Wi. Ler Zezi ti lo later, i ti akonplir plizyer profesi konsernan “en sef,” ki ti pou “sov lemonn.” (Danyel 9:25; 1 Zan 4:14) Menm apre son lanmor, Zezi ti kontinyen akonplir bann profesi konsernan Mesi.​—Psonm 110:1; Akt 2:34-36.

•  Ki savedir “Mesi”?

•  Eski plizyer dimoun ti kapab akonpli bann profesi konsernan Mesi?

•  Eski Mesi i kapab vini dan lavenir?

•  Ki kantite profesi konsernan Mesi i annan dan Labib?

•  Serten profesi konsernan Mesi ki Zezi in akonpli

 Sa term Ebre Ma·shiʹach (Mesi) e Khri·stos (Kris) an Grek, i vedir “sa Enn ki’n ganny swazir.” Alor, “Zezi Kri” i vedir “Zezi sa Enn ki’n ganny swazir” oubyen “Zezi sa Mesi.”

 Dan letan Labib, ler en dimoun ti ganny swazir pour en pozisyon spesyal, delwil ti ganny vide lo son latet. (Levitik 8:12; 1 Samyel 16:13) Bondye ti swazir Zezi konman Mesi, en pozisyon ki montre ki Zezi i annan en gran lotorite. (Akt 2:36) Par kont, Bondye pa ti servi delwil pour swazir Zezi, i ti swazir li avek lespri sen.​—Matye 3:16.

 Non. Zis en Mesi oubyen Kris ki ti kapab akonpli sa bann profesi Labib. Par kont, Labib i averti ki i ti pou annan “bann fo Kris ek bann fo profet ki pou fer bann mirak ek keksoz merveye pour anbet dimoun, si posib, menm bann ki’n ganny swazir.”​—Matye 24:24.

 Non. Labib ti predir ki Mesi ti pou en desandans David ki ti lerwa ansyen nasyon Izrael. (Psonm 89:3, 4) Par kont, bann rikord ki montre lekel bann desandans Lerwa David i nepli egziste, vi ki aparaman sa bann rikord ti ganny detri ler bann Romen ti detri Zerizalenm lannen 70. a Depi sa letan, i pa’n posib pour en dimoun prouve ki i en desandans Lerwa David. De lot kote, menm si sa bann rikord ti ankor egziste dan letan Zezi, ni enn parmi son bann lennmi pa ti reisi prouve ki i pa ti en desandans Lerwa David.​—Matye 22:41-46.

 I pa posib pour dir egzakteman konbyen profesi konsernan Mesi i annan dan Labib. En rezon i akoz lafason ki en dimoun i konte konbyen profesi i annan dan en resi ki klerman koz lo Mesi, i diferan avek lafason ki en lot dimoun pour vwar sa menm resi. Par egzanp, sa resi dan Izai 53:2-7 i mansyonn diferan keksoz konsernan Mesi. Serten dimoun i kapab dir ki sa resi antye i zis en profesi me lezot i kapab dir ki sak laspe sa resi i en profesi.