Korona ˈˈtʋ̈ŋ ˈgü, kwa ꞊dhegblü ˗nu ˗wo wo ˗bha ˗zlanwopö ˗kɔ ˗nu ˗bho ˈˈgblʋʋ kö ˗wo nɔɔn˗ ˗së ˈö Biblö ˈgü ˗a pö mɛn ˈˈwɛɛ ˗nu ˗dhɛ. ˈWaa kun ˗zlanwopö ˗ni ˈgü ˈzü ˈˈdhɛɛtadhɛ ˗nu ɛɛnˈˈ ˈkɔ ˈgü ˈkɔ ˈgü. ˗Wo ˗kun wo ˗bha ˗Zlan ˗wo ˈkpiidhɛ pö ˗ni ˈgü telefɔnö ˈˈdhiʋ̈ ɛɛnˈˈ ˗bɔ lɛtrö ˗nu ˗ta ˗sü ˈka. a ˗An ˗bha wo ˈgüdɔgbɩɩsü ˈˈdhia ꞊dede ˗yö ˗mën mɛn ꞊vadhɛ ˈgü, ˈyö Zoova ˗yö ˈdhuëë˗ ˗kpɔ ˗an ˗bha. (Proverbes 16:3, 4) ˈWɔn ˗sɛŋbɔ ˗nu ˈwo bɔ ˗an ˈgü Isölandö ˗sɛ ˈgü, ˗bhö ˗a ˈbha ˗nu ˗ga.

 ˈˈSanni korona zü ˗yö dɔ, Elɛnö ˗kun ˈdho ˗ni ˈgü ˗wo dhebɔnën do ˈbha ˈö gwan ˗bha ˗a ˗dhɛ kö waa˗ ˗nu ˗wo Biblö draanˈˈ ˈˈkwëë. ˈˈKɛɛ dhebɔnën bhë ˈyaa kun ˈˈwɩ ˗ni ˈgü ˗a ˗bha toŋtoŋdhö. ˈKö ˗kë ˈˈdhʋ̈ ˈˈsanni ˈˈsɛgɔdhiʋ̈mɛn ˗nu ˗wa pö mɛn ꞊gban ˈˈpɛpɛ ˗dhɛ ꞊dhɛ ˗wo ˈto ˈkɔɔ korona ˗kosɔn bhë, Elɛnö ˗yö Biblö do waa ˈsëëdhɛ ˗be Biblö ˗ya ˗pö kwa ˗dhɛ ꞊dhɛ? nu ˗a ˗dhɛ ˗a ˗dhɛkpaɔyi ˗totaabhasü ˈka. ˈˈTʋ̈ŋ ˈö mɛn ˈbha ˈyaa kun ꞊mɔɔn˗ ˗ni ˈgü ˗a ˗bha kö ˗yö ˈdho ˗wo mɛn ˈbha ˗dhɛ ˗a ˈka bhë, Elɛnö ˗yö dhebɔnën bhë ˗a ˗dhɛ ˈö Biblö draanˈˈ ˗wɔn ꞊blɛɛ ˗a ˗dhɛ ˈzü, ˈˈkɛɛ ˗ya ˗pö ˗a ˗dhɛ ꞊dhɛ ˗yö ˗dho kë telefɔnö ˈˈdhiʋ̈. Dhebɔnën ˈö bhë ˗yö ˗we ˗a ˗dhɛ ˈö bhë, ˗a ˗bha. ˗Dhɛ ˈö ˗kë ꞊dhɛ pë ˈö kun ˗a draanˈˈ ˗ni ˈgü ˗yö ˗kun ˗a ˗dhɛ ˗së ꞊dedewo bhë, ˗ya ˗pö Elɛnö ˗dhɛ ꞊dhɛ ˗wa draanˈˈ yi ꞊gban ˈˈpɛpɛ ˈka. ˗Yö ˗ya ˗bhɔkwëë ˗nu kë ˗sü ˗bha ˈpö ˈˈdhoogɔ ꞊gban ˈka telefɔnö ˈˈdhiʋ̈. Pë ˈö kun ˗a draanˈˈ ˗ni ˈgü Biblö ˈgü ˗ya ˗ya ꞊bhlëë ˈgü, ˈˈkɛɛ ˗yö ˗ya ˗a ˈwɔn blɛɛˈˈ ˗sü ˗bha ˈpö mɛn ˈˈwɛɛ ˗nu ˗dhɛ.

 Zoova ˗bha ꞊Gbɛkiö ˗nu ˈwo kun ˗zlanwokɔdhi do ˈgü ˗wo ˈsëëdhɛ ˗ya ˈö ˈwo ˗an bɔ ꞊zaŋ ˗nu ˈwo kun ˗an ˗bha ˈˈkwipö ˈgü ˗an ˗dhɛ kö ˈwo ˗an ˈˈnuɛ bho yö ˗së ˈö ˈwo˗ kë ˗ni ˈgü bhë ˗a ˗bha. ˈSëëdhɛ ˗nu ˈwo ˗an bɔ bhë, ˗a ˈwɔn ˗yö ꞊zaŋ ˗nu ˗kun. ˗A mɛn do ˗ya ˗pö Ӡefɛsɔnö ˈö mɛn zii ˈka ˗zlanwokɔdhi do ˈgü ˗a ˗dhɛ ˈö˗ pö: «N ˗maan ˈka ˗be ꞊zaŋ ˗nu ˗dhɔ ˈyaa Zoova ˗bha ꞊Gbɛkiö ˗nu kë ꞊wa.» ˗Dhɛ ˈö˗ pö ˈˈdhʋ̈, Ӡefɛsɔnö ˗ya ˗zɔn ˗a ˗dhɛ ꞊dhɛ ˈyaa gagade ˈka. ˗Dhɛ ˈö ˗kë ꞊dhɛ ˗wo ˗nu ˈwo kun ˈsëëdhɛ ˗nu bhë ˗an ˈgü ˗wo ˗kun ˗së ˈö ˗an ˈˈdhia ˗yö mën ꞊zaŋ ˗nu ˈgü bhë, ˗wo ˗an ˗nënŋ pë ˈbha ˗an ˗bha ꞊zaŋplöödhɛ ˈˈdhiʋ̈. ˗A mɛn do ˗ya ˗pö: «˗Yö ˗dho ꞊mɔɔn˗ ˗bha ˈö mɛn ˈˈwɛɛ ˗nu ˗takun ˈwo yi yö ˗kɔ ˗së ˗kë.»

 Ɛdöna waa Ɛdönalinö ˗wo ˈˈtʋ̈ŋ ꞊gban ˈgü ˗yödhiʋ̈ ˗nu ˈka. b ˗Dhɛ ˈö ˗kë ꞊dhɛ ɛntɛnɛtö ˈyaa ˗an ˗gɔ ˈkɔɔ bhë ˈwaa ꞊mɔɔn˗ ˗bha kö ˗wo ˗zlanwokɔdhi ˗bhɔkwëë ˗nu kë video ˈˈdhiʋ̈. ˗A ˗wɔn ˈgü ˗wo wo ˗yayoo do ˈö ˈyaa Zoova ˗bha ꞊Gbɛkiö ˈka ˗a ˗dhɛ ˈö ˈwo ˗a dhɛɛˈˈ kpɔ ꞊ya kë ꞊dhɛ ˗yö ꞊mɔɔn˗ ˗bha ˈö ö ˗bha wifi ˗gblü ˗an ˈka kö ˗wa ꞊saa bho ˈpö. Dhebɔnën ˈö bhë ˗yö ˗we ˗a ˗bha ˈö˗ pö ˈwa ˈdho pë ˈbha nu. Ɛdöna waa Ɛdönalinö ˗wa ˗dhɛ kö ö ˗bhɔkwëë ˗nu bhë ˗an ˗ga pö, ˈyö ˗yö ˗we ˗a ˗bha. ꞊Dɛɛ dhebɔnën ˈö bhë waa˗ gbö do waa˗ bhaŋnën ˗nu ꞊plɛ ˗wo Biblö draanˈˈ ˗ni ˈgü Zoova ˗bha ꞊Gbɛkiö ˗nu ˈˈpiʋ̈, ˈyö ˗wo ˗dho ˗bhɔkwëë ˗nu ˗ta ˈpö ˈˈdhoogɔ ꞊gban ˈka.

 Zoova ˗bha ꞊Gbɛkiö ˈbha ˗nu ˗wo wo ˗yayoo ˗nu, wo yökëyoo ˗nu waa mɛn ˈˈwɛɛ ˗nu ˗dhɛ ˈˈdhɛɛtadhiaŋ˗ do ˗ta video ˈˈdhiʋ̈. ˗A zübhodhɛ ˈgü, Elɛnö ˈö yö ˗kë ꞊dhɔtrɔɔplöö ˗dhɛ ˈbha ˈgü bhë, ˈyaa kun ˗a ˈˈpiʋ̈ ˈö ö yökëyoo ˗nu ˗dhɛ ˈyö ˗tɔ ˗yö ˗kun ˗a pö ˗ni ˈgü ö ˗de ˗dhɛ ꞊dhɛ ꞊dhɔtrɔɔ ˈbha ˗nu ˈwaa Zoova ˗bha ꞊Gbɛkiö ˗nu yö ˗kɔ ˗së ˗kë. ˈKö ˗kë ˈˈdhʋ̈, ˗yö nɔɔnwo ˗bɔ ö yökëyoo ˗nu ˗dhɛ kö ˈö ˗an ˗dhɛ. ˈˈKɛɛ mɛn ꞊plɛ ˗dhɛ ˗sü ˈˈsuʋ̈ ˗yö ˗da ˗a ˈgü. ˗A mɛn ꞊plɛ ˈwo dhʋ̈ ˗wo ˗kun dhe waa ö ˗gɔn ˗an ˈka. ˗Dhɛ ˈö ö ˗zota ˈö ꞊bhɛɛ ˗a ˗wɔn ˈgü, ˗yö nɔɔnwo ˗bɔ ˗an ˗dhɛ ˈö ˗an ˗dhɛ ˈpö. ˗A dhebɔsü ˗ya ˗yɔ ˗bɔ ˗a ˗gɔ ˈö˗ pö: «˗Dhɛ ˈö ˈˈdhʋ̈ ü˗ ˈˈpiʋ̈ kö ˈa ˗da ka ˗bha ˗zlanwo bhë ˗a ˈgü ˈpö ˗ee?» Elɛnö ˗ya ˗pö ˗a ˗dhɛ ꞊dhɛ mɛn ꞊gban ˈˈpɛpɛ ꞊mɔɔn˗ ˗bha ˈwo nu ˗bhɔkwëë ˗nu ˗ta. ˈWaa Zoova ˗bha ꞊Gbɛkiö ˗nu dosɛnŋ ˗an ˗bhaa ˈka. ˗A ˗dhɛkpaɔyi ˗dhɛ ˈö dɔ ˗a ˈˈpiʋ̈, Elɛnö ˗yö ˗kpan dhe waa ö ˗gɔn ˈwo bhë ˗an ˗bha ˗bhɔkwëë ˗ta kö ˈˈlɛlɛ ˈyii ˗wo ꞊köŋ, ˈyö ˗a ˈwɔn ꞊dede ˗ya ˗kun. Elɛnö ˗ya ˗pö: «ˈˈSanni ˗bhɔkwëë ˗yö ɲën, dhebɔnën bhë ˗yö nɔɔnwo ˗bɔ n ˗dhɛ ˈö˗ pö: ‹N ˗man ˗kë Zoova ˗bha ꞊Gbɛkiö ˗nu ˗bha ˗bhɔkwëë ˗nu ˗ta ˗sü ˗blɛɛsü ꞊nɛɛn. ˗Bhɔkwëë bhë ˗yö ˗kun ˗së. ˗A ˈˈdhia ˗yö ˗mën n ˈgü. Ü ˈˈnuɛ n ˗dhɛ ˗sü ˗bha.›»

 ꞊Dhɔtrɔɔ 20 ˈnën Elɛnö ˗yö ˗an ˗dhɛ ˗bhɔkwëë ˗ta. ˗Dhɛ ˈö˗ man ꞊dhɛ ˗a ˗mɛn 16 ˈnën ˈwo kë ˗a ˗ta bhë, ˗yö ˗kë ˗a ˗dhɛ ˗së ꞊dedewo. ˗Yö ˗ӡiö ˗wo ˈö Pɔdhö ˗ya pö ˗a ˈgü, ˈö˗ pö: «˗A kë ˗sü kö ˈa n ‹˗zʋ ˗gban› kö ˈa ˗Zlan ‹˗bha naɔ ˗së bha˗› pö n yökëyoo ˗nu ˗dhɛ bhë, ˗ya n zuʋ̈ˈˈ ˈˈgblü ˗dhi ꞊dedewo.»—1 Tesadhonikö 2:2.

 Korona ˈˈtʋ̈ŋ ˗yö ˗gbɔɔn mɛn ꞊gban ˈˈpɛpɛ ˗ta. ˈˈKɛɛ Zoova ˗bha ꞊Gbɛkiö ˗nu ˈö ˈwo Isölandö waa ˈˈsɛ ˈˈwɛɛ ˗nu ˈgü ˗wa ˗kë ˈö ˈwo zuʋ̈gblüdhi ꞊slɔɔ, ˈö ˗an ˗bha ˈwɔn yö ˗kɔ ˗nu ˗to ˗së ˗kplawo pë ˈö ˗an ˗kɔ ˗yö ꞊mɔɔn ˗a ˗bha ˗a ˗kë ˗sü ˈka kö ˗wo mɛn ˈˈwɛɛ ˗nu ˗takun, ˗wo ˗an ˗zogban.—Këwɔn ˗nu 20:35.