.

[Not anba lo paz]

[Portre lo paz 14]