˗Zlan ˗yö ˈˈkwɛndë Ablaamö ꞊suu ˈgü ˈnën ˗nu ˗lo ˈko ˗ta ˈö ˗an ˗kë ˈˈsɛgɔ do ˈka, ˈö ö ˗bha ˈtɔŋ˗ ˗nu dɔ ˗an ˗ta. ˗A ˈˈsɛgɔ ˈö bhë ˗ya ˗dhɛ “Izraɛdhö.” ˗Yö ˗an ˗kë ˈˈsɛgɔ ˈka ˈˈdhʋ̈ kö ˗wo wo ˗zo ˗kë ˗a ˗dhɔkë ˗kɔ ꞊dede waa˗ ˈˈdhiwo ˈˈpiʋ̈. (Psaume 147:19, 20) ˈDhɛ ˈö kë ˈˈdhʋ̈ ˈˈsɛgɔ ˈˈpɛpɛ ˈgümɛn ꞊mɔɔn˗ ˗bha ˈwo ˈdhuëë˗ ꞊slɔɔ Izraɛdhö ˈsaa˗ ˈgü.​—ˈWunzüdɔdhɛ 22:18 ˗wo pö.

˗Zlan ö ˗kɔ ˗yɛ Izraɛdhö ˈnën ˗nu ˗bha kö ˗wo kë ˗a ˗bha ꞊gbɛkiö ˗nu ˈka. ˗An ˗bha ˗kwɛzlan ˗ya ˗zɔn ꞊dhɛ ˈdhuëë˗ ˗yö ˗Zlan ˗bha ˈtɔŋ˗ ˈkun ˗sü ˈgü. (Deutéronome 4:6) ˈDhɛ ˈö ˈˈdhʋ̈, Izraɛdhömɛn ˗nu ˈsaa˗ ˈgü, ˈˈsɛ ˈˈwɛɛ ˈgümɛn ˗nu ꞊mɔɔn˗ ˗bha kö ˗wo ˗Zlan ꞊dede dɔ.​—Isaïe 43:10, 12 ˗wo pö.

ˈDhɛ ˈwo ꞊ɲɔɔn mü ˈyö ˗Zlan ˗yö ö ˗kɔ bho Izraɛdhömɛn ˗nu˗wɔn ˈgü, ˈyö Zoova ˗yö Kletiɛn ꞊dede ˗nu ˗bha ˈkɔdhi ˗ya ˗an ꞊ʒiaan˗ ˈgü. (Matiö 21:43; 23:37, 38) Izraɛdhömɛn ˗nu ꞊ʒiaan˗ ˈgü ꞊dɛɛ, Kletiɛn ꞊dede ˗nu ꞊wa kë Zoova ˗bha ꞊gbɛkiö ˗nu ˈka.​—Këwɔn ˗nu 15:14, 17 ˗wo pö.

Yesu ˗yö ö ˗bha gwëëˈˈ ˗nu ˗kɔ ˗lo ˈko ˗ta kö ˗wo ˗zlanwopö, kö ˗wo mɛn ˗nu ꞊klaŋ kë ˈˈsɛ ꞊gban ˈˈpɛpɛ ˈgü. (Matiö 10:7, 11; 24:14; 28:19, 20) ˗A ˗zlanwopö ˗yö ˈö bhë, ˗yö kë ˗ni ˈgü ꞊dedewo ˈˈtʋ̈ŋ ˈö yö ˗a ˈgü. Zoova ˗yö mɛn ˈˈmliɲɔn ꞊va ˈwo go ˈˈsɛ ꞊gban ˈˈpɛpɛ ˈgü ˗an ˗lo ˗ni ˈgü ˈkwëëdhö ö ˗dhɔkë ˗kɔ ꞊dede ˈö bhë ˗a ˈgü. ˈÖ˗ ˗bhɔ ˈˈdhʋ̈ ꞊kwɛŋzü, ˗a ˗kë ˈˈdhʋ̈ ˗sü ˗blɛɛsü ˈnën bhë. (˗Dhɛkpaɔ dhia ˈsëëdhɛ 7:9, 10) Kletiɛn ꞊dede ˗nu ˗kɔ ˗yö ˗kɔlokota do ˗bha kö ˗wo wo ˈko ˗nu ꞊faanmën, kö ˗wo wo ˈko ˗nu ˗takun. ˈˈKpɔnŋtaadhɛ ˗todhʋ̈sü ˈgü, pë ˈwo˗ ꞊draan Biblö ˈgü ˗yö do, ˈö ˈwo˗ ꞊trɔɔn ꞊slɔɔ ˗an ˗bha ˗bhɔkwëë ˗nu ˗ta.​—Eblö 10:24, 25 ˗wo pö.

˗Kwɛ 1870 ˈgü, ˈyö Biblö draanmɛn ˗nu kpönën ˈbhaa ˗yö ˗ya gagade ˈö Biblö ˈgü, ˈö mɛn ˗nu ˗zo ˗ya bhɔ˗ ˈka ˗a yi ꞊ya ꞊gwëë bhë, ˈˈdhɛ bho ˗an ˗ta ˗sü ˗bha. ˗Wa ˈgüman ꞊dhɛ Yesu ˗yö Kletiɛn ˗nu ˗lo ˈko ˗ta ˈkɔdhi ˈgü kö ˗wo ˗zlanwopö. ˈDhɛ ˈö ˗kë ˈˈdhʋ̈ ˈyö ˈwo ˗ya ˗Zlan ˗bha ˗Gblüdëdhɛ ˗nɔɔn pö ˗sü ˗bha ˈˈsɛ ˈˈpɛpɛ ˈgü. ˗Wo Zoova ˗bha ꞊Gbɛkiö ˗tɔ ˗ya wo ˗bha ˗kwɛ 1931 ˈgü.​—Këwɔn ˗nu 1:8; 2:1, 4; 5:42 ˗wo pö.

˗Kwɛ ꞊këŋ do ˗blɛɛsü ˈgü, Kletiɛn ˗nu ˗bha ˈkɔdhi ˗nu ˈwo kun ˗pɛn ˗sü ˈka ˈˈsɛ ꞊va ˈgü bhë, ˗wo ˗an ˈˈdhiʋ̈ʒiöwomɛn kpönën ˈö Yesu dɔ ꞊dhɛ ˗Zlan ˗bha ˈkɔdhi ˗gɔ ˈdhö bhë ˗a ˗bha ˈˈdhiʋ̈süsü ꞊trɔɔn ˗slɔɔ. (Këwɔn ˗nu 16:4, 5) ˗Kɔ do ˈö bhë ˗a ˈgü ꞊dɛɛ, Zoova ˗bha ꞊Gbɛkiö ˗nu ˈwo ˈˈkpɔnŋtaadhɛ ˗todhʋ̈sü ˈgü bhë, ˗an ˈˈdhiʋ̈ʒiöwomɛn kpönën, ˈö ˗kë mɛn zii ˗nu ˈö ˗an ˗zo ˗ya ˗gban ˗an ˈka, ˗an ˗bha ˈˈdhiʋ̈süsü ꞊trɔɔn ˗yö. Zoova ˗bha ꞊Gbɛkiö ˗nu ˗bha Betɛlö ˗nu ˈwo ˗wo ˗nu ꞊dhiëëta ˗mü, ˈö ˈwo Biblö ˗draan ˗a ˈgü ˈsëëdhɛ ˗nu yö ˗kë mü, ˈö ˈwo˗ ˗gblü ˗wo ˈö ˗ʒiö ˗wo 600 ˗ta ˗an ˈgü mü bhë, ˗a ˈˈɲan ˗yö ˗an ˈˈdhiʋ̈. ꞊Ya kë ˈˈdhʋ̈, ˈyö ꞊mɔɔn˗ ˗bha kö ˗yö ꞊faanmëndhe ˈö go Biblö ˈgü ˗a nu ˗zlanwokɔ ˗nu ˈwo ˈˈkpɔnŋtaadhɛ ˗todhʋ̈sü ˈgü, ˈö ˈwo ˗ʒiö ˗zlanwokɔ 100.000 ˗ta bhë ˗an ˗dhɛ, kö ˗yö ˈˈdhiʋ̈ sü ˗an ˈka. ˗Zlanwokɔdhi ˈˈpɛpɛ ˈgü, ˗kɔmɔnwɔnbhamɛn ˗nu ˈö ˈwo ˗kë mɛn zii ɛɛnˈˈ ˗maankëmɛn ˗nu ˈka ˗wo mü. ˗Wo wo ˗zoto ˗Zlan ˗bha ˗tuë ˗nu ˈˈpiʋ̈ ˗dhɔkaa ˈgü.​—1 Piɛdhö 5:2, 3 ˗wo pö.

Zoova ˗bha ꞊Gbɛkiö ˗nu ˗wo ˈdho ˗sü ˈka ˈkwëëdhö kö ˗wo nɔɔn˗ ˗së bhë ˗a ˗wɔn blɛɛˈˈ, kö ˗wo mɛn ˗nu ꞊klaŋ kë. Yi ˗zlanwopö ˈkɔ gü ˈkɔ ˈgü ꞊dhɛ bɔmɛn ˗nu ˈdhö. (Këwɔn ˗nu 20:20) ꞊Ya ˈgo mü ˈzü yi Biblö ˗draan mɛn ˗nu ˈö gagade ˗dhɔ ˗yö ˗an ˗kë bhë ˗an ˈˈpiʋ̈. ˈˈKɛɛ Zoova ˗bha ꞊Gbɛkiö ˗nu ˈwaa ˗kɔlokota dosɛnŋ ˈˈkpaan ˈka. Yi Dë ˈö ˗dhɔkaa ˈdhö ˗a ˗gɔ, ˗a ˗bha ˈnën ˗nu ˗mü yi ˈka. Yi ꞊dhegblüzë gɔɔn˗ ˗nu waa˗ dhebɔ ˗nu ˈö ˈwo wo ˗zo ˗kë wo ˈko ˗nu ˈˈpiʋ̈ ˗an ˈka. (2 Tesadhonikö 1:3) ˈDhɛ ˈö ˗kë ꞊dhɛ Zoova ˗bha ꞊Gbɛkiö ˗nu ˗wo ˈdho ˗sü ˈka ˈkwëëdhö kö ˗wo kë ˗Zlan ˗dhɛ ˗së, kö ˗wo mɛn ˈˈwɛɛ ˗nu ˗takun bhë, wo ˈnën ˈwo ˗tɔ ˈkɔdhi do ˈgümɛn ˈö zuʋ̈gblüdhi ˈdhö ˗an ˗gɔ ˈˈkpɔnŋtaadhɛ ˗todhʋ̈sü ˈgü.​—Psaume 33:12; Këwɔn ˗nu 20:35 ˗wo pö.