Bann larelizyon ki zwenn ansanm​—Eski se sa ki Bondye i oule?

“Eski larelizyon i ini oubyen diviz nou? Sa kestyon ti ganny demande avek bann lekter zournal The Sydney Morning Herald. Dan sa gran kantite lekter ki ti reponn, apepre 89 poursan ti santi ki larelizyon i anmenn divizyon.

PAR kont bann ki dakor ki larelizyon i zwenn ansanm i pans diferaman. Eboo Patel ki fondater sa lorganizasyon ki apel Interfaith Youth Core ti demande, “Montre mwan en larelizyon ki pa enterese avek konpasyon . . . , ki pa enterese avek lanvironnman . . . e ki pa enterese avek lospitalite.”

Anfet, Boudis, Katolik, Protestan, Endou, Mizilman ek lezot ankor in zwenn ansanm dan serten lokazyon pour lager kont lapovrete, fer kanpanny pour drwa imen, travay pour bàn bann min ki ganny kasyet anba later oubyen atir latansyon lo bann problenm lanvironnman. Plizyer larelizyon in zwenn ansanm dan zefor pour rod en bon konprenezon ek lankourazman. Zot selebre zot diferans dan bann seremoni alim labouzi, festival, lanmizik, lapriyer ek lezot ankor.

Eski sa melanz larelizyon i en fason pour aret konfli ant bann krwayans? Eski bann larelizyon ki zwenn ansanm i en fason ki Bondye pe anmenn en lemonn meyer?

LINITE, KI SON PRI?

Enn parmi sa pli gran lorganizasyon larelizyon ki’n zwenn ansanm i annan bann manm ki sorti dan plis ki 200 krwayans e i aktif dan 76 pei. Son lobzektif se pour “kontinyelman promot korperasyon ant bann larelizyon ki’n zwenn ansanm.” Sa, par kont, i en keksoz ki fasil pour dir me difisil pour fer. Par egzanp, dapre bann organizater, zot dokiman konstitisyon ti bezwen byen ganny ekrir pour ki i pa ofans okenn krwayans ek bann larelizyon ki ti siny sa dokiman. Akoz? En rezon se ki ti annan en dezagreman konsernan si Bondye i devret ganny mansyonnen dan sa dokiman konstitisyon. An rezilta, zot pa ti servi ouswa fer referans avek Bondye.

Ki rol lafwa pou zwe, si Bondye pa enkli ladan? An plis ki sa, ki mannyer sa lorganizasyon bann larelizyon ki zwenn ansanm i diferan avek nenport lorganizasyon lasarite oubyen lorganizasyon led imaniter? Pour sa rezon, sa lorganizasyon bann larelizyon ki’n zwenn ansanm ki’n mansyonnen avan pa dekrir zot konman en lorganizasyon relizye me konman “en lorganizasyon ki zwenn lezot ansanm.”

ESKI PROMOT SA KI BYEN I ASE?

Dalai Lama, en personnaz renonmen ki an faver bann larelizyon ki’n zwenn ansanm i dir, “Tou bann gran larelizyon i pas preski menm mesaz: sa i lanmour, konpasyon ek pardon.”  I azoute: “En keksoz pli enportan se ki sa bann kalite i devret form parti nou lavi tou le zour.”

Sirman, valer bann bon kalite parey lanmour, konpasyon ek pardon i vreman enportan. Dan sa ki nou apel lareg-d-or ozordi, Zezi ti dir: “Alor fer pour lezot sa ki ou oule lezot i fer pour ou.” (Matye 7:12) Me eski vre lafwa i zis en fason pour promot sa ki byen?

Konsernan bokou ki ti dir zot pe servi Bondye dan son letan, zapot Pol ti dir: “Mon kapab dir dan zot faver, ki zot ranpli avek motivasyon pour Bondye, me zot motivasyon pa baze lo en vre konnesans.” Ki ti zot problenm? ‘Dan zot linyorans lo ki mannyer Bondye i rann dimoun zis devan li,’ Pol ti dir ki zot “esey rod zot prop fason pour vin zis.” (Romen 10:2, 3) Vi ki zot ti napa bokou konnesans lo sa ki Bondye ti anvi zot fer, zot motivasyon ek lafwa ti vreman anven.​—Matye 7:21-23.

PWENNVI LABIB LO BANN LARELIZYON KI ZWENN ANSANM

Zezi ti dir, “Byennere bann ki fer lape.” (Matye 5:9) Zezi ti met an pratik sa ki i ti dir ler i ti rezet vyolans e anmenn mesaz lape kot bann dimoun dan diferan larelizyon. (Matye 26:52) Sa bann ki ti aksepte ti zwenn ansanm dan lanmour ki soud tou keksoz parfetman. (Kolosyen 3:14) Me eski lobzektif ki Zezi ti annan ti zis pou inifye dimoun dan diferan larelizyon ansanm dan lape? Eski i ti zwenn avek lezot dan zot bann ladorasyon relizye?

Bann sef relizye Farizyen ek Sadiseen ti opoz Zezi dan en fason kriyel e menm rod fason pour touy li. Ki mannyer i ti reakte? Zezi ti donn lord son bann disip: “Les zot; zot en bann aveg ki pe kondir aveg.” (Matye 15:14) Zezi ti refize pour annan en lasosyasyon avek sa bann sekt relizye.

En pe letan pli tar, en kongregasyon Kretyen ti ganny formen an Korent, en lavil renonmen pour son bann diferan group relizye. Ki mannyer bann Kretyen laba ti reakte dan sa kalite lanvironnman? Zapot Pol ti ekri zot: “Pa bezwen asosye zot avek bann non-krwayan.” Akoz? Pol ti rezonnen: “Ki mannyer Kris i kapab tonm dakor avek Dyab? Ki mannyer en krwayan i kapab partisip avek en non-krwayan?” Apre i ti donn sa konsey: “Pour sa rezon, sorti parmi zot, e separe avek zot.”​—2 Korentyen 6:14, 15, 17.

Klerman, Labib i koz kont bann larelizyon ki zwenn ansanm. Me ou kapab demande, ‘Alor, ki mannyer vre linite i kapab ganny akonplir?’

BATIR VRE LINITE

The International Space Station, en mervey teknolozik ki pe fer letour later i rezilta travay 15 pei ki ti zwenn ansanm. Eski ou panse sa proze ti pou akonpli si sa bann nasyon pa ti tonm dakor lo ki plan pour servi?

Annefe, sa i sityasyon bann larelizyon ki’n zwenn ansanm dan nou letan. Menm si i sanble ki i annan korperasyon ek respe, napa okenn lagreman lo ki plan pour servi pour batir lafwa. An rezilta, bann size konsernan lansennyman ek moralite i diviz zot plis ankor.

Labib i kontyen bann standar Bondye, ki parey en plan. Nou kapab konstri nou lavi lo sa ki Labib i dir. Bann ki’n aksepte son bann konsey in arive fer fas avek bann baryer rasyal ek prezidis larelizyon e aprann travay ansanm dan lape ek linite. Bondye ti predir: “Mon pou sanz langaz bann pep e fer zot koz en langaz pir, pour ki zot tou zot kriy o non Zeova, pour zot kapab servi li zepol kont zepol.” Linite i rezilta sa “langaz pir,” ladorasyon standar Bondye.​—Tsefanya 3:9; Izai 2:2-4.

Temwen Zeova i kordyalman envit ou pour rann en vizit kot en lasal Rwayonm ki pre avek kot ou reste e vwar pour ou menm sa lape ek linite remarkab ki egziste parmi zot.​—Psonm 133:1.

[Bwat lo paz 10]

Eski laverite i egziste?

Bann ki an faver bann larelizyon ki’n zwenn ansanm, i santi ki napa larelizyon ki kapab dir ki i laverite. Anfet, zot kapab dir ki divizyon parmi bann larelizyon i sanmenm ki kre sa kantite problenm ki nou vwar ozordi.

Kontrerman avek sa bann lopinyon, Zeova i ganny dekrir konman “sa Bondye laverite,” e I’n dir li menm: “Mon pa’n sanze.” (Psonm 31:5; Malaki 3:6) Konsernan Bondye, Zezi ti dir: “Ou parol i laverite.” (Zan 17:17) Sa laverite i trouve dan sa Parol enspire ki sorti kot Bondye, Labib. I enstri nou e ekip nou “pour fer tou aksyon ki bon.”​—2 Timote 3:16, 17.

[Portre lo paz 11]

En lasanble bann larelizyon ki’n zwenn ansanm an 2011. Eski sa melanz larelizyon i en fason pour aret sa konfli ant bann krwayans?

[Sorti kot]

Portre tire par Franco Origlia/zimaz Getty