Yesu ˗yö mɛn ˗nu ꞊klaŋkë kö ˗dhikodhɛ ˗yö kë waa mɛn ˈˈwɛɛ ˗nu ˗an ꞊zinŋgü. ˈˈKɛɛ ˗dhɛkpɔyi do ˈka, ˗ya ˗pö ˈö bha bɔmɛn ˗nu ˗dhɛ: «ˈYa ˈdho kë ka ˈgü ꞊dhɛ ˗dhi ˈko ˗dhɛ ˗sü ꞊në ˈa nu˗ ˈka ˈˈkpʋngtaamɛ ˗nu ˗dhɛ. ˈMii nu ˗dhi ˈko ˗dhɛ ˗sü ˈka, a ˗nu ˗siödhe ꞊në˗ ˈka; ˗a ˗gɛn ˗mü ꞊dhɛ a ˗nu kö ˈa ˈgügblüdhe ꞊në˗ ˗da ˈnëgɔɔn˗ waa˗ dë ˗a ˗nu ꞊zinng ˈgü, ˈnëdhebhɔ waa˗ dhe ˗a ˗nu ꞊zinng ˈgü, ˈˈɛɛn gbö ˗bha dhebhɔ waa˗ gɔndhe ˗a ˗nu ꞊zinng ˈgü.» (Mat. 10:34, 35) ˈMën Yesu kun ˗a ˈˈpiʋ̈ ˈö˗ pö?

Yesu ˈyaa kun ˗a ˈˈpiʋ̈ kö ˈö ˈkɔdhigümɛn ˗nu ˈˈkan ˈkwëë˗. ˈˈKɛɛ ˗a ˈwɔn ˗kun ˗a ˈˈɲaan ꞊dhɛ ö ˗bha ‹꞊klaŋwo› ˗nu ˗dho nu ˗kankwëëdhe ˈka ˈkɔdhi ˈbha ˗nu ˈgü. ˈDhɛ ˈö ˈˈdhʋ̈, mɛn ˗nu ˈö ˈwo˗ ˈˈpiʋ̈ ˈwo kë Yesu ˗bha gwëëˈˈ ˗nu ˈka, kö ˈwo bɔ ˈˈyi ꞊bhaa, ˗an ˗dua ˗mü kö ˗yö kë ˗an ˈˈɲaan ꞊dhɛ ˈwɔn ˈwo ˗da ˗a ˗ʒian ˗ta bhë, ˈyii ˗dho dhi ˗an ˗bha ˈkɔdhigümɛn ˗nu ꞊gban ˗dhɛ. ˗An ꞊gɔɔn, ˗an ˗bha dhebɔ ɛɛnˈˈ ˗an ˗bha ˈkɔdhigümɛn ˈˈwɛɛ ˈbha ˗nu ˗wa ˗gban ˗an ˗gɔ, ˗klu Yesu ˗bha ꞊klaŋwo ˗nu ˗bha ˗sü ˗dho kë ˗an ˗kɔa ˈˈgbɩɩ˗.

Biblö ˗yö kletiɛn ˗nu ꞊faanmën kö waa ‹mɛ ꞊gban ˈˈpɛpɛ ˗wo kë wo ˈko ˗dhɛ ˗së.› (Wlɔ. 12:18) ˈˈKɛɛ ˈkɔdhi ˈbha ˗nu ˈgü mɛn ˈbha ˗ya kë kletiɛn ˈka, mɛn ˗nu ˈwo to ˗wa ˗gban ˗a ˗gɔ, Yesu ˗bha ꞊klaŋwo ꞊mɔɔn˗ ˗bha ˈö ˗kë ꞊dhɛ «˗dhaa» ˈdhö ˗an ꞊zinŋgü. ꞊Ya kë ꞊dhɛ ˗kɔ bhë ˗a ˈdhö, kö ˈkɔdhi bhë ˗a ˈgümɛn ˗nu ˈö ˈwo ˗gban mɛn ˈö gagade dɔ ˗a ˗gɔ bhë, ˗wa wo ˗de kë ˗a ˈyɔɔ˗ ˗nu ˈka. —Mat. 10:36.

Yesu ˗bha gwëëˈˈ ˗nu ˈö ˗an ˗bha ˈkɔdhigümɛn ˗nu ꞊gban ˈwaa Zoova ˗dhɔkëmɛn ˗nu ˈka, ˗wo ˗bɔ ˈwɔn ˗nu ˈwo ˗an ˗bha Zoova waa Yesu ˗an ˗dhɔ ˗da ˈgüdandhe ˈgü, ˗an ˈgü. ˗A ˈwɔnzuan ˈnën ˗tɔ ˗an ˗mɛn ˗nu ꞊mɔɔn˗ ˗bha ˈwo ˈˈgbɩɩdhɛ ˗wɔ ˗an ˗ta kö ˈwlaan˗ ˗nu ˈö ˈwaa ˗Zlan ˗dhɛ ˗së ˗wo ˗an kë. ˗Ya kë ꞊dhɛ ˗kɔ bhë ˗a ˈdhö, ˈmɛn ˈwo˗ ˈˈpiʋ̈ ˈwo kë ˗a ˗dhɛ ˗së ˗an dua ˗mü kö ˗wo wo ˗kɔ ˈˈyɛ ˗a ˗bha. Yesu ˗ya ˗pö:« Mɛ ˈö˗ dë waa˗ dhe ˗nu ˗dhɔ dho˗ kë kö ˗yö ziö˗ ˈka n ˗ta, kö ˈyaa n ꞊bhlëëgümɛ ˈka.» (Mat. 10:37) Pë ˈö Yesu ˗ya pö bhë ˈyaa ˈnën ˗tɔ ö ˗bha gwëëˈˈ ˈö ö ꞊bhlëëyamɛn ˈka ˗a dua ˗mü kö ˗yö ö bo ö ˗mɛn ˗nu ꞊bhlëëyasü ˈka ˈgbɛ. ˈˈKɛɛ pë ˈö kun ˗a ˗zɔn ˗ni ˈgü ˗an ˗dhɛ ˈyö ˗tɔ ˗kɔ ˈwo dho ˗a kë ˗a ˈka kö pë ˈö ˗wɔn ˈdhö ˈˈgbɩɩ˗ ˗tosɛta ˈgü, ˗wa dɔ. Kwa ˗bha ˈkɔdhigümɛn ˗nu ˈö ˈwaa Zoova ˗dhɔkëmɛn ˗nu ˈka ˗wa ˗gban kwa ˗bha ˗Zlan ˗dhɔkësü ˗gɔ, kwa ˗dho ˗dhɔkë ˗an ˈka ˗kplawo, ˈˈkɛɛ kwa ˗zo ˈti ˗dho bhɔ ꞊dhɛ pë ˈdhɛ˗ ˗wɔn ˈdhö ˈˈgbɩɩ˗, ˈyö ˗tɔ Zoova ˗dhɔ.

ˈYaa za ˈgü ꞊dhɛ kwa ˗bha ˈkɔdhigümɛn ˗nu ˗bha ˗gban kwa ˗gɔ ˗sü ˈö bhë, ˈwɔn ˈˈdhiʋ̈˗ ˗mü. ˈˈKɛɛ Yesu ˗bha gwëëˈˈ ˗nu dua ˈyaa ˗mü kö ˗an ˗zo ˗yö bhɔ ˗wo ˈö˗ pö yö ˗a ˈka. ˗Ya pö: «Mɛ ˈö yaa ö ˗bha ˗gaatalü ˈsü yaa zië n ˈpiö kö yaa˗ ˗ma ˈkun ˗yaan kë ma mɛ ˈka.» (Mat. 10:38, NTBL) ˗A ˗pö ˗kɔ ˈˈwɛɛ ˈgü ˗sü ˈka, Yesu ˗bha gwëëˈˈ ˗nu ˗wo ˗an ˗bha ˈkɔdhigümɛn ˗nu ˗bha ˗gban ˗an ˗gɔ ˗sü ˗yö ꞊dhɛ ˈˈklʋʋbhɔdhe ˈö ˗an dua ˈdhö ˗mü kö ˗wa bun, ˗a ˈdhö. Pë ˈwo˗ ˈˈpiʋ̈ ˈyö ˗tɔ kö wo ˗bha ˈˈtakɔ ˗së ˗wɔn ˈgü, dhiʋ̈ˈˈ ˗nu ö ꞊taabha ˗nu ˈka, wo ˗bha ˈkɔdhigümɛn ˗nu ˗wo wo ˗zotakɔ bho ˈˈgblʋʋ, kö ˗wo Zoova ˗dhɔkë. —1 Piɛ. 3:1, 2.