Zeova i Sours lavi. (Psonm 36:9) Eski i rezonnab alor ki sa menm Bondye i kapab redonn lavi sa bann ki’n mor? Labib i asir nou ki i pou fer sanmenm dan lavenir. (Lir Akt 24:15) Me akoz i pou fer sa?

O konmansman, nou Kreater ti annan lentansyon pour zonm viv pour touzour lo later. (Zenez 1:31; 2:15-17) Sanmenm ki i ankor anvi pour limanite. I fer li lapenn pour vwar sa ki nou pe fer fas avek konmela, setadir en lavi ki ranpli avek problenm e ki fini vitman.​—Lir Zob 14:1, 14, 15.

Eski Bondye ti kree imen pour viv dan lesyel? Non. Bondye ti kree lanz pour reste dan lesyel me i ti kree imen pour viv lo later. (Zenez 1:28; Zob 38:4, 7) Avek sa lide antet, annou vwar serten legzanp kot Zezi ti resisit bann dimoun. I ti resisit zot isi menm lo later. Pareyman, laplipar dimoun ki pou resisite a lavenir pou resisit isi menm lo later.​—Lir Zan 5:28, 29; 11:44.

Par kont, Bondye in swazir en pti group dimoun ki pou ganny resisite dan lesyel kot zot pou annan en lekor spirityel. (Lik 12:32; 1 Korentyen 15:49, 50) Bann ki pou resisite pou al dan lesyel pour diriz later konman lerwa ansanm avek Kris.​—Lir Revelasyon 5:9, 10.