BIOGRAFI

Retrouv lafors dan mon febles

Rakonte par Maite Morlans

Personn pa ti pou mazinen ki mon for ler zot vwar mon pti lekor frazil ki pez zis 29 kilo pe asiz dan en wiltyer. Me anmezir ki mon lafors fizik i diminyen, en lafors dan mwan i ed mwan kontinyen. Mon ava eksplike ki lefe lafors ek febles in annan dan mon lavi.

Ler mon mazin mon lanfans, sa i fer mwan pans lo bann moman zwaye ki mon ti pase dan nou pti lakaz dan lakanpanny sid Lafrans, kot mon paran ti reste. Mon papa ti fer en balans pour mwan e mon ti kontan tay taye dan zarden. An 1966, Temwen Zeova ti vizit nou e zot ti fer bann gran konversasyon avek mon papa. Zis set mwan pli tar, i ti determinen pour vin en Temwen. En pe letan apre mon manman ti swiv menm semen avek li e zot ti elve mwan avek bokou lafeksyon.

Mon bann problenm ti konmanse zis en pti pe letan apre ki nou ti’n retourn Lespanny, kot mon paran ti sorti. Mon ti konmans santi bann gro douler ki lanse dan mon lanmen ek seviy. Apre ki nou ti’n vizit plizyer dokter pandan de-z-an, nou ti vwar en rheumatologist byen renonmen, ki avek latristes ti dir, “I tro tar.” Mon manman ti konmans plere. Sa bann lekspresyon drol tel parey “autoimmune chronic illness” e “juvenile polyarthritis,” * ti rezonnen dan sa lasanm fre e sonm. Menm si mon ti annan di-z-an e mon pa ti konpran bokou, mon ti realize ki sa nouvel pa ti bon.

Sa dokter ti sizere ki mon ganny mete dan en lenstitisyon ki donn tretman bann zanfan ki malad. Ler mon ti arive, mon ti enkyet letan mon ti get sa landrwa tris. Disiplin ti sever: Bann leser ti koup mon seve e met mwan en liniform demode. An pleran mon ti mazinen, ‘Konman mon pou kapab andir sa kalite lavi isi?’

ZEOVA I VIN REEL POUR MWAN

Lefet ki mon paran ti’n ansenny mwan pour servi Zeova, mon ti refize pour pran par dan bann seremoni Katolik dan sa lenstitisyon. Bann leser ti vwar li difisil pour konpran akoz mon refize. Mon ti sipliy Zeova pour pa abandonn mwan e zis apre mon ti resanti son lebra konman en proteksyon otour mwan, konmsi en papa ki kontan mwan en kantite in may mwan.

Mon paran ti kapab vizit mwan zis pour en pti pe letan dan Sanmdi. Zot ti anmenn bann piblikasyon baze lo Labib pour mwan lir pour gard mon lafwa for. Normalman bann zanfan pa ti devret annan zot prop liv, me bann leser ti permet mwan pour gard zot  ansanm avek mon Labib, ki mon ti lir tou le zour. Mon ti osi koz avek lezot fiy konsernan mon lespwar pour viv pour touzour dan sa paradi lo later, kot personn pa pou malad. (Revelasyon 21:3, 4) Malgre parfwa mon ti santi mwan sagren e tousel, mon ti kontan ki mon lafwa ek konfyans dan Zeova ti pe vin pli for.

Apre sis mwan ki ti paret bokou letan, bann dokter ti anvoy mwan kot mwan. Mon maladi pa ti’n amelyore me mon ti kontan pour retourn kot mon paran. Mon bann zwentir ti vin pli diformen e mon ti soufer plis. Dan mon bann lannen ladolesans mon ti vreman fay. Kantmenm sa, a laz 14 an, mon ti batize akoz mon ti determinen pour servi mon Papa dan lesyel mannyer mon kapab. Selman parfwa mon ti dezapwente avek Li. “Akoz mwan? Silvouple geri mwan?” Mon ti priye, “Eski ou pa vwar ki kantite mon pe soufer?”

Mon letan ladolesans ti en letan pli difisil pour mwan. Mon ti bezwen aksepte ki mon pa ti pou byen. Mon pa ti kapab aret konpar mwan avek mon bann zanmi, ki ti an bonn sante e pe rezwir lavi. Mon ti santi mwan enferyer e mon ti konmans vin timid. Kantmenm sa, mon fanmir ek zanmi ti siport mwan. Mon rapel avek bokou tandres Alicia ki ti 20 an pli vye ki mwan e ki ti vin en vre zanmi pour mwan. I ti ed mwan pour pa konsantre lo mon maladi me devlop lentere dan lezot olye mazin mon bann problenm.

ROD BANN FASON POUR FER MON LAVI ANNAN EN SANS

Ler mon ti annan 18 an, mon maladi ti vin pli grav ki menm mon ti santi mwan vreman fatige apre ki mon’n asiste bann renyon Kretyen. Kantmenm sa, mon ti servi mon bann letan lib kot lakour pour etidye Labib o profon. Liv Zob ek bann Psonm ti ed mwan pour konpran ki Zeova i premyerman pran swen avek nou spirityelman olye fizikman. Mon bann lapriyer tou le zour ti donn mwan “sa pisans ki napa son parey” ek “lape Bondye ki depas tou konpreansyon.”​—2 Korentyen 4:7; Filipyen 4:6, 7.

A laz 22 an, mon ti bezwen aksepte ki mon ti pou aprezan depan lo en wiltyer. Mon ti per ki dimoun ti pou aret rekonnet mwan e vwar zis en madanm malad dan en wiltyer. Par kont, sa wiltyer ti fer mwan pli endepandan e sa ki mon ti krwar ti en “malediksyon” ti vin en benediksyon. Enn mon zanmi ki ti apel Isabel ti sizere ki mon fer en lobzektif pour fer 60 erdtan avek li dan predikasyon pour en mwan.

O konmansman, mon ti krwar ki sa nide pa fer sans. Me mon ti demann Zeova son led e ansanm avek sipor mon fanmir ek zanmi, mon ti arive fer li. Sa mwan ti pas sitan vit e mon ti remarke ki mon ti’n reisi fer fas avek lakanmizri ek lafreyer. Mon ti telman kontan, ki an 1996 mon ti deside pour vin en pionye ordiner kot mon ti pas bokou erdtan sak mwan dan predikasyon. I ti enn parmi bann pli bon desizyon, ki ti fer mwan vin pli pros avek Zeova e mon ti ganny ranforsi fizikman. Mon partisipasyon dan predikasyon ti permet mwan partaz mon lafwa avek bokou dimoun e ed serten pour vin zanmi Bondye.

ZEOVA PA KIT MWAN

Pandan lete an 2001, mon ti dan en aksidan loto kot mon ti kas tou le de mon lipye. Anmezir ki mon ti pe alonze lo lili avek en douler entans dan lopital, mon ti fer en lapriyer senser dan silans: “Silvouple Zeova, pa kit mwan!” Zis apre en madanm ki ti lo en lili la o bor mwan ti demann mwan, “Eski ou en Temwen Zeova?” Mon ti napa lafors pour reponn alor mon ti zis balans mon latet. I ti dir “Mon konn zot! Mon abitye lir zot magazin.” Sa bann parol ti rekonfort mwan en kantite. Menm si mon ti fay, mon ti kapab rann en temwannyaz lo Zeova. Pa i en loner!

Ler mon ti refer en pe, mon ti deside pour rann plis temwannyaz. Mon manman ti pous mon dan mon wiltyer partou dan lopital avek mon de lipye dan lakok. Tou le zour nou ti vizit serten pasyan, demann zot konman zot ete e kit serten magazin avek zot. Sa bann vizit ti fatigan, me Zeova ti donn mwan lafors.

Dan sa bann dernyen lannen, mon bann douler in ogmant plis e ler mon ti perdi mon papa sa ti fer mwan pli soufer ankor. Kantmenm sa, mon ti esey gard en pwennvi pozitif. Ki mannyer? Kan i posib  mon esey pas letan avek mon bann zanmi ek fanmir pour ki sa i ed mwan pour pa mazin mon problenm e kan mon tousel mon lir e etidye Labib oubyen mon pres par telefonn.

Mon osi esey pran plezir dan bann pti keksoz tel parey ler mon santi sa labriz fre dan mon figir ouswa bon loder bann zoli fler. Sa i donn mwan rezon pour demontre mon lapresyasyon. En bon limer i touzour ede. En zour dan predikasyon, enn mon zanmi ki ti pe pous mon wiltyer ti arete pour pran not. Toutakou mon wiltyer ti roule san kontrol ziska ki mon ti al bat dan en loto ki ti’n park. Nou tou le de nou ti soke me ler nou ti vwar ki napa nanryen grav ki’n arive, nou ti byen riye.

I annan bokou keksoz dan lavi ki mon pa kapab fer. Mon apel zot mon bann swe ki pa ankor arive. Souvan mon ferm mon lizye e mon vwar mwan dan sa nouvo lemonn ki Bondye in promet nou. (2 Pyer 3:13) Mon vwar mon annan en bon lasante, pe marse e rezwir lavi plennman. Mon pran aker parol Lerwa David: “Met ou lespwar dan Zeova, pran kouraz e fodre ki ou leker i for.” (Psonm 27:14) Menm si deplizanpli mon lekor pe vin pli frazil, Zeova i fer mwan for. Mon kontinyen retrouv lafors dan mon febles.

[Not anba lo paz]

[Ekstre lo paz 9]

Souvan mon ferm mon lizye e mon vwar mwan dan sa nouvo lemonn ki Bondye in promet nou

[Portre lo paz 9]

Mon ganny lazwa pour pres par telefonn

[Portre lo paz 7]

A laz kat-r-an

[Portre lo paz 9]

Avek mon paran an 2003