Bondye i kapab sagren—Konman pour fer li kontan
ANSENNY OU ZANFAN
Bondye i kapab sagren—Konman pour fer li kontan
Eski ou’n deza sitan ganny dimal ki ou ti plere?— * Mon plis ki sir i’n deza ariv ou. Me par ler, nou kapab plere akoz nou sagren. En dimoun i kapab dir en move keksoz lo ou ki pa vre. I fermal sa, pa i vre?— Bondye osi i santi li sagren kan dimoun i koz manti lo li. Annou koz lo la e vwar ki mannyer nou kapab fer Bondye kontan olye sagren.
Labib i dir ki serten dimoun ki ti dir ki zot kontan Bondye ti “fer li tris.” Wi, Bondye ti “dan lapenn”! I vre personn pa kapab fer Bondye dimal fizikman. I tou pwisan. Alor, annou vwar akoz Zeova i sagren ler nou pa fer sa ki i dir.
Sa de premye dimoun ki Zeova ti kree lo later ti fer li sagren en kantite. Sa de dimoun ti ganny mete dan Paradi lo later, ki ti apel “zarden Edenn.” Lekel sa de dimoun?— Wi, Adan premye, epi Ev. Annou vwar ki zot ti fer pour fer Zeova sagren.
Apre ki Zeova ti’n met zot dan sa zarden, i ti dir zot pran swen avek later. I ti osi dir zot ki zot ti kapab fer zanfan e viv lo later dan sa paradi san ki zot mor. Me, avan ki Adan ek Ev ti annan zanfan, en move keksoz ti arive. Ou konnen kwa?— En lanz ti pous Ev ek Adan pour rebel kont Zeova. Annou vwar ki mannyer sa ti arive.
Sa lanz ti fer krwar ki en serpan ti pe koze. Ev ti kontan sa ki i ti pe tande. Sa serpan ti dir Ev ki i ti pou “parey Bondye.” Alor, i ti fer sa ki sa serpan ti dir li fer. Ou konnen kwa?—
Ev ti manz sa fri dan sa pye dibwa ki Zeova ti’n dir Adan ki zot pa devret manze. Avan Zeova ti kre Ev, i ti dir Adan: “Fri dan tou pye dibwa sa zarden ou kapab manze ziska ou rasazye. Me an sa ki konsern sa pye konnesans bon e move ou pa devret manze, parski sa zour ki ou manz son fri, sirman ou pou mor.”
Ev ti konn sa lalwa. Me, i ti kontinyen get sa pye dibwa e vwar ki son fri “ti bon pour manze e i ti en keksoz ki son lizye ti anvi gete, . . . Alor i ti kas sa fri e i ti manze.” Pli tar i ti donn Adan en bout e “i ti konmans manze” li osi. Akoz ou krwar i ti fer sa?— Akoz Adan ti kontan Ev plis ki Zeova. I ti anvi fer Ev plezir plito ki fer plezir Zeova. Me i pli enportan pour obeir Zeova plito ki okenn lezot dimoun, pa i vre!
Eski ou mazin sa serpan ki ti koz avek Ev? Zis parey en gran dimoun i kapab fer krwar en poupet pe koze, en personnaz ti fer krwar ki sa serpan ti pe koze. Lekel ki ti pe koz dan plas sa serpan?— Se sa “serpan lantikite, ki apel dyab ou Satan.”
Ki mannyer ou kapab fer Zeova kontan?— Ou kapab fer sa par esey fer li plezir tou lazournen. Satan i dir ki i kapab fer tou dimoun fer sa ki i anvi zot fer. Alor Zeova i donn nou sa lankourazman: “Vin saz, mon garson e rezwir mon leker, pour ki mon a kapab reponn sa enn ki pe provok mwan.” Satan pe provok ouswa monk Zeova. I dir ki i kapab fer tou dimoun aret servi Bondye. Alor, obeir e servi Zeova pour ki ou fer leker Zeova kontan! Eski ou pou fer bokou zefor pour fer sa?—
Lir dan ou Labib
Revelasyon 12:9; Proverb 27:11
[Not anba lo paz]
^ par. 3 Si ou pe lir avek en zanfan, sa tre in ganny mete pour ou mazinen fer en poz e permet sa zanfan eksprim son lekor.
[Portre lo paz 14]
[Portre lo paz 15]
