LO KOUVERTIR

Sa ki Bondye in fer pour ou

“Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”​—Zan 3:16.

Sa i enn parmi bann teks Labib ki pli renonmen e ki pli ganny servi. I’n ganny dir ki napa en lot verse “ki eksplik dan en fason senp e kler relasyon Bondye avek limanite ek semen delivrans.” Pour sa rezon, dan serten pei sa verse oubyen zis sa referans “Zan 3:16” i ganny servi dan bann levennman piblik, lo bann stiker ki ganny kole lo loto, lo miray dan landrwa piblik oubyen lezot landrwa.

Tre probab, bann ki kontan servi sa verse i konvenki ki lanmour Bondye i garanti zot delivrans eternel. Me ou? Ki lanmour Bondye i vedir pour ou? Ki ou krwar Bondye in fer pour demontre son lanmour pour ou?

“BONDYE IN TELMAN KONTAN LEMONN”

Bokou dimoun i pare pour rekonnet ki Bondye ki’n kree liniver, lanatir ek bann imen. I bezwen annan en gran lentelizans ki par deryer legzistans bann lorganizm vivan ki’n ganny byen fer dan en fason sitan konplike. En kantite dimoun i remersye Bondye tou le zour pour sa kado lavi. Zot osi realize ki zot bezwen konpletman depan lo Bondye pour ganny ler, delo, manze ek bann sirk natirel pour ki zot kontinyen viv e pran plezir dan sa ki zot fer.

I byen pour remersye Bondye pour tou sa bann keksoz, vi ki i sa Enn ki’n kre tou keksoz e ki pe soutenir nou. (Psonm 104:10-28; 145:15, 16; Akt 4:24) Nou kapab apresye lanmour ki Bondye i annan pour nou kan nou reflesir lo tou sa ki i pe fer pour fer lavi posib pour nou. Zapot Pol ti dir: “[Bondye] ki donn tou dimoun, lavi, respirasyon  ek tou keksoz. Parski, atraver li nou ganny lavi, nou kapab mouvmante e nou egziste.”​—Akt 17:25, 28.

Par kont, lanmour Bondye i ganny demontre dan bokou fason pa zis pour pran swen avek nou fizikman. I’n osi kre nou dan en fason pli spesyal e pli enportan ki bann zannimo par donn nou en kapasite spirityel e ed nou pour byen satisfer nou spirityalite. (Matye 5:3) Dan sa fason, bann dimoun ki obeisan i annan sa lespwar pour form parti fanmir Bondye, konman son bann “zanfan.”​—Romen 8:19-21.

Zan 3:16 i kontinyen par dir ki, Bondye in demontre son lanmour pour nou par anvoy son sel garson, Zezi, lo later pour ansenny nou lo son Bondye ek Papa e pour mor pour nou. Me bokou i dir ki zot pa vreman konpran akoz ki i ti neseser pour Zezi mor pour limanite e ki mannyer lanmor Zezi i en fason ki Bondye in demontre son lanmour pour nou. Annou vwar ki mannyer Labib i eksplik rezon akoz Zezi ti bezwen mor e ki valer sa i annan pour nou.

“I’N DONN SON SEL GARSON”

Tou limanite i bezwen fer fas avek maladi, lavyeyes ek lanmor. Me sa pa ti plan Zeova o konmansman. I ti donn bann imen sa posibilite pour viv pour touzour dan en paradi lo later. Me ti annan en kondisyon: Zot ti bezwen obei li. Bondye ti dir si zot swazir pour pa fer li, zot pou mor. (Zenez 2:17) Sa premye zonm ti sertennman rebel kont lotorite Bondye, alor i ti anmenn lanmor lo li ek son desandans. Zapot Pol ti eksplike, ‘Par en sel zonm, pese in anmenn lanmor, e lanmor in pas avek tou dimoun, parski tou dimoun in komet pese.’​—Romen 5:12.

Par kont, Bondye i “kontan lazistis.” (Psonm 37:28) Menm si I pa ti kapab inyor pese ki sa premye zonm ti’n fer volonterman, Bondye pa’n kondann tou limanite pour soufer e mor pour touzour akoz dezobeisans en sel zonm. O kontrer, par aplik sa prensip “nanm pour nanm,” I’n demontre lazistis e fer lavi eternel posib ankor enn fwa pour bann imen obeisan. (Egzod 21:23) Kestyon se, ki mannyer nou pou kapab reganny sa lavi parfe ki Adan in perdi? Larepons: En dimoun ti pou bezwen ofer son lekor konman sakrifis, en lavi ki annan menm valer parey Adan, en lavi parfe.

I kler ki napa okenn desandans Adan ki ti kapab ofer en tel sakrifis, me Zezi ti kapab. (Psonm 49:6-9) Zezi ti ne san pese, i ti parfe zis parey Adan ti ete. Alor, par donn son lavi konman en ranson, Zezi ti liber limanite dan lesklavaz pese. Par fer sa, i ti ofer desandans sa premye koup imen loportinite pour rezouir sa menm lavi parfe ki Adan ek Ev ti annan. (Romen 3:23, 24; 6:23)  Eski i annan en keksoz ki nou kapab fer pour benefisye avek sa pli gran aksyon ki i’n fer pour demontre son lanmour anver nou?

“NENPORT KI, KI KRWAR DAN LI”

Remarke ki dan Zan 3:16 i dir, “nenport ki, ki krwar dan li, pa pou mor, me i a ganny lavi eternel.” Sa i vedir ki i annan kondisyon pour ganny lavi eternel. Si nou anvi ganny “lavi eternel” nou bezwen krwar dan Zezi e obei li.

Ou kapab demande: ‘Ki mannyer obei i enkli ladan? Pa Zezi ti dir ki “nenport ki, ki krwar dan li” pou ganny lavi eternel?’ Wi, krwar oubyen lafwa i enportan. Toudmenm, i enportan rapel ki dan Labib, lafwa i plis ki zis krwar. Dapre Vine’s Expository Dictionary of Old and New Testament Words sa mo ki Zan ti servi dan sa langaz orizinal i vedir “annan konfyans dan en keksoz, pa zis krwar ladan.” Pour ganny faver Bondye, nou bezwen plis ki zis rekonnet ki Zezi i sa Sover. Sa krwayan i devret osi senserman fer bokou zefor pour aplik sa ki Zezi in ansennyen. Si napa aksyon, lafwa i anven. Labib i dir, “Lafwa san bann laksyon i mor.” (Zak 2:26) Dan en lot fason, en Kretyen i bezwen demontre lafwa dan Zezi, savedir, i devret viv annakor avek son krwayans ek lafwa.

Pol ti eksplik sa pwen dan sa fason: “Lanmour Kris i kontrol nou, parski nou asire ki en sel [Zezi] in mor pour tou dimoun. . . . E i’n mor pour tou bann vivan pour ki bann vivan i nepli viv pour zot menm, me pour li ki’n mor e resisite pour zot.” (2 Korentyen 5:14, 15) Lapresyasyon senser pour sakrifis Zezi i devret pous nou pour fer sanzman dan nou lavi, pour pa viv zis pour nou menm me viv pour Zezi ki’n mor pour nou. Savedir nou bezwen fer li en priyorite dan nou lavi pour met an pratik sa ki Zezi in ansennyen. Sa kalite sanzman pou definitivman annan en lefe lo nou bann standar, swa ek tou sa ki nou fer. Ki rekonpans bann ki krwar e demontre lafwa dan Zezi pou gannyen?

“PA POU MOR, ME I A GANNY LAVI ETERNEL”

Dan dernyen parti Zan 3:16 i eksplik promes Bondye pour bann ki demontre lafwa dan sa ranson e viv dapre bann standar sorti kot Bondye. Bondye in promet ki sa bann ki fidel “pa pou mor, me i a ganny lavi eternel.” Me sak dimoun pou benefisye dan diferan fason avek lanmour Bondye.

Zezi in promet lavi eternel dan lesyel avek en group. I ti klerman dir son bann disip fidel ki i’n prepar en plas pour zot dan lesyel pour zot kapab diriz avek li dan laglwar. (Zan 14:2, 3; Filipyen 3:20, 21) Sa bann ki pou resisite pour al dan lesyel “pou vin pret pour Bondye e pour Kris, e zot pou renny avek li pandan 1000 an.”​—Revelasyon 20:6.

Selman en pti group bann serviter Zezi ki pou ganny sa kalite privilez. Anfet Zezi ti dir: “Pa bezwen per, pti troupo, akoz zot Papa i’n war bon pour donn zot son Rwayonm.” (Lik 12:32, nou ki’n met an italik.) Ki kantite i pou annan dan sa “pti troupo”? Revelasyon 14:1, 4 i dir: “Mon ti gete, e mon ti war Lanyo pe debout lo montanny Siyon e avek li 144,000 dimoun, ki ti port son non ek non son Papa ekri lo zot fron. . . . Zot in ganny sove parmi bann zonm konman bann premye fri devan Bondye e devan Lanyo.” An konparezon avek sa kantite bilyon dimoun ki’n viv, sa 144,000 i zis en “pti troupo.” Zot in ganny dekrir konman lerwa, alor lo lekel zot pou dirize?

Zezi ti koz lo en dezyenm group bann fidel ki pou benefisye avek sa Rwayonm dan lesyel. Parey nou’n vwar dan Zan 10:16, Zezi ti dir: “Mon annan ankor [oubyen “lezot,” NW] mouton ki pa dan sa berkay. Mon bezwen anmenn zot osi, zot a ekout mon lavwa. Alor i ava annan en sel troupo e en sel berze.” Sa bann “mouton” pe esper avek pasyans lavi eternel lo later, sa menm lespwar ki Adan ek Ev ti’n gannyen o konmansman. Ki mannyer nou konnen ki zot lavenir i lo later?

 Plizyer fwa Labib in koz lo bann kondisyon dan Paradi lo later. Pour vwar sa pour ou menm, ou kapab ouver ou Labib e lir sa bann verse swivan: Psonm 37:9-11; 46:8, 9; 72:7, 8, 16; Izai 35:5, 6; 65:21-23; Matye 5:5; Zan 5:28, 29; Revelasyon 21:4. Sa bann verse i predir en lafen avek lager, lafamin, maladi ek lanmor. Zot koz lo en letan kan bann dimoun pou annan sa lazwa pour konstri zot prop lakaz, kiltiv zot prop later e elve zot zanfan dan lape. * Eski sa kalite lespwar pa enteres ou? Nou annan en bon rezon pour krwar ki sa bann promes pou byento realize.

BONDYE IN FER BOKOU POUR NOU

Si ou pran en letan pour egzamin tou sa ki Bondye in fer pour ou e pour limanite, i kler ki deza I’n fer en kantite keksoz. Nou annan lavi, lentelizans, en lasante ki ase bon e tou sa ki nou bezwen pour viv. An plis ki sa, kado ranson ki Bondye in donn nou atraver Zezi ki’n mor pour nou, i sa pli gran benediksyon, parey nou’n vwar dan Zan 3:16.

Lavi eternel dan lape, lazwa, san maladi, lager, lafamin oubyen lanmor, pou sirman anmenn lazwa ek benediksyon ki pou dire pour touzour. Pour resevwar sa bann benediksyon i antyerman depan lo ou. Kestyon ki reste pour demande se, Ki ou pe fer pour Bondye?

[Not anba lo paz]

[Portre lo paz 4]

Zezi ti volonterman vin lo later pour donn son lavi pour sov limanite dan pese ek lanmor