IMIT ZOT LAFWA

I ti andire ler i ti fer fas avek lenzistis

ELIYA ti pe marse o bor Vale Zourden. I ti’n marse pour plizyer semenn sorti Montanny Oreb pour al dan nor. Finalman i ti ariv Zerizalenm, e la i ti vwar bann sanzman ki ti’n arive dan son pei. Bann lefe sa gran lasesres ti pe konmans diminyen. Sa pti lapli lotonn ti’n konmans tonbe e bann fermye ti deor pe kiltiv zot plantasyon. Lefet ki later ti pe rekipere sa ti rekonfort sa profet, me sa ki ti enteres li plis se sa bann dimoun. Sa bann dimoun ti vreman pa byen spirityelman. Ladorasyon Baal ti ankor popiler parmi bann dimoun, alor Eliya ti pou annan en ta travay pour fer. *

Pros avek lavil Abel-Meola, Eliya ti vwar bann dimoun pe travay lo en gran laferm. I ti annan 24 toro ki ti’n ganny mete par de anba en zoug. Sa 12 per toro ti pe travay ansanm pour kas later e sa ti kit bann fose dan sa later imid. Sa zonm ki ti pe diriz sa de dernyen toro ti limenm sa enn ki Eliya ti pe rode. I ti apel Elisa, sa enn ki Zeova ti’n swazir pour ranplas Eliya. Eliya ki ti panse ki i ti tousel pe servi Zeova ti san dout enpasyan pour zwenn sa zonm.​—1 Lerwa 18:22; 19:14-19.

Eski Eliya ti osi en pe ezite pour partaz serten son responsabilite ek privilez oubyen pour ganny ranplase en zour? Nou pa kapab dir ni menm krwar ki i pa ti mazin lo sa bann keksoz. Apre tou i ti ‘en zonm ki ti annan menm santiman ki nou.’ (Zak 5:17) An tou ka Labib i dir: “Eliya ti al kot li e anvoy son lenz ofisyel lo li.” (1 Lerwa 19:19) Lenz ofisyel Eliya ki ti petet ganny fer avek lapo mouton oubyen lapo kabri ti servi konman en manto e ti reprezant son fonksyon ki Zeova ti’n donn li. Alor ler i ti anvoy son manto lo zepol Elisa, sa ti annan en gran sinifikasyon. Eliya ti pare pour soumet avek lord Zeova pour apwent Elisa konman son sikseser. Eliya ti annan konfyans dan son Bondye e i ti obei li.

Lo son kote, Elisa ti pare pour ed sa profet ki ti pli vye ki li. Elisa pa ti pou pran plas Eliya toudswit. O kontrer, pour apepre sis an, i ti akonpanny e asiste sa profet, ki fer ki plitar i ti ganny apele sa enn “ki ti abitye vid delo dan lanmen Eliya.” (2 Lerwa 3:11) Sirman sa ti rekonfort Eliya pour annan en serviter ki konpetan e itil parey Elisa. Zot ti vitman vin de bon zanmi. Lankourazman ki zot ti donn kanmarad ti sirman ed zot tou le de pour andire menm si zot ti pe vwar bann lenzistis ki ti komen dan sa pei. Sirtou mesanste lerwa Aab ti pe vin de zour an zour pli pir.

Eski ou’n deza fer fas avek lenzistis? Laplipar nou in deza fer fas avek lenzistis dan sa lemonn koronpi. Ler ou annan en zanmi ki kontan Bondye, sa i kapab ed ou pour andire. Ou osi kapab aprann bokou avek lafwa Eliya kan ou pe fer fas avek lenzistis.

 “LEVE, DESANN AL ZWENN AAB”

Eliya ek Elisa ti travay dir pour batir spirityalite bann dimoun. Evidaman zot ti form lezot profet, ki petet ti’n ganny organize dan en serten fason. Avek letan Zeova ti donn Eliya en lot travay: “Leve, desann al zwenn Aab lerwa Izrael.” (1 Lerwa 21:18) Ki Aab ti’n fer?

Sa letan sa lerwa ti en aposta, pli move lerwa ki Izrael ti annan ziska prezan. Lefet ki i ti’n marye avek Zezabel, sa ti fer ladorasyon Baal vin pli popiler e sa lerwa osi ti pe pran par ladan. (1 Lerwa 16:31-33) Ladorasyon Baal ti enkli bann seremoni fertilite, bann pratik prostitisyon, e menm sakrifis bann zanfan. Deplis, Aab ti’n fek dezobeir en lord Zeova pour egzekit sa move Lerwa Siryen Bennadad. I paret ki i ti refize pour egzekit sa lerwa akoz kek larzan ki i ti’n ganny promet. (1 Lerwa, sapit 20) Me aprezan, Aab ek Zezabel ti’n vin pli voras, vyolan e kontan keksoz materyel.

Aab ti annan en pale dan lavil Samari. Sa ti en manman pale! I ti osi annan en pale dan lavi Yizreel ki ti 37 kilomet avek sa enn Samari. Akote sa dezyenm pale, i ti annan en plantasyon rezen. Aab ti anvi sa bout later, ki ti pou en zonm ki ti apel Nabot. Aab ti apel li pour ofer li larzan pour sa plantasyon rezen oubyen fer lesanz pour en lot plantasyon. Me Nabot ti dir: “I enposib pour mwan dezobeir lalwa Zeova e donn ou leritaz mon bann zanset.” (1 Lerwa 21:3) Eski Nabot ti antete? I ti iresponsab? Bokou ti kapab mazin sa. Annefe, i ti pe obei lalwa Zeova ki en Izraelit ti napa drwa vann later ki ti en posesyon zot fanmir lo en baz permanan. (Levitik 25:23-28) I ti enposib pour Nabot dezobeir lalwa Bondye. I ti en zonm lafwa e i ti annan kouraz akoz i ti konnen ki i ti danzere pour refiz demann Aab.

Byensir Aab pa ti pe pran kont lalwa Zeova. I ti al kot li avek en, “figir long e tris” akoz i pa ti’n ganny sa ki i ti anvi. Nou lir: “I ti alonze lo son lili, vir son figir laba e refize pour manze.” (1 Lerwa 21:4) Ler Zezabel ti vwar ki son msye ti’n boude konmsi en piti malelve, i ti deswit fer en plan pour donn Aab sa ki i ti anvi e sa ti detri en fanmir drwat.

Ler ou lir lo son konplo sirman ou pou sirprann par son mesanste. Larenn Zezabel ti konnen ki lalwa Bondye ti demann de temwen pour ki en sarz ki vreman serye i ganny konfirmen. (Deterononm 19:15) Alor i ti ekri bann let lo non Aab, pour demann bann zonm enportan Yizreel, pour rod de zonm ki pare pour fer en fo lakizasyon kont Nabot, konmkwa i’n blasfenm lerwa e i merit ganny kondannen a mor. Son plan ti mars tre byen. De “bon nanryen” ti fer fo lakizasyon kont Nabot, e i ti ganny saboule amor. Pa zis sa, menm son bann garson ki ganny touye! * (1 Lerwa 21: 5-14; Levitik 24:16; 2 Lerwa 9:26) Annefe, Aab ti’n abandonn son lotorite konman lerwa, parski i ti les son madanm fer sa ki i oule e detri bann dimoun inosan.

Zis mazin santiman Eliya kan Zeova ti dir li sa ki lerwa ek larenn ti’n fer. I kapab vreman dekourazan kan i paret ki en move dimoun pe ranport laviktwar lo bann inosan. (Psonm 73:3-5, 12, 13) Ozordi nou souvan vwar bann lenzistis terib ki pe arive; parfwa menm par bann dimoun ki dir zot bann reprezantan Bondye. Kantmenm sa, nou kapab ganny rekonfor dan sa resi. La Labib pe rapel nou ki napa nanryen ki kasyet devan Zeova. I vwar tou. (Ebre 4:13) Ki mannyer I reazir anver bann move aksyon ki i vwar?

“ALOR, OU’N TROUV MWAN O MON LENNMI!”

Zeova ti anvoy Eliya kot Aab. Zeova ti dir: “La i laba dan plantasyon rezen Nabot.” (1 Lerwa 21:18) Kan Zezabel ti dir avek Aab ki sa plantasyon rezen i aprezan pour li, i ti deswit leve e al rezwir sa ki ti’n gannyen. I pa ti pe realize ki Zeova ti vwar tou sa ki ti pe pase. Zis mazin sa lekspresyon lo son figir anmezir ki i pe mars marse dan sa plantasyon rezen, son lespri plen avek bann rev lo ki mannyer i pou fer sa zarden vin en mervey. En sel kou, Eliya ti la o bor li! Deswit lekspresyon lo figir Aab ti sanze, anflanmen avek lakoler ek laenn, i ti dir sa parol: “Alor ou’n trouv mwan, O mon lennmi!”​—1 Lerwa 21:20.

Sa ki Aab ti dir ti bet dan de fason. Premyerman, par dir “Alor ou’n trouv mwan” avek Eliya, Aab ti montre ki i ti aveg spirityelman. Depi lontan Zeova ti’n fini “trouv” li. I ti’n vwar Aab pe abiz lo son laliberte pour swazir e byen profit sa move konplo ki Zezabel ti’n fer. Zeova ti’n vwar dan leker Aab ki lanmour pour annan plis keksoz materyel ti bokou plis ki mizerikord, lazistis, ek konpasyon. Dezyenmman, ler i ti dir avek Eliya, “O mon lennmi!” Aab ti demontre son laenn pour en zonm ki ti zanmi avek Zeova e ki ti’n kapab ed li sanz sa move direksyon ki i ti pe pran.

Nou kapab aprann bann leson enportan avek enbesilite Aab. Nou devret touzour mazinen ki Zeova i vwar tou. Konman en Papa ki ranpli avek lanmour, i konnen ler nou pe kit sa semen drwat, e i vreman anvi vwar nou sanz nou fason. Pour ed nou, i souvandfwa servi son bann zanmi, bann imen fidel parey Eliya, ki ansenny lezot Parol Bondye. Pa i ti pou bet pour  vwar bann zanmi Zeova konman nou lennmi!​—Psonm 141:5.

Mazin Eliya pe dir Aab: “Mon’n trouv ou.” I ti vwar Aab pour sa ki i ti ete, en voler, en kriminel e en rebel kont Zeova. Pa i ti annan kouraz pour li kapab debout kont sa move zonm! Eliya ti anons zizman Zeova lo Aab. Zeova ti vwar tou, sa bann move keksoz ki fanmir Aab ti pe fannen partou e sa ti pe afekte lezot. Alor Eliya ti dir avek Aab ki Bondye ti’n donn lord pour fer “en bon netwayaz,” savedir detrir son fanmir an antye. Zezabel osi ti pou ganny zize.​—1 Lerwa 21:20-26.

Eliya pa ti krwar ki nou zis kapab kontinyen fer sa ki mal san sibir konsekans. Sa i en keksoz ki ozordi bokou dimoun dan lemonn i krwar. Sa resi dan Labib i fer nou rapel ki Zeova pa zis vwar sa ki pe arive me I pou osi anmenn lazistis dan son letan apropriye. Son Parol i asir nou ki sa zour pe vini kan i pou met en lafen avek tou lenzistis pour touzour. (Psonm 37:10, 11) Me parfwa ou kapab demande: ‘Eski zizman Zeova i enkli zis pinisyon ouswa eski i osi enkli mizerikord?’

“ESKI OU’N VWAR KI MANNYER AAB IN ABES SON LEKOR?”

Petet Eliya ti sirprann avek reaksyon Aab anver zizman Zeova. Sa resi i dir: “Desito ki Aab ti tann sa bann parol, i ti desir son lenz apre met en lenz goni lo li; i pa ti manze e i ti kontinyen dormi dan sa lenz goni e i ti marse konmsi i ti dan depresyon.” (1 Lerwa 21:27) Eski Aab ti repantir?

Nou kapab dir ki i ti pe al dan en bon direksyon. Aab ti pe abes son lekor, en keksoz ki ti difisil pour en dimoun vantar e arogan fer. Me eski i ti en vre repantans? Annou vwar legzanp en lot lerwa pli tar, ki ti pli move ki Aab, sa ti Manase. Kan Zeova ti pini Manase, sa zonm ti abes son lekor par rod led avek Zeova. Me i ti fer plis ki sa. I ti apre sanz son lavi par retir tou bann zidol ki i ti’n met an plas, fer zefor pour servi Zeova e menm ankouraz son pep pour fer parey. (2 Kronik 33:1-17) Eski Aab osi ti fer parey? Malerezman non!

Eski Zeova ti vwar ki Aab ti demontre son latristes an piblik? Zeova ti dir avek Eliya: “Eski ou’n vwar ki mannyer Aab in abes son lekor akoz mwan? Akoz i’n abes son lekor devan mwan, mon pa pou anmenn destriksyon pandan son letan. Mon pou anmenn maler lo son lakour dan letan son bann garson.” (1 Lerwa 21:29) Eski Zeova ti pe pardonn Aab? Non, se selman si i ti’n vreman repantir ki i ti pou’n ganny mizerikord Zeova. (Ezekyel 33:14-16) Me vi ki Aab ti demontre en pe regre dan sa ki i ti’n fer, Zeova ti demontre en serten degre mizerikord. Aab pa ti pou bezwen pas atraver sa move leksperyans pour vwar son fanmir an antye ganny detri.

Kantmenm sa, zizman Zeova pa ti sanze. Pli tar, Zeova ti rod pwennvi son bann lanz pour konn sa pli bon fason pour anbet Aab pour partisip dan sa lager ki ti pou met en lafen avek son lavi. Deswit apre, santans Zeova lo Aab ti akonpli. Aab ti ganny blese dan sa lager e i ti sennyen ziska ki i ti mor dan son saret. Sa resi i osi azout sa bann detay tris: Kan sa saret rwayal ti ganny lave bann lisyen ti lis disan sa lerwa. Dan sa fason, parol Zeova lo Aab atraver profet Eliya ti ganny akonplir: “Dan sa menm landrwa kot lisyen ti lis disan Nabot, lisyen pou osi lis ou prop disan.”​—1 Lerwa 21:19; 22:19-22, 34-38.

Pour Eliya, Elisa ek tou lezot serviter fidel Bondye, sa ki ti arive avek Aab ti reasir zot ki Zeova pa ti oubliy kouraz ek lafwa Nabot. To ou tar, sa Bondye lazistis pou anmenn pinisyon lo bann move e I pou touzour demontre mizerikord dan son bann zizman si I annan rezon pour fer li. (Nonm 14:18) Pa sa i en leson tousan ki nou aprann avek Eliya, ki ti andire pour plizyer lannen anba renny sa move lerwa! Eski ou’n deza vin viktim en lenzistis? Eski ou ti a kontan vwar Bondye met keksoz annord? I pou byen pour imit lafwa Eliya. Avek son konpanyon fidel Elisa, i ti kontinyen temwanny mesaz Bondye e andire ler i ti fer fas avek lenzistis.

[Not anba lo paz]

[Portre lo paz 13]

Avek limilite, Eliya ti apwent Elisa konman son sikseser

[Portre lo paz 14]

“Alor ou’n trouv mwan, O mon lennmi!”