LO KOUVERTIR | ESKI TOU I FINI AVEK LANMOR?

Soufrans ki lanmor i anmennen

Lanmor pa en size ki dimoun i santi zot konfortab pour koz lo la. Bokou i prefere pour pa koz lo la. Me to ou tar, nou tou nou bezwen fer fas avek lanmor. Soufrans ki lanmor i anmennen i tro for pour siporte.

Napa nanryen ki kapab prepar nou san pour san pour lanmor en paran, en konzwen oubyen en zanfan. En sityasyon terib i kapab arive san ekspekte oubyen persiste pour en bon pe letan. Nenport sityasyon ki arive, nou pa kapab evit sa soufrans ki lanmor i anmennen e lefet ki nou pa kapab fer nanryen sa i fer nou pli fristre ankor.

Antonio ki ti perdi son papa dan en aksidan lo semen i dir: “I konmsi en dimoun in tak ou lakaz e i’n al avek ou lakle. Ou pa kapab retourn kot ou, ni menm pour en pti moman. Ou annan zis bann memwar ou lakour. Sa ki larealite aprezan. Menm si ou vwar li difisil pour aksepte akoz i paret enzis, napa nanryen ki ou kapab fer.”

Ler i ti fer fas avek menm sityasyon, Dorothy ki ti vin en vev a laz 47 an, ti determinen pour rod leksplikasyon. Lefet ki i ti en ansenyan bann zanfan dan legliz, i pa’n zanmen santi ki lanmor i lafen tou keksoz. Me kantmenm sa, i pa ti vreman konnen ki i arive ler en dimoun i mor. I ti demann son paster Anglikan: “Ki i arive avek nou ler nou mor?” Sa paster ti reponn: “Personn pa vreman konnen. Nou zis bezwen espere pour konnen.”

Eski nou vreman bezwen zis “espere pour konnen?” Eski i annan okenn fason ki nou kapab vreman konnen si lanmor i lafen tou keksoz?