Y Cyntaf at y Thesaloniaid 5:1-28
5 Nawr ynglŷn â’r amseroedd a’r tymhorau, frodyr, does dim rhaid i ddim byd gael ei ysgrifennu atoch chi.
2 Oherwydd rydych chi’ch hunain yn gwybod yn iawn fod dydd Jehofa yn dod yn union fel lleidr yn y nos.
3 Bryd bynnag y byddan nhw’n dweud, “Heddwch a diogelwch!” yna y bydd dinistr sydyn yn dod arnyn nhw ar unwaith, yn union fel poenau geni ar ddynes* feichiog, ac ni fyddan nhw ar unrhyw gyfri yn dianc.
4 Ond chi, frodyr, dydych chi ddim yn y tywyllwch, felly ni fydd y dydd hwnnw yn dod arnoch chi’n sydyn fel golau dydd yn dod yn annisgwyl ar leidr,
5 oherwydd meibion y goleuni a meibion y dydd ydych chi i gyd. Dydyn ni ddim yn perthyn i’r nos nac i’r tywyllwch.
6 Felly, mae’n rhaid inni beidio â chysgu fel y mae’r gweddill yn gwneud, ond gadewch inni aros yn effro a chadw’n pennau.
7 Oherwydd mae’r rhai sy’n cysgu yn cysgu yn y nos, a’r rhai sy’n meddwi yn meddwi yn y nos.
8 Ond y ni sy’n perthyn i’r dydd, gadewch inni gadw ein pennau a rhoi amdanon ni’r arfogaeth o ffydd a chariad sy’n amddiffyn y fron a’r helmed o obaith am achubiaeth
9 oherwydd bod Duw wedi ein dewis ni, nid i brofi ei ddicter, ond i gael achubiaeth drwy ein Harglwydd Iesu Grist.
10 Gwnaeth ef farw droston ni er mwyn inni allu byw gydag ef, p’run a ydyn ni’n aros yn effro neu’n cysgu.*
11 Felly, daliwch ati i annog* eich gilydd ac i gryfhau eich gilydd,* yn union fel rydych chi’n wir yn gwneud.
12 Nawr frodyr, rydyn ni’n gofyn ichi ddangos parch tuag at y rhai sy’n gweithio’n galed yn eich plith ac sy’n eich arwain yn yr Arglwydd ac sy’n eich cynghori chi;
13 ac i ddangos ystyriaeth arbennig iddyn nhw mewn cariad oherwydd eu gwaith. Byddwch yn heddychlon tuag at eich gilydd.
14 Ar y llaw arall, rydyn ni’n erfyn arnoch chi, frodyr, i rybuddio’r afreolus, i siarad yn gysurlon â’r rhai sy’n isel eu hysbryd,* i gefnogi’r gwan, i fod yn amyneddgar wrth bawb.
15 Gwyliwch na fydd neb yn talu drwg am ddrwg i unrhyw un, ond ceisiwch bob amser yr hyn sy’n dda tuag at eich gilydd a thuag at bawb arall.
16 Byddwch yn llawen bob amser.
17 Gweddïwch yn ddi-baid.
18 Rhowch ddiolch am bopeth. Dyma ewyllys Duw ichi yng Nghrist Iesu.
19 Peidiwch â diffodd tân yr ysbryd.
20 Peidiwch â dirmygu proffwydoliaethau.
21 Gwnewch yn siŵr fod pob peth yn gywir; daliwch yn dynn yn yr hyn sy’n dda.
22 Gwrthodwch bob math o ddrygioni.
23 Rydyn ni’n gweddïo y bydd y Duw sy’n rhoi heddwch yn eich sancteiddio chi’n llwyr. Ac y bydd eich ysbryd a’ch enaid* a’ch corff chi frodyr, sy’n iach ym mhob ffordd, yn aros yn bur yn ystod presenoldeb ein Harglwydd Iesu Grist.
24 Mae’r un sy’n eich galw chi yn ffyddlon, a bydd ef yn sicr yn gwneud hyn.
25 Frodyr, daliwch ati i weddïo droston ni.
26 Cyfarchwch y brodyr i gyd â chusan sanctaidd.
27 Rydw i’n eich rhoi chi o dan orfodaeth yn enw’r Arglwydd i ddarllen y llythyr hwn i’r holl frodyr.
28 Rydw i’n dymuno i garedigrwydd rhyfeddol ein Harglwydd Iesu Grist fod gyda chi.
Troednodiadau
^ Neu “ar fenyw.”
^ Neu “cysgu mewn marwolaeth.”
^ Neu “i gysuro.”
^ Llyth., “adeiladu eich gilydd.”
^ Neu “y rhai sy’n ddigalon.” Llyth., “y rhai o ychydig enaid.”
